Мыпхуэдэ Іуэхугъуэ къызыщыгъэхъут: Тим и ныбжьэгъухэм и гъусэу мэджэгу. Абы топыр едзри я гъунэгъум и машинэм и абджыр екъутэ.

Тим и пІэм уитамэ, сытыт уэ пщІэнур?

УЭ ІЭМАЛИЩ УИІЭЩ:

1. 1. УщІэпхъуэжыну.

2. 2. НэгъуэщІым теплъхьэну.

3. 3. Зыбумысыжу, уи гъунэгъум пкъутам и уасэр ептыжыну жепІэну.

Уэ 1 Іэмалыр къыхэпхыну нэхъ къэпщтэнкІэ хъунущ. Ауэ сыт хуэдэ къуаншагъэ умыщІами, сыт щыгъуи зыбумысыжым нэхъыфІщ. Абы щхьэусыгъуэ зыбжанэ иІэщ.

1. Апхуэдэу пщІэныр тэмэмщ.

   Библием мыпхуэдэу итщ: «Іуэху псомкІи щыпкъагъэ дигу илъу дыпсэуну дыхуейщ» (Еврейхэм 13:18).

2. Зыбумысыжым нэхъ тыншу къыпхуагъэгъунущ.

   Библием жеІэ: «Зи гуэныхьыр щІэзыхъумэм ехъулІэныгъэ иІэнукъым, ауэ зызумысыжу ахэр къэзыгъанэм гущІэгъу хуащІынущ» (Притчи 28:13).

3. Псом нэхъапэр — Алыхьыр богъэгуфІэ.

   Библием итщ: «ЦІыху бзаджэм Иеговэ гущыкІ хуещІ, ауэ цІыху пэжхэмрэ абырэ я зэхуаку зэхущытыкІэфІ дэлъщ» (Притчи 3:32).

Илъэс тІощІ хъу Каринэ машинэр псынщІэІуэу къызэрырихуэкІам щхьэкІэ къыхуэкІуа штрафыр и адэм къримыгъэщІэну мурад ищІащ. Ауэ ар къыщІэщащ. «Зы илъэс хуэдиз дэкІауэ штраф къысхуэкІуар папэ илъэгъуащ.— игу къегъэкІыж Каринэ,— Сэ езым бэлыхь зыхэздзэжащ».

Мы щапхъэм сытым дыхуригъасэрэ? Каринэ жеІэ: «Уи къуаншагъэхэр щІэпхъумэу щытмэ, уи Іуэхур нэхъ Іей хъуну аращ. Гува-щІэхами жэуап птыжынущ!»

Библием щыжыІащ: «Дэ псоми Іуэхугъуэ куэдкІэ гуэныхь дощІэ» (Екъуб 3:2). ИкІи зэрытлъэгъуащи, уи щыуагъэхэмкІэ занщІэу зыбумысыжмэ нэхъыфІщ. Абы уэ Іэдэбагъ зэрыпхэлъыр икІи узэрыбалигъыр къегъэлъагъуэ.

КъыкІэлъыкІуэ лъэбакъуэр — уи щыуагъэхэм дерс хэпхыныращ. Верэ къыддогуашэ: «Сэ си щыуагъэхэм дерс хэсхыну сыхэтщ, нэхъыфІ сыхъун щхьэкІэ, икІи апхуэдэ щыуагъэ афІэкІа сымыщІэжын щхьэкІэ». Иджы къэдгъащІэ, уи щыуагъэхэм дерс зэрыхэпхыфынур.

Уи адэм и велосипедыр къэбжыхьыну къапщтэри пкъутащ. Сыт уэ пщІэнур?

• Гу лъимытэну ущыгугъыу, уи адэм зыри жепІэнукъым.

• Уи адэм ар зэрыпкъутар жепІэжынущ.

• Уи адэм къэхъуар жепІэжынущ, ауэ ар нэгъуэщІ гуэрым ищІауэ жыпІэнущ.

Уэ экзаменыр пхуэтакъым, фІыуэ зыхуэбгъэхьэзыратэкъыми. Сыт уэ пщІэнур?

• Экзаменыр гугъу Іейуэ щытауэ жыпІэнущ.

• ФІыуэ зэрызомыгъэхьэзырар жыпІэжынущ.

• Уи егъэджакІуэр фІыуэ къыпхущымыту жыпІэнущ.

 ИщхьэмкІэ къыщыхьа щапхъэхэм иджыри зэ еплъыжи, адэмрэ егъэджакІуэмрэ я пІэм зигъэувэ. Уи къуаншагъэр пэжу жыпІэжу щытмэ, дауэ ахэр къызэрыпхущытыныр? Ауэ сыт абыхэм я гугъэныр, ар щІэпхъумэу щытмэ?

Иджы иужьрей илъэсым пщІа щыуагъэ гуэр уигу къэгъэкІыжи, къыкІэлъыкІуэ упщІэхэм жэуап ет.

Сыт хуэдэ щыуагъэт ар? Сыт уэ абы иужькІэ пщІар?

• ЩІэпхъумащ.

• НэгъуэщІым теплъхьащ.

• ЗанщІэу зыбумысыжащ.

Уи щыуагъэр щІэпхъумауэ щытмэ, сыт абы иужькІэ узэгупсысар?

• «Сыту фІыт зыми къызэримыщІар!»

• «СыхущІегъуэжащ, пэжыр жысІэн хуеящ.»

Дауэ пщІамэ нэхъыфІт?

Уи щыуагъэм сытым ухуригъэса?

Сыт языныкъуэ цІыхухэр я щыуагъэхэмкІэ заумысыжыну щІыхуэмейр?

Уи къуаншагъэхэр сыт щыгъуи щІэпхъумэну ухэтмэ, сыт цІыхухэм къыпхужаІэнур? Зыбумысыжмэ, дауэ ахэр къызэрыпхущытынур? (Лука 16:10).