1, 2. Экклезиаст 11:6 ит псалъэхэр Пащтыхьыгъуэм теухуа хъыбарыфІ гъэІуным дапхуэдэу зэрепхар?

 ЯЗЫНЫКЪУЭ къэралхэм цІыхухэр хъыбарыфІым яфІэфІу йодаІуэ икІи нэхъыбэ къащІэну ахэр хуейщ. НэгъуэщІ къэралхэм Алыхьымрэ Библиемрэ теухуауэ едэІуэну апхуэдэуи яфІэгъэщІэгъуэнкъым. Фэ фыщыпсэу щІыпІэм хъыбарыфІым цІыхухэр дапхуэдэу зэрыхущытыр? ХъыбарыфІым цІыхухэр дапхуэдэу хущымытми, Иеговэ хуейщ хъыбарыфІ гъэІуным дыхэтыну, а лэжьыгъэр иухауэ абы жиІэху.

² Иеговэ щытриухуа зэманым хъыбарыфІ гъэІуныр иухынущ икІи «дунейм и кІэухыр къэсынущ абы и ужькІэ» (Мт. 24:14, 36). А зэманыр къэсыху «уи Іэр умыгъэувыІэ» * жыхуиІэ псалъэхэм дапхуэдэу дызэрытетынур? (Къеджэ Экклезиаст 11:6 *.)

3. Мы статьям сыт щызэпкърытхынур?

³ Мы статьям ипэ дызэджам дэ щызэпкърытхащ ехъулІэныгъэ диІэу «цІыхухэр къэдубыдын» щхьэкІэ сыт къыддэІэпыкъунуми (Мт. 4:19, ДЩІ). Иджы мы статьям дыщытепсэлъыхьынущ гугъуехьхэм емылъытауэ теубыдагъэ тхэлъу хъыбарыфІыр дгъэІуну сыт къыддэІэпыкъунуми. Дэ къэтщІэнущ мыхьэнэ щІиІэр: 1) ди гъащІэм псом нэхърэ нэхъапэр тщІэжыным; 2) шыІэныгъэ зыхэдгъэлъыным икІи 3) фІэщхъуныгъэ быдэ диІэным.

4. Иеговэ къыдита лэжьыгъэр ди дежкІэ псом нэхърэ нэхъапэу щІыщытын хуейр сыт?

⁴ Хьисэ жиІауэ щытащ кІэух зэманхэм дунейр дапхуэдэу щытынуми икІи сыт хуэдэ Іуэхугъуэхэр къэхъунуми. Абы ищІэт и лъэужь ирикІуэхэм я акъылыр хъыбарыфІ гъэІуным теухуауэ  щытыну а псор зэран къазэрыхуэхъуфынур. Абы къыхэкІкІэ мыпхуэдэу яжриІащ: «Фымыжейуэ фысакъ» (Мт. 24:42). Нухь жиІэ хъыбарым едэІуэну цІыхухэм зэран къахуэхъуа дыдэр дэри зэран къытхуэхъуфынущ (Мт. 24:37—39; 2 Пет. 2:5). Аращи, зыщыдгъэгъупщэн хуейкъым: ди дежкІэ псом нэхърэ нэхъапэр Иеговэ къыдита лэжьыгъэр гъэзэщІэныращ.

5. Апостолхэм 1:6—8 зэритымкІэ, Пащтыхьыгъуэм теухуа хъыбарыфІым щІылъэм дапхуэдизу зыщиубгъуну?

