ХЬИСЭ пэж дыдэу къэгубжьаифэ теткъэ мыбдеж? ПщІэрэ къыщІэгубжьар сытми? Алыхьым и унэшхуэм щІэс цІыхухэм я нэпсеягъэращ. Алыхьым хуэлэжьэну къакІуэ цІыхухэр ахъшэ хэхыпІэ ящІыну хэтщ ахэр.

Мо мэлхэр, выхэр, тхьэрыкъуэхэр плъагъурэ? Мы цІыхухэм ахэр Алыхьым и унэшхуэм щащэр. ЩІащэр пщІэрэ сытми? Алыхьым къурмэн хуащІын щхьэкІэ израиль цІыхухэр псэущхьэ хуейщи аращ. Алыхьым и унафэм итщ израиль цІыхум Іей гуэр ищІамэ, къурмэн къихьын хуейуэ. НэгъуэщІ Іуэхугъуэхэм щхьэкІи абыхэм къурмэн яукІын хуейщ. Ауэ дэнэ абыхэм Алыхьым къыхуахьыну къурмэныпхъэр къыздрахынур?

Языныкъуэхэм бзухэмрэ псэущхьэхэмрэ езым яІэжт. Ар къурмэныпхъэ ящІ хъунут. Ауэ Израилым щыщ куэдым бзуи псэущхьи яІэтэкъым. Зыгуэрхэр Иерусалим пэжыжьэІуэти къурмэныпхъэр къахуздэшэнутэкъым. Абы щхьэкІэ къакІуэти мыбы къыщащэхут зыхуеину псэущхьэхэмрэ бзухэмрэ. Ахэр зыщэхэм лъапІэу ящэт. Абыхэм цІыхухэр къагъапцІэт. А псом нэмыщІыж, ахэр хуитыхэтэкъым Алыхьым и унэм зыгуэр щащэхэну.

Мис аращ Хьисэ апхуэдизу къыщІэгубжьар. Абы щхьэпредз ахъшэ зыхъуэжхэм я Іэнэхэр, я ахъшэхэр зэбгырепхъ. КІапсэм чнутІ къыхещІыкІри унэшхуэм псэущхьэхэр къыщІеху. Тхьэрыкъуэ зыщэхэм унафэ яхуещІ: «ПсынщІэу щІэфх! Къэвгъанэ си Адэм и унэм сату щыфщІыныр».

Хьисэ и гъусэу унэшхуэм щІэтт и гъэсэн гуэрхэри. Абыхэм ягъэщІагъуэ Хьисэ ищІэр. ИужькІэ абыхэм ягу къокІыж Тхыгъэ ЛъапІэм Алыхьым и Къуэм теухуауэ иту зы пычыгъуэ: «Алыхьым и унэм хуиІэ лъагъуныгъэм мафІэу къызэщІигъэлындэнущ»,— жыхуиІэр.

ІутІыж махуэшхуэм щыгъуэ Иерусалим телъыджэ куэд Хьисэ щещІэр. Махуэшхуэ нэужьым, Иудей хэкум йокІри Галилей хэкум абы егъэзэж. Абы здэкІуэм Самарие хэкум блэкІын хуей мэхъу. Деплъынти мыбы къыщыхъур сытми.

Иуан 2:13—25; 4:3, 4.