НУХЬ фызрэ къуищрэ иІэт. И къуэхэм зэреджэр Сим, Хам, Иафетт. Абыхэм псоми фыз яІэт. Нухь и унагъуэр, псори зэгъусэу, цІыхуий хъут.

Мызыгъуэгу Алыхьым Нухь ищІэн хуейуэ жриІащ зы Іуэхугъуэ хьэлэмэт гуэр. Кхъухьышхуэ ищІын хуейуэ арат абы. Кхъухьыр и инагъкІэ къызэрыгуэкІ кхъухьым хуэдизт, ауэ и теплъэкІэ ашык кІыхьышхуэм нэхъ ещхьт. «Къатищу зэтету щІы,— жиІащ Алыхьым,— и кІуэцІри пэш-пэшу зэпыуд». Нухь кхъухьым хуищІат и унагъуэм, псэущхьэхэм иужькІэ къахуэсэбэпыжыну шхыным щхьэкІэ пэшхэр.

Апхуэдэуи Алыхьым Нухь жриІащ кхъухьым псы кІуэцІрымыкІын щхьэкІэ, зыгуэр ирищІэн хуейуэ. Алыхьым жиІащ: «Псыдзэшхуэ къэзгъэхъунурэ дунейр скъутэжынущ. Кхъухьым имысхэр псори хэкІуэдэнущ»,— жиІэри.

Нухь и къуэхэр и гъусэу Алыхьым жиІэм едаІуэри кхъухьыр щІын щІадзащ. Адрейхэр къащыдыхьэшхт абыхэм. Ахэр зэрыщытауэ Іейуэ къэнэжхэт. Алыхьым и псалъэхэр Нухь цІыхухэм щажриІэм, зыми и фІэщ хъуакъым.

Кхъухьыр зэрыиным щхьэкІэ, и щІыным зэманышхуэ ихьащ. ИкІэм-икІэжым, илъэс куэд дэкІа иужь, кхъухьыр хьэзыр хъуащ. Иджы Алыхьым Нухь жриІащ хьэкІэкхъуэкІэхэр кхъухьым иришэну. ХьэкІэкхъуэкІэ гуэрхэр ишэн хуейт тІурытІурэ — зэхъузэбзу. Адрейхэр — блырыблу. Апхуэдэуи къуалэбзухэмрэ джэдкъазхэмрэ иришэну Алыхьым Нухь жриІащ. Алыхьым зэрыжриІам хуэдэу Нухь псори ищІащ.

Иужь дыдэу кхъухьым ихьэжащ Нухьрэ и унагъуэмрэ. Алыхьым бжэр хуищІыжащ. Нухь и унагъуэр и гъусэу кхъухьым ису адэкІэ къэхъуным ежьэрт. Къызыщыгъэхъут, адэкІэ къэхъуным уежьэу абыхэм я гъусэу уэри кхъухьым уису. Пэж дыдэу Алыхьым жыхуиІа псыдзэшхуэр къэхъуну пІэрэ?