1, 2. Унагъуэхэр насыпыфІэу щытыну Иеговэ зэрыхуейр сыт къэзыгъэлъагъуэр?

ЯПЭ ДЫДЭ унагъуэр зыухуар Алыхьыращ. Библием зэрыжиІэмкІэ, Иеговэ цІыхубзыр къигъэщІри, Іэдэм деж къишащ. Іэдэм цІыхубзыр щилъагъум, макъ хэІэтыкІакІэ жиІащ: «Мыр си пкъым щыщ къупщхьэщ, си лым щыщ лыщ» (ЩІэдзапІэ 2:22, 23). Іэдэм егъэлеяуэ насыпыфІэт. Абы къегъэлъагъуэ унагъуэхэр насыпыфІэу щытыну Иеговэ зэрыхуейр.

² Ди жагъуэ зэрыхъунщи, псори унагъуэ насыпыфІэ къыщыхъуакъым. Ауэ Библием ит принципхэм я фІыгъэкІэ зэщхьэгъусэхэми, адэ-анэхэми, сабийхэми лъагъуныгъэрэ пщІэрэ я зэхуаку дэлъыфынущ (Лука 11:28).

3, 4. 1) ЛІыр и щхьэгъусэм дауэ зэрыхущытын хуейр? 2) Зым адрейм хуигъэгъуным зэщхьэгъусэхэм я дежкІэ мыхьэнэшхуэ щІиІэр сыт?

³ Тхыгъэ ЛъапІэм зэрыжиІэмкІэ, лІым и щхьэгъусэр фІыуэ илъагъун икІи абы пщІэ хуищІын хуейщ. Ефес 5:25—29 укъеджэну дынолъэІу. ЛІыфІыр и щхьэгъусэм сыт щыгъуи щабэу хущытщ. Ар и щхьэгъусэм къыщхьэщож, и нэІэ абы тригъэтщ икІи и гум зэремыуэным иужь итщ.

 ⁴ ЦІыхубзым ищІар и лІым игу щримыхь къохъу. Дауэ цІыхухъур абы зэрыхущытын хуейр? Библием мыпхуэдэ чэнджэщ лІыхэм ярет: «ЛІыхэ, фэ фщыщ дэтхэнэми и фызыр [зэпымыууэ] фІыуэ илъагъун хуейщ, абыхэм фахуэпхъэшэн хуейкъым» (Колоссэ 3:19). ЛІыхэ, зыщывмыгъэгъупщэ: фэри фыщыщыуэ къохъу. Алыхьым фэ къыфхуигъэгъуну фыхуеймэ, фэри фи щхьэгъусэхэм яхуэвгъэгъун хуейщ (Маттэ 6:12, 14, 15). Зым адрейм хуигъэгъумэ, зэщхьэгъусэхэм я унагъуэр насыпыфІэу щытынущ.

5. ЦІыхухъум и щхьэгъусэм пщІэ щІыхуищІын хуейр сыт?

⁵ Иеговэ хуейщ цІыхухъум и щхьэгъусэм пщІэ хуищІыну. ЛІыр егупсысын хуейщ и щхьэгъусэр зыхуэныкъуэ псом. Ар мыхьэнэшхуэ зиІэ упщІэщ. ЦІыхухъур и щхьэгъусэм Іейуэ хущытмэ, абы и тхьэлъэІум Иеговэ емыдэІуэнкІэ хъунущ (1 Петр 3:7). ЦІыхубзым нэхърэ цІыхухъур нэхъ лъапІэу Иеговэ ибжкъым. ФІыуэ къэзылъагъу дэтхэнэри Алыхьым фІыуэ елъагъу.

6. Зэщхьэгъусэхэр «зыпкъщ» жиІэмэ сыт къикІыр?