⁵ Нобэ мыхьэнэшхуэ иІэщ Пащтыхьыгъуэм теухуа хъыбарыр дгъэІуным. Хьисэ жиІауэ щытащ ар лІа иужьи и лъэужь ирикІуэхэм а лэжьыгъэр адэкІи зэрырагъэкІуэкІынур икІи щІыпІэ куэдым зэрызыщиубгъунур (Ин. 14:12). Ауэ Хьисэ лІа иужь и лъэужь ирикІуэхэм ящыщу языныкъуэхэр бдзэжьеящэ лэжьыгъэм пэрыувэжауэ щытащ. Хьисэ лІахэм къахэтэджыкІыжа иужь телъыджэ Іуэхугъуэ ищІащ: бдзэжьей куэду къаубыдыну абыхэм ядэІэпыкъуащ. Апхуэдэу и лъэужь ирикІуэхэм къагуригъэІуащ «цІыхухэр къэбубыду» ущытыным нэхърэ нэхъ мыхьэнэшхуэ зиІэ лэжьыгъэ зэрыщымыІэр (Ин. 21:15—17). Хьисэ уафэм дэкІуэижын ипэ и лъэужь ирикІуэхэм яжриІат абы иригъэжьа лэжьыгъэм Израил щІыналъэм нэмыщІ нэгъуэщІ щІыпІэхэми зэрызыщиубгъунур. (Къеджэ Апостолхэм 1:6—8.) Илъэс бжыгъэ дэкІа иужь Хьисэ Иуан иригъэлъэгъуауэ щытащ «Зиусхьэным и махуэм» * къэхъунур. Иуан хуабжьу гъэщІэгъуэн щыхъуа гуэр илъэгъуащ: мелыІычым «Тхьэм и хъыбарыфІу мыкІуэдыжынур» «лъэпкъ псоми, унагъуэ лъэпкъ псоми, бзэ псоми, къэрал псоми» яхуиІуатэт (Апок. 1:10; 14:6). Абы къыдгурегъаІуэ нобэ Иеговэ къызэрытщыгугъыр — хъыбарыфІ гъэІуныр иухауэ абы жиІэху, а хъыбарыфІыр щІылъэ псом щыдгъэІуну зэрыхуейр.

6. ХъыбарыфІ гъэІуным мыхьэнэшхуэ зэриІэр тщымыгъупщэну сыт къыддэІэпыкъунур?

⁶ ХъыбарыфІ гъэІуным мыхьэнэшхуэ зэриІэр тщымыгъупщэну сыт къыддэІэпыкъунур?  Иеговэ дэІэпыкъуэгъушхуэ къызэрытхуэхъум дызэрегупсысыр. Псалъэм папщІэ, Иеговэ и фІыгъэкІэ ди фІэщхъуныгъэр нэхъ быдэ зыщІ шхыныгъуэхэр берычэту диІэщ. Дэ тхылъымпІэхэм тедзауэ икІи электроннэу публикацие куэд диІэщ, абы нэмыщІ аудиозаписьхэмрэ видеороликхэмрэ ди куэдщ, иджыри интернет-телевидение диІэщ. Фи нэгу къыщІэвгъэхьэт: ди сайтым 1 000 нэхърэ нэхъыбэ бзэкІэ информацие къыщыбгъуэтыфынущ! (Мт. 24:45—47). Политикэмрэ динымрэ я зэранкІэ, абы нэмыщІ языныкъуэхэр нэхъ бейуэ, адрейхэр нэхъ хуэмыщІауэ зэрыпсэум къыхэкІкІэ цІыхухэм я зэхуаку зэкъуэтыныгъэ дэлъкъым. Ауэ мелуанийм щІигъу Алыхьым и лэжьакІуэхэр дэнэ щымыпсэуами, ахэр зэзыпх лъагъуныгъэ я зэхуаку дэлъщ. 2019-нэ гъэм, мэлыжьыхьым и 19-м, мэрем махуэм дуней псом щыпсэу Иеговэ и Щыхьэтхэр махуэм хухаха едзыгъуэр зэпкърызых видеороликым еплъащ. А махуэ дыдэм, пщыхьэщхьэм Хьисэ и лІэныгъэр дигу къыщыдгъэкІыж Пщыхьэщхьэшхэм цІыху 20 919 041 къекІуэлІащ. ДауикІ, щІыхьышхуэщ а телъыджэ Іуэхур плъэгъуну икІи абы ухэтыну! Абы дегупсысмэ, Пащтыхьыгъуэм теухуа хъыбарыр дгъэІуным мыхьэнэшхуэ зэриІэр тщыгъупщэнукъым.

