10-НЭ УПЩІЭР
Библиер сэ дауэ сэбэп къызэрысхуэхъунур?
СЫТЫТ УЭ ПЩІЭНУР?
Уи нэгу къыщІэгъыхьэт мыпхуэдэ Іуэхугъуэ: Дейвид гъуэгу имыцІыхум тету зыщІыпІэ макІуэ. Уэрамхэм я цІэхэмкІэ икІи нэгъуэщІ нэщэнэхэмкІэ Дейвид къыгуроІуэ зэрыгъуэщар. Шэч хэмылъу, ар и гъуэгум текІауэ аращ.
Дейвид и пІэ уитамэ, сытыт уэ пщІэнур?
КЪЭУВЫІИ ЕГУПСЫС!
Іэмал зыбжанэ уиІэщ уэ:
-
1. ГъуэгумкІэ ущІэупщІэну.
-
2. Картэ е навигатор къэбгъэсэбэпыну.
-
3. Зыгуэрурэ сынэсынщ жыпІэу, гъуэгум пыпщэну.
ДауикІ, 3-нэ Іэмалыр нэхъ мыхьэнэншэщ.
2-нэ Іэмалыр япэм нэхърэ нэхыфІщ. Сыт щхьэкІэ жыпІэмэ картэр е навигаторыр гъуэгум утетыху къыбдэІэпыкъунущ, уздэкІуэныр пэжу уигъэлъагъуу.
Апхуэдэ дыдэу Библиер уэ сэбэп къыпхуэхъунущ!
Дуней псом щыІэ тхылъхэм нэхърэ нэхъыбэу къыдэкІ тхылъыр къыбдэІэпыкъунущ...
-
гъащІэм узрихьэлІэ гугъуехьхэм упэлъэщыну,
-
фІыкІэ зыпхъуэжыну,
-
гъащІэ насыпыфІэ епхьэкІыну.
МЫХЬЭНЭШХУЭ ЗИІЭ УПЩІЭХЭМ Я ЖЭУАПХЭР
Псэлъэн зэрыщІэддзэу дэ упщІэ ттыуэ щІыдодзэ.
-
Сыт уафэр щІэщхъуантІэр?
-
Вагъуэхэр сыт къызыхэщІыкІар?
Зэманыр кІуэтэху ди гъащІэм къыщыхъу Іуэхугъуэхэм дегупсысын щІыдодзэ.
Алыхьым и Псалъэ Библием куэд щІауэ мы упщІэхэм я жэуапхэр итмэ-щэ?
Куэдым я гугъэщ, Библиер таурыхърэ шыпсэкІэ зэхэлъу, ар ди зэманым хуэмыкІуэу е зэхъуэкІыныгъэ халъхьауэ дзыхь хуэпщІ мыхъуну. Ауэ ар зи лажьэр Библиера, хьэмэрэ цІыхухэм а тхылъым теухуауэ яІэ еплъыкІэрауэ пІэрэ?
Псалъэм папщІэ куэдым я гугъэщ мы дунейр Алыхьым и ІэмыщІэм илъу Библием жиІэу. Ауэ апхуэдэу щыту пІэрэ? Мы дунейр утІыпщауэ щытщ! Ар гъэнщІащ гуауэкІэ, насыпыншагъэкІэ, узыфэхэмкІэ, лІэныгъэкІэ, тхьэмыщкІагъэкІэ, гузэвэгъуэшхуэхэмкІэ. Дауэ фІыуэ дыкъэзылъагъу Алыхьым а псори къызэрыбгъэдэкІынур?
Ухуейт абы и жэуапыр къэбгъуэтыну? Уэ гъэщІэгъуэн пщыхъунущ дунейм и тепщэу Библием жиІэр хэтми къапщІэм!
ДауикІ, уэ гу лъыптауэ къыщІэкІынщ, мы брошюрэм ит чэнджэщхэр Библием зэрытегъэщІам. Иеговэ и Щыхьэтхэм шэч къытрахьэкъым, Библием дзыхь зыхуэпщІ хъуну чэнджэщхэр зэритым. Сыт щхьэкІэ жыпІэмэ ар Алыхьым къыбгъэдэкІа тхыгъэщ икІи «цІыхухэм щыпкъагъэр ебгъэщІэнкІи, уегиинкІи, бгъэдэІуэнкІи... щхьэпэщ» (2 Тимофей 3:16, 17). Библиер куэд щІауэ ятхами, ар ди зэманым хуокІуэ икІи уэ ухущІегъуэжынукъым, а тхылъыр бджыну мурад пщІымэ!