ЕУУЕЙ мыгъуэ! Сыт иджы мы цІыхухэм ящІэр? Алыхьым и пІэкІэ танэм йолъэІу! Сыт щхьэкІэ?

Мусэ куэдрэ бгым къехыжтэкъыми, цІыхухэм унафэ ящІ: «Мусэ къыщыщІар тщІэкъыми, иІэ мы щІыналъэм дизышыжын тхьэ дывгъэщІ».

Мусэ и къуэш Хьэрун арэзы мэхъури жеІэ: «Хъунщ, иІэ фи тхьэкІумэм илъ дыщэ тхьэгъухэр къифхи къысхуэфхь». ЦІыхухэм къахьа тхьэгъухэр егъэткІури, дыщэм танэ къыхещІыкІ Хьэрун. Арати, цІыхухэр къогуфІэж: «Мис Мысырым дыкъизышыжа ди Алыхьыр!» Абы иужькІэ абыхэм джэгушхуэ ящІри а дыщэм къыхэщІыкІа танэр ягъэлъэпІэн щІадзэ.

Ар Иеговэ къелъагъури абы Іейуэ къегъэгубжь. Муси унафэ хуещІ: «ПсынщІэу ехыж. ЦІыхухэм гуэныхьышхуэ ящІэ. Си унафэхэр ящыгъупщэжауэ дыщэм къыхэщІыкІа танэм йолъэІу».

Мусэ пІащІэу бгым къохыжри мис илъагъур: цІыхухэр къафэу, уэрэд жаІэу дыщэм къыхэщІыкІа танэм и хъуреягъкІэ къакІухь! Мусэ абы апхуэдизкІэ къигъэгубжьати мывэ пІащІитІыр тредзэри щыкъуейуэ екъутэ. ИтІанэ дыщэм къыхэщІыкІа танэр игъэткІужри къэнар еущэбыж.

ЦІыхухэм а ящІар Іей дыдэт. Абы къыхэкІкІэ Мусэ цІыхухъу гуэрхэм унафэ яхуещІ джатэ къащтэну. «ФыукІ, дыщэм къыхэщІыкІа танэр зыгъэлъэпІа цІыху мыхъумыщІэхэр»,— яжреІэ абыхэм. Арати яукІ цІыху минищым нэс! Мы Іуэхугъуэм дигъэлъагъукъэ-тІэ дэ дызэрысакъын хуейр, Иеговэ къэдгъанэу адрей тхьэ нэпцІхэр дымыгъэлъэпІэн щхьэкІэ?