ПЩІЭРЭ израилхэм къащыпыр сытми? И теплъэкІэ ар сытхъум ещхьщ: хужьщ, щыкъуейщ, зэкІэрощэщ. Ауэ мыр сытхъукъым. АтІэ шхыныгъуэ гуэрщ.

Мази дэкІакъым израиль лъэпкъыр Мысырым къызэрикІыжрэ. Иджы ахэр губгъуэ нэщІым итщ. Пшхы хъуну мыбы къыщыкІ къэкІыгъэр мащІэщи цІыхухэр мэтхьэусыхэ: «Сыт Иеговэ дыщІимыгъэлІар Мысырым дыщыщыІам щыгъуэ, зы мыхъуами, абы дызыхуей псори щытшхт».

Арати Иеговэ ахэр къегъэгугъэ: «Фшхыныр уафэм къыфхуезгъэщэщэхынщ»,— жеІэри. ЖиІари игъэзэщІащ. ЕтІуанэ пщэдджыжьым израиль лъэпкъым хужьу щІым телъыр ялъагъури зищІысыр къагурыІуэкъым. «Мыр сыт?» — жаІэ.

Мусэ яжреІэ абыхэм: «Мыр Иеговэ къывита шхыныгъуэращ». ЦІыхухэм абы МЭНН фІащ. И ІэфІагъкІэ ар фокІэ пща щІакхъуэм ещхьт.

Мусэ цІыхухэм яжреІэ: «Псоми фхуэшхыным хуэдизщ къэфщыпынур». Пщэдджыжь къэс апхуэдэу къащыпт. ИтІанэ дыгъэр къэплъа иужь, щІым щылъу къэнар ткІужырт.

Мусэ иджыри яжреІэ мэнныр етІуанэ махуэ хъуху щамыгъэлъыну. Ауэ зыгуэрхэр абы едаІуэкъым. ПщІэрэ итІанэ къэхъур сытми? ЕтІуанэ махуэ хъуху къагъэна мэнным хьэпІацІэр къыхэлъэлъу хищІэрт, мэ къищтэт!

Ауэ тхьэмахуэм и зы махуэ гуэрым Иеговэ яжриІащ абыхэм къащыпым нэхърэ тІукІэ нэхъыбэ къащыпыну. Ар еханэ махуэрат. Иеговэ зэрыжиІамкІэ, израилхэм мэнным щыщ етІуанэ махуэм щхьэкІэ къагъэнэн хуейт, сыт щхьэкІэ жыпІэмэ ебланэ махуэм мэнныр уафэм къехынутэкъым. Арати, ебланэ махуэм щхьэкІэ къагъэна мэнным хьэпІацІи хищІэртэкъым, мэи къищтэртэкъым! Ари зы телъыджэт!

Губгъуэ нэщІым итыхункІэ Иеговэ израиль лъэпкъыр мэннкІэ игъэшхащ.