1, 2. 1 Тимофей 6:20 зэритымкІэ, сыт Тимофей дзыхь хуащІар?

 ХЬЭПШЫП лъапІэ тхуахъумэну дэ щІэх-щІэхыурэ нэгъуэщІхэм щетт къохъу. Псалъэм папщІэ, ахъшэ банкым итлъхьэнкІэ хъунущ икІи ар ямыгъэкІуэду яхъумэну дыщогугъ. Зыгуэрым хьэпшып лъапІэ ихъумэну етту щытмэ, абы къегъэлъагъуэ а цІыхум дзыхь зэрыхуэтщІыр.

² Къеджэ 1 Тимофей 6:20. Апостол Паул Тимофей игу къигъэкІыжат лъапІэ гуэр дзыхь къызэрыхуащІар — Алыхьым и мурадым теухуа щІэныгъэ пэжыр, абы нэмыщІ «хъыбарыфІыр цІыхухэм яхуэзыІуатэм и Іуэхур» лэжьыныр (2 Тим. 4:2, 5). Паул Тимофей хуигъэушащ дзыхь къыхуащІар ихъумэну. Ауэ дэ лъапІэу сыт Иеговэ дзыхь къытхуищІар? ИкІи ар лъапІэу сыт тлъытэн щІыхуейр?

3, 4. Библием ит щІэныгъэ пэжхэр лъапІэу сыт жыпІэ щІэхъунур?

³ Иеговэ и Псалъэ Библием ит щІэныгъэ пэжхэр дэ тыгъэу къыдитащ. А щІэныгъэ пэжхэр икъукІэ лъапІэщ, сыт щхьэкІэ жыпІэмэ Алыхьым и ныбжьэгъу дыхъуну къыддоІэпыкъу икІи нэгъэсауэ насыпыфІэ дыхъун щхьэкІэ сыт тщІэн хуейми къыдгурагъаІуэ. Иеговэ и Псалъэм ит щІэныгъэ пэжхэр ди фІэщ хъууэ щытмэ, Алыхьым и Псалъэм темыхуэ щІэныгъэхэм я пщылІ дыхъунукъым икІи Иеговэ илъагъу мыхъур тщІэнукъым (1 Кор. 6:9—11).

⁴ Библием ит щІэныгъэ пэжхэр лъапІэ иджыри зыщІыр — ар Иеговэ «пэжыр къэзыщІэну хуей цІыху» Іэдэбхэм фІэкІа нэгъуэщІхэм къазэрыхузэІуимыхыращ (Апост. 13:48, ДЩІ). Апхуэдэ цІыхухэр зэхэщІыкІ зиІэ, узыщыгугъ хъун унэІутым зыхуригъаджэхэм арэзы тохъуэ (Мт. 11:25; 24:45). А щІэныгъэхэр  дэр-дэру къыдгурыІуэнукъым икІи абыхэм нэхърэ нэхъ лъапІэ щыІэкъым (Прит. 3:13, 15, Гъэсэпэтхыдэхэр).

5. Иеговэ дэ иджыри сыт дзыхь къытхуищІар?

⁵ Иеговэ дэ иджыри зыгуэр дзыхь къытхуищІащ: езым теухуа пэжымрэ и мурадымрэ адрейхэм къедгъэщІэну (Мт. 24:14). Дэ хъыбарыфІ къетхьэкІым уасэ иІэкъым, сыт щхьэкІэ жыпІэмэ ар дэІэпыкъуэгъу мэхъу цІыхухэр Иеговэ и унагъуэм щыщ хъуну икІи а хъыбарым и фІыгъэкІэ абыхэм гъащІэ мыухыжыр къалъысыну Іэмал яІэ мэхъу (1 Тим. 4:16). ХъыбарыфІ гъэІуным дызэрыхэтыр мащІэми куэдми, дэ псом нэхърэ нэхъ мыхьэнэ зиІэ лэжьыгъэм дыхэтщ (1 Тим. 2:3, 4). Алыхьым дызэрыдэлажьэр ди дежкІэ щІыхьышхуэщ! (1 Кор. 3:9).

6. Хьисэ и лъэужь ирикІуэ языныкъуэхэм Алыхьым зэрыдэлажьэр лъапІэу ямылъытэжу зэрыхъуам ахэр сытым хуиша?