7. ХъыбарыфІ гъэІуным мыхьэнэшхуэ зэриІэр тщымыгъупщэну Хьисэ и щапхъэр дапхуэдэу къызэрыддэІэпыкъур?

⁷ ХъыбарыфІ гъэІуным мыхьэнэшхуэ зэриІэр тщымыгъупщэну Хьисэ и щапхъэр къыддоІэпыкъу. «Щыпкъагъэм щыхьэт» техъуэн щхьэкІэ абы зэран къыхуэхъуу хъуар ІэщІыб ищІт (Ин. 18:37). Хьисэ ШейтІаным зыкъригъэгъэпцІакъым «дунейм тет къэралыгъуэ псори абыхэм ябгъэдэлъ щытхъури» щригъэлъэгъуам щыгъуэ. ИкІи цІыхухэм ар пащтыхь ящІыну щыхэтам щыгъуэ, абы идакъым (Мт. 4:8, 9; Ин. 6:15). Ар мылъку зэхуэхьэсыным хущІэкъутэкъым икІи гущІэгъуншэу къызэрыпэщІэувэми игъэшынэтэкъым (Лк. 9:58; Ин. 8:59). Апостол Паул Хьисэ и лъэужь ирикІуэхэр хуигъэушт Хьисэ и щапхъэм тетыну, ахэр емышын икІи я гур ямыгъэныкъуэн щхьэкІэ (Евр. 12:3). Ди фІэщхъуныгъэр гъэунэхуапІэ щихуэм деж мы псалъэхэр дигу идгъэлъын хуейщ. Апхуэдэу тщІэмэ, псом нэхърэ нэхъапэр тщыгъупщэнукъым.

8. ШыІэныгъэр сыт зищІысыр икІи сыт дэ абы дыщІыхуэныкъуэр?

⁸ ШыІэныгъэр — зэхъуэкІыныгъэхэм дыщежьэм деж теубыдагъэ тхэлъу дыщытыныращ. Абы дэ дыхуэныкъуэщ, псалъэм папщІэ гугъуехь гуэрым кІэ иІэну дыщежьэм деж е дызыщІэхъуэпс гуэр къэхъуным дыщежьэм деж. Бегъымбар Аввакум щІэхъуэпст Иудэм къыщекІуэкІ Іейм кІэ къыщыхуэкІуэну зэманыр илъэгъуну (Авв. 1:2). Хьисэ и лъэужь ирикІуэхэр щыгугът Римым и тепщэныгъэ гущІэгъуншэм къыщІэзышыну Пащтыхьыгъуэ къэунэхуну (Лк. 19:11). Дэ Алыхьым и Пащтыхьыгъуэм дунейм къыщекІуэкІ Іейм кІэ къыхуигъакІуэу, мамырыгъэ здэщыІэ «щІылъэщІэр къызэрыунэхужынум дыпоплъэ» (2 Пет. 3:13). Иеговэ триухуа зэманыр къэсыху дэ шыІэныгъэ зыхэдгъэлъын хуейщ. ШыІэныгъэ тхэлъыну Иеговэ къызэрыддэІэпыкъум дегупсысынщ.

9. Иеговэ шыІэныгъэ зэрыхэлъыр сыт ди фІэщ зыщІыр?

