«Ɛlabɩ paa mbʋ lɛ pɩ-alɩwaatʋ yɔɔ nɛ pɩwɛɛ kajʋka. Halɩ ɛɖʋ tamtam wɛʋ ɛyaa laŋa taa; paa mbʋ yɔ, tʋmɩyɛ nɖɩ Ɛsɔ toovenim tʋ laba yɔ, ɛyaa ɩɩkaɣ-ɖɩ tɩlʋʋ kpaɣnɩ ɖɩbazɩyɛ nɛ piwolo ɖɩdɛnɖɛ kpa.»—Eklezɩyasɩtɩ 3:11, Ɛjaɖɛ kɩfaɖɛ tɔm ɖɛzʋʋ.

 «Ɛlɩzɩ kɩbam kpeekpe pɩ-wɛɛ taa, ɛɖʋ pa-laŋa taa kele kele tɔm, ɛlɛ ɛyʋ ɛɛkaɣ nɩʋ Ɛsɔ tʋmɩyɛ tɔbʋʋ, nɖɩ Ɛsɔ labɩ ɖooo kiɖe tɛɛ nɛ pɩkɔɔ pɩtɛ yɔ.»—Eklezɩyasɩtɩ 3:11, TAKAYAƔ KIÐEÐEA, Verbum Bible, 1997.

 «Ɛlabɩ paa mbʋ lɛ pɩ-alɩwaatʋ yɔɔ nɛ pɩwɛɛ kajʋka.» Ebree tɔm piye nɖɩ pɛɖɛzɩ cɩnɛ se «kajʋka» yɔ, ɖɩ-tɔbʋʋ nɩʋ ɛɛsɩɣnɩ ɛzɩma nabʋyʋ wɛ cɔnʋʋ ɛsa yɔɔ yem yɔ, ɛlɛ pɩcɛzɩ mbʋ. Papɩzɩɣ nɛ pɛɖɛzɩ-ɖɩ ɖɔɖɔ se «ɛñɔɔzɩ-pʋ camɩyɛ; nɛ pɩmʋna.» (Eklezɩyasɩtɩ 3:11, pɩ-tɛɛ tɔm) Wondu ndʋ Ɛsɔ lɩzaa yɔ pɩtɩkɛ ti-ɖeke tɩwɛnɩ kajʋka ɛlɛ mbʋ payɩ ɛlakɩ se pɩsa nɛ ɛ-sɔɔlɩm la yɔ pɩwɛ kajʋka ɖɔɖɔ.—Danɩyɛɛlɩ 2:21; 2 Pɩyɛɛrɩ 3:8; Natʋ 4:11.

 «Halɩ ɛɖʋ tamtam wɛʋ ɛyaa laŋa taa.» Ɛsɔ lɩzɩ ɛyaa se pacaɣ wezuu tam. (Keɣa 37:29) Nɛ pʋyɔɔ ɛɖʋ pa-laŋa taa se pɔsɔɔlɩ se pacaɣ wezuu tam. Ɛlɛ kajalaɣ ɛyaa Aɖam nɛ Ɛva patɩña Ɛsɔ nɛ pɩkɔnɩ-wɛ sɩm, nɛ sɩm mbʋ pɩwadɩ pa-lʋlʋʋ taa mba yɔɔ. (Kiɖe Tɛɛ Tɔm 3:17-19; Roma mba 5:12) Paa mbʋ yɔ, Ɛsɔ labɩ tamaɣ se ‘mbʋ payɩ pɩwɛ wezuu yɔ ɛhaɣzɩɣ-pʋ mbʋ pi-liu wɛɛ yɔ,’ pɩkpɛndɩnɩ sɔɔlɩm mbʋ ɛyaa wɛna se pacaɣ wezuu tam yɔ. (Keɣa 145:16) Bibl lɩzɩ pɩ-taa ɛzɩma Yehowa yeba se ɛyaa ɩpɩzɩ nɛ paɖaɣnɩ wɛnʋʋ tamtam wezuu caɣʋ lidaʋ yɔ.—Roma mba 6:23.

 «Tʋmɩyɛ nɖɩ Ɛsɔ toovenim tʋ laba yɔ, ɛyaa ɩɩkaɣ-ɖɩ tɩlʋʋ kpaɣnɩ ɖɩbazɩyɛ nɛ piwolo ɖɩdɛnɖɛ kpa.» Ɛsɔ lɔŋsɩnɖɛ paɣlɩ siŋŋ pʋyɔɔ Bibl yɔɔdɩ ɖɩ-tɔm se ‘ɛyʋ ɛɛpɩzɩɣ nɛ ɛnɩɩ ɖɩ-taa.’ (Roma mba 11:33) Paa mbʋ yɔ, Ɛsɔ sɔɔlaa se ekuli ɛ-kaɖʋsɩ yɔɔ nɛ ɛwɩlɩ mba pɔsɔɔlaa se pɔ-tɔm ɛkɛdɩnɩ-ɩ yɔ.—Amoosi 3:7.

 Caanaʋ taa Izrayɛɛlɩ Wiyaʋ Salomɔɔ manɩ Eklezɩyasɩtɩ takayaɣ, nɛ ɛyaa kaasɩmɩ-ɩ lɔŋsɩnɖɛ nɖɩ Ɛsɔ kaaha-ɩ yɔ ɖɩ-yɔɔ. Lɔŋ kɩbaŋ wɛ takayaɣ ŋga ka-taa, nɛ itukuuni mbʋ toovenim taa lɛ pɩwɛnɩ wazaɣ wezuu caɣʋ taa nɛ mbʋ pɩfɛyɩnɩ wazaɣ yɔ. (Eklezɩyasɩtɩ 1:2, 3; 2:1, 17; 7:1; 12:1, 13) Ñʋʋ 3 taa, Salomɔɔ yɔɔdɩ mbʋ mbʋ pɩlakɩ ɛyaa wezuu caɣʋ taa tam alɩwaatʋ ndɩ ndɩ yɔɔ yɔ pɩ-tɔm. Ɛyɔɔdɩ ɖɔɖɔ tʋma wena ɛyaa lakɩ yɔ a-taa naayɛ tɔm. (Eklezɩyasɩtɩ 3:1-8, 10) Ɛsɔ ha ɛyaa waɖɛ se palɩzɩ tʋma wena pɔsɔɔlaa se pala nɛ alɩwaatʋ ndʋ tɩ-yɔɔ pɔsɔɔlaa se palabɩ-yɛ yɔ. (Wayɩ Wayɩ Paɣtʋ 30:19, 20; Yozuwee 24:15) Salomɔɔ lɩzɩ pɩ-taa se ye ɛyaa wezuu caɣʋ ɛlakɩ nɔɔ kʋɖʋmaɣ nɛ Ɛsɔ kaɖʋwa nɛ pañaŋ yaa pɔɖɔŋ alɩwaatʋ ndʋ ɛɖʋwa se pala paa ɛbɛ yɔ tɩ-yɔɔ yɔ, pi-ɖeke piyekina nɛ mbʋ pehikiɣ pa-tʋmɩyɛ ɖoŋ ñɩnɖɛ labʋ taa yɔ panɩɩ leleŋ siŋŋ pɩ-taa. Mbʋ Salomɔɔ tɔŋ se pɩkɛ «Ɛsɔ kʋjɔʋ.»—Eklezɩyasɩtɩ 3:1, 12, 13.

 Cɔnɩ video cikpeluu kʋnɛ nɛ ŋtɩlɩ Eklezɩyasɩtɩ takayaɣ taa lɩmaɣza sɔsɔna.