МЫ ЩІАЛЭ цІыкІуитІыр зыкІи зэщхькъым, пэжкъэ? ПщІэрэ абыхэм я цІэр? ЩакІуэ щІалэ цІыкІум и цІэр Исавщ, мэл цІыкІухэм кІэлъыплъ щІалэ цІыкІум зэреджэр Екъубщ.

ЗэтІолъхуэныкъуэ Исаврэ Екъубрэ — Ревеккэрэ Исхьэкърэ я къуэщ. Исав фІыуэ щакІуэт, щІэх-щІэхыури унагъуэм яшхын гуэр къихьти, Исхьэкъ ар нэхъыфІыу илъагъут. Ауэ Ревеккэ Екъубт нэхъыфІыу илъагъур, сыт щхьэкІэ жыпІэмэ ар щэхут икІи Іэсэт.

Апщыгъуэм абыхэм я адэшхуэ Ибрэхьим иджыри псэут. Иеговэ теухуауэ абы жиІэж хъыбархэр Екъуб фІыщэу илъагъуу къыщІэкІынт. Ибрэхьим лІащ илъэс 175 хъууэ. ЗэтІолъхуэныкъуэхэр апщыгъуэм илъэс 15 хъут.

Илъэс 40 щыхъум Исав фызитІ къишащ, ханаан щІыналъэм щыщу. Ар Іейуэ я жагъуэ хъуащ Исхьэкърэ Ревеккэрэ, сыт щхьэкІэ жыпІэмэ а цІыхубзхэр Иеговэ хуэлажьэтэкъым.

ИужькІэ зы Іуэхугъуэ гуэр щхьэкІэ Исав Іейуэ къигъэгубжьащ Екъуб. Исхьэкъ и къуэ нэхъыжьым Алыхьым и нэфІыр зэрыщыхуэныр щыжриІэну зэманыр къэсат. Исав Екъуб нэхърэ зэрынэхъыжьым щхьэкІэ, Алыхьым и нэфІыр къылъысыну щыгугът. Ауэ Алыхьым и нэфІыр къылъысын щхьэкІэ абы иІа хуитыныгъэр ипэІуэкІэ Екъуб ирищат. Апхуэдэуи щІалэ цІыкІухэр къыщамылъхум Алыхьым жиІат и нэфІыр къызылъысынур зэры Екъубыр. Зэрыхъуари апхуэдэущ. Исхьэкъ Алыхьым и нэфІыр зылъигъэсари Екъубщ.

ИужькІэ ар Исав къыщищІам, Іеищэу къэгубжьащ. АпхуэдизкІэ къэгубжьати, псалъэ итащ Екъуб иукІыну. Абы Ревеккэ Іейуэ иригузэващ. Арати Исхьэкъ жриІащ: «Гузэвэгъуэ Іейщ, Екъуби ханаан цІыхубз фызу къишэмэ»,— жиІэри.

Апщыгъуэм Исхьэкъ Екъуб къриджэри жриІащ: «Ханаан цІыхубз къомышэ. Абы и пІэкІэ Харран, уи адэшхуэ Вафуил и унэм кІуэи, къашэ абы и къуэ Лаван и пхъухэм щыщ гуэр».

Екъуб и адэм жиІам едаІуэри, асыхьэтым Харран кІуэ гъуэгуанэ жыжьэм теуващ, и Іыхьлыхэм деж кІуэну.