«Mo-lootiye ɖɔ-ŋ, mbʋ pʋyɔɔ yɔ mon-ɖoŋ wɛɛ nɛ ɩlakɩ tʋmɩyɛ pilim ɛjandʋ taa.»—2 Kɔrɛntɩ mba 12:9, Ɛjaɖɛ kɩfaɖɛ tɔm ɖɛzʋʋ.

 «Man-kʋjɔʋ ɖɔ-ŋ, mbʋ yɔ mo-ɖoŋ lakɩ tʋmɩyɛ ɛjandʋ taa kɛna.»—2 Kɔrɛntɩ mba 12:9, TAKAYAƔ KIÐEÐEA, Verbum Bible, 1997.

 Ɛsɔ labɩ tamaɣ se ɛhaɣ apostoloo Pɔɔlɩ ɖoŋ weyi pɩpɔzʋʋ-ɩ yɔ nɛ ɛlʋbɩnɩ tɩlasɩ nzɩ sɩ-taa ɛwɛɛ yɔ nɛ ɛ-ɛjandʋ.

 «Mo-lootiye ɖɔ-ŋ.» Apostoloo Pɔɔlɩ tɩmnɩ Ɛsɔ tam sakɩyɛ nɛ tɔm ndʋ ɛlɛ cosi-i se «mo-lootiye ɖɔ-ŋ» yɔ papɩzɩɣ nɛ pɛɖɛzɩ-tʋ ɖɔɖɔ se «mbʋ pɩpɔzʋʋ-ŋ yɔ mbʋ lɛ man-camɩyɛ lakasɩ.» Pʋ-tɔbʋʋ lɛ se ye ɛwɛnɩ Ɛsɔ lootiye yɔ pɩmaɣaa, ɖɩpɩzɩɣ ɖɩsɩ-ɩ nɛ ɛlʋbɩnɩ tɩlasɩ nzɩ sɩ-taa ɛwɛɛ yɔ. Ɛzɩma tɩyɛ? Tɔm piye nɖɩ pɛɖɛzaa se «lootiye» yɔ, ɖɩwɩlɩ kʋjɔʋ ŋgʋ Ɛsɔ lakɩ nɔɔyʋ faaa nɛ ɛlɛ tɩmʋna se palabɩ-ɩ kʋ yɔ. Takayɩsɩ nzɩ Pɔɔlɩ mawa yɔ sɩ-taa ɛwɩlaa se Ɛsɔ labɩ-ɩ lootiye pɩfɛyɩ yɔɔdʋʋ. Paa Pɔɔlɩ kaakɛ ɛyaa nazɩyʋ yɔ Ɛsɔ ha-ɩ ɖoŋ weyi pɩpɔzʋʋ yɔ nɛ ɛlɛɣzɩ ɛ-lakasɩ, nɛ ɛsɩnɩ lalaa ɖɔɖɔ nɛ papɩsɩ Krɩstʋ mba. (1 Kɔrɛntɩ mba 15:9, 10; 1 Timootee 1:12-14) Pɔɔlɩ pɩzaɣ se ɛtaa Ɛsɔ liu se ɛkaɣ-ɩ sɩnʋʋ nɛ ɛwa paa kaɖɛ nɖɩ.

 «Mbʋ pʋyɔɔ yɔ mon-ɖoŋ wɛɛ nɛ ɩlakɩ tʋmɩyɛ pilim ɛjandʋ taa.» Kɩbaɣlʋ Yehowa a tɔzɩ Pɔɔlɩ se pɩnaɣ e-ɖoŋ kaɣlaa alɩwaatʋ ndʋ ɛlakɩnɩ-ɩ tʋmɩyɛ se ɛsɩnɩ ɛyaa yɔ, mba patɩtalɩ pilim nɛ pɛwɛnɩ ɛjandʋ yɔ. (2 Kɔrɛntɩ mba 4:7; 12:8) Alɩwaatʋ ndʋ Krɩstʋ mba tisiɣ se po-ɖoŋ wɛnɩ kamaɣ nɛ papɩsɩɣnɩ Yehowa yɔɔ se ɛsɩnɩ-wɛ yɔ, pahaɣ Ɛsɔ ɖoŋ nʋmɔʋ se ɛla tʋmɩyɛ pɔ-yɔɔ kiya. (Efɛɛzɩ mba 3:16; Filiipi mba 4:13) Mbʋ Ɛsɔ ɖoŋ lakɩ tʋmɩyɛ ɛyaa ɛjandʋ taa.

 Fezuu kiɖeɖeu sɩnɩ apostoloo Pɔɔlɩ nɛ ɛma Krɩstʋ ñɩma mba paawɛ Kɔrɛntɩ yɔ takayaɣ nakɛyɛ pɩnaɣ 55 taa mbʋ yɔ. Takayaɣ ŋga kɛ-kɛdɛzaɣ hɔɔlʋʋ taa, ɛlɩzɩ pɩ-taa se ɛwɛnɩ waɖɛ se ɛkɛ apostoloo. Mbʋ pituyi-i nɛ ɛla mbʋ yɔ lɛ se ɛyaa mba payaɣaɣ pa-tɩ se wɩlɩyaa yɔ paahɔmnɩ-ɩ tɔm; pɩtɩla pɔcɔnɩ-ɩ ɛsa yɔɔ yem na nɛ pɔhɔmnɩ-ɩ tɔm yaa palabɩ mbʋ, mbʋ pʋyɔɔ yɔ ɛtaawɛɛ niye yɔɔdaɣ taa.—2 Kɔrɛntɩ mba 10:7-10; 11:5, 6, 13; 12:11.

 Pɩsa nɛ Pɔɔlɩ lʋ ɛ-tɩ yɔɔ lɛ, ɛlɩzɩ pɩ-taa se ye pɩɩkɛ ɛ-maɣmaɣ e-ɖoŋ taa yɔ ɛtaapɩzɩ nɛ ɛla tʋma wena payɩ ɛlabɩ ɛ-Ɛsɔ sɛtʋ taa yɔ nɛ ɛtaapɩzɩ nɛ ɛlʋbɩnɩ tɩlasɩ sakɩyɛ nzɩ ɛkataa yɔ. (2 Kɔrɛntɩ mba 6:4; 11:23-27; 12:12) Ñʋʋ 12 taa ɛyɔɔdɩ ‘tomnaɣ taa sɔɔyɛ naɖɩyɛ’ tɔm, nɛ pɩtɩla yɔ, pɩkɛɣ kaɖɛ ɖɩcɛyaɣ-ɩ paa ɛzɩmtaa nɛ ɖiyeki nɛ ɛnɩɣ wɩzasɩ tomnaɣ yɔɔ nɛ pɩhaɣ-ɩ nɩɣzɛ yɔ. (2 Kɔrɛntɩ mba 12:7) Paa Pɔɔlɩ ɛtɩyɔɔdɩ kaɖɛ nɖɩ ɛɛwɛɛ nɛ ɛkatɩɣ ɖeyi ɖeyi yɔ ɖɩ-tɔm yɔ, ɛɛtɛm ɛ-taa se ɛɖɔkʋʋ ɛ-laŋɩyɛ ɖɩ-taa mbʋ pʋyɔɔ ɛnawa se Ɛsɔ kaɣ-ɩ sɩnʋʋ.

 Sɔnɔ ɖɔɖɔ Krɩstʋ mba pɩzɩɣ nɛ pakatɩ nazɩm nɛ tɩlasɩ. Patɩlʋʋ se Ɛsɔ pɩzɩɣ ɛsɩnɩ-wɛ nɛ palʋbɩnɩ paa kaɖɛ nɖɩ yɔ pɩhɛzɩɣ pa-laŋa. Ɛzɩ Pɔɔlɩ yɔ, papɩzɩɣ nɛ pɔyɔɔdɩ nɛ pɛtɛ pa-taa se: «Alɩwaatʋ ndʋ mɛnkɛ ɛjam yɔ, ɖɩnɛ ɛlɛ mɛwɛ ɖoŋ.»—2 Kɔrɛntɩ mba 12:10.

 Cɔnɩ video cikpeluu kʋnɛ nɛ ŋtɩlɩ Kɔrɛntɩ mba takayaɣ naalɛ ñɩŋga taa lɩmaɣza sɔsɔna.