Tito 3:1-15
3 Endeea kũmalilikany’a methĩwe menyivĩtye na me ewi kwa silikalĩ na ala me na ũkũmũ, na meyũmbanĩtye kũtethya kĩla wĩa mũseo,
2 matekũneena naĩ ĩũlũ wa mũndũ o na wĩva, mate na ĩteta, ĩndĩ methĩwe mateũkwatĩĩa mũno woni woo, na mavinda onthe mayĩthĩwa me auu kwa andũ onthe.
3 Nũndũ o naitũ mbeenĩ tũyaĩ na ũmanyi, tũyaĩ ewi, nĩtweelelũkĩtw’e, na twaĩ ngombo sya mawendi na motanu me kĩvathũkany’o, na nĩtweekaa maũndũ mathũku na kwĩw’anĩa kĩwĩu, twaĩ andũ matesa kwendeka, na twaĩ na kĩmena katĩ witũ.
4 Ĩndĩ yĩla ũseo wa Ngai, ũla nĩ Mũtangĩĩi waitũ, na wendo wake kwelekela andũ woonaniw’e
5 (ti kwondũ wa maũndũ o na meva malũngalu tweekĩte, ĩndĩ nũndũ wa tei wake), nĩwatũtangĩĩie kwa kũtũthambya, ũndũ ũla watumie twĩthĩwa thayũ, na nĩwatũtw’ĩkĩthisye eũ kwĩsĩla veva mũtheu.
6 Na kwĩsĩla Yesũ Klĩsto, Mũtangĩĩi waitũ, nĩwatũtulũĩle veva ũũ kwa ũlau,*
7 nĩ kana ĩtina wa kũtalĩlwa ũlũngalu kwĩsĩla ũseo wake mwingĩ, tũtonye kwĩthĩwa atiĩwa kwosana na wĩkwatyo wa thayũ wa tene na tene.
8 Ndeto isu nĩ sya kũĩkĩĩka, na nĩenda ũendeee kũkindĩlĩĩla maũndũ asu, nĩ kana ala mamũĩkĩĩie Ngai maendeee kũsũanĩa ĩũlũ wa kwĩthĩwa na meko maseo. Maũndũ asu nĩ maseo na nĩmatethasya andũ.
9 Na ndũkelikye ngananĩonĩ sya ũtumanu na kwĩka ũkunĩkĩli ĩũlũ wa mosyaanĩo na ngusanĩsyo na kaũ ĩũlũ wa ĩla Mĩao, nũndũ maũndũ asu nĩ ma mana na maitethya.
10 Lea mũndũ ũla ũetae mũtilĩkangano, ĩtina wa kũmũkany’a ya mbee na ya kelĩ,
11 ũimanya kana mũndũ ta ũsu nĩwelelũkĩte kuma ĩla nzĩanĩ na aendeee kwĩka naĩ na nĩwĩsilĩle.
12 Yĩla nĩtũma Alitema kana Tikiko kũla ũĩ, wĩtata ũndũ ũtonya wũke Nikovoli kũla nĩĩ, nũndũ kũu nĩkw’o nĩtw’ĩte kwĩkala ĩvindanĩ ya mbevo.
13 Ĩka kyonthe kĩla ũtonya ũtetheesye Nzena, ũla wĩsĩ Mĩao nesa, vamwe na Avolo nĩ kana maikaĩwe nĩ kĩndũ me kyalonĩ.
14 Ĩndĩ eka andũ maitũ memanyĩsye kwĩkaa maũndũ ala maseo nĩ kana matetheesye ala me na vata wa kũtetheew’a na mĩtũkĩ, nĩ kenda maikethĩwe mate na ũsyao.
15 Onthe ala nĩ namo nĩmaũkethya. Ngethesye ala matwendete nthĩnĩ wa mũĩkĩĩo.
Ũseo mwingĩ nĩwĩthĩwe nenyu inyw’onthe.
Maelesyo ma kwongeleela
^ Kana “kwa wingĩ.”
