1. Иеговэ и лэжьакІуэ языныкъуэхэр сыт хуэдэ гурыщІэхэм ебэнрэ?

 ДЭ ШЭЧ лъэпкъ къытетхьэкъым Иеговэ и лъэпкъымкІэ арэзыуэ зэрыщытым. Библием щыжыІащ: «Иеговэ и лъэпкъым щеплъкІэ мэгуфІэ» (Пс. 149:4). Ауэ иныкъуэхэм деж къуэшым е шыпхъум и лъэр щІэхуу: «Иеговэ сэркІэ арэзыуэ пІэрэ?» — жиІэу егупсысыфынущ. Алыхьым пэжу хуэлэжьа, ауэ апхуэдэ гупсысэхэм ебэна цІыху куэдым Библием и гугъу ещІыж (1 Сам. 1:6—10; Иов 29:2, 4; Пс. 51:11).

2. Иеговэ арэзыуэ къытхущытын щхьэкІэ сыт дэ тщІэн хуейр?

² Библием гурыІуэгъуэу итщ гуэныхь зыхэлъ цІыхухэм Иеговэ арэзы зэрахуэхъуфынур. Сыт абы щхьэкІэ тщІэн хуейр? Дэ Хьисэ МэссихькІэ фІэщхъуныгъэ зэдгъэгъуэту псым зыщІэдгъэуэн хуейщ (Ин. 3:16). АбыкІэ дэ къэдгъэлъэгъуэнущ ди гуэныхьхэм дызэрыхущІегъуэжар икІи Алыхьым и Іэмырыр дгъэзэщІэну абы псалъэ зэреттар (Апост. 2:38; 3:19). Иеговэ и гуапэщ абы ныбжьэгъу дыхуэхъун щхьэкІэ апхуэдэ лъэбакъуэхэр щытчым деж. Иеговэ етта псалъэм дыщытетым деж ар къытхуэарэзыщ икІи ныбжьэгъу лъапІэу абы делъытэ (Пс. 25:14).

3. Сыт хуэдэ упщІищ зэпкърытхыну?

³ Сыт-тІэ языныкъуэхэм Иеговэ къахуэмыарэзыуэ къащІыщыхъур? Иеговэ къызэрытхуэарэзыр дапхуэдэу къызэригъэлъагъуэр? Ар къызэрытхуэарэзым щыхьэт техъуэ сыт хуэдэ Іуэхугъуэхэр щыІэ?

СЫТ ЯЗЫНЫКЪУЭХЭМ ИЕГОВЭ КЪАХУЭМЫАРЭЗЫУЭ КЪАЩІЫЩЫХЪУР?

4, 5. Мыхьэнэншэу зыкъэзылъытэж цІыхум гупсэхугъуэ къезытыфынур сыт?

⁴ Дэ тщыщ языныкъуэхэм зэрыцІыкІу лъандэрэ мыхьэнэншэу закъыщохъуж (Пс. 88:15). Ди къуэш Адриа́н жеІэ: «Сэ сымыхьэнэншэу, зыкІи сымысэбэпу сыт щыгъуи къысщыхъут. СыщыцІыкІум Иеговэ селъэІут си унагъуэм щыщхэр жэнэтым щигъэпсэуну. Ауэ сэ езыр жэнэтым сыщыпсэуну схуэмыфащэу  си гугъэт». Зи адэ-анэр Иеговэ и Щыхьэту щымыт То́ни къыддогуашэ: «Си адэ-анэм сэ зэи къызжаІэтэкъым фІыуэ сыкъалъагъуу икІи къысхуэарэзыуэ. Сыт сымыщІэми яфІэмащІэт — ахэр зэи арэзы пхуэщІынутэкъым».

⁵ Дэ мыхьэнэ димыІэу къыщытщыхъум деж Іэмал имыІэу дигу къэдгъэкІыжын хуейщ езы Иеговэ дызэрызришэлІар (Ин. 6:44). Дэ тхэлъ фІыр дымылъагъуми ар абы елъагъу, ди гум илъри ещІэ (1 Сам. 16:7; 2 Лет. 6:30). Аращи, Иеговэ фІыуэ дыкъилъагъуу щыжиІэкІэ, абы шэч къыщІытетхьэн щыІэкъым (1 Ин. 3:19, 20).

