СЭЛМЭН щІалэщІэ дыдэу пащтыхь мэхъу. Абы Иеговэ фІыуэ елъагъу икІи тетщ и адэ Даут кърита чэнджэщым. Алыхьыр Сэлмэн хуэарэзыщ икІи абы щхьэкІэ зэгуэр жэщым пщІыхьэпІэм хэту абы къыжреІэ: «Сэлмэн, сыт уэстыну узыхуейр?»

Сэлмэн жэуап иретыж: «Иеговэ, си Тхьэ, сыщІэлэІуэщи тепщэкІэ сщІэкъым. Абы щхьэкІэ Іущагъ къызэт, уи цІыхубэм тэмэму я унафэ сщІыфын щхьэкІэ».

Иеговэ Сэлмэн къызэрелъэІуам щогуфІыкІ. ИкІи къегъэгугъэ: «Уи гъащІэр кІыхь сщІыну, къулей усщІыну укъызэмылъэІуу, Іущагъ щхьэкІэ укъызэрызэлъэІуам щхьэкІэ, уэстынущ мы дуней псом зы цІыхум имыІа Іущагъым хуэдэ. Уэстынущ укъызэрызэмылъэІуа къулеягъэри щІыхьри».

Абы иужькІэ куэд дэмыкІыу Сэлмэн деж къокІуэ цІыхубзитІ, Іуэху гугъу гуэр яІэу. А тІум язым къригъэжьащ: «Мы цІыхубзымрэ сэрэ зы унэ дыщІэсу допсэу. Сэ щІалэ цІыкІу къэслъхуащ. Махуищ фІэкІ дэмыкІыу мобыи щІалэ цІыкІу къилъхуащ. Жэщ гуэрым абы и сабийр лІащ. Сыжейуэ абы и сабий лІар къызбгъэдилъхьэри сысейр езым къищтащ. Сыкъэушу сабий лІар щыслъэгъуам, ар сызэримысабийр къызгурыІуащ».

ИтІанэ адрей цІыхубзым зэпеудри: «Хьэуэ! Сабий псэур сысейщ, лІар мобы ейщ!»,— жеІэ. Япэрей цІыхубзыр къопсалъэри мыарэзыуэ жеІэ: «Хьэуэ! Уэращ зейр лІар, псэур сысейщ!» Апхуэдэу ахэр зодауэ. Сыт–тІэ иджы ищІэныр Сэлмэн?

Абы егъакІуэ джатэ къригъэхьыну. Джатэр къыщахьым, унафэ ещІ: «Сабий псэур тІууэ зэгуэвупщІыкІи ныкъуэ–ныкъуэу цІыхубзитІым ефтыж».

Хьэуэ! — мэкІий и анэ дыдэр.— КхъыІэ, фымыукІ сабийр. Ефт ар мобы! — Ауэ адрей цІыхубзым трегъэчыныхь: «ТІуми къытлъырыремыс, иІэ, зэгуэвупщІыкІ адэ».

ИтІанэ Сэлмэн жеІэ: «ФымыукІ сабийр! Япэ цІыхубзым ефтыж. Аращ абы и анэ дыдэр». Сабийм и анэ дыдэм сабийр фІыуэ зэрилъагъум щхьэкІэ арэзыщ ямыукІ закъуэу адрей цІыхубзым иратми. Сэлмэн абыкІэ ар зэхегъэкІ. Абы а Іуэхугъуэр зэрызэхигъэкІа щІыкІэр цІыхухэм къыщащІам, апхуэдэ пащтыхь Іущ зэраІэм щхьэкІэ ахэр хуабжьу мэгуфІэ.

Сэлмэн и пащтыхьыгъуэ зэманым Алыхьым цІыхухэм къарет гуэдзыр, хьэр, жызумыр, инжирыр, нэгъуэщІ ерыскъыгъуэхэри бэву. ЦІыхухэм фІыуэ захуапэ, унэфІхэм щІэсщ. Псоми псори берычэту яІэщ.