«Pʋyɔɔ lɛ, ɩtaanɩɣzɩ cee yɔɔ kpa, mbʋ pʋyɔɔ yɔ cee kaɣ wɛnʋʋ kɩ-maɣmaɣ kɩ-nɩɣzɛ. Paa evemiye nɖɩ lɛ, ɖɩ nɛ ɖɩ-maɣmaɣ ɖɩ-kʋñɔmɩŋ.»—Maatiyee 6:34, Ɛjaɖɛ kɩfaɖɛ tɔm ɖɛzʋʋ.

 «Ɩtaanɩɣzɩ cee yɔɔ, cee maɣmaɣ kanɩɣzɩnɩ ɛ-tɩ yɔɔ. Paa kɩyakʋ ŋgʋ lɛ, kɩ nɛ kɩ-ɛhʋyɛ.»—Maatiyee 6:34, Takayaɣ kiɖeɖea, Kinshasa, Verbum Bible, 1997.

 Yesu yɔɔdɩnɩ tɔm ndʋ tɩwɛ mayaɣ kanɛ ka-taa yɔ. Ɛtɩŋnɩ tɩ-yɔɔ nɛ ɛhɛzɩ ɛ-tɔm welisiyaa laