Ди тхыгъэхэм еджэхэм я упщІэхэр
Исайя 60:1 сыт хуэдэ цІыхубз зи гугъу ищІыр икІи «къэтэдж», «къэлыд» жыхуиІэ псалъэхэм сыт къикІыр?
Исайя 60:1 щыжыІащ: «Къэтэдж, цІыхубз, къэлыд, сыт щхьэкІэ жыпІэмэ уэ уи нэхур къэблащ. Иеговэ и щІыхьым уэ уегъэнэху». Контекстым къызэригъэлъагъуэмкІэ, «цІыхубзыр» — ар Сионыращ е Ерусалимыращ (ар а зэманым Иудэ хэкум и къалащхьэт) (Ис. 60:14; 62:1, 2) a. Иеговэ мыбдеж къалэм зэрызыхуигъазэм къикІыр лъэпкъ псом зэрызыхуигъазэращ. Аращи, упщІитІ къохъей. Япэрауэ, дапщэщ икІи дапхуэдэу Ерусалим «къыщытэджар» икІи «къэлыдын» щыщІидзар? ЕтІуанэрауэ, мы пророчествэр нэхъ убгъуауэ ди зэманым гъэзэщІа хъууэ пІэрэ?
Дапщэщ икІи дапхуэдэу Ерусалим «къэтэджу» «къэлыдын» щыщІидзар? Израил цІыхухэр илъэс 70-кІэ Бабилэн гъэрыпІэм щыІащ. А зэманым и кІуэцІым Ерусалими Алыхьым и унэшхуэри зэхэкъутауэ щытт. Ауэ мыдхэмрэ къэжэрхэмрэ Бабилэныр къазэуа иужь журт лъэпкъыр хуит ящІащ я хэкум ягъэзэжу дин пэжыр зэтрагъэувэжыну (Езд. 1:1—4). Ди эрэм ипэ 537 гъэм унагъуэ лъэпкъ 12 щыщ Алыхьым хуэпэжхэр Ерусалим къэкІуащ (Ис. 60:4). Абыхэм Иеговэ къурмэныпхъэхэр къыхуахьын, махуэшхуэхэр ягъэлъэпІэн икІи Алыхьым и унэшхуэр зэтрагъэувэжын щІадзащ (Езд. 3:1—4, 7—11; 6:16—22). Апхуэдэу Иеговэ и щІыхьым Ерусалим къалэр е нэгъуэщІу жыпІэмэ, Алыхьым и лъэпкъыр аргуэру игъэнэхуу щІидзащ. Езы Израил лъэпкъыр Иеговэ зымыцІыху, къэзыухъуреихь лъэпкъхэм нэху яхуэхъуауэ жыпІэ хъунущ.
Ауэ Ерусалим теухуауэ Ешайа итха пророчествэр а зэманым нэгъэсауэ гъэзэщІа хъуакъым. Израил лъэпкъым и нэхъыбэр Алыхьым и жыІэм щІэкІащ (Неем. 13:27; Мал. 1:6—8; 2:13, 14; Мт. 15:7—9). ИужьыІуэкІэ абыхэм Хьисэ Мэссихь ІэщІыб ящІащ (Мт. 27:1, 2). ИкІэм-икІэжым ди эрэм 70 гъэм Ерусалим къалэри абы дэт Алыхьым и унэшхуэри етІуанэу зэтракъутащ.
Апхуэдэу къызэрыхъунур Иеговэ жиІауэ щытат (Дан. 9:24—27). Абы къокІ Исайя 60 псалъащхьэм ит пророчествэр пасэрей зэманым щыІа Ерусалим къалэмкІэ нэгъэсауэ гъэзэщІа хъуну Иеговэ и мураду зэрыщымытар.
Мы пророчествэр нэхъ убгъуауэ ди зэманым гъэзэщІа хъууэ пІэрэ? Мэхъу. Ауэ ар зэпхар «уафэм щыІэ Ерусалимыращ». Ар Библием цІыхубзым ирегъэщхь. Апостол Паул абы теухуауэ жиІащ: «Ар дэ псоми анэ къытхуохъу» (Гал. 4:26). Уафэм щыІэ Ерусалимыр — ар уафэм щыІэ Иеговэ и организацэращ икІи абы хохьэ Алыхьым хуэпэж мелыІычхэр. А цІыхубзым и бынхэр — ар Хьисэрэ уафэм кІуэну гугъэ зиІэ 144 000-рэ хъу цІыхухэращ. Ахэри Паул хуэдэу уафэм щыпсэунущ. Уафэм кІуэну гугъэ зиІэхэр — ар «лъэпкъ лъапІэщ», «Тхьэм и израил цІыхущ» (1 Пет. 2:9; Гал. 6:16).
Дапхуэдэу уафэм щыІэ Ерусалимыр «къызэрытэджар», «къэлыдыни» зэрыщІидзар? «Къэтэджу» «къэлыдын» щІэзыдзар абы и бынхэращ, нэгъуэщІу жыпІэмэ, уафэм кІуэну гугъэ зиІэ щІылъэм щыпсэухэращ. Абыхэм къащыщІамрэ Исайя 60 псалъащхьэм итымрэ зэдгъэпщэнщ.
