ЗЭГУЭР шыд псалъэу зэхэпха уэ? «Хьэуэ,— жыпІэнкІэ хъунущ.— Псэущхьэхэр псэлъэфкъым». Ауэ Тхыгъэ ЛъапІэм шыд псалъэ гуэрым и гугъу ещІыж. ИІэт, ар зэрыпсэлъэфар дауэми дегъэплъыт.

Израиль лъэпкъыр хьэзырт тІэкІу дэкІмэ Ханааным ихьэну. Моавитхэм япщ Валак Іейуэ израилхэм щышынэт. Абы егъакІуэ Валаам зи цІэ цІыху бзаджэр къригъашэу, ар игъакІуэу израилым иригъэбгыну. Валак Валаам ахъшэ куэд иритыну къигъэгугъати Валаам и шыдым тетІысхьэри Валак деж кІуэну ежьащ.

Иеговэ хуейкъым и лъэпкъым Валаам ебгыну. Абы къыхэкІкІэ егъакІуэ джатэ иІыгъыу мелыІыч, Валаам и гъуэгур зэхуищІыу къигъэувыІэну. Валаам мелыІычыр илъагъукъым, ауэ шыдым елъагъу. Арати, шыдыр абы зыгуэрурэ фІэкІыну хэтщ хэтри, щымыхъужыххэм гъуэгум тетІысхьащ. Валаам Іейуэ абы къигъэгубжьауэ шыдыр башкІэ еукІ.

Абы иужькІэ шыдым жиІэр Валаам зэхихыу Иеговэ ещІ.

— Сыт сыбукІыну уэсщІар? — йоупщІ шыдыр.

— Лей къызыбох,— зехъунщІэ Валаам.— Иджыпсту джатэ сІыгъатэмэ, узукІат!

— Зэгуэр мыпхуэдэу зысщІа? — щІоупщІэ шыдыр.

— Хьэуэ,— йогупсысыж Валаам.

Абдеж Иеговэ Валаам и нэр къызэІуехри абы къелъагъу джатэ иІыгъыу гъуэгур зэхуэзыщІауэ щыт мелыІычыр. МелыІычым жеІэ: «Сыт шыдым и лажьэу ущІеуэр? Израилым уебгыну укІуэ хъунукъыми уи гъуэгур зэхуэзсщІауэ аращ. Уи шыдым лъэныкъуэкІэ зыспэщІимыдзауэ щытамэ, шыдым зыри езмыщІэу уэрат сыукІынур».

«Гуэныхь къэсхьащ. Си гъуэгум утету сщІакъым»,— жеІэ Валаам. МелыІычым Валаам еутІыпщыжри, ар Валак деж кІуэну гъуэгу тоувэж. Япэм хуэдэу Валаам иджыри Израилым ебгыну хэтщ, ауэ абы и пІэкІэ ар Иеговэ хегъэзыхь щэней израилым ехъуэхъуну.