6. Япэм ищІа гуэныхьхэм щхьэкІэ апостол Паул сыт хуэдэ гурыщІэхэр иІа?

⁶ Пэжыр къащІэн ипэ языныкъуэхэм ящІа Іуэхухэм щхьэкІэ иджыри къыздэсым я напэр къоныкъуэкъу (1 Пет. 4:3). Иеговэ и лэжьакІуэ пэжхэри я гуэныхь щэныжьым щебэнын хуей къохъу. Уэ-щэ? Уи гум ущигъэкъуаншэ къэхъурэ? Апхуэдэу щытмэ, уэ гупсэхугъуэ къыуитынущ уи гурыщІэхэм хуэдэ Иеговэ и лэжьакІуэ пэжхэми зэраІам. Псалъэм папщІэ, апостол Паул: «Сыту сыцІыху тхьэмыщкІэ!» — жиІэурэ и щыуагъэхэм щхьэкІэ игу зэбгъэжт (Рим 7:24). Пэжщ, Паул и гуэныхьхэм хущІегъуэжри псым зыщІигъэуауэ щытащ. Ауэ абы «апостолхэм ящыщу нэхъ цІыкІуу» икІи гуэныхьщІакІуэхэм япэ иту зыкъилъытэжт (1 Кор. 15:9; 1 Тим. 1:15).

7. Гуэныхь тщІауэ щытмэ, сыт зыщыдгъэгъупщэн хуэмейр?

⁷ Уафэм щыІэ ди Адэ лъапІэм дыкъегъэгугъэ ди гуэныхьхэм дыхущІегъуэжмэ, къытхуигъэгъуну (Пс. 86:5). Аращи, ди гум къыбгъэдэкІыу ди гуэныхьхэм дыхущІегъуэжамэ, Иеговэ къызэрытхуигъэгъунур ди фІэщ тщІын хуейщ. Иеговэ къытхуигъэгъуну щыжиІакІэ къытхуигъэгъунущ (Кол. 2:13).

8, 9. ТхузэфІэкІыу хъуар Иеговэ хуэдмыщІэфу ди гугъэмэ, а гупсысэм дапхуэдэу дызэрыпэлъэщынур?

⁸ Дэ псори дыхуейщ тхузэфІэкІыу хъуар Иеговэ хуэтщІэну. Ауэ языныкъуэхэм ящІэр яфІэмащІэщ икІи Иеговэ зэи къахуэмыарэзыну къащохъу. Ди шыпхъу Ама́ндэ къыддогуашэ: «Сэ къысщохъу нэхъыфІу уиІэр Иеговэ ептыным къикІыр — абы хуэпщІэм хэбгъахъуэу укІуэн хуейуэ арауэ. Иныкъуэхэм деж сщІэфыным нэхърэ нэхъыбэ зыхузогъэувыж. Ар щысхузэфІэмыкІым деж сэ си гур зобгъэж, Иегови къысхуэмыарэзыуэ къысщохъу».

⁹ «Иеговэ хуэсщІэр мащІэщ», — жытІэу дегупсысмэ, дапхуэдэу а гупсысэм дызэрытекІуэфынур? Зыщумыгъэгъупщэ: Иеговэ Алыхь пхъашэкъым, тхузэфІэмыкІыни къытхуигъэувкъым. Дэ тхузэфІэкІыр щытщІэм деж, ар мэгуфІэ. Уигу къэгъэкІыж я къарум щымысхьу Иеговэ хуэлэжьа цІыхухэм я щапхъэхэр. Псалъэм папщІэ, Паул хузэфІэкІыу хъуар ищІэу илъэс куэдкІэ Алыхьым хуэлэжьащ. Абы километр мин куэд къызэхикІухьащ, зэхуэс куэди иухуащ. Ауэ иныкъуэхэм деж абы и Іуэхум зихъуэжти, япэм ищІам хуэдиз хуэщІэжтэкъым. НтІэ, абы къигъэлъагъуэрэт Иеговэ Паул афІэкІа хуэмыарэзыуэ? Хьэуэ. Паул хузэфІэкІыу хъуар ищІэти Алыхьым и нэфІ къыщыхуэт (Апост. 28:30, 31). Апхуэдэу дэри ди Іуэхум зихъуэжу Иеговэ япэм хуэтщІэу щытам хуэдиз хуэдмыщІэжыфынкІэ хъунущ. Иеговэ дежкІэ нэхъапэр дэ тщІэм и куэдагъыракъым, атІэ ар щІэтщІэм и щхьэусыгъуэращ. Иеговэ къызэрытхуэарэзыр дапхуэдэу къигъэлъагъуэми иджыпсту деплъынщ.