⁶ Хьисэ зэрыжиІамкІэ, цІыхухъумрэ цІыхубзымрэ зэрыша нэужь, «ахэр зыпкъщ, пкъитІ хъужыркъым», нэгъуэщІу жыпІэмэ ахэр псом хуэмыдэу гъунэгъу зэхуохъу (Маттэ 19:6). Зэщхьэгъусэхэр сыт щыгъуи зэхуэпэжын хуейщ (Притчи 5:15—21; Еврейхэм 13:4). Зэгъусэным теухуауэ зэщхьэгъусэхэр зыр зым егупсысын хуейщ. Щхьэхуещагъэ пхэлъу а Іуэхум убгъэдыхьэ хъунукъым (1 Коринф 7:3—5). Библием щыжыІащ: «3ыми езым и пкъыр  илъагъу мыхъуу зэи щытакъым, атІэ пкъыр зыхуэныкъуэр ирегъэгъуэт икІи йогугъу». Мы псалъэхэм къагъэлъагъуэ лІым и щхьэгъусэр фІыуэ зэрилъагъум нэмыщІ, щабэу зэрыхущытын хуейр. Псом нэхърэ нэхъыбэу цІыхубзыр хуейщ и щхьэгъусэм лъагъуныгъэрэ щабагъэрэ хэлъыну (Ефес 5:29).

7. Унагъуэм нэхъыжь щІиІэн хуейр сыт?

⁷ Унагъуэр быдэу икІи зэкъуэту щытын щхьэкІэ, абы нэхъыжьыфІ иІэн хуейщ. Тхыгъэ ЛъапІэм щыжыІащ: «Дэтхэнэ лІыми и щхьэр Мэссихьщ, дэтхэнэ фызми и щхьэр и лІырщ, Мэссихь и щхьэри Тхьэр арщ» (1 Коринф 11:3).

8. И лІым пщІэ зэрыхуищІыр дауэ цІыхубзым къызэригъэлъэгъуэфынур?

⁸ ДауикІ, лІыр щыщыуэ къохъу. Абы емылъытауэ, цІыхухъум ищІ унафэхэр и щхьэгъусэм диІыгъмэ,  унагъуэр нэхъ насыпыфІэ хъунущ (1 Петр 3:1—6). Библием щыжыІащ: «Фызми и лІым щІыхь хурещІ» (Ефес 5:33). Ауэ лІым Алыхьыр и фІэщ мыхъумэ е нэгъуэщІ дин иІыгъмэ, цІыхубзыр дауэ абы зэрыхущытын хуейр? Абы щыгъуэми пщІэ хуищІын хуейщ. Библием цІыхубзхэр къыхуреджэ: «Фэ, фызхэм, нывжызоІэ филІхэм фахуэІурыщІэ. Ар фщІэмэ, абыхэм ящыщхэр Тхьэм и псалъэхэм емыдаІуэми, фэ, фызхэм, зыри жывмыІэми, фи псэукІэр зэралъагъум щхьэкІэ фІэщхъуныгъэ яІэ хъунущ, фигу къабзэу, Тхьэм фыфІэлІыкІыу [филІхэм щІыхь куу хуэфщІу, ДЩІ] фызэрыпсэум гу лъатэмэ» (1 Петр 3:1, 2). ЦІыхубзым и лІым пщІэ зэрыхуищІым фІы къыпэкІуэфынущ: пщІэ къыхуищІынущ икІи и диныр фІэгъэщІэгъуэн хъунущ.

9. 1) Зы Іуэху гуэрым теухуауэ цІыхубзым и еплъыкІэр и щхьэгъусэм ейм темыхуэмэ, сыт абы ищІэ хъунур? 2) Тит 2:4, 5 унагъуэм ис фызхэм хуэгъэзауэ сыт хуэдэ чэнджэщ итыр?