Уафэм кІуэну гугъэ зиІэхэр «къэтэджын» щІыхуейр сыту пІэрэт? Ди эрэм II лІэщІыгъуэм Алыхьым епцІыжахэр удзыжьым хуэдэу заубгъуу зэрыщІадзам къыхэкІкІэ уафэм кІуэну гугъэ зиІэхэр духовнэ кІыфІыгъэм хэхуащ (Мт. 13:37—43). Апхуэдэу ахэр Бабилэнышхуэм — дунейпсо дин нэпцІым и гъэрыпІэм ихуащ. Ахэр «мы дунейм и кІэухым» нэсыху а гъэрыпІэм щыІащ (Мт. 13:39, 40). «Мы дунейм и кІэух» жыхуаІэр щыщІидзар 1914 гъэращ. 1919 гъэм уафэм кІуэну гугъэ зиІэхэр Бабилэнышхуэм и гъэрыпІэм къикІыжри занщІэу «лыду», нэгъуэщІу жыпІэмэ, Пащтыхьыгъуэм теухуа хъыбарыфІыр жыджэру ягъэІуу щІадзащ b. А зэманым къыщыщІэдзауэ лъэпкъ псоми къыхэкІ цІыхухэр а нэхугъэм хуокІуэ. Абыхэм яхэтщ Исайя 60:3 зи гугъу ищІ «пащтыхьхэр» — ахэр уафэм кІуэну гугъэ зиІэхэращ (Апок. 5:9, 10).
КъэкІуэну зэманым уафэм кІуэну гугъэ зиІэхэм Алыхьым и нэхур нэхъыбэжу къыттрагъэпсэнущ. Помазанникхэр псори уафэм кІуа иужь, ахэр «ЕрусалимыщІэ» е Мэссихь и нысащІэ хъунущ. НысащІэ хъужыр 144 000 хъу пащтыхьхэмрэ дин пашэхэмрэщ (Апок. 14:1; 21:1, 2, 24; 22:3—5).
Исайя 60:1 ит пророчествэр нэхъыбэу зытеухуар ЕрусалимыщІэращ. (Исайя 60:1, 3, 5, 11, 19, 20 итыр Апокалипсис 21:2, 9—11, 22—26 итым евгъапщэ.) Пасэрей Израилым и пащтыхьхэр Ерусалим къалэм щытепщэу зэрыщытам хуэдэу Мэссихьрэ ЕрусалимыщІэмрэ дунеищІэм щытепщэу щытынущ. «ЕрусалимыщІэр Тхьэм деж къикІыу, уафэм къох» жыхуиІэм къикІыр сыт? Абы къокІ помазанникхэм я нэІэ цІыхухэм зэрытрагъэтынур. Алыхьым пщІэшхуэ хуэзыщІ цІыхухэр ЕрусалимыщІэм «и нэхум щызекІуэнущ». Уеблэмэ, а цІыхухэр гуэныхьымрэ лІэныгъэмрэ къаІэщІэкІынущ (Апок. 21:3, 4, 24). А псом и фІыгъэкІэ Ешайарэ нэгъуэщІ бегъымбархэмрэ къызэрыжаІам хуэдэу «Тхьэм псори тэмэму зэтригъэувэжынущ» (Апост. 3:21). Хьисэ пащтыхьу щытеуваращ псори зэтригъэувэжу щыщІидзар икІи ар щынигъэсынур илъэс минкІэ екІуэкІыну и тепщэныгъэм и кІэм дежщ.
a Языныкъуэ Библиехэм Исайя 60:1 ит псалъэхэр зыхуэгъэзар «Сионыращ» е «Ерусалимыращ». НтІэ, «ДунеищІэ» жаІэу зэрадзэкІа Библием а едзыгъуэм «цІыхубз» псалъэр сыт къыщІагъэсэбэпар? Ар къыщІагъэсэбэпар «къэтэдж», «лыд», «уэ» — журтыбзэ псалъэхэр «женский род» жыхуаІэм итщи аращ.
b 1919 гъэм Алыхьым дин пэжыр зэрызэтригъэувэжам иджыри топсэлъыхь Иезекииль 37:1—14, Апокалипсис 11:7—12 едзыгъуэхэр. Иезекииль къыжиІащ уафэм кІуэну гугъэ зиІэхэр зэман куэдкІэ гъэрыпІэм щыІа иужь дин пэжыр зэрызэтеувэжынур. Апокалипсис тхылъым ит пророчествэми къегъэлъагъуэ уафэм кІуэну гугъэ зиІэхэм щыщ гуп цІыкІу къэунэхужын зэрыхуеяр, Алыхьым и лъэпкъым иригъэкІуэкІ лэжьыгъэм и нэІэ адэкІи тригъэтын щхьэкІэ. А гуп цІыкІур захуагъэ хэмылъу лъэхъуэщым ирагъэтІысхьэри, зэман кІэщІкІэ Алыхьым и Іуэхур къэувыІат, ауэ иужькІэ ахэр къэпсэужауэ жыпІэ хъунущ. 1919 гъэм Хьисэ ахэр «узыщыгугъ хъун унэІуту» къыхихащ (Мт. 24:45; «Чистое поклонение Иегове восстановлено!» жыхуиІэ тхылъым и 118 напэкІуэцІым феплъ).