ИЕГОВЭ КЪЫЗЭРЫТХУЭАРЭЗЫР ДАПХУЭДЭУ КЪЫЗЭРИГЪЭЛЪАГЪУЭР?

10. Иеговэ арэзы къызэрытхуэхъур дапхуэдэу «зэрызэхэтхыфынур»? (Иуан 16:27).

¹⁰ БиблиемкІэ. Иеговэ ифІэфІщ и лэжьакІуэхэм яжриІэну ахэр фІыуэ зэрилъагъур икІи лъапІэу зэрилъытэр. Библием тІэунейрэ ущрохьэлІэ Иеговэ Хьисэ теухуауэ: «Мыращ сэ фІыуэ слъагъу си Къуэ щІасэу си гум  ирихьыр», — жиІэу (Мт. 3:17; 17:5). Уэр щхьэкІи апхуэдэ псалъэ гуапэхэр Иеговэ жиІэну ухуейт? Нобэ Иеговэ уафэм къиІукІыу къыдэпсалъэкъым. Ар дэ БиблиемкІэщ къызэрыдэпсалъэр. Дэ Иеговэ арэзы къызэрытхуэхъур «зэхэтхыфынущ» Хьисэ и псалъэхэм дыщеджэкІэ. (Къеджэ Иуан 16:27.) Хьисэ нэгъэсауэ и Адэм и хьэл-щэнхэр сыт щыгъуи игъэлъагъуэт. Абы и лъэужь ирикІуэхэм гуэныхь яхэлъми, ахэр Иеговэ пэжу хуэлажьэт икІи Хьисэ абыхэм ящытхъут. Аращи, Хьисэ и лъэужь ирикІуэхэм яжриІэу щыта псалъэхэм дыщеджэкІэ, дэри а псалъэхэр Иеговэ къыджиІэу ди нэгу къыщІэдгъэхьэ хъунущ (Ин. 15:9, 15).

11. ГъэунэхуапІэ дыщиІэм деж Иеговэ и щІыб къытхуигъэзауэ жыпІэ щІэмыхъунур сыт? (Екъуб 1:12).

¹¹ Дызыхуэныкъуэр къызэрыдитымкІэ. Иеговэ сыт щыгъуи дэІэпыкъуэгъу къытхуохъу. Псалъэм папщІэ, дыпсэун щхьэкІэ дызыхуэныкъуэр къыдет. Ауэ абы гугъуехь псоми дыщихъумэкъым, икІи, Іэиуб хуэдэу, дэри гъэунэхуапІэ дыпэщІэхуэфынущ (Иов 1:8—11). ГъэунэхуапІэ дызэриІэм къикІкъым Иеговэ и щІыб къытхуигъэзауэ. ГъэунэхуапІэм дэ Іэмал къыдет Иеговэ фІыщэу зэрытлъагъур икІи дзыхь зэрыхуэтщІыр къэдгъэлъэгъуэну. (Къеджэ Екъуб 1:12.) Абы нэмыщІ гугъуехь дыщиІэм деж Иеговэ нэгъуэщІ лъэныкъуэкІэ къэтцІыхуфынущ. Дэ къэтлъагъунущ ар гъэунэхуапІэм и кІэм нэс щІэгъэкъуэн къызэрытхуэхъур икІи дзыхь зыхуэпщІ хъун, лъагъуныгъэшхуэ зыхэлъ Алыхьу зэрыщытыр.

12. Дмитрий и гъащІэм къыщыхъуам сытым дыхуигъасэрэ?

