«Pasa Ɛsɔ ɖooo ɛsɔdaa, nɛ tɛtʋ yɔɔ lɛ laŋhɛzɩyɛ wɛɛ mba pɔ-tɔm kɛdɩnɩ-ɩ yɔ pɛ-hɛkʋ taa.»—Luka 2:14, Ɛjaɖɛ kɩfaɖɛ tɔm ɖɛzʋʋ.

 «Pasa Ɛsɔ ɖooo ɛsɔdaa nɛ ɛ-laŋhɛzɩyɛ wɛɛ tataa ɛyaa mba ɛsɔɔlɩ-wɛ yɔ pɔ-cɔlɔ.»—Luka 2:14, NƆƆ HAƲ KƖFAM, L’Alliance Biblique du Togo, 1996.

 Ɛsɔ tiyiyaa yɔɔdɩnɩ samtʋ tɔm tʋnɛ alɩwaatʋ ndʋ palʋlɩ Yesu yɔ nɛ tɩwɩlɩɣ se mba pɛwɛnɩ tisuu Yesu yɔɔ yɔ, pɔ-tɔm pɩzɩɣ nɛ pɩkɛdɩnɩ Ɛsɔ nɛ pɛwɛɛ laŋhɛzɩyɛ taa.

 «Pasa Ɛsɔ ɖooo ɛsɔdaa.» Tiyiyaa tɔm tʋnɛ tɩñɩkɩɣ niye se Ɛsɔ mʋnaa se pɛcɛlɩ-ɩ samtʋ kpeekpe. Tɔm loyaɣ ŋga kawɩlɩɣ ɖɔɖɔ se Yesu lʋlʋʋ nɛ Ɛsɔ sɛtʋ tʋmɩyɛ nɖɩ ɛkaɣaɣ labʋ tɛtʋ yɔɔ yɔ, ɖɩkaɣ Ɛsɔ Yehowa a sam siŋŋ. Kɩɖaʋ nakʋyʋ yɔ: Tɔm ndʋ Yesu wɩlaɣ yɔ ɛcɛlaɣ tɩ-samtʋ Ɛsɔ paa ɛzɩmtaa, pʋyɔɔ ɛyɔɔdaa se: «Tɔm ndʋ mawɩlɩɣ yɔ tɩtɩlɩɩnɩ mɔn-cɔlɔ, ɛlɛ weyi etiyi-m yɔ ɛ-cɔlɔ tɩlɩnaa.» (Yohanɛɛsɩ 7:16-18) Ɛyaa mba panaɣaɣ Yesu maamaaci lakasɩ yɔ, ɖoŋ ɖoŋ lɛ ‘papaɣzaɣ Ɛsɔ sam.’ (Luka 5:18, 24-26; Yohanɛɛsɩ 5:19) Halɩ Yesu sɩm maɣmaɣ kɔnɩ samtʋ Ɛsɔ. Ɛ-sɩm yeki se tamaɣ sɔsɔɔ ŋga Ɛsɔ wɛna se ɛlakɩ nɛ ɛyaa siɣsiɣ tɩnaa nɛ mba pɔsɔɔlɩ laŋhɛzɩyɛ yɔ posu tɛtʋ yɔɔ yɔ kala.—Kiɖe Tɛɛ Tɔm 1:28.

 «Tɛtʋ yɔɔ lɛ laŋhɛzɩyɛ wɛɛ.» Laŋhɛzɩyɛ nɖɩ ɖɩ-tɔm pɔyɔɔdʋʋ cɩnɛ yɔ, ɖɩcɛzɩ laŋhɛzɩyɛ nɖɩ ɖɩ-taa ɛyʋ wɛɣ alɩwaatʋ ndʋ you nakʋyʋ fɛyɩ yɔ; ɖitukuuni ɛzɩma ɛyʋ yɔɔ hɛɣ mbʋ pʋyɔɔ yɔ ɛnawa se taabalɩyɛ kɩbanɖɛ wɛ ɛ nɛ Yehowa pɛ-hɛkʋ taa yɔ, nɛ pi-ɖeke piyekina se ehiɣ laŋhɛzɩyɛ nɖɩ. Pɩkɛdɩnɩ-ɖʋ se Yesu yɔɔ lɛ taabalɩyɛ kɩbanɖɛ pɩzɩɣ nɛ ɖɩwɛɛ ɛyaa nɛ Ɛsɔ pɛ-hɛkʋ taa. (Yakubu 4:8) Yesu kɛnɩ Ɛsɔ Kewiyaɣ Wiyaʋ nɛ ɛkaɣ yebu nɛ laŋhɛzɩyɛ wɛɛ tɛtʋ kpeekpe yɔɔ tam.—Keɣa 37:11; Luka 1:32, 33.