⁶ Тимофей и зэманым псэуа Хьисэ и лъэужь ирикІуэ языныкъуэхэм Алыхьым зэрыдэлажьэр лъапІэу ямылъытэжу хъуат. Апхуэдэу Дима́с мы дунейр фІыуэ илъагъури зи гъусэу хъыбарыфІыр игъэІуу щыта Паул къигъэнащ (2 Тим. 4:10). Фиге́ллрэ Ермоге́нрэ хъыбарыфІыр ягъэІун щагъэтауэ къыщІэкІынущ, Паул хуэдэу езыхэри кърахуэкІыну зэрышынам къыхэкІкІэ (2 Тим. 1:15). Имене́й, Александр, Фили́т сымэ Алыхьым епцІыжахэм жаІэр я фІэщ хъури, пэжыр къагъэнащ (1 Тим. 1:19, 20; 2 Тим. 2:16—18). Абыхэм псоми Иеговэ фІыуэ ялъагъуу щытащ, ауэ иужькІэ дзыхь къыхуащІар лъапІэу ямылъытэжу хъуащ.

7. ШейтІаным сыт хуэдэ Іэмалхэр къигъэсэбэпрэ?

⁷ ШейтІаным сыт ищІэр Иеговэ дзыхь къытхуищІар къыдигъэгъэнэн щхьэкІэ? Абы къигъэсэбэп Іэмал языныкъуэхэм дытепсэлъыхьынщ. Телевидениер, интернетыр, фильмхэр, газетхэр, журналхэр, тхылъхэр ШейтІаным къегъэсэбэп пэжыр къэдгъэнэну дыхуэзыгъэушын гупсысэкІэр икІи щытыкІэр къытхипщэн щхьэкІэ. Абы иджыри цІыхухэм къызэрыттракъузэм икІи дыкъызэрырахуэкІым щхьэкІэ дигъэшынэу, хъыбарыфІ гъэІуныр къыдигъэгъэнэну иужь итщ. Абы нэмыщІ пэжым дытришын щхьэкІэ Алыхьым епцІыжахэм къабгъэдэкІ «щІэныгъэ нэпцІыр» абы къегъэсэбэп (1 Тим. 6:20, 21).

8. Дэниел и щапхъэм сытым фыхуигъасэрэ?

⁸ Дэ дымысакъыу щытмэ, пэжыр лъапІэу дымылъытэжу дыхъуфынущ. Ди къуэш Дэ́ниел * и щапхъэр зэпкърытхынщ. Ар видеоджэгухэм дихьэхат. Абы жеІэж: «Сэ илъэсипщІ сыщыхъум видеоджэгу сыджэгуу щІэздзат. ЯпэщІыкІэ абыхэм зыри Іей хэттэкъым. Ауэ хуэм-хуэмурэ лей зехьэнымрэ Іэзэгъуазэмрэ зыхэтхэм сыдихьэхыу щІэздзат». ИкІэм-икІэжым Дэниел махуэ къэс сыхьэт 15 хуэдиз видеоджэгухэм тригъэкІуадэу щІидзащ. Абы  жеІэ: «Сэ къызгурыІуэт: апхуэдэ джэгухэм зэман куэд зэрытезгъэкІуадэм Иеговэрэ сэрэ ди зэхуаку дэлъ зэныбжьэгъугъэр икъутэт. Ауэ си гур пхъашэ хъуат икІи Библием ит принципхэм семыбакъуэу си фІэщ сщІыжат». Нэгу зегъэужьыкІэ къыхэтххэм дэ езым къыдгурымыІуэжурэ пэжыр лъапІэу дымылъытэжу дащІыфынущ икІи Иеговэ дзыхь къытхуищІа лъапІэу щыт Іуэхугъуэхэр тфІэкІуэдынкІэ хъунущ.

9. 1 Тимофей 1:18, 19 зэритымкІэ, Паул Тимофей сытым хуигъэуша?

⁹ Къеджэ 1 Тимофей 1:18, 19. Паул Тимофей хуигъэушат «зауэлІыр фІыуэ зэрызауэм хуэдэу» и Іуэхур илэжьыну. Ауэ дэ дызэзауэр цІыхухэракъым, атІэ Иблисымрэ абы и жин бзаджэхэмрэщ. Дэ зауэлІхэм сыткІэ дырещхь икІи сыт хуэдэ хьэл-щэнхэр зыхэтлъхьэн хуей? Паул къихьа щапхъэм хэтх хъуну дерситху зэпкърытхынщ. А дерсхэр къыддэІэпыкъунущ дзыхь къытхуащІар тхъумэну.

