МЫ ЩІАЛИЩЫР пцІыхужрэ? Пэжщ. Яшх мыхъуну ерыскъыр зышхын зымыда Даниил и ныбжьэгъуищращ мыхэр. Вавилоным мыбыхэм Седрах, Мисах, Авденаго цІэхэр къыщыфІащащ. НтІэ иджы еплъыт мыбыхэм. Сыт псом я гъусэу лъэгуажьэмыщхьэу сын гъэжам и пащхьэм щІимыувар мыхэр? ИІэт къэтщІэнти.

ПщІэрэ УнафипщІкІэ зэджэу езы Иеговэ къарита унафэхэр? Япэ унафэр мырат: «Уэ сэр нэмыщІ нэгъуэщІ алыхь бгъэлъапІэ хъунукъым». Гугъуу щытми мы щІалэхэр иджыпсту а унафэм тету аращ.

Вавилоным и пащтыхь Навуходоносор зэхуишэсащ цІыху цІэрыІуэ куэд, ищІа сын гъэжар яригъэгъэлъэпІэну. Иджыпсту иуха къудейуэ аращ абы и цІыхухэм яжриІэн: «Нэкъырэхэм, пшынэ дыкъуакъуэхэм, е нэгъуэщІ музыкальнэ Іэмэпсымэхэм я макъыр зэхэфха нэужь, фэ лъэгуажьэмыщхьэу фыуву мы дыщэ сын гъэжар вгъэлъэпІэн хуейщ. Хэт апхуэдэу имыщІэми, занщІэу хьэку гъэплъам ирезгъэдзэнущ.

Седрах, Мисах, Авденаго сымэ лъэгуажьэмыщхьэу зэрымыувар къищІа нэужь, Навуходоносор Іейуэ къэгубжьащ. Ахэр кърегъашэри иджыри зэ яжреІэж лъэгуажьэмыщхьэу увыну. Ауэ абыхэм Навуходоносор жраІэр, Иеговэ зэрагугъапІэр: «Дэ дызыхуэлажьэ Алыхьым дыкъызэрыригъэлыфын къару иІэщ. Ауэ дыкъримыгъэлу щытми, дэ уи дыщэ сын гъэжам и пащхьэ лъэгуажьэмыщхьэу диувэнукъым».

Ар зэхиха нэужь, Навуходоносор нэхъ Іеижу къогубжь. Япэмыжыжьэу хьэку щытти, абы унафэ ещІ: «Хьэкур зэрывгъэплъ хабзэм нэхърэ блыкІэ нэхъ гуащІэу къэвгъэплъ!» — жеІэри. АдэкІэ и дзэм щыщу цІыхухъу нэхъ къару дыдэхэм яжреІэ Мисах, Седрах, Авденаго сымэ япхыу хьэкум ирадзэну. Хьэкур апхуэдизкІэ къагъэплъати, мафІэбзийм занщІэу а цІыхухъу къарууфІэхэр елыпщІ. Сыт–тІэ адэкІэ а щІалищым къащыщІыр?

Пащтыхьыр хьэкум йоплъэри егъэщІагъуэ: «Сыт щхьэкІэ, цІыхухъуищкъэ тпхыуэ хьэкум иддзар?»

— Ара дыдэщ, ди пащтыхь,— жаІэ пщылІхэм.

— НтІэ солъагъури мафІэ бзийм цІыхухъуиплІым къыщакІухьу, къыгурыІуэкъым абы.— Ахэр пхакъым, мафІэ бзийри къалъэІэскъым. А еплІанэри алыхь хуэдэу къысщохъу.— Арати, пащтыхьыр хьэкум щхьэщохьэри мэгуоу: «Седрах! Мисах! Авденаго! ФыкъикІыж, ЛъэкІыныгъэшхуэ зиІэ Алыхьым и пщылІхэ!» — жеІэ.

КъикІыжа нэужь, псоми ялъагъу абыхэм мафІэ бзийм зыри къазэрыримыщІар. ИтІанэ пащтыхьым жеІэ: «Шыкурыр ейщ Седрах, Мисах, Авденаго сымэ я Алыхьым! Дапхуэдизу хэдмыгъэзыхьами, лъэгуажьэмыщхьэу уву я Алыхьым нэмыщІ нэгъуэщІ тхьэ ягъэлъэпІэну зэрыхуэмеям щхьэкІэ, мэлыІыч къахуигъакІуэри къригъэлащ ахэр».

Иеговэ зэрыхуэпэжын хуейм и щапхъэу къытхуагъэнам дэри дытет хъунукъэ?