⁹ Иеговэ нэгъэсауэ шыІэныгъэ хэлъщ икІи дэ абы щапхъэ тетхыну дыхуейщ. Абы Нухь кхъухьыр ищІын икІи дуней бзаджэм кІэ къызэрыхуэкІуэнум теухуауэ цІыхухэм хъыбар яригъэщІэн щхьэкІэ ирикъун зэман иритащ (1 Пет. 3:20; 2 Пет. 2:5). Иеговэ Содомрэ Іаморэрэ дэс мыхъумыщІэ псэукІэ зиІэ цІыхухэр щигъэкІуэдынум щыгъуэ Ибрэхьим и упщІэхэм едэІуащ (ЩІэдз. 18:20—33). ЛІэщІыгъуэ зыбжанэкІэ израил лъэпкъыр Иеговэ хуэмыпэжу щытащ, абы щыгъуи шыІэныгъэшхуэ абы игъэлъэгъуащ (Неем. 9:30, 31). Иеговэ шыІэныгъэ зэригъэлъагъуэр нобэ дэри долъагъу: Иеговэ зыришалІэ цІыхухэм зэман ярет «я гуэныхьхэм хущІегъуэжыну» (2 Пет. 3:9; Ин. 6:44; 1 Тим. 2:3, 4). Иеговэ шыІэныгъэ зэрыхэлъым дэри дыхуегъэуш хъыбарыфІыр щыдгъэІум икІи цІыхухэр щедгъаджэм деж а хьэл-щэныр дгъэлъэгъуэну.  Абы нэмыщІ Иеговэ и Псалъэм ит зы щапхъэмкІэ шыІэныгъэ зыхэдгъэлъыну дегъасэ.

10. Екъуб 5:7, 8 ит мэкъумэшыщІэм и щапхъэм сытым дыхуигъасэрэ?

¹⁰ Къеджэ Екъуб 5:7, 8. МэкъумэшыщІэм и щапхъэм дыхуегъасэ шыІэныгъэ зыхэдгъэлъыну. ДауикІ, языныкъуэ къэкІыгъэхэр псынщІэу къокІ. Ауэ и нэхъыбэ къэкІыгъэхэм гъавэ къыуату хъун щхьэкІэ зэман нэхъыбэ хуейщ. Израилым мэкъумэш лэжьыгъэр мазихкІэ екІуэкІт. Бжьыхьэм ипэрей уэшхым иужь мэкъумэшыщІэм губгъуэм трисэт, гъатхэм иужьрей уэшхым иужь гъавэ къытрихыжт (Мк. 4:28). Дэри мэкъумэшыщІэм хуэдэу шыІэныгъэ зыхэдгъэлъыным мыхьэнэшхуэ иІэщ. Ауэ ар тыншу щымытынкІэ хъунущ.

11. ХъыбарыфІыр щыдгъэІум деж шыІэныгъэр дапхуэдэу къызэрыддэІэпыкъур?

¹¹ Гуэныхь зыхэлъ цІыхухэм и нэхъыбэм деж я лэжьыгъэм къыпэкІуэр занщІэу ялъэгъуну хуейщ. Ауэ къэкІыгъэм гъавэ къыуитын щхьэкІэ, абы сыт щыгъуи укІэлъыплъын хуейщ: япэщІыкІэ щІыр къэптІын, иужькІэ хэпсэн, щІэх-щІэхыурэ псы щІэбгъэлъэдэн икІи упщІэн хуейщ. ЦІыхухэр Хьисэ и лъэужь иувэну щыдгъэхьэзырым деж дэри сыт щыгъуи къару етхьэлІэн хуейщ. Дэ зэман дыхуейщ Библием едгъаджэхэм удзыжьым ебгъэщхь хъун хьэл-щэнхэр я гум ирагъэкъэбзыкІыну дадэІэпыкъун щхьэкІэ, псалъэм папщІэ цІыху зэхэгъэж щІынымрэ нэгъуэщІхэр къафІэмыІуэхуу щытынымрэ. ШыІэныгъэр къыддоІэпыкъу нэгъуэщІхэр къыщыдэмыдаІуэм деж гуфІэгъуэр зыфІэдмыгъэкІуэдыну. Уеблэмэ, къыщыдэдаІуэм дежи шыІэныгъэм дыхуэныкъуэщ. Дэ Библием едгъаджэхэр залымыгъэкІэ Алыхьым гъунэгъу хуэтщІыфынукъым. Иныкъуэм деж Хьисэ и лъэужь ирикІуэхэми яжриІэр занщІэу къагурыІуэтэкъым (Ин. 14:9). Зыщывмыгъэгъупщэ: дэ хыдосэ икІи псы щІыдокІэ, ауэ къэзыгъэкІыр Алыхьыращ (1 Кор. 3:6).