10. Алыхьым дыхуэпэжын щІыхуейр сыт?

¹⁰ Алыхьым фызэрыхуэпэжыным фыхущІэкъу. Зи къалэныр фІыуэ зыгъэзащІэ зауэлІыр зыхуэлажьэм хуэпэжщ. Абы къарууэ иІэр ирехьэлІэ фІыуэ илъагъур икІи лъапІэу илъытэр ихъумэн щхьэкІэ. Паул Тимофей хуигъэушащ Алыхьым хуэпэжын щхьэкІэ къару ирихьэлІэну (1 Тим. 4:7). Алыхьыр фІыуэ тлъагъумэ икІи дыхуэпэжмэ, дзыхь къытхуищІар тхъумэну нэхъ гукъыдэж диІэнущ (1 Тим. 4:8—10; 6:6).

11. Мурад тщІам дытетын щхьэкІэ къару етхьэлІэу зедгъэсэн щІыхуейр сыт?

¹¹ Мурад фщІам фытетын щхьэкІэ къару ефхьэлІэу зевгъасэ. ЗауэлІыр сыт щыгъуи зауэм хуэхьэзыру щытын щхьэкІэ къарууэ иІэр ирихьэлІэу езым зигъэсэн хуейт. Тимофей Алыхьым хуэпэжу щытащ, сыт щхьэкІэ жыпІэмэ Паул и чэнджэщым тету хъуэпсэныгъэ Іейхэм пэщІэтт, Алыхьым ифІэфІ хьэл-щэнхэр зэрызыхилъхьэным иужь итт икІи къуэш, шыпхъухэм яхэтт (2 Тим. 2:22). А псор Тимофей хуэщІэнутэкъым, мурад ищІам тетын щхьэкІэ къару ирихьэлІэу зримыгъасэу щытамэ. Дэри а хьэл-щэным дыхуэныкъуэщ гуэныхьыщІэ щэныжьыр зыщІэхъуэпс Іуэхугъуэхэм дебэнын щхьэкІэ (Рим 7:21—25). А хьэл-щэным иджыри дыхуэныкъуэщ ди «щэныжь бзаджэр» зыхэдну «щэныщІэфІыр фащэу» зэтшэкІын щхьэкІэ (Еф. 4:22, 24). Махуэм икІэм хуабжьу дешауэ зэІущІэм дыкІуэну щымытынш къохъу — абы щыгъуи мурад тщІам дытетын щхьэкІэ къару етхьэлІэу зедгъэсэн хуейщ (Евр. 10:24, 25).

12. Библиер фІыуэ къэдгъэсэбэпу зедгъэсэну сыт къыддэІэпыкъунур?

¹² ЗауэлІым Іэщэр фІыуэ къигъэсэбэпу хъун щхьэкІэ зэмани къаруи тригъэкІуэдэн хуейщ. Абы ещхьу дэри Алыхьым и Псалъэр фІыуэ къэдгъэсэбэпу зедгъэсэн хуейщ (2 Тим. 2:15). АбыкІэ ди зэІущІэхэр къыддэІэпыкъунущ. Ауэ Библием ит пэжхэр лъапІэу зэрыщытыр нэгъуэщІхэм къагурыдгъэІуэну дыхуеймэ, дэ езым Библиер зэрыддж программэ диІэн хуейщ. Алыхьым и Псалъэм ди фІэщхъуныгъэр нэхъ быдэ ищІыфынущ. Абы щхьэкІэ Библием ауэ деджэн хуей закъуэкъым. Библием ит пэжыр тэмэму къыдгурыІуэн щхьэкІэ икІи ар нэгъуэщІхэм къазэрыгурыдгъэІуэнур тщІэн щхьэкІэ дызэджам дегупсысыным икІи ди тхыгъэхэр къэдгъэсэбэпу куууэ зэпкърытхыным мыхьэнэшхуэ иІэщ (1 Тим. 4:13—15). Апхуэдэу тщІэмэ, нэгъуэщІхэр едгъэджэн щхьэкІэ Алыхьым и Псалъэр къэдгъэсэбэпыфынущ. ЦІыхум Библием ит едзыгъуэм дыкъыхуеджэн хуей закъуэкъым, атІэ дэ къыдэдаІуэм дыдэІэпыкъун хуейщ, дыкъызэджам итымрэ ар езым зэрехьэлІамрэ къыгурыІуэну. Дэ езым Библие зэрыддж программэ диІэу, абы дытетмэ, егъэджакІуэфІ дыхъунущ (2 Тим. 3:16, 17).

