ПАСЭРЕЙ зэманым Израил цІыхухэм я дежкІэ музыкэм мыхьэнэшхуэ иІэт. Библием щІэх-щІэхыурэ и гугъу ещІ макъамэхэмрэ уэрэдхэмрэ теухуауэ. Тхыгъэ ЛъапІэм и Іыхьэ пщІанэм хуэдизыр — уэрэдщ. Абыхэм щыщу нэхъ цІэрыІуэхэр — Псалмы, Песня Соломона, Плач Иеремии жыхуаІэ тхылъхэращ. Аращи, гъэщІэгъуэнкъым зы тхылъ гуэрым мыпхуэдэу зэрыщыжыІар: «Библием ІупщІу къыхощ музыкэр цІыхухэм я гъащІэм сыт хуэдэ лъэныкъуэкІи хэпщауэ зэрыщытар» a.

Музыкэр цІыхухэм я гъащІэм зэрыхэтар. Израил цІыхухэм музыкэр къагъэсэбэпу я гурыщІэхэр къагъэлъагъуэт (Ис. 30:29). Пащтыхь щытрагъэувэм, текІуэныгъэ къыщахьым, махуэшхуэхэр щагъэлъапІэм деж цІыхубзхэр бубенхэм еуэт, гуфІэу, уэрэд жаІэурэ къафэт (Суд. 11:34; 1 Сам. 18:6, 7; 1 Цар. 1:39, 40). Зыгуэр щылІам деж израил цІыхухэм я гурыщІэхэр гъыбзэ уэрэдкІэ къагъэлъагъуэт (2 Лет. 35:25). Макклинтокрэ Стронгрэ я энциклопедием къыхощ «журтхэм музыкэр хуабжьу яфІэфІу зэрыщытар».

Израилым и пащтыхьхэм музыкэр яфІэфІт. Пащтыхь Щаул Даут къищтат, арфэ къыхуеуэн щхьэкІэ (1 Сам. 16:18, 23). Езы Даут пащтыхь щыхъуам щыгъуэ макъамэ къызэрыкІ Іэмэпсымэхэр къигупсыст, уэрэд дахэхэр зэхилъхьэт икІи оркестр къызэригъэпэщат. А оркестрыр иужькІэ Иеговэ и унэшхуэм щеуэу щытащ (2 Лет. 7:6; Ам. 6:5). Пащтыхь Сэлмэн и унэми уэрэджыІакІуэу цІыхухъуи цІыхубзи щыІэт (Эккл. 2:8).

Музыкэр Алыхьым хуэлэжьэным зэрепхар. Израил цІыхухэр Иеговэ зэрыхуэлажьэм музыкэм мыхьэнэшхуэ зиІэ увыпІэ щиІыгът. ЗэрытщІэмкІэ, Ерусалим дэта Алыхьым и унэшхуэм музыканту щыІахэр цІыху 4 000 хъут (1 Лет. 23:5). Ахэр бжьэмий, кимвал, арфэ, макъамэ къызэрыкІ нэгъуэщІ Іэмэпсымэхэми еуэт (2 Лет. 5:12). Музыкэм хурагъэса закъуэхэратэкъым Иеговэ уэрэдкІэ зыгъэлъапІэу щытар. Абы нэмыщІ Израил цІыхухэм махуэшхуэхэр ягъэлъэпІэну илъэс къэс Ерусалим щыкІуэкІи Иеговэ уэрэдкІэ щІыхь къыхуахьт (Пс. 120—134). Журтыбзэ Іэрытххэм зэритымкІэ, израил цІыхухэм ІутІыж пщыхьэщхьэшхэр щагъэлъапІэкІэ «Псалмы Халлел» b жыхуаІэ уэрэдхэр жаІэт.

Ноби Алыхьым и лэжьакІуэхэм дежкІэ музыкэм мыхьэнэшхуэ иІэщ (Екъуб 5:13). Уэрэдхэр — Иеговэ дызэрыхуэлажьэм и Іыхьэщ (Еф. 5:19). Музыкэм Алыхьым и лэжьакІуэхэр зэкъуэт ещІ (Кол. 3:16). Ар иджыри къыддоІэпыкъу гугъуехьхэм дыпэлъэщыну (Апост. 16:25). Сыту гуфІэгъуэшхуэ музыкэ дызэриІэр! Абы и фІыгъэкІи ди фІэщхъуныгъэри ди лъагъуныгъэри Иеговэ едгъэлъэгъуну Іэмал диІэщ.