«Piyele nɛ weyi ɛpɩzɩɣ ɛla nɛ pɩɖɔɔ sakɩyɛ nɛ pɩkɩlɩ mbʋ payɩ ɖɩpɔzʋʋ yaa ɖɩmaɣzɩɣ yɔ, ɛzɩ e-ɖoŋ weyi ɛlakɩ tʋmɩyɛ ɖa-taa yɔ ɛpɔzʋʋ yɔ, ɛnʋ pɩwɛɛ se . . . [pasa.]»—Efɛɛzɩ mba 3:20, 21, Ɛjaɖɛ kɩfaɖɛ tɔm ɖɛzʋʋ.

 «Ɛnʋ weyi ɛlakɩ tʋmɩyɛ ɖa-taa nɛ e-ɖoŋ yɔ, ɛpɩzɩɣ ɛlabɩ-ɖʋ nɛ pɩkɩlɩ mbʋ ɖɩpɔzʋʋ-ɩ yɔ yaa mbʋ ɖɩmaɣzɩɣ yɔ kpem. Ɛ-hɩɖɛ ɛsɛɛ.»—Efɛɛzɩ mba 3:20, 21, Nɔɔ Haʋ Kɩfam Takayaɣ, Lomé, Alliance Biblique du Togo, 1996.

 Apostoloo Pɔɔlɩ tɩŋnɩ mayaɣ kanɛ ka-taa tɔm yɔɔ nɛ ɛwɩlɩɣ se ɛ-taa tɛma se Ɛsɔ pɩzɩɣ nɛ ecosi ɛ-sɛyaa adɩma yɔɔ nɛ ɛla mbʋ pɔpɔzɩ-ɩ yɔ nɛ ɛla ɖɔɖɔ mbʋ pataaɖʋna se pɩpɩzɩɣ nɛ pɩla yɔ. Mbʋ ɛlakɩ-wɛ yɔ, halɩ pɩzɩɣ nɛ pɩcɛzɩ mbʋ paaɖaŋaa yaa mbʋ pataɣaɣ liu yɔ.

 «Weyi ɛpɩzɩɣ ɛla . . . ɛzɩ e-ɖoŋ weyi ɛlakɩ tʋmɩyɛ ɖa-taa yɔ ɛpɔzʋʋ yɔ.» Mayaɣ 21 wɩlɩɣ se weyi ɛ-tɔm pɔyɔɔdʋʋ mayaɣ 20 taa se ɛpɩzɩɣ ɛla ɛzɩ e-ɖoŋ weyi ɛlakɩ tʋmɩyɛ ɖa-taa yɔ ɛpɔzʋʋ yɔ, ɛnʋ lɛ Ɛsɔ Yehowa. a Pɔɔlɩ ma mayaɣ ŋga ka-taa se «ɛnʋ pɩwɛɛ se patɩŋnɩ ɛgbɛyɛ nɛ Krɩstʋ Yesu pɔ-yɔɔ nɛ [pasa.]» (Yohanɛɛsɩ 20:31) Pɩtasɩ lɛ, Ɛsɔ pɩzɩɣ nɛ ɛha-ɖʋ ɖoŋ weyi pɩpɔzʋʋ-ɖʋ yɔ nɛ ɖɩla ɛ-sɔɔlɩm.—Filiipi mba 4:13.

 Kalɩtʋ 20 taa, apostoloo Pɔɔlɩ ñɩɣ niye ɖoŋ weyi Yehowa wɛna se ɛsɩnɩ ɛ-sɛyaa yɔ ɛ-tɛ ŋgee wɛtʋ natʋyʋ yɔɔ. Takayaɣ nakɛyɛ yɔɔdɩ tɔm loyaɣ ŋga pɛɖɛzaa se «weyi ɛpɩzɩɣ» yɔ kɔ-tɔm se ‘kaawɩlɩɣ yem se Yehowa pɩzɩɣ nɛ ɛla nabʋyʋ yaa pɩtɩla yɔ ɛkaɣ-pʋ labʋ, ɛlɛ kawɩlɩɣ se ɛwɛnɩ ɖoŋ se ɛlabɩ-pʋ.’ Ɛyʋ sɔɔlaa se ɛsɩnɩ ɛ-taabalʋ, ɛlɛ pɩtɩkɛ paa ɛzɩmtaa ɛwɛnɩ ɖoŋ; ɛlɛ Yehowa lɛ, ɛwɛnɩ ɖoŋ paa ɛzɩmtaa se ɛla mbʋ payɩ pɩpɔzʋʋ yɔ nɛ ɛcɔnɩ ɛ-sɛyaa yɔɔ nɛ ecosi ɖɔɖɔ pa-adɩma yɔɔ. E-ɖeke ɛwɛnɩnɩ ɖoŋ weyi ɛfɛyɩnɩ kamaɣ yɔ.—Izaayii 40:26.

 «[Ɛsɔ pɩzɩɣ] ɛla nɛ pɩɖɔɔ sakɩyɛ nɛ pɩkɩlɩ mbʋ payɩ ɖɩpɔzʋʋ yaa ɖɩmaɣzɩɣ yɔ.» Yehowa pɩzɩɣ ɛla sakɩyɛ nɛ ɛcɔnɩ ɛ-sɛyaa kɩcɛyɩm ɖeɖe, nɛ halɩ ɛpɩzɩɣ ɛla nɛ «pɩɖɔɔ sakɩyɛ» nɛ pɩcɛzɩ mbʋ ɖɔɖɔ. Ɛpɩzɩɣ se ɛsɩnɩ-wɛ nɛ pɩcɛzɩ mbʋ pamaɣzaɣ se ye ɛlabɩ-wɛ yɔ pɩwɩlɩɣ se ɛsɩnɩ-wɛ kpem yɔ.

 Tɔm loyaɣ «pɩkɩlɩ mbʋ payɩ ɖɩpɔzʋʋ yaa ɖɩmaɣzɩɣ yɔ» kpɛlɩkɩɣ-ɖʋ tɔm natʋyʋ ɖɔɖɔ mayaɣ ŋga kɔ-yɔɔ. Apostoloo Pɔɔlɩ yɔɔdʋʋ se «pɩkɩlɩ mbʋ payɩ ɖɩpɔzʋʋ yaa ɖɩmaɣzɩɣ yɔ,» ɩñɩnɩɣ se Krɩstʋ mba tɩŋa ɩnɩɩ pɩ-taa se Ɛsɔ pɩzɩɣ nɛ ɛsɩnɩ-wɛ nɛ pɩcɛzɩ mbʋ payɩ paɖaŋaa se ɛlabɩ-wɛ yɔ. Nabʋyʋ taa Krɩstʋ mba pɩzɩɣ nɛ pamaɣzɩ se tɩlasɩ nzɩ pakatɩɣ yɔ sɩkɩlɩ paɣlʋʋ yaa sɩkɩlɩ kaɖɛ nɛ nɔɔyʋ ɛɛpɩzɩɣ nɛ ɛcɔnɩ si-ɖeɖe. Halɩ pɩtɩla, paasɩŋ mbʋ pɔpɔzɩ Ɛsɔ pa-adɩma taa yɔ. Ɛlɛ ɖoŋ weyi Yehowa wɛna se ɛnɩɩ pɛ-wɛtʋ taa camɩyɛ yaa se ɛsɩnɩ-wɛ yɔ ɛfɛyɩnɩ tɩnaɣ. Alɩwaatʋ ndʋ ɛɖʋwa yɔ tɩtalɩɣ lɛ, paa kʋñɔmɩŋ weyi ɩ-taa ɛ-sɛyaa kaawɛɛ yɔ, ɩkaɣ-ɩ hɩzʋʋ; ɛkaɣ tɩŋnʋʋ nʋmɔŋ weyi ɩ-yɔɔ patɩmaɣzɩ ɩ-yɔɔ nɛ eyele nɛ kʋñɔmɩŋ ɛnɩ ɩsɩɩ tɩnaɣ. (Yɔɔb 42:2; Yereemii 32:17) Ɛlɛ pʋcɔ alɩwaatʋ ndʋ tɩtalɩ lɛ, ɛhaɣ-wɛ ɖoŋ nɛ pɔɖɔkɩ pa-laŋa, nɛ halɩ pɔɖɔkʋʋ pa-laŋa nɛ taa leleŋ.—Yakubu 1:2, 3.

 Apostoloo Pɔɔlɩ manɩ Efɛɛzɩ mba takayaɣ Krɩstʋ ñɩma mba paawɛ Aazii Cikpeluu egeetiye taa tɛtʋ ndʋ payaɣ se Efɛɛzɩ yɔ tɩ-taa yɔ. Sɔnɔ, ɛjaɖɛ nɖɩ payaɣ se Turkii yɔ ɖɩ-hɔɔlʋʋ nakʋyʋ taa Efɛɛzɩ tɛtʋ kaawɛɛ. Adɩma wena Pɔɔlɩ lakaɣ Krɩstʋ ñɩma mba pɔ-yɔɔ yɔ a-tɔm ɛma takayaɣ ŋga ka-taa. (Efɛɛzɩ mba 3:14-21) Ɛtɩmaɣ se pañaɣ pana nɛ pamaɣzɩnɩ Yesu, weyi sɔɔlɩm ɖiyiɣni ɛ-maɣzɩm nɛ ɛ-lakasɩ yɔ, nɛ patɩŋnɩ pɩ-yɔɔ nɛ patɩlɩ Krɩstʋ sɔɔlɩm nɛ pɩkɩlɩ (nɛ pɩwɛɛ se Krɩstʋ mba tɩŋa ɩñaɣ pana ana ɖɔɖɔ.) Tɔm ndʋ tɩwɛ Efɛɛzɩ mba 3:20, 21 taa yɔ ndʋ Pɔɔlɩ tɛzɩnɩ ɛ-adɩma nɛ ɛsamnɩ Ɛsɔ.

 Cɔnɩ video cikpeluu kʋnɛ nɛ ŋtɩlɩ Efɛɛzɩ mba takayaɣ taa lɩmaɣza sɔsɔna.