13. Еврейхэм 5:14 зэритымкІэ, зэхэщІыкІ зидгъэІэн щІыхуейр сыт?

 ¹³ ЗэхэщІыкІ зивгъэІэ. ЗауэлІым зыпэщІэхуэнкІэ хъуну гугъуехьхэр къыгурыІэу, абы зыщихъумэн хуейщ. Дэри апхуэдэу гугъуехь дызыпэщІэхуэнкІэ хъунухэр къыдгурыІэу икІи зыщытхъумэу зедгъэсэн хуейщ (Прит. 22:3, Гъэс; къеджэ Еврейхэм 5:14). Псалъэм папщІэ, зэрызыдгъэпсэхунымрэ ди нэгу зэрызедгъэужьынымрэ къыщыхэтхым деж набдзэгубдзаплъэу дыщытын хуейщ. Фильмхэм, телевизоркІэ къагъэлъагъуэ шоухэм хэт цІыхухэм и нэхъыбэм деж мыхъумыщІэ щытыкІэ яІэщ. Абыхэм я щытыкІэмкІэ Алыхьыр ягъэпуд икІи я щхьэми нэгъуэщІ цІыхухэми зэран къыхуахь. Аращи, дэ Алыхьым худиІэ лъагъуныгъэр зыгъэупщІыІун нэгу зегъэужькІэхэр ІэщІыб дощІ (Еф. 5:5, 6).

14. ЗэхэщІыкІ зэриІэр Дэниел дапхуэдэу къызэрыдэІэпыкъуар?

¹⁴ Мы статьям зи гугъу тщІа Дэниел къыгурыІуэу щІидзат лей зехьэнымрэ Іэзэгъуазэмрэ зыхэт джэгухэм зэран къихьыр. А темэм теухуа материал абы электроннэ библиотекэм къыщигъуэтри зэпкърихащ. Дапхуэдэу ар абы къызэрыдэІэпыкъуар? Иеговэрэ абырэ я зэхуаку дэлъ зэхущытыкІэр зэтезыкъутэ видеоджэгухэр абы къигъэнащ. Абы нэмыщІ Дэниел онлайну джэгуным къыхэкІыжащ икІи зи гъусэу джэгуу щыта цІыхухэри къигъэнащ. Дэниел къыддогуашэ: «Видеоджэгу сыджэгуным ипІэкІэ сэ жьы къабзэкІэ сыбауэу икІи зэхуэсым щыщ си ныбжьэгъухэм сахуэзэу щІэздзащ». Иджыпсту ар пионеру икІи зэхуэсым и нэхъыжьу мэлажьэ.

15. Алыхьым епцІыжахэм къабгъэдэкІ пцІым сыт хуэдэ зэран къихьыр?

¹⁵ Дэри Тимофей хуэдэу Алыхьым епцІыжахэм къабгъэдэкІ пцІым зэран къихьыр къыдгурыІуэу щытын хуейщ (1 Тим. 4:1, 7; 2 Тим. 2:16). Псалъэм папщІэ, абыхэм къуэшхэм щхьэкІэ пцІы жаІэфынущ е Иеговэ и организацэм дзыхь хуэдмыщІыжу ящІыфынущ. Алыхьым епцІыжахэм къабгъэдэкІ пцІым ди фІэщхъуныгъэр махэ ищІыфынущ. Дэ абыхэм я къапхъэным зидгъахуэ хъунукъым. Апхуэдэ шыпсэхэр зыгъэбагъуэхэр зи акъылыр Іейм хуэунэтІа хъуахэмрэ «щыпкъагъэм пэжыжьэ цІыхухэмрэщ». Абыхэм я мурадыр — дагъэныкъуэкъуэну, дагъэдэуэну аращ. Ахэр хуейщ абыхэм жаІэ пцІыр ди фІэщ хъууэ, къуэшхэм гурыщхъуэ яхуэтщІу щІэддзэну (1 Тим. 6:4, 5).

