СЫТУ щІалэ фо цІыкІу мыр, аракъэ? Мыр Самуелщ. Самуел и щхьэм Іэ дэзылъэр израилым и дин пашэ нэхъыщхьэ Илясщ. Адрейхэр Самуел Иляс деж къэзыша и адэ Елканрэ и анэ Аннэрэщ.

Самуел илъэсиплІ–тху хъуми аращ. Ауэ ар Иеговэ и шэтырым щыпсэунущ Илясрэ адрей дин пашэхэмрэ я гъусэу. Сыт-тІэ Елканрэ Аннэрэ иджыри апхуэдэу цІыкІуу Самуел Иеговэ щІратыр шатырым къулыкъу щырагъэщІэну. ИІэт къэтщІэнти.

Илъэс зыбжанэкІэ узэІэбэкІыжмэ, Аннэ гуауэшхуэ иІащ. Ар Іей дыдэу хуейт сабий иІэну, ауэ иІэтэкъым. Арати, зэгуэрым Аннэ Иеговэ и шэтырым кІуэри елъэІуащ: «Уа, Иеговэ, уигу сыкъэгъэкІыж! Къуэ къызэптмэ, игъащІэкІэ пхуэлэжьэну уэстынщ».

Иеговэ Аннэ и лъэІум жэуап къритащ. Мазэ бжыгъэ дэкІри абы Самуел къилъхуащ. Аннэ и къуэ цІыкІур фІы дыдэу илъагъут икІи ар зэрыцІыкІунитІэ лъандэрэ Иеговэ зыхуейм хуигъасэт. И лІым абы жриІащ: «Самуел тІэкІу къыдэкІуэтейрэ быдзышэр къыІурысчыжмэ, Иеговэ и шэтырым сшэнурэ къулыкъу щищІэну естынущ».

Мы сурэтми къыщыгъэлъэгъуар Елканрэ Аннэрэ Самуел къыщаша дэкъикъэращ. Самуел и адэ–анэм фІыщэу ягъэсащи ар Іейуэ щогуфІыкІ шэтырым щыІэу Иеговэ къулыкъу зэрыхуищІэнум. Илъэс къэс Аннэрэ Елканрэ къокІуэ шэтырым Иеговэ ягъэлъэпІэн, я къуэ цІыкІур ялъагъун щхьэкІэ. Гъэ къэс Аннэ Самуел къыхуехь Іэщхьэншэу бостеищІэ цІыкІу.

Гъэхэр макІуэ. Самуел япэм хуэдэу иджыри и къулыкъур щегъэзащІэ Иеговэ и шэтырым. Ар фІыуэ ялъагъу цІыхухэми Иегови. Дин пашэ нэхъыщхьэ Иляс и къуэ Офнирэ Финиесрэ цІыхуфІкъым. Абыхэм Іуэхугъуэ Іей куэд ящІэ, адрейхэри Иеговэ ирагъэдаІуэкъым. Иляс абыхэм дин пашэ къулыкъур яригъэІыгъын хуейтэкъым, ауэ зыри ищІэкъым.

Шатырым щащІэ зы Іуэхугъуэ Іей щхьэкІи Самуел зи щІалагъ къигъэнакъым Иеговэ къулыкъу хуищІэн. Иеговэ гурэ–псэкІэ фІыуэ зылъагъур мащІэти, Алыхьыр зэман куэдкІэ цІыхухэм щыщу зыми къепсалъэкъым. Самуел тІэкІу къыщыдэкІуэтейм, мыпхуэдэу къыщощІ:

Шатырым щІэлъу щыжейм щыгъуэ, макъ гуэр къоджэри къегъэуш. «Сы–мис,— жеІэри, къотэджри мажэ Иляс деж Самуел.— Укъызэджати, сы–мис».

— Сыноджакъым, кІуэи гъуэлъыж,— жеІэ Иляс. Арати, Самуел макІуэри мэгъуэлъыж.

ИтІанэ макъыр етІыуанэуи къоджэ: «Самуел!». Самуел къотэджри аргуэру мажэ Иляс деж. «Укъызэджати, сы–мис»,— жеІэ абы. Иляс жеІэ: «Си къуэ, сыноджакъым. КІуэ гъуэлъыж». Самуел аргуэру макІуэри мэгъуэлъыж.

— Самуел! — ещанэу къоджэ макъыр. Самуел ещанэу мажэ Иляс деж. «Сы–мис, иджы пэж дыдэу укъызэджа къыщІэкІынщ»,— жеІэ абы. ИтІанэ Иляс къыгуроІуэ абы къеджэр зэры–Иеговэр. Арати, абы Самуел жреІэ: «КІуэи гъуэлъыж, иджыри зэ къоджэу щытмэ, мыпхуэдэу жыІэ: «ЖыІэ Иеговэ, къодаІуэр уи пщылІыр»».

Иеговэ иджыри зэ къеджа нэужь, Самуел Иляс зэрыжиІам хуэдэу ещІ. Арати, Иеговэ Самуел къыжреІэ Илясрэ абы и къуэхэмрэ тезыр зэрытрилъхьэнур. Зэман гуэр дэкІа нэужь, Офнирэ Финеесрэ филистимлянхэм щезауэм щыгъуэ хуокІуадэ, Иляс ар зэрызэхихыу мэджалэри и пщэгурыгъыр зэрощІыкІри малІэ. Апхуэдэ щІыкІэкІэ Иеговэ жиІар къохъу.

Самуел ин мэхъури израилым и яужьрей хеящІэ мэхъу. Ар балигъ хъуа нэужь, цІыхухэр абы йолъэІу: «Ди унафэ зыщІын пащтыхь тхутегъэувэ»,- жаІэри. Самуел хуейкъым апхуэдэу ищІэну, сыт щхьэкІэ жыпІэмэ пэж дыдэу абыхэм я пащтыхьыр Иеговэщ. Ауэ Иеговэ абы къыжреІэ цІыхухэм жаІэр ищІэну.