¹² Ди къуэш Дмитрий и гъащІэм къыщыхъуам деплъынщ. Зэгуэр абы и лэжьапІэр фІэкІуэдри, нэгъуэщІ лэжьапІэ куэдрэ къилъыхъуащ. Иеговэ дзыхь зэрыхуищІыр къигъэлъэгъуэн щхьэкІэ Дмитрий мурад ищІащ абы нэхъыбэу хуэлэжьэну. Мазэ бжыгъэ дэкІащ, ауэ абы лэжьапІэ игъуэттэкъым. ИужькІэ Дмитрий сымаджэ хьэлъэ хъури пІэм хэгъуэлъхьащ. Абы къыхэкІкІэ ар егупсыст унагъуэм щиІэ къалэнхэр хуэмыгъэзащІэу икІи Иеговэ къыхуэмыарэзыуэ. Зы пщыхьэщхьэ гуэрым абы ипхъу цІыкІур къыщІыхьэри тхылъымпІэ напэ къритащ. А тхылъымпІэм Исайя 30:15 ит псалъэхэр тетхат: «ЗэпІэзэрыту фыкъанэмэ икІи дзыхь къысхуэфщІмэ, къару фиІэнущ». Абы а тхылъымпІэр пІэм и бгъум деж игъэтІылъри жиІащ: «Папэ, ущынэщхъейм деж мы псалъэхэр уигу къэгъэкІыж». Дмитрий къыгурыІуащ и унагъуэм Иеговэ и нэІэ зэрытригъэтыр, сыт щхьэкІэ жыпІэмэ шхыни, щыгъыни, зыщІэсыни абыхэм  яІэт. Абы игу къегъэкІыж: «Сэ сымыгужьейуэ Иеговэ дзыхь хуэсщІын хуейуэ арат». Уэри апхуэдэ Іуэхугъуэ уитмэ, Иеговэ дзыхь хуэщІ. Абы Іэмал имыІэу къару къыуитынущ.

13. Иеговэ къызэрытхуэарэзыр дигъэлъагъун щхьэкІэ хэт икІи дапхуэдэу къызэригъэсэбэпыфынур?

¹³ Къуэш, шыпхъухэмкІэ. Иеговэ къызэрытхуэарэзыр ди къуэш, ди шыпхъухэмкІэ къегъэлъагъуэ. Псалъэм папщІэ, Иеговэ абыхэм ящыщ гуэр хуигъэушыфынущ игъуэу псалъэ гуапэхэр къыджиІэну. Азием щыпсэу ди зы шыпхъур гугъуехьышхуэ щыпэщІэхуам, къуэш, шыпхъухэмкІэ Иеговэ къызэрыдэІэпыкъур зыхищІащ. Абы и лэжьапІэр фІэкІуэдри сымаджэ хьэлъэ хъуащ. ИужькІэ и щхьэгъусэм гуэныхь хьэлъэ ищІэри, пщІэ зыпылъ къалэнхэр фІэкІуэдащ. «А псор къыщІысщыщІыр сэ къызгурыІуэтэкъым, — жеІэ абы. — Щыуагъэ гуэр сщІауэ Иеговэ и нэфІ къысщымыхуэжу арауэ пІэрэ?» Ди шыпхъур абы хуабжьу елъэІут: «Иеговэ, укъызэрысхуэарэзыр кхъыІэ сыгъэлъагъу» жиІэурэ. Дапхуэдэу Иеговэ абы жэуап зэрыритар? Абы жеІэ: «Зэхуэсым и нэхъыжьхэм гупсэхугъуэ къызатащ, Иеговэ фІыуэ сыкъызэрилъагъури зыхызагъэщІащ». Зэман дэкІа иужьи, Иеговэ къыдэІэпыкъуным а шыпхъур иджыри хуэныкъуэти, абы тхьэлъэІукІэ зыхуигъэзащ. Ар къыддогуашэ: «А махуэ дыдэм зэхуэсым щыщ дэлъху, шыпхъухэм я письмо къысІэрыхьащ. Абыхэм я псалъэ гуапэхэм сыкъыщеджэм сэ къызгурыІуащ Иеговэ сызэрызэхихар». Мы Іуэхугъуэм къегъэлъагъуэ Иеговэ къызэрытхуэарэзыр щІэх-щІэхыурэ нэгъуэщІхэм я псалъэ гуапэхэмкІэ зэрыдигъэлъагъур (Пс. 10:17).