16. Сыт зэран зыхуэдгъэхъун хуэмейр?

¹⁶ Фи гъащІэм псом нэхърэ нэхъапэу щытыр зыщывмыгъэгъупщэ. «Хьисэ Мэссихь и зауэлІыфІым хуэдэу» Тимофей хъыбарыфІ гъэІуным  къарууэ иІэр ирихьэлІэу, мы дунейм и Іуэхухэмрэ мылъку зэгъэпэщынымрэ хущІэмыкъуу псэун хуейт (2 Тим. 2:3, 4). Дэри мылъку зэгъэпэщыным зыдедгъэхьэх хъунукъым. «Беягъэм и пцІым» Иеговэ худиІэ лъагъуныгъэр игъэупщІыІуфынущ, абы нэмыщІ Алыхьым и Псалъэр дызэриІэр фІыщІэ дымыщІыжу икІи пэжымкІэ нэгъуэщІхэм дадэгуэшэну гукъыдэж димыІэжу ищІыфынущ (Мт. 13:22). Дэ мылъку зэгъэпэщыным дыхущІэмыкъуу, ди къарумрэ ди зэманымрэ къэдгъэсэбэпу «Тхьэм и Тепщэныгъэшхуэм и Іуэхугъуэхэр» адэкІи ипэ идгъэщын хуейщ (Мт. 6:22—25, 33).

17, 18. Иеговэрэ дэрэ ди зэхуаку дэлъ зэхущытыкІэр тхъумэн щхьэкІэ сыт тщІэн хуейр?

¹⁷ Зэран къытхуэхъун гуэрым дызэрыпэщІэтыным занщІэу иужь дихьэн хуейщ. Зыгуэр къытеуэ хъумэ, зауэлІым сыт ищІэнуми ипэІуэкІэ егупсысын хуейщ. Дэ Иеговэ дзыхь къытхуищІар тхъумэну дыхуеймэ, зэран къытхуэхъун гуэрым гу зэрылъыттэу, абы дызэрыпэщІэтыным занщІэу иужь дихьэнущ. Сыт абыкІэ къыддэІэпыкъунур? ЯпэщІыкІэ план зыхэтлъхьэн хуейщ.

¹⁸ Щапхъэ къэтхьынщ. Машинэхэм огнетушитель илъын хуейщ. Сыт щхьэкІэ? Машинэм мафІэ къыщІэнэ хъумэ, занщІэу ягъэункІыфІыжын щхьэкІэ. Дэри фильмхэм, телепередачэхэм е интернетымкІэ мыхъумыщІагъэ е гущІэгъуншагъэ къагъэлъагъуэу дрихьэлІэмэ, абы нэмыщІ Алыхьым епцІыжахэм жаІэ гуэр къатмэ, тщІэнум ипэІуэкІэ дегупсысын хуейщ. Дэ абы дыхуэхьэзыру щытмэ, ар зэран зэрызыхуэдмыгъэхъуным занщІэу иужь дихьэфынущ, Иеговэрэ дэрэ ди зэхуаку дэлъ зэхущытыкІэр тхъумэн икІи абы и пащхьэм къабзэу дыкъыщынэн щхьэкІэ (Пс. 101:3; 1 Тим. 4:12).

19. Иеговэ дзыхь къытхуищІар лъапІэу тлъытэмэ, сыт хуэдэ фІыгъуэхэр диІэну?

¹⁹ Иеговэ дзыхь къытхуищІар лъапІэу тлъытэн хуейщ — Библием ит щІэныгъэ пэжымрэ, а щІэныгъэхэмкІэ нэгъуэщІхэм дазэрыдэгуашэмрэ. Апхуэдэу тщІэмэ, дэ напэ къабзэ диІэнущ, ди гъащІэм мыхьэнэ иІэнущ икІи нэгъуэщІхэм Алыхьыр къацІыхуну дазэрыдэІэпыкъум щхьэкІэ ди гум гуфІэгъуэ илъынущ. Иеговэ къызэрыддэІэпыкъум и фІыгъэкІэ дэ абы дзыхь къытхуищІар тхуэхъумэнущ (1 Тим. 6:12, 19).