УЛІАУЭ укъэхъужатэмэ, сыту пІэрэт уи анэм зыхищІэнур? Псом нэхърэ нэхъ насыпыфІэу зилъытэжынт! Ауэ цІыху лІар къэхъужыфыну? Зэгуэр къэхъуауэ пІэрэ апхуэдэ?

Мы сурэтым ит цІыхухъур, цІыхубзыр, щІалэ цІыкІур плъагъурэ? Мы цІыхухъур Иляс бегъымбарыращ. ЦІыхубзыр Сарептэ къалэ щыщ фызабэщ. ЩІалэ цІыкІур абы и къуэщ. Зэгуэр щІалэ цІыкІур сымаджэ хъури нэхъ хьэлъэ хъум хъууэрэ, икІэм–икІэжым лІащ. ЩылІэм Иляс щІалэ цІыкІум и анэм: «Къэхь мыдэ уи щІалэ цІыкІур»,— жеІэ.

Абы щІалэ цІыкІур унэм и щхьэ пэшым дрехьейр, гъуэлъыпІэм ирелъхьэри Иеговэ йолъэІу: «Уа, Иеговэ, сынолъэІу щІалэ цІыкІур къэбгъэхъужыну!» ЩІалэ цІыкІур къобэуэж! ИтІанэ Иляс ар къещтэри и анэм деж кърехьэхыжри мыпхуэдэу жреІэ: «Еплъыт, уи къуэр псэущ!» Мис аращ абы и анэр апхуэдизу щІэнасыпыфІэр.

Иеговэ и адрей бегъымбарым зэреджэр Елисейщ. Ар Иляс и дэІэпыкъуэгъущ. Ауэ зэман гуэр дэкІа нэужь, Иеговэ Елисеи къегъэсэбэпри Іуэху телъыджэхэр ещІэ. Зэгуэр Елисей Сонам къалэ макІуэ. ЗдэкІуам цІыхубз гуэрым абы фІы куэд къыщыхуещІэ. ИужьыІуэкІэ а цІыхубзым къуэ къелъху.

ЩІалэ цІыкІур нэхъ ин къэхъуа нэужь, зэгуэр и адэм деж губгъуэм макІуэ. Арати, напІэзыпІэм ар къокІий: «Си щхьэр мэуз!» — жеІэри. ИтІанэ унэм къахьыжа нэужь, малІэ. Сыту гуІэгъуэшхуэт ар и анэм дежкІэ! Асыхьэтым ар Елисей деж макІуэ.

Елисей абы и деж къокІуэри сабий лІар зыщІэлъ пэшымкІэ щІохьэ. Ар Иеговэ йолъэІури абы и хьэдэм тогъуалъхьэ. Куэд дэмыкІыу щІалэ цІыкІур къохуэбэжри блэней къопс. Сыту насыпыфІагъэшхуэт и анэм дежкІэ и къуэр псэууэ къыщилъэгъуам!

ЦІыху куэдыщэ лІащ нобэр къыздэсым. Ажалым гуауэшхуэ къахуихьащ лІахэм я унагъуэхэмрэ я ныбжьэгъухэмрэ. ЦІыхухэм лІахэр къызэрагъэхъужын къару яІэкъым. Ауэ апхуэдэ къару Иеговэ иІэщ. ИужьыІуэкІэ къэтщІэнщ мелуан бжыгъэкІэ лІа цІыхухэр абы къызэригъэхъужынур.