14. Иеговэ къызэрытхуэарэзыр дапхуэдэу иджыри зэрыдигъэлъагъур?

¹⁴ Иеговэ къызэрытхуэарэзыр дапхуэдэу иджыри зэрыдигъэлъагъур? Дыщыхуэныкъуэм деж абы ди къуэш, ди шыпхъухэм щыщ гуэр хуигъэушыфынущ чэнджэщ къыдатыну.  Псалъэм папщІэ, япэ лІэщІыгъуэм Иеговэ апостол Паул хуигъэушащ письмо 14 къуэш, шыпхъухэм яхуитхыну. А письмохэмкІэ Паул щабэу, ауэ къехьэкІ-нехьэкІ имыІэу абыхэм чэнджэщхэр яритащ. Сытыт Иеговэ Паул ар ищІэну щІыхуигъэушар? Иеговэ — АдэфІщ икІи лъагъуныгъэм къыхэкІыу и бынхэм я щыуагъэхэр ярегъэлъагъуж (Прит. 3:11, 12, Гъэсэпэтхыдэхэр). Аращи, Библием тегъэщІауэ чэнджэщ къыщыдатым деж дэ дыгуфІэн хуейуэ аращ, сыт щхьэкІэ жыпІэмэ абы къегъэлъагъуэ Иеговэ къызэрытхуэарэзыр (Евр. 12:6). Ар къызэрытхуэарэзым щыхьэт техъуэ сыт хуэдэ Іуэхугъуэхэр иджыри щыІэ?

ИЕГОВЭ КЪЫЗЭРЫТХУЭАРЭЗЫМ ЩЫХЬЭТ ТЕХЪУЭ НЭГЪУЭЩІ ІУЭХУГЪУЭХЭР

15. Иеговэ и къару лъапІэр къызэрыдитыр сытым щыхьэт техъуэрэ?

¹⁵ Иеговэ зыхуэарэзыхэм и къару лъапІэр ярет (Мт. 12:18). А къару лъапІэр къыддоІэпыкъу хьэл-щэн дахэхэр зыхэтлъхьэну. Дэ мыпхуэдэу дызэупщІыж хъунущ: «А хьэл-щэнхэм щыщу сыт хуэдэхэра сэ згъэлъагъуэр?» Псалъэм папщІэ, дэ мыпхуэдэу дегупсыс хъунущ: «Пэжыр къыщысщІамрэ иджыпстурэ зэзгъапщэмэ, шыІэныгъэ нэхъ згъэлъагъуэу сыхъуауэ пІэрэ?» Алыхьым и къару лъапІэм къыбгъэдэкІ хьэл-щэнхэр нэхъыбэу бгъэлъэгъуэхукІэ Иеговэ къызэрыпхуэарэзыр уи фІэщ щІэхъун щхьэусыгъуэ нэхъыбэ уиІэ мэхъу. (« Алыхьым и къару лъапІэм къыбгъэдэкІ фІыгъуэхэр» жыхуиІэ рамкэм феплъ.)

16. ХъыбарыфІ гъэІуныр Иеговэ хэт зыхуигъэфэщар икІи абы сыт хуэдэ гурыщІэхэр къыуитрэ? (1 Фессалоникэ 2:4).

