ЕПЛЪЫТ, хэт деж Динэ хьэщІапІэ здэкІуэр? Ханаан щІыналъэм щыпсэу цІыхубзхэм я дежщ. Абы и адэ Екъуб идэнут ар? Мы упщІэм нэхъ тыншу жэуап пхуетын щхьэкІэ Ибрэхьимрэ Исхьэкърэ ханаан цІыхубзхэм язэрыхущытар къэтщІэжынти.

Хуейт Ибрэхьим ханаан хъыджэбз Исхьэкъ къригъэшэну? ДауикІ, хьэуэ. Хуеят Исхьэкърэ Ревеккэрэ я къуэ Екъуб ханаан цІыхубз кърагъэшэну? ДауикІ, хьэуэ. ПщІэрэ сыт щхьэкІэми?

Сыт щхьэкІэ жыпІэмэ Ханааным щыпсэухэр Алыхь нэпцІхэм хуэлажьэрт. ЛІыфІ, фызыфІ, е ныбжьэгъуфІ хъун хуэдэу ахэр цІыхуфІтэкъым. Абы щхьэкІэ, уи фІэщ щІы, и пхъур ханаан хъыджэбзхэм ныбжьэгъу зэрахуэхъуар къищІатэмэ, ар Екъуб зэримыдэнур.

ДауикІ, Динэ насыпыншагъэ къыщыщІащ. Щыплъагъурэ сурэтым Динэ еплъ ханаан цІыхухъур? Абы и цІэр Сихемщ. Зэгуэрым, Динэ хьэщІапІэ къыщыкІуам, Сихем Динэ къиубыдри залымыгъэкІэ и гъусэу игъэгъуэлъащ. Абы ищІар щІэпхъаджагъэт, сыт щхьэкІэ жыпІэмэ зэлІзэфызхэращ зэгъусэу гъуэлъыну хуитыр. Сихем Динэ ирищІа щІэпхъаджагъэм насыпыншагъэ куэд кърикІуащ.

Динэ иращІар къыщащІэм, и дэлъхухэр Іейуэ къэгубжьащ. Псом хуэмыдэу Симеонрэ Левиерэ. ЯмыщІэххэу джатэхэр яІыгъыу къалэм дыхьэри, къалэдэсхэм теуащ ахэр. ИтІанэ абыхэм я къуэшхэр я гъусэу Сихемрэ цІыхухъуу къалэм дэсхэмрэ зэтраукІащ. Апхуэдэ гущІэгъуншагъэм Іейуэ къигъэгубжьащ Екъуб.

Апхуэдиз насыпыншагъэм я къежьапІэ хъуар сыт? Алыхьым и хабзэхэм емыдаІуэ цІыхухэр Динэ ныбжьэгъу зэрищІаращ. Дэ апхуэдэ ныбжьэгъухэр диІэну дыхуейкъым, пэжкъэ?