Хьисэ и лъэужь ирикІуэ цІыху 70-р Зиусхьэным и Пщыхьэщхьэшхэм щымыІами, абы къикІкъым абыхэм Хьисэ къагъэнауэ. А пщыхьэщхьэм Хьисэ и апостолхэм я гъусэу зэман игъэкІуэну хуейуэ арат.

Апостол 12-ри адрей цІыху 70-ри Хьисэ и лъэужь ирикІуэт. ЯпэщІыкІэ и лъэужь ирикІуэ цІыху гупышхуэм Хьисэ цІыхухъу 12 къыхихри, апостол яфІищащ (Лк. 6:12—16). Хьисэ «и гъуэгу ирикІуэ цІыху пщыкІутІыр» зэхуишэсу цІыхухэр «Тхьэм и Тепщэныгъэшхуэм теухуа хъыбарыфІым ирагъэдэІуэну, сымаджэхэри ягъэхъужыну» щажриІам щыгъуэ, ар Галилей хэкум щыІэт (Лк. 9:1—6). ИужькІэ Иудэ хэкум щыІэу «Зиусхьэным цІыху блыщІ къыхихри... езыр здэкІуэн хуейм мыкІуэ щІыкІэ тІурытІу игъэкІуащ» (Лк. 9:51; 10:1). Апхуэдэу щІыпІэ зэмылІэужьыгъуэхэм цІыхухэр Хьисэ и лъэужь иувэт икІи абы теухуа хъыбарыр нэгъуэщІхэм жраІэт.

Хьисэ и лъэужь иува журтхэм япэм хуэдэу гъэ къэс ІутІыж махуэшхуэр ягъэлъапІэт. Абыхэм а махуэшхуэр я унагъуэм я гъусэу ягъэлъапІэу къыщІэкІынт (Исх. 12:6—11, 17—20). Хьисэ яукІыным куэд имыІэжу апостолхэр и гъусэу Ерусалим къэкІуат. Ауэ абы жиІакъым и лъэужь ирикІуэ псори — Иудэм щыщхэри, Галилей щыщхэри, Перей щыщхэри — Ерусалим къакІуэу, ІутІыж махуэшхуэр зэгъусэу ягъэлъэпІэну. Хьисэ и апостолхэр и гъусэу а пщыхьэщхьэр игъэкІуэну хуеяуэ къыщІэкІынт. Абы жиІащ: «Гугъуехь сшэчынум и пэ къихуэу мы ІутІыж пщыхьэщхьэшхэр фи гъусэу сшхыну гукъыдэжышхуэ сиІащ» (Лк. 22:15).

Хьисэ и апостолхэр и гъусэу а пщыхьэщхьэр игъэкІуэну щІыхуеям щхьэусыгъуэ иІэт. Куэд дэмыкІыу «Тхьэм и къурмэныпхъэ щынэу дунейм и цІыхухэм я гуэныхьхэр ятезыхыжым» хуэдэу ар лІэн хуейт (Ин. 1:29). А Іуэхугъуэр къыщыхъун хуеяр Ерусалим къалэрат. Алыхьым и лэжьакІуэхэм илъэс щэ бжыгъэ куэд хъуауэ а къалэм къурмэнхэр къыщахьт. Израил цІыхухэм ІутІыж махуэшхуэр щагъэлъапІэкІэ щынэм ягу къигъэкІыжт Иеговэ ахэр Мысыр гъэрыпІэм къызэрыришыжар. Ауэ щынэм нэхърэ Хьисэ и къурмэныпхъэм куэдкІэ нэхъ мыхьэнэшхуэ иІэщ — абы цІыхухэр гуэныхьымрэ лІэныгъэмрэ къаІэщІех (1 Кор. 5:7, 8). Хьисэ и щхьэщэхуж къурмэныпхъэм апостолхэм Іэмал яритащ зэхуэсым «лъабжьэ» хуэхъуну (Еф. 2:20—22). ГъэщІэгъуэныращи, Ерусалим къалэшхуэ лъапІэм «и блыным лъабжьэ пщыкІутІ иІэт. А лъабжьэхэм Щынэм и апостол пщыкІутІым я цІэхэр тетхат» (Апок. 21:10—14). Зэрытлъагъущи, Алыхьым и мурадыр гъэзэщІа хъун щхьэкІэ апостолхэм къалэн хэха яІэт. Иужьрей ІутІыж махуэшхуэмрэ Зиусхьэным и Пщыхьэщхьэшхэмрэ Хьисэ щигъэлъапІэм щыгъуэ апостолхэр и гъусэну щІыхуеяр гъэщІэгъуэнкъым.

Пэжщ, Хьисэ и гъэсэн цІыху 70-мрэ адрей и лъэужь ирикІуэхэмрэ а Пщыхьэщхьэшхэм щыІакъым. Ауэ, абы емылъытауэ, абыхэм я дежкІи Пщыхьэщхьэшхэм мыхьэнэшхуэ иІэт. Ахэр Иеговэ хуэпэжу къэнауэ щытмэ, Алыхьым и къару лъапІэр абыхэм ящыхуащ. Абы нэмыщІ Хьисэ а пщыхьэщхьэм апостолхэм ярищІылІа Пащтыхьыгъуэм и зэгурыІуэныгъэм ахэри хыхьащ (Лк. 22:29, 30).