¹⁶ Иеговэ зыхуэарэзыхэм хъыбарыфІ гъэІуныр яхуегъэфащэ. (Къеджэ 1 Фессалоникэ 2:4.) Деплъынщ ди шыпхъу Джо́селин хъыбарыфІымкІэ цІыхухэм зэрыдэгуэшар езым сэбэп къызэрыхуэхъуар. Зы пщэдджыжь гуэрым абы гукъыдэж лъэпкъ имыІэу къэушащ. «Сэ къару сиІэтэкъым, зыкІи сымысэбэпуи къысщыхъут, — жеІэ Джоселин. — Ауэ сыпионерт икІи а махуэм хъыбарыфІыр згъэІуну зыгуэрым сыгурыІуакІэт. Арати, Иеговэ лъэІукІэ зыхуэзгъазэри зызгъэхьэзыру щІэздзащ». А пщэдджыжьым Джоселин Мэри зи цІэ цІыхубз гуэрым хуэзэри абы и гъусэу Библие джын щІидзащ. Мазэ зыбжанэ дэкІауэ Мэри мыпхуэдэу жиІащ: «Джоселин си бжэм къыщытеуІуам щыгъуэ, сэ Алыхьым селъэІут къыздэІэпыкъуну». А Іуэхугъуэр Джоселин игу къегъэкІыжри жеІэ: «Сэ къысщыхъут езы Иеговэ „сэ уэ сыпхуэарэзыщ“  къызжиІэу». ДауикІ, хъыбарыфІыр щыдгъэІум деж дызыхуэзэ цІыхухэр апхуэдэ защІэу щытынукъым. Ауэ ди гум къыбгъэдэкІыу хъыбарыфІ гъэІуным дыхэтмэ, Иеговэ къызэрытхуэарэзым шэч къытедмыхьэми хъунущ.

17. Викторие щхьэщэхуж къурмэныпхъэм щегупсысым щыгъуэ сыт къыгурыІуар? (Псалом 5:12).

¹⁷ Иеговэ зыхуэарэзыхэм я гуэныхьхэр щхьэщэхуж къурмэныпхъэм и фІыгъэкІэ яхуегъэгъу (1 Тим. 2:5, 6). Ауэ уэ псым зыщІэбгъэуами, ар къыплъэмыІэсу къыпщыхъункІэ хъунущ. Зыщыдгъэгъупщэнкъым: ди гум дыкъигъэпцІэнкІэ хъунущ, ауэ Иеговэ дыкъигъэпцІэнукъым, абы сыт щыгъуи дзыхь хуэтщІ хъунущ. Щхьэщэхуж къурмэныпхъэр зи фІэщ хъухэр Иеговэ цІыху пэжу къелъытэ икІи и нэфІ абыхэм ящохуэ (къеджэ Псалом 5:12; Рим 3:26). Викторие жиІэжым деплъынщ. Зэгуэр ар Хьисэ и щхьэщэхуж къурмэныпхъэм щегупсысым мыпхуэдэ гупсысэ къыхуэкІуащ: «Иеговэ куэд щІауэ шыІэныгъэ хэлъу къысхущытщ... Сэ абы жесІэ хуэдэт: „Сэ схуэдэ цІыху уэ зэи фІыуэ плъагъуфынукъым. Уи Къуэм къихьа къурмэныпхъэм зэи си гуэныхьхэр ипшыныжыфынукъым“». Ауэ Викторие къыгурыІуащ щхьэщэхуж къурмэныпхъэр тыгъэу Иеговэ абы къызэрыритар. Апхуэдэу Викторие и фІэщ хъуащ Иеговэ ар фІыщэу къызэрилъагъур. Дэри щхьэщэхуж къурмэныпхъэм дегупсысмэ, къэтлъагъунущ Иеговэ фІыщэу дыкъызэрилъагъур икІи къытхуэарэзыуэ зэрыщытыр.

18. Уафэм щыІэ ди Адэр фІыуэ тлъагъумэ, сытым шэч къытедмыхьэми хъуну?

¹⁸ Мы статьям ит чэнджэщхэр къэдгъэсэбэпыну дызэрыхущІэкъум емылъытауэ зэман-зэманкІэрэ ди лъэр щІэхуфынущ икІи Иеговэ къызэрытхуэарэзым шэч къытетхьэфынущ. Апхуэдэм деж зыщумыгъэгъупщэ Иеговэ «езыр фІыуэ зылъагъухэр» лъапІэу зэрилъытэр (Екъуб 1:12). Аращи, адэкІи Иеговэ гъунэгъу зыхуэщІ икІи къызэрыпхуэарэзыр зэрыуигъэлъагъум гу лъытэ. Зэи зыщумыгъэгъупщэ Иеговэ «дэ тщыщ дэтхэнэми зэрыпэмыжыжьэр» (Апост. 17:27).