Vilemona 1:1-25
1 Nyie Vaulo, mwovwa kwondũ wa Klĩsto Yesũ, na Timotheo mwana-a-asa waitũ, kwa Vilemona mwendwa waitũ na mũtethya wa wĩa vamwe naitũ,
2 na Avia mwĩĩtu-a-asa waitũ, na Alikivo mũsikalĩ vamwe naitũ, na kĩkundi kĩla kĩ nyũmba kwaku:
3 Ĩthĩwai na ũseo mwingĩ na mũuo kuma kwa Ngai, ũla nĩwe Ĩthe waitũ, na kuma kwa Mwĩaĩi Yesũ Klĩsto.
4 Kĩla ĩvinda nĩnĩmũtũngĩaa Ngai mũvea yĩla ngũũweta mboyanĩ syakwa,
5 nũndũ kĩla ĩvinda nĩnĩw’aa ĩũlũ wa mũĩkĩĩo waku na ũndũ ũmwendete Mwĩaĩi Yesũ na atheu onthe.
6 Nĩvoya nĩ kana mũamba waku vamwe na ala angĩ mũĩkĩĩonĩ ũtume wĩtĩkĩla kĩla ũndũ mũseo ũla tũkwatĩte kwĩsĩla Klĩsto.
7 Nĩkwĩthĩwa nĩnatanie mũno na nakiakiw’a yĩla neewie ĩũlũ wa wendo waku nũndũ we, mwana-a-asa, nũthangaaĩtye ngoo sya atheu.
8 Na nũndũ wa kĩtumi kĩu, o na kau nĩ na ũthasyo mwingĩ wa kũneena ĩsyĩtwanĩ ya Klĩsto na kũkwĩaĩa wĩke kĩla kyaĩle,
9 nĩona naĩle kũkwĩsũva kwa wendo, nũndũ nyie Vaulo, nĩ mũtumĩa mũkũũ, ĩĩ, na yu nĩ mwovwa kwondũ wa Klĩsto Yesũ.
10 Nĩngũkwĩsũva kwondũ wa mwana wakwa Onesimo, ũla natw’ĩkie ĩthe wake nĩ yela.*
11 Mbeenĩ ndaĩ aũtethya, ĩndĩ yu no aũtethye na akandethya.
12 Nĩngũmũtũma asyoke kwaku, ĩĩ o ũsu, ũla nendete mũno.
13 No nende ekale nakwa vaa nĩ kana anthũkũme ĩvindanĩ yĩĩ nĩ yela kwondũ wa ũvoo mũseo o tondũ we ũtonya kũnthũkũma.
14 Ĩndĩ ndikwenda kwĩka ũndũ o na ũmwe ũtambĩte kwĩtĩkĩla, nĩ kana wĩke ũla ũseo na ngenda, ĩndĩ ti kwa kũthing’ĩĩw’a.
15 Na nĩvatonyeka ũkethĩa akũtiie kwa ĩvinda ĩnini nĩ kana asyoke kwaku tene na tene,
16 ate ngombo, ĩndĩ e mbee wa ngombo, ĩĩ, e mwana-a-asa mwendwa, na mũno mũno kwakwa, ĩndĩ mũno vyũ kwaku, kĩ-mwĩĩ na nthĩnĩ wa Mwĩaĩi.
17 Kwoou ethĩwa ũmbosaa ta mũnyanyau, mũthokye nesa ũndũ ũtonya kũnthokya.
18 O na ĩngĩ, ethĩwa nĩwaũvĩtĩisye, kana ve kĩndũ ũmũtaĩte, ngaĩva.
19 Nyie Vaulo, nĩandĩka na kw’oko kwakwa mwene: Ngaĩva, na nĩwĩsĩ kana o nakwa nĩngũtaĩte thayũ waku mwene.
20 Ĩĩ, mwana-a-asa, nĩngũũkũlya ũndetheesye ũndũnĩ ũũ nthĩnĩ wa Mwĩaĩi; tanĩthya ngoo yakwa nthĩnĩ wa Klĩsto.
21 Ndi na nzika kana nũkũatĩĩa maũndũ ala naũtavya, kwoou nĩkũandĩkĩa nĩsĩ kana nũkwĩka o na mbeange wa maũndũ ala naweta.
22 Ĩndĩ vamwe na ũu, nzeũvĩsye vandũ va kwĩkala, nũndũ nĩ na wĩkwatyo kana, kwondũ wa mboya syenyu, ngatũngwa kwenyu.*
23 Evavila nĩwaũkethya, ũla nĩ mwovwa vamwe nakwa kwondũ wa Klĩsto Yesũ.
24 O na ĩngĩ, nĩwakethw’a nĩ Maliko, Alisitaliko, Ndema, na Luka, atethya ma wĩa vamwe nakwa.
25 Ũseo mwingĩ wa Mwĩaĩi Yesũ Klĩsto nĩwĩthĩwe na veva ũla inyw’ĩ mwonanasya.
