ОБЛОЖКЭМ ТЕТ ТЕМЭР | БИБЛИЕМ ЕДЖЭНЫР ДАУЭ НЭХЪ ГЪЭЩІЭГЪУЭН ЗЭРЫПЩІ ХЪУНУР?
Библием удихьэхыу уеджэн щхьэкІэ сыт пщІэ хъунур?
Библие джыныр уи дежкІэ зэшыгъуэ хьэмэрэ абы гушхуэныгъэ къыуитрэ? Ар зэлъытар бгъэдыхьэкІэ къыхэпхыращ. Иджыпсту зэпкърытхынщ Библием удихьэхыу уеджэну къыбдэІэпыкъуну Іэмал зыбжанэ.
Пэжым техуэ икІи иджыпсту зэрыпсалъэ бзэкІэ зэдзэкІа Библие къыхэх. Тхылъыр бзэ гугъукІэ тхамэ е къэдмыгъэсэбэпыж псалъэ куэд хэтмэ, абы узэреджэм гуфІэгъуэ къыпхуихьыну къыщІэкІынкъым. Абы къыхэкІкІэ тыншу узэджэн икІи уи гум нэсын Библие къыхэх. Абы нэмыщІ уэ зэхэбгъэкІын хуейщ къыхэпха Библиер япэ дыдэу ятха Библием итым техуэрэ темыхуэрэ *.
ІэмэпсымэщІэ къыдэкІахэр къэвгъэсэбэп. Дэ ди зэманым Библиер тедзауэ зэрыщыІэм нэмыщІ электроннэ форматуи щыІэщ. Библием интернетми ущеджэфынущ, ар уи компьютерым, планшетым е телефоным требгъатхэ хъунущ. Языныкъуэ приложениехэм Іэмал къыуат зы темэ хэха гуэрым ехьэлІа едзыгъуэхэр псынщІэу къэбгъуэтыну икІи Библие зэмылІэужьыгъуэхэм едзыгъуэхэр зэритыр зэбгъэпщэну. Библием уеджэ нэхърэ уедэІуэну нэхъ къапщтэмэ, ар аудиоформаткІэ къипхь хъунущ. Куэдыр Библием йодаІуэ гъуэгу щытетым, къыщакІухьым е Іуэху гуэрхэр щащІэм деж. Уэ нэхъ уигу ирихь Іэмалыр къыхэпх хъунущ.
Библие зэрадж нэгъуэщІ Іэмэпсымэхэри къэгъэсэбэп. Апхуэдэ Іэмэпсымэхэр къыбдэІэпыкъунущ Библием удихьэхыу уеджэну. Узэджэм зи гугъу ищІ щІыпІэр библейскэ картэхэм къыщыбгъуэтыфынущ. Ар къыбдэІэпыкъунущ а щІыпІэм ущыІэу икІи абы къыщыхъуа Іуэхугъуэм ухэт хуэдэу уи нэгу къыщІэбгъэхьэну. Абы нэмыщІ Библием ит едзыгъуэхэр къыбгурыІуэну къыбдэІэпыкъунущ мы журналым ит статьяхэмрэ jw.org сайтым ит «Библейские учения» жыхуиІэ разделымрэ.
Уи бгъэдыхьэкІэр хъуэж. Библием зэрыщыту уеджэну пхузэфІэмыкІыну къыпщыхъумэ, абы щыщу нэхъ уигу ирихь тхылъымкІэ щІэдзэ. Библием зи гугъу ищІ цІыху гуэрым теухуауэ нэхъыбэ къэпщІэну ухуеймэ, абы тепсэлъыхьыж пычыгъуэхэм еджэ. Апхуэдэ бгъэдыхьэкІэ къыщыхьащ « Библиер нэхъыфІу къащІэ, ар зытепсэлъыхьыж цІыхухэр зэбгъэцІыхуурэ» жыхуиІэ рамкэм. Абы нэмыщІ Библием уеджэ хъунущ темэ-темэкІэ гуэшауэ е Іуэхугъуэхэр къызэрыхъуам хуэдэу зэкІэлъыкІуэу. КъедбжэкІа бгъэдыхьэкІэхэм щыщу нэхъ уигу ирихьар къэбгъэсэбэпыну ухудогъэуш.
^ абз. 4 Куэдым «ДунеищІэкІэ еджэу зэдзэкІа Тхыгъэ ЛъапІэр» къыхахащ, ар пэжым техуэу, гурыІуэгъуэу тхауэ икІи дзыхь хуэпщІ хъуну зэрыщытым щхьэкІэ. Иеговэ и Щыхьэтхэм къыдагъэкІа а Библиер бзэ 130 щІигъукІэ зэрадзэкІащ. Ар jw.org сайтымрэ JW Library приложениемрэ къипхыфынущ. Ауэ Библиер тхылъымпІэм тедзауэ нэхъ къапщтэмэ, Иеговэ и Щыхьэтхэм ар къыпІэрагъэхьэфынущ.