Уи нэгу къыщІэгъэхьэт мыпхуэдэ Іуэхугъуэ. Илъэс 17 хъу Джефф унэ къалэнхэр псори игъэзэщІащ. Иджы зигъэпсэхуми хъунущ. Абы телевизорыр щІегъанэри нэхъыфІ дыдэу илъагъу креслэм тыншу йотІысхьэ.

А зэманым ирихьэлІэу и адэр губжьауэ пэшым къыщІохьэ.

Джефф и пІэ уитамэ, сытыт уэ пщІэнур, Іуэхур абы нэмысын щхьэкІэ?

Адэ-анэм епсэлъэныр машинэ къехуэкІыным ебгъэщхь хъунущ. Зы гъуэгур гъэбыдауэ щытмэ, нэгъуэщІыпІэкІэ укъежэкІ хъунущ.

 ЩАПХЪЭ:

«Си адэм сепсэлъэну къызохьэлъэкІ.— жеІэ Лия,— Зыгуэр щыжесІэжым деж „СынодэІуакъым, сытыт жыпІар?“ жиІэу ар къыщызэупщІ къохъу»

ЛИЯ ІЭМАЛИЩ ИІЭЩ.

1. 1. И адэм текІиену.

   Лия къэгубжьауэ жеІэ: «Папэ, сыт укъыщІызэмыдаІуэр? ЖысІэр къыпфІэмыІуэхуу ара?»

2. 2. АфІэкІа абы и гугъу хуимыщІыну.

   Лия мурад ещІ зыгъэгузавэм теухуауэ и адэм емыпсэлъэну.

3. 3. Нэхъ хуэкІуэ зэман къыхихыну.

   Лия зэман дэкІауэ къытрегъэзэжри и адэм иджыри зэ йопсалъэ е письмокІэ абы зыхуегъазэ.

Уэ дауэ уеплърэ, Лия сыт хуэдэ Іэмал къыхихмэ нэхъыфІ?

ДЕГЪЭГУПСЫС. Лия и адэр и гупсысэхэм хэтщи и пхъур зэрынэщхъейр илъагъукъым. Аращи, Лия 1 Іэмалыр къыхихыу и макъым зригъэІэтмэ, и адэм къэхъуар къыгурыІуэнукъым икІи нэхъыфІу къедэІуэнукъым. Абы нэмыщІ апхуэдэ псэлъэкІэм пщІэ хэлъкъым (Ефес 6:2). ГурыІуэгъуэщ мы Іэмалым фІым узэрыхуимышэнур.

2-нэ Іэмалыр нэхъ тынш дыдэщ, ауэ нэхъыфІ дыдэкъым. Сыт щхьэкІэ жыпІэмэ Лия и адэм епсалъэу къэхъуар сытми жриІэн хуейщ, ар абы къыдэІэпыкъуфын щхьэкІэ. Зэрытлъагъущи, зыри жомыІэныр хэкІыпІэкъым.

3-нэ Іэмалыр Лия къигъэсэбэпмэ, нэгъуэщІ гъуэгу къилъыхъуэу жыпІэ хъунущ. Ар иджыри зэ и адэм епсэлъэнущ е письмо хуитхынущ. ИкІи абы письмо итхмэ, нэхъ псынщІэу гупсэхугъуэ игъуэтыну къыщІэкІынщ.

ПисьмомкІэ Лия и гупсысэхэр и адэм хуиІуэтэфынущ. Ар письмом къеджэмэ, и пхъум жиІэну зыхуеяр нэхъыфІу къыгурыІуэнущ. Апхуэдэу, 3-нэ Іэмалыр Лия къигъэсэбэпмэ, абыи и адэми яфІ къикІынущ. Лия и адэм епсалъэмэ е письмо хуитхмэ, ар мыпхуэдэ чэнджэщым тету жыпІэ хъунущ: «ЗэгурыІуэныгъэ къэзыхь Іуэхухэм... я ужь дивгъэт» (Рим 14:19).

Сыт иджыри Лия ищІэ хъуныр?

Иджыри зы Іэмалрэ абы къыпэкІуэнкІэ хъунымрэ тхы.

Зыщомыгъэгъупщэ: иныкъуэхэм деж уи адэ-анэм зэхахыр уэ жыпІэну узыхуейракъым.

ЩАПХЪЭ:

«УщІэнэщхъейр сыт?» жаІэу уи адэ-анэр къоупщІ. Уэ абыхэм жэуап ибот: «Абы сытепсэлъыхьыну сыхуейкъым».

Ауэ уи адэ-анэм мыпхуэдэу зэхах: «Си ныбжьэгъухэм садэгуашэм нэхъ къызощтэ, фэ зыгуэр вжесІэж нэхърэ».

Къызыщыгъэхъут, зы гугъуехь гуэр упэщІэхуауэ. Уи адэ-анэм къыбжаІэ къыбдэІэпыкъуну зэрыхуейр. Уэ абыхэм яжыбоІэ: «Фымыгузавэ, сэ езым зыхэзгъэкІынщ ар».

• Дауэ уи адэ-анэм ар къазэрыгурыІуэфынур?

• Сытыт жыпІамэ нэхъыфІыр?