Іуэхугъуэ гуэрхэр зэрыфІым е зэрыІейм теухуауэ цІыхухэм я еплъыкІэр зэтохуэ. Псалъэм папщІэ, цІыху быукІыныр, балигъым е сабийм лей епхыныр тэмэму къилъытэну зыми игу къэкІыну къыщІэкІынкъым. НэгъуэщІ лъэныкъуэкІи, захуагъэ, хэлэлагъ, гущІэгъу бгъэлъэгъуэныр куэдым фІыуэ къалъытэ. Ауэ сексым, пцІы упсыным е сабийхэр зэрыбгъэсэным Іуэхур нэса иужь, «Ар дэтхэнэ зыми и Іуэхужщ», «Щхьэж езым тэмэму къилъытэ унафэр къищтэну хуитыжщ» жаІэу зэхэпхыфынущ. ЦІыхухэм унафэ къыщащтэкІэ и нэхъыбэм абы лъабжьэ хуэхъур езыхэм тэмэму къалъытэмрэ адрей цІыхухэм я Іуэху еплъыкІэмрэщ. Ауэ апхуэдэ бгъэдыхьэкІэм дзыхь хуэпщІ хъуну?

Унафэ къыщытщтэкІэ дэ и нэхъыбэм ди напэм жиІэм додаІуэ. Ар сытыр фІыми, сытыр Іейми зэхэдгъэкІыну къыддоІэпыкъу (Рим 2:14, 15). Уеблэмэ, сабий цІыкІухэми сыт захуэми, сыт мызахуэми къагуроІуэ икІи я напэм егъэкъуаншэ. Ди гъащІэм къриубыдэу ди напэр дыкъэзыухъуреихь куэдым ягъасэ: ди унагъуэм, ди ныбжьэгъухэм, ди егъэджакІуэхэм, дызыхэт цІыхухэм, диным, культурэм. Аращи, дэ унафэ къатщтэхэр зэлъытауэ щытынур ди напэр зэрыгъэсаращ.

Дэ фІымрэ Іеймрэ зэхэдгъэкІыу зэрызедгъэсам дыхуегъэуш нэгъуэщІхэм захуагъэрэ гущІэгъурэ хэлъу дахущытыну икІи ди гум фІыщІэ илъыну. Иджыри абы дэ дыщехъумэ нэгъуэщІхэм зэран яхуэхъун, дыщІэукІытэжын икІи ди напэр къыщІыдэныкъуэкъужын Іуэхугъуэхэр дымыщІэну.

ФІымрэ Іеймрэ щызэхэдгъэкІкІэ дэ езым ди еплъыкІэм сыт щыгъуи дзыхь хуэтщІ хъуну пІэрэ? Гаррик и щапхъэм гу лъыттэнщ. Абы и щІалэгъуэм и щхьэ акъылкІэ псэуну унафэ ищІат, ауэ абы фІы лъэпкъ кърикІуакъым. Гаррик къыддогуашэ: «Сэ зыкІэ цІыху мыхьэнэншэ сыхъуати — секс, наркотик, фадэ, зауэ-банэ  — арат си гъащІэр зэрызэхэлъыр, си напэри абы щхьэкІэ къызэныкъуэкъутэкъым».

Унафэ къыщытщтэм деж дэ ди еплъыкІэм нэмыщІ адрейхэми я еплъыкІэм мыхьэнэ идот. Апхуэдэу абыхэм гъащІэм щызрагъэгъуэта щІэныгъэр дэри къэдгъэсэбэпу жыпІэ хъунущ. Иджыри ди благъэхэм, ди ныбжьэгъухэм е дызыхэт цІыхухэм тэмэму къалъытэ унафэхэр къыщытщтэм деж, дэ абыхэм пщІэ нэхъ къытхуащІу мэхъу.

ФІымрэ Іеймрэ щызэхэдгъэкІкІэ нэгъуэщІхэм я еплъыкІэм сыт щыгъуи дзыхь хуэтщІ хъуну пІэрэ? Присциллэ и щапхъэм деплъынщ. И щІалэгъуэм ар удэмыкІуауэ зыгуэрым уригъусэныр тэмэму зыбж и ныбжьхэм ядэплъейурэ езыми къикІухьу щІидзащ. Ауэ Присциллэ нэгъуэщІхэм тэмэму къалъытэр ищІэу псэууэ щытами, ар насыпыфІэтэкъым. Абы жеІэж: «Сэ псоми ящІэр сщІэжт, ауэ абы гурыщІэ Іей фІэкІа къысхуихьтэкъым. Сыту делагъэт ар! Сэ си гъащІэм сриджэгуу арат».

Сытыр фІыми, сытыр Іейми щызэхэдгъэкІкІэ, дэ дауикІ, ди напэмрэ нэгъуэщІхэм я еплъыкІэмрэ къыддэІэпыкъуфынущ. Ауэ абы сыт щыгъуи фІым ухуишэкъым. Унафэ къатщтэхэм кърикІуэну псор зэрыдмыщІэм къыхэкІкІэ дэ лей къыттехьэфынущ, нэгъуэщІхэми ди зэран екІыфынущ (Притчи 14:12). Абы нэмыщІ фІымрэ Іеймрэ теухуауэ ди еплъыкІэми нэгъуэщІхэм я еплъыкІэми зэман дэкІмэ захъуэжыфынущ. Къапщтэмэ, япэм къемызэгъыу щыта дуней тетыкІэр нобэ тэмэму къалъытэ икІи япэм щытыкІэфІу къалъытэу щытар нобэ мыхъумыщІагъэу ябж.

НтІэ, фІымрэ Іеймрэ зэхэдгъэкІыну сыт дэ къыддэІэпыкъунур? Зэман гуэр дэкІа иужьи дызыхущІемыгъуэжын унафэ къэтщтэну къыддэІэпыкъун гуэр щыІэу пІэрэ?

Ди насыпщи, цІыхухэм псоми сэбэп къахуэхъун гуэр щыІэщ. Ар зищІысыр къыкІэлъыкІуэ статьям къыщытщІэнущ.