12. Иеговэ и Щыхьэту щымыт ди Іыхьлыхэм хъыбарыфІымкІэ дащыдэгуашэм деж шыІэныгъэ дапхуэдэу зэрыдгъэлъэгъуэнур?

¹² Иеговэ и Щыхьэту щымыт ди Іыхьлыхэм хъыбарыфІымкІэ дащыдэгуашэм деж шыІэныгъэ  зыхэдгъэлъыну щымытынш къохъу. Апхуэдэм деж Экклезиаст 3:1, 7 ит принципыр къыддэІэпыкъунущ: «Псоми зэман иІэщ... зыри щыжумыІэн зэмани ущыпсэлъэн зэмани». Дэ зыри жыдмыІэми, ди щытыкІэфІым ахэр къыдихьэхынкІэ хъунущ. Ауэ Іэмал диІэ хъумэ, ди фІэщхъуныгъэм теухуауэ ди Іыхьлыхэм дадэгуэшэну сыт щыгъуи дыхьэзыру дыщытын хуейщ (1 Пет. 3:1, 2). ДауикІ, дэ псэемыблэжу хъыбарыфІ гъэІунымрэ Хьисэ и лъэужь иувэну цІыхухэр гъэхьэзырынымрэ дыхэтыну дыхуейщ, ауэ зыщыдгъэгъупщэ хъунукъым псоми, ди Іыхьлыхэри абыхэм яхэту, шыІэныгъэ тхэлъу дахущытын зэрыхуейр.

13, 14. ШыІэныгъэ зыхэвгъэлъыну фыхуэзыгъэуш Алыхьым и лэжьакІуэхэм я щапхъэхэр къыжыфІэж.

¹³ Иеговэ и лэжьакІуэ пэжхэм я щапхъэм шыІэныгъэм дыхуигъэсэфынущ. Абыхэм ящыщщ бегъымбар Аввакумрэ апостол Паулрэ. Іейм кІэ къыхуэкІуэну Аввакум хуабжьу хуейуэ щытами, шыІэныгъэ зыхигъэлът. Абы жиІащ: «ХъумакІуэ чэщанэм адэкІи сытетынущ» (Авв. 2:1). Паул и лэжьыгъэр иухыу, уафэм кІуэну тыгъэ иІэр къылъысыну хуабжьу хуейт. Ауэ, абы емылъытауэ шыІэныгъэ хэлъу хъыбарыфІыр адэкІи цІыхухэм яхуиІуатэт (Апост. 20:24).

¹⁴ Галаад Школыр къэзыуха зэщхьэгъуситІым я щапхъэ зэпкърытхынщ. ХъыбарыфІыр ягъэІуну ахэр здагъэкІуа къэралым Иеговэ и Щыхьэтхэр щымащІэт икІи а къэралым щыпсэухэм и нэхъыбэм чристэн диныр яІыгътэкъым. А къэралым щыпсэу цІыхухэм ящыщу Библиер джын щІэзыдзэр мащІэт. Абыхэм Галаад Школым къадеджа нэгъуэщІ къэралым ягъэкІуахэм къыхуатхт цІыху куэд зэрырагъаджэр икІи ирагъаджэхэм псым зэрызыщІагъауэр. Дапхуэдэу мыхъуами, а зэщхьэгъуситІым цІыхухэр къызэремыдаІуэм емылъытауэ, шыІэныгъэ яхэлъу адэкІи хъыбарыфІыр ягъэІут. Абыхэм хъыбарыфІыр зэрагъэІум зыри къыпэмыкІуэу къащыхъут, ауэ илъэсий дэкІа иужь я лэжьыгъэм фІыгъуэ къызэрыпэкІуэр ялъэгъуащ: Библие ирагъаджэ цІыхубзым псым зыщІигъэуащ. Бегъымбар Аввакум, апостол Паул, абы нэмыщІ а зэщхьэгъуситІым я щапхъэхэр сыткІэ зэщхь? Мы Алыхьым и лэжьакІуэ пэжхэм дапхуэдэу мыхъуами, кърата лэжьыгъэр адэкІи ягъэзащІэт икІи я Іэр ягъэувыІэтэкъым. Абыхэм шыІэныгъэ зэрызыхагъэлъам щхьэкІэ Иеговэ фІыгъуэ яхуищІэжащ. Аращи, «фІэщхъуныгъэрэ шыІэныгъэрэ зэраІэм щхьэкІэ Тхьэм къызэригъэгугъа Іуэхухэр ІыхьэфІу къызылъысыну цІыхухэм я лъэужьым фрикІуэ» (Евр. 6:10—12).

15. ХъыбарыфІыр дгъэІуну фІэщхъуныгъэм дапхуэдэу дызэрыхуигъэушыр?

¹⁵ Дэ хъыбарыфІ дгъэІур быдэу ди фІэщ мэхъу, абы къыхэкІкІэ а хъыбарыр цІыху нэхъыбэм яжетІэну дыхуейщ. Тхыгъэ ЛъапІэм ит Алыхьым дыкъызэригъэгугъэ псалъэхэм дэ дзыхь худощІ (Пс. 119:42; Ис. 40:8). Дэ ди нэкІэ долъагъу Библием къэхъун хуейуэ итхэр къызэрыхъур икІи Библием и фІыгъэкІэ цІыхухэм фІыкІэ зэрызахъуэжыр. А псом дэ ди фІэщ ящІ Алыхьым и Пащтыхьыгъуэм теухуа хъыбарыр дэтхэнэ зы цІыхуми зэхихын зэрыхуейр.

16. Псалом 46:1—3 зэритымкІэ, Иеговэрэ Хьисэрэ худиІэ фІэщхъуныгъэм дапхуэдэу дызэрыхуигъэушыр хъыбарыфІыр дгъэІуну?

¹⁶ Дэ иджыри хъыбарыфІыр къызыбгъэдэкІ Иеговэрэ абы и Пащтыхьыгъуэм и Пащтыхьу тригъэува Хьисэрэ ди фІэщ мэхъу (Ин. 14:1). Ди хъуреягъкІэ сыт къэмыхъуами, Иеговэ «ди хъумапІэщ икІи ди къарущ». (Къеджэ Псалом 46:1—3 *.) Абы нэмыщІ дэ шэч къытетхьэкъым Хьисэ уафэм щыІэу, Иеговэ кърита тепщэныгъэмрэ къарумрэ къигъэсэбэпу хъыбарыфІ гъэІун лэжьыгъэр зэрыригъэкІуэкІым (Мт. 28:18—20).

17. ХъыбарыфІыр адэкІи дгъэІун щІыхуейр къыдгурызыгъаІуэ щапхъэ къыжыфІэж.

 ¹⁷ ФІэщхъуныгъэ дызэриІэм и фІыгъэкІэ дэ шэч къытетхьэкъым хъыбарыфІ гъэІуным къару зэретхьэлІэм щхьэкІэ Иеговэ фІыгъуэ къызэрытхуищІэнум икІи иныкъуэм деж ар дызэримыгъугъам хуэдэу ещІэ (Эккл. 11:6). Псалъэм папщІэ, ди тхыгъэхэр зыдэлъ стендым и гъунэгъуу махуэ къэс мин бжыгъэкІэ цІыхухэр блокІ. ХъыбарыфІыр зэрыдгъэІу а Іэмалым ехъулІэныгъэ иІэу пІэрэ? ДауикІ, иІэщ! 2014-нэ гъэм, щэкІуэгъуэм къыдэкІа «Наше священное служение» жыхуиІэм университетым щеджэ зы хъыджэбзым теухуауэ итащ. Абы Иеговэ и Щыхьэтхэм теухуауэ реферат итхыну хуейт. А хъыджэбзым Иеговэ и Щыхьэтхэр щызэхуэс Унэр игъуэтакъым, ауэ студентхэр щыпсэу унэхэм и гъунэгъуу абы ди тхыгъэхэр зыдэлъ стенд къилъэгъуащ икІи рефератыр итхын щхьэкІэ зыхуэныкъуэ информацие Иеговэ и Щыхьэтхэм абы иратащ. Зэман дэкІри а хъыджэбзым псым зыщІигъэуащ икІи ар иджыпсту пионеру мэлажьэ. Мыпхуэдэ щапхъэхэм дыхуагъэуш адэкІи хъыбарыфІыр дгъэІуну икІи абыхэм къагъэлъагъуэ Пащтыхьыгъуэм теухуа хъыбарыр зэхэзыхын хуей цІыхухэр иджыри зэрыщыІэр.

18. Пащтыхьыгъуэм теухуа хъыбар гъэІун лэжьыгъэр Иеговэ щытриухуа зэманым зэриухыным дэ шэч къыщІытедмыхьэр сыт?

¹⁸ Пащтыхьыгъуэм теухуа хъыбар гъэІун лэжьыгъэр Иеговэ щытриухуа зэманым зэриухыным дэ шэч къытедмыхьэми хъунущ. Нухь щыпсэуа зэманым къэхъуар дигу къэдгъэкІыжынщ. Иеговэ зэманым зэрыкІэлъыплъыр къигъэлъэгъуащ. Псыдзэшхуэр къэхъуным илъэс 120 хуэдиз иІэу, Алыхьым ар щыщІидзэну зэманыр триухуат. Илъэс бжыгъэ куэд дэкІри абы Нухь къалэн иритащ кхъухь ищІыну. Псыдзэшхуэр щІидзэным илъэс 40—50 хуэдиз иІэу Нухь кхъухьыр щІын щІидзащ икІи абы и Іэр имыгъэувыІэу лэжьащ. Нухь цІыхухэр къызэремыдаІуэм емылъытауэ, гузэвэгъуэшхуэ къызэрыхъунур адэкІи абыхэм яжриІэт икІи абы а хъыбарыр игъэІуащ кхъухьым хьэкІэкхъуэкІэхэр иригъэтІысхьэну зэманыр къызэрысар Иеговэ къыжриІэху. Абы иужь Иеговэ щытриухуа зэманым «кхъухьым и бжэр абыхэм якІэлъыхуищІыжащ» (ЩІэдз. 6:3; 7:1, 2, 16).

19. Ди Іэр дымыгъэувыІэу щытмэ, дэ сытым шэч къытедмыхьэми хъуну?

¹⁹ Пащтыхьыгъуэм теухуа хъыбар гъэІун лэжьыгъэр икІэм зэрынэсар куэд мыщІэу Иеговэ къыджиІэнущ. Абы иужь ШейтІаным и дунейр игъэкІуэдынурэ, пэжыгъэ здэщыІэ дунеищІэ иухуэнущ. Ауэ а зэманыр къэсыху зи Іэр зымыгъэувыІэу щыта Нухь, Аввакум, абыхэм нэмыщІ Алыхьым и лэжьакІуэ нэгъуэщІхэм щапхъэ ятетхынщ. Псом нэхърэ нэхъапэр зыщыдгъэгъупщэнкъым, шыІэныгъэ зыхэдгъэлъынщ, абы нэмыщІ Алыхьымрэ абы дыкъызэригъэгугъэхэмрэ быдэу ди фІэщ тщІынщ.