⁹ Зы Іуэху гуэрым теухуауэ цІыхубзым и еплъыкІэр и щхьэгъусэм ейм темыхуэмэ, сыт абы ищІэ хъунур? Абы теухуауэ пщІэ хэлъу и лІым епсалъэ хъунущ. Зэгуэр зы упщІэм теухуауэ Сарэ и еплъыкІэр Ибрэхьим жриІат. Ибрэхьим ар игу ирихьатэкъым. Ауэ Иеговэ Ибрэхьим жриІащ: «ЕдаІуэ абы и псалъэм» (ЩІэдзапІэ 21:9—12). Алыхьым хуэлажьэ цІыхухъум ищІ унафэхэр и нэхъыбэм Библием итым тохуэ. Абы къыхэкІыу, лІым ищІ унафэхэр и щхьэгъусэм диІыгъын хуейщ (Апостолхэм 5:29; Ефес 5:24). ЩхьэгъусэфІу икІи анэфІу щыт цІыхубзым и унагъуэм и нэІэ тригъэтщ. (Къеджэ Тит  2:4, 5.) ЦІыхубзыр псэемыблэжу и унагъуэм кІэлъыплъмэ, и лІымрэ и бынхэмрэ ар нэхъыфІыжу къалъагъунущ икІи пщІэ нэхъыбэу къыхуащІынущ (Притчи 31:10, 28).

10. Зэман гуэркІэ зэдэмыпсэуну е нэчыхьыр ирагъэкъутэжыпэну зэщхьэгъусэхэм унафэ ящІ хъуну?

¹⁰ Языныкъуэ зэщхьэгъусэхэм унафэ ящІ зэман гуэркІэ зэдэмыпсэуну е нэчыхьыр ирагъэкъутэжыпэну. Ауэ, Библием зэрыжиІэмкІэ, «фызыр и лІым бгъэдэкІыж хъунукъым», «лІыми и фызыр иригъэкІыж хъунукъым» (1 Коринф 7:10, 11). ЦІыхум зэман гуэркІэ и щхьэгъусэр къигъанэу  щхьэхуэу псэуну унафэ щІищІым щхьэусыгъуэ иІэфынущ. Ауэ апхуэдэ унафэ ищІын ипэ, цІыхур а Іуэхум фІыуэ егупсысын хуейщ. Нэчыхьыр егъэкъутэжыным теухуауэ сыт Библием щыжыІар? ТІум я зым зинэ ищІауэ щытмэ, адрейр хуитщ нэчыхьыр иригъэкъутэжыну (Маттэ 19:9).

11. Сыт сабийхэр псом хуэмыдэу зыхуэныкъуэр?

¹¹ Адэ-анэхэ, фи сабийхэм зэрыхъукІэ щІэх-щІэхыурэ фадэуэршэр. Ахэр фэ къыфхуэныкъуэщ. Иеговэ теухуауэ абыхэм яжефІэ. Аращ фи бынхэм нэхъыфІ дыдэу яхуэфщІэфынур (Второзаконие 6:4—9).

12. Адэ-анэхэм я сабийхэр яхъумэн щхьэкІэ сыт ящІэн хуейр?

¹² КІуэтэхукІэ дыщыпсэу дунейр нэхъ бзаджэ мэхъу. Абы къыхэкІыу, зыгуэрым уи сабийм Іей гуэр кърищІэнкІэ хъунущ, псалъэм папщІэ лей кърихынкІэ хъунущ. Языныкъуэ адэ-анэхэм я дежкІэ тыншкъым апхуэдэ темэхэр я бынхэм я гъусэу зэпкърахыну. Ауэ уэ уи къалэнщ уи сабийр Іейм щыпхъумэну икІи ар цІыху бзаджэм ІущІэмэ ищІэн хуейр къыгурыбгъэІуэну. Адэ-анэхэ, фи сабийхэр фхъумэну фи къалэнщ * (1 Петр 5:8).

13. Дапхуэдэу адэ-анэхэм я сабийхэр зэрагъэсэн хуейр?

¹³ Адэ-анэхэм я сабийхэр ягъэсэну я къалэнщ. Дапхуэдэу? Сабийхэм зэпымыууэ еущиен хуейщ, ауэ пхъашэу е гущІэгъуншэу абыхэм уахущыт хъунукъым  (Иеремия 30:11). Сабийм и гум уемыуэн щхьэкІэ укъэгубжьауэ абы и щыуагъэр къыгурыбгъэІуэну иужь уимыхьэ (Притчи 12:18). КъодэІуэн щІыхуейр сабийм щабэу къыгурыгъаІуэ (Ефес 6:4; Еврейхэм 12:9—11; 30-нэ Приложением еплъ).

14, 15. Сабийхэр я адэ-анэхэм щІедэІуэн хуейр сыт?

¹⁴ Хьисэ сыт щыгъуи и Адэм хуэжыІэдаІуэт, ар щымытынш къэхъуми (Лука 22:42; Иуан 8:28, 29). Иеговэ хуейщ сабийхэр я адэ-анэхэм едэІуэну (Ефес 6:1—3).

¹⁵ Сабийхэ, фи адэ-анэхэм федэІуэну иныкъуэм деж мытыншми, зыщывмыгъэгъупщэ: фэ фыжыІэдаІуэмэ, фи адэ-анэри Иегови абы егъэгуфІэ * (Притчи 1:8; 6:20; 23:22—25).

16. 1) Іей гуэр уигъэщІэн щхьэкІэ Иблисым хэт къигъэсэбэпыфынур? 2) Иеговэ фІыуэ зылъагъухэм нэмыщІ, нэгъуэщІ умыгъэныбжьэгъуным мыхьэнэшхуэ щІиІэр сыт?

 ¹⁶ Иблисым уи ныбжьэгъухэр къигъэсэбэпыфынущ Іей гуэр уигъэщІэн щхьэкІэ. Екъуб ипхъу Динэ уигу къэгъэкІыж. Иеговэ фІыуэ зымылъагъухэр ныбжьэгъу зэрищІам езы Дини и унагъуэми гуауэ куэд къахуихьащ (ЩІэдзапІэ 34:1, 2). Алыхьыр фІыуэ зымылъагъухэр уэри ныбжьэгъу пщІымэ, абыхэм ухуагъэушыфынущ Иеговэ илъагъу мыхъу гуэр пщІэну. Блэжьа гуэныхьым уэри уи унагъуэми гуауэ къыфхуихьынущ. Алыхьми абыкІэ и жагъуэ пщІынущ (Притчи 17:21, 25). Аращи, Иеговэ фІыуэ зылъагъухэм нэмыщІ, нэгъуэщІ умыгъэныбжьэгъуным мыхьэнэшхуэ иІэщ (1 Коринф 15:33).

17. Иеговэ унагъуэм щыщхэм сыт къахуигъэувыр?

¹⁷ Унагъуэр гугъуехь куэдым щыхъума хъунущ, абы щыщ дэтхэнэри Алыхьым хуэжыІэдаІуэмэ. ЛІыхэ, фи щхьэгъусэхэр фІыуэ флъагъу икІи абыхэм щабэу фахущыт. Фызхэ, филІхэм фахуэІурыщІэ икІи пщІэ яхуэфщІ. Притчи 31:10—31 зи гугъу ищІ цІыхубзым щапхъэ тефх. Адэ-анэхэ, фи сабийхэм Алыхьыр фІыуэ ялъагъуу вгъасэ (Притчи 22:6). Адэхэ, фи унагъуэхэм фІыуэ факІэлъыплъ (1 Тимофей 3:4, 5; 5:8). Сабийхэ, фи адэ-анэхэм жаІэм федаІуэ (Колоссэ 3:20). Унагъуэм щыщ дэтхэнэри зэрыщыуэнкІэ хъунур зыщывмыгъэгъупщэ. Дэфчыхыну фыхьэзыру фыщыт икІи зым адрейм хуэвгъэгъу. Зэрытлъагъущи, Библием итщ унагъуэм щыщ дэтхэнэми хуэгъэза чэнджэщыфІхэр.