 «Mba pɔ-tɔm kɛdɩnɩ-ɩ yɔ.» Tɔm loyaɣ kanɛ kɔyɔɔdʋʋ ɛyaa mba pɛwɛnɩ Ɛsɔ lootiye yɔ pɔ-tɔm, pɛwɛnɩ Ɛsɔ lootiye mbʋ pʋyɔɔ yɔ pɛwɛnɩ tisuu sɔsɔm Ɛsɔ yɔɔ nɛ pɛtɛ pɛwɛɛnɩ-pʋ Yesu weyi etiyaa yɔ ɛ-yɔɔ. Kaawɩlɩɣ se ɛyaa tɩŋa tɔm kɛdɩɣnɩ Ɛsɔ paa wɛtʋ ndʋ patɩɩwɛna yaa lakasɩ nzɩ patɩɩlakɩ yɔ. Biblwaa nabɛyɛ taa, pɛɖɛzɩ tɔm loyaɣ ŋga se «kɩbandʋ [wɛɛ] ɛyaa yɔɔ.» (NƆƆ HAƲ KƖFAM TAKAYAƔ, Bibles international.) Paa mbʋ yɔ, caanaʋ taa Grɛɛkɩ Masɩ nzɩ paamanɩ nesi nɛ papɩzɩɣ nɛ pataa-sɩ liu nɛ pɩkɩlɩ yɔ sɩwɩlɩɣ se ɛyaa mba pɔ-tɔm kɛdɩnɩ Ɛsɔ yɔ pɔ-tɔm pɔyɔɔdʋʋ tɔm loyaɣ ŋga ka-taa ɛzɩ pɛɖɛzʋʋ-kɛ Ɛjaɖɛ kɩfaɖɛ tɔm ɖɛzʋʋ Bibl taa yɔ; nɛ ɖa-alɩwaatʋ taa Bibl ɖɛzɩyaa sakɩyɛ ɖɔɖɔ ɖɛzɩ lɩmaɣzɩyɛ kʋɖʋmɖɩyɛ nɖɩ.—Na « Ɛzɩma pɛɖɛzɩ Luka 2:14 Biblwaa nabɛyɛ taa yɔ.»

 Luka ñʋʋ 2 yɔɔdʋʋ kajalaɣ pɩnzɩ nzɩ Yesu kaacaɣ tɛtʋ yɔɔ yɔ sɩ-tɔm. Palʋlɩ Yesu nɛ pitileɖi lɛ, Ɛsɔ tiyiyu nɔɔyʋ lɩɩ ninɖiɣyaa mba paawɛ «tɛyɛ yɔɔ nɛ paɖaŋɩɣ pa-kpɩna yɔɔ ɖoo taa» yɔ pɔ-yɔɔ. b (Luka 2:4-8) Tiyiyu ɛnʋ esusi ‘tɔm kɩbandʋ ndʋ tɩhaɣ taa leleŋ sɔsɔŋ yɔ’; eheyi ninɖiɣyaa se: «Sɔnɔ palʋlɩ-mɩ Daviid tɛtʋ taa ñʋʋ yaɖʋ nɔɔyʋ, ɛnʋ lɛ Kɩbaɣlʋ Krɩstʋ.» (Luka 2:9-11) Eheyi ninɖiɣyaa ɖenɖe papɩzɩɣ nɛ pana pɩɣa ŋga palʋlaa yɔ, nɛ pʋwayɩ lɛ pana Ɛsɔ tiyiyaa sakɩyɛ, paawɛɛ nɛ pasaŋ Ɛsɔ. Ninɖiɣyaa talɩ Bɛtɩlɛhɛm lɛ, pana Maarɩɩ, Yosɛɛfʋ nɛ pɩɣa Yesu. (Luka 2:12-16) Ninɖiɣyaa kɛdɩ piti lakasɩ nzɩ panawa yɔ sɩ-tɔm lɛ, pakpaɣ nʋmɔʋ nɛ papɩsɩɣ pa-kpɩna cɔlɔ nɛ «pasaŋ Ɛsɔ nɛ paɖʋʋ-ɩ hɩɖɛ tɔm ndʋ payɩ panɩwa nɛ mbʋ payɩ panawa yɔ pɩ-yɔɔ.»—Luka 2:17-20.

 «Pasa Ɛsɔ ɖooo ɛsɔdaa, nɛ tɛtʋ yɔɔ lɛ mba pɔ-yɔɔ e-lootiye wɛɛ yɔ pɛwɛɛ laŋhɛzɩyɛ taa.»—Luka 2:14, New International Version.

 «Pasa Ɛsɔ ɖooo ɛsɔdaa, nɛ tɛtʋ yɔɔ lɛ mba ɛ-taa wɛnɩ-wɛ leleŋ yɔ pɛwɛɛ laŋhɛzɩyɛ taa.»—Luka 2:14, Good News Translation.

 «Pasa Ɛsɔ ɖooo ɛsɔdaa, nɛ tɛtʋ yɔɔ lɛ mba ɛ-taa wɛnɩ-wɛ leleŋ yɔ laŋhɛzɩyɛ wɛɛ pɛ-hɛkʋ taa.»—Luka 2:14, English Standard Version.

 «Pasa Ɛsɔ weyi ɛwɛ ɛsɔdaa liɣ liɣ yɔ, nɛ tɛtʋ yɔɔ lɛ mba pɔ-tɔm kɛdɩnɩ-ɩ yɔ pɛwɛɛ laŋhɛzɩyɛ taa.»—Luka 2:14, Bible de Jérusalem.

 Cɔnɩ video cikpeluu kʋnɛ nɛ ŋtɩlɩ Luka takayaɣ taa lɩmaɣza sɔsɔna.