Aayɩ, Ɛsɔ sɛtʋ agbaa tɩŋa tɩkɛ kʋɖʋma. Bibl taa, pɔyɔɔdɩ Ɛsɔ sɛtʋ agbaa sakɩyɛ tɔm, nɛ a-tɔm taakɛdɩnɩ Ɛsɔ. Papɩzɩɣ nɛ pekpeɣli-yɛ tindima sɔsɔna 2 taa.

Tindimiye kajalaɣ ñɩnɖɛ: Ɛsɔ sɛtʋ agbaa wena a-taa pɛsɛɣ cɛtɩm ɛsɔnaa yɔ

 Bibl yɔɔdaa se cɛtɩm ɛsɔnaa sɛʋ kɛ «cɛtɩm» pʋyʋ, «falaa pʋyʋ» nɛ «mbʋ pɩfɛyɩ wazaɣ nakɛyɛ yɔ.» (Yereemii 10:3-5; 16:19, 20) Yehowa a kaaɖʋ caanaʋ taa Izrayɛɛlɩ samaɣ paɣtʋ se: «Pɩfɛyɩ se ŋwɛɛnɩ ɛsɔnaa lalaa nɛ pɩtasɩnɩ-m.» (Ejipiti Lɩʋ 20:3, 23; 23:24) Nɛ alɩwaatʋ ndʋ Izrayɛɛlɩ mba sɛɣaɣ ɛsɔnaa lalaa yɔ, «Yehowa kɔ pana siŋŋ.»—Kɩgalʋʋ 25:3; Levitiki 20:2; Tɔm Hʋyaa 2:13, 14.

 Halɩ nɛ sɔnɔ, ɛyaa sɛɣ «mbʋ payaɣ se ɛsɔnaa yɔ» lɛ pɩɩkɛdɩɣnɩ Ɛsɔ. (1 Kɔrɛntɩ mba 8:5, 6; Galaatii mba 4:8) Ɛɖʋ paɣtʋ mba pɔsɔɔlaa se pɛsɛɛ-ɩ yɔ se peyele taabalɩyɛ ɖʋʋ nɛ mba pɛwɛ cɛtɩm Ɛsɔ sɛtʋ agbaa taa yɔ. Ɛyɔɔdaa se: «Ɩlɩɩ pɛ-hɛkʋ taa, nɛ ɩkɛzɩ mɩ-tɩ nɛ hɔɔlʋʋ.» (2 Kɔrɛntɩ mba 6:14-17) Ye Ɛsɔ sɛtʋ agbaa tɩŋa ɩɩkɛ kʋɖʋma nɛ ye a-tɩŋa asɩɣaɣnɩ ɛyʋ se ɛñɔtɩnɩ Ɛsɔ yɔ, Ɛsɔ kaaɖʋ paɣtʋ ndʋ yaa we?

Tindimiye naalɛ ñɩnɖɛ: Ɛsɔ sɛtʋ agbaa wena a-taa pɛsɛɣ Ɛsɔ toovenim tʋ, ɛlɛ paasɛɣ-ɩ ɛzɩ ɛsɔɔlʋʋ yɔ

 Nabʋyʋ taa, Izrayɛɛlɩ mba sidaɣ cɛtɩm Ɛsɔ sɛyaa sɔnzɩ nɛ pa-lakasɩ pɛ-Ɛsɔ sɛtʋ taa, ɛlɛ Yehowa taasɔɔlɩ se pesidi cɛtɩm Ɛsɔ sɛtʋ toovenim Ɛsɔ sɛtʋ taa. (Ejipiti Lɩʋ 32:8; Wayɩ Wayɩ Paɣtʋ 12:2-4) Yesu kaakʋ ɛ-alɩwaatʋ taa Ɛsɔ sɛtʋ ñʋndɩnaa tɔm, mbʋ pʋyɔɔ yɔ pataasɛɣ Ɛsɔ ɛzɩ pɩpɔzʋʋ yɔ. Palakaɣ ɛsa yɔɔ yem se pɛkɛ Ɛsɔ sɛyaa kɩbama, ɛlɛ paakɛ pɩ-tɛɛ nɛ pɩ-yɔɔ tɩnaa, nɛ «[peniŋaɣ] Paɣtʋ taa mbʋ pɩ-tɔm kɩlɩ cɛyʋʋ yɔ, mbʋ lɛ siɣsiɣ tɔm yɔɔ ɖɔm nɛ pʋtɔdɩyɛ naʋ nɛ siɣsiɣ wɛtʋ.»—Maatiyee 23:23.

 Mbʋ ɖɔɖɔ sɔnɔ, Ɛsɔ sɛtʋ ɛgbɛyɛ nɖɩ ɖɩwɩlɩɣ toovenim tɔm yɔ ɖi-ɖeke ɖɩsɩɣnɩnɩ ɛyaa se pɔñɔtɩnɩ Ɛsɔ. Nɛ toovenim tɔm ndʋ, Bibl taa tɩwɛɛ. (Yohanɛɛsɩ 4:24; 17:17; 2 Timootee 3:16, 17) Toovenim taa lɛ, Ɛsɔ sɛtʋ agbaa wena a-wɩlɩtʋ kaɖɩɣnɩ Bibl yɔ, aposuu ɛyaa nɛ Ɛsɔ kiposinuu. Wɩlɩtʋ ndʋ ɛyaa maɣzɩɣ se tɩlɩnɩ Bibl taa yɔ, toovenim taa lɛ, cɛtɩm Ɛsɔ sɛtʋ taa tɩ-taa sakɩyɛ lɩnaa. Wɩlɩtʋ ndʋ tɩ-taa natʋyʋ lɛ se Ɛsɔ kɛ Trinita, kalɩzaɣ ɛɛsɩkɩ, nɛ Ɛsɔ nazɩɣ ɛyaa kɩdɛkɛdaa miŋ maatɛŋ taa. Ɛsɔ sɛtʋ ɛgbɛyɛ nɖɩ ɖɩwɩlɩɣ wɩlɩtʋ ndʋ yɔ ɖɩkɛ «falaa» yaa ɖɩfɛyɩ wazaɣ nakɛyɛ, mbʋ pʋyɔɔ yɔ ɖɩkpaɣ ɛyaa sɔnzɩ nɛ ɖɩlɛɣzɩ Ɛsɔ paɣtʋ lone taa.—Maarɩkɩ 7:7, 8.

 Ɛsɔ paɖɩɣ Ɛsɔ sɛtʋ agbaa tɛ pɩ-tɛɛ nɛ pɩ-yɔɔ lakasɩ. (Tiiti 1:16) Pɩsa nɛ Ɛsɔ sɛtʋ ɛgbɛyɛ naɖɩyɛ sɩnɩ ɛyʋ nɛ ɛñɔtɩnɩ Ɛsɔ lɛ, pɩtɩkɛ sɔnzɩ yaa lakasɩ nasɩyɩ labʋ taa ɖeke, ɛlɛ pɩwɛɛ se ɖɩwɛɛnɩ ɖoŋ ɛyʋ ɛnʋ e-wezuu caɣʋ tɩŋa yɔɔ. Bibl yɔɔdʋʋ se: «Ye nɔɔyʋ ɛmaɣzɩɣ se ɛkɛ Ɛsɔ sɛyʋ ɛlɛ ɛɛɖɔkʋʋ ɛ-nzʋlʋmɩyɛ yɔ, ɛwɛɛ nɛ epeɣziɣ ɛ-maɣmaɣ ɛ-laŋɩyɛ, nɛ ɛ-Ɛsɔ sɛtʋ kɛ falaa. Ɛsɔ sɛtʋ ndʋ tɩwɛ kele kele nɛ tɩfɛyɩnɩ azuluma ɖa-Caa Ɛsɔ ɛsɩndaa yɔ ndʋ yɔ: solisi nɛ lelaa pɔ-yɔɔ cɔnʋʋ pa-kʋñɔmɩŋ taa, nɛ pɩwɛɛ se ɛyʋ etaapisi ɛ-tɩ nɛ ɛjaɖɛ.» (Yakubu 1:26, 27) Tɔm loyaɣ «Ɛsɔ sɛtʋ ndʋ tɩwɛ kele kele» yɔ, tɔbʋʋ lɛ se Ɛsɔ sɛtʋ ndʋ tɩ-taa pɩ-tɛɛ nɛ pɩ-yɔɔ lakasɩ fɛyɩ yɔ.