Tito 2:1-15
2 Ĩndĩ we endeea kũneena maũndũ ala mosanĩte na momanyĩsyo ala maseo.*
2 Atumĩa akũũ nĩmethĩwe na wĩting’o maũndũnĩ onthe, mayosa maũndũ kwa ũito, me kĩlĩko kĩanĩu, me alũmu mũĩkĩĩonĩ, wendonĩ, na wũmĩĩsyonĩ.
3 O ta ũu, iveti ngũũ nĩsyĩthĩwe na kĩkĩo mwĩkalĩlenĩ wasyo, ite nzukani, ite ngombo sya mbinyu mbingĩ, na iyĩthĩwa amanyĩsya ma maũndũ ala maseo,
4 nĩ kana syĩthĩwe itonya kũtaa aka ma mũika mende aũme moo, mende syana syoo,
5 methĩwe na kĩlĩko kĩanĩu, atheu, matethasya wĩa mĩsyĩ kwoo, aseo, menyivĩsye aũme moo, nĩ kana ndeto ya Ngai ndĩkese kũneenewa naĩ.
6 O na ĩngĩ, endeea kũtaa aũme ma mũika methĩwe na kĩlĩko kĩanĩu,
7 na kwa kĩla nzĩa ũyĩthĩwa wĩ ngelekany’o nzeo mekonĩ ala maseo. Manyĩsya maũndũ ala matheu* kwa ũito w’onthe,
8 ũitũmĩa ndeto nzeo* ila itatonya kumanw’a, nĩ kana ala mavĩngaa mekĩĩthw’e nthoni, nũndũ mai na ũndũ mũthũku o na ũmwe matonya kũneena ĩũlũ witũ.
9 Ngombo nĩsyĩnyivĩsye mavwana masyo maũndũnĩ onthe, na iitata kũmendeesya, ite kũmasũngĩla,
10 iteũmoyĩa, na syĩ ndĩkĩĩku vyũ, nĩ kana kwa nzĩa syonthe syanakavye momanyĩsyo ma Ngai, Mũtangĩĩi waitũ.
11 Nĩkwĩthĩwa ũseo mwingĩ wa Ngai nĩwonanĩtw’e, na ũkatuma andũ ma mĩthemba yonthe makwata ũtangĩĩo.
12 Ũseo ũsu nũtũmanyĩasya kũlea maũndũ ala matamwendeeasya Ngai na mawendi ma nthĩ na kwĩkala twĩ na kĩlĩko kĩanĩu na twĩ alũngalu na twĩ na kĩkĩo kya Ngai ĩvindanĩ yĩĩ,*
13 tweteele wĩkwatyo mũseo na kumĩla kwa Ngai waitũ mũnene e na ũtheu mũtisu na kwa Mũtangĩĩi waitũ, Yesũ Klĩsto,
14 ũla weenenganie kwondũ witũ nĩ kana atũthasye kumana na mĩthemba yonthe ya ũtũli wa mĩao na kwĩtheesya andũ methĩwe malĩ yake ya mwanya, na me na kĩthito mekonĩ maseo.
15 Endeea kũneena maũndũ asu na kũtaa na kũkany’a wĩ na ũkũmũ w’onthe. Ndũketĩkĩlye mũndũ o na wĩva aũvũthye.
Maelesyo ma kwongeleela
^ Kana “matethya.”
^ Kana nĩvatonyeka, “Manyĩsya na ũtheu.”
^ Kana “ndeto itethya.”
^ Sisya Maelesyo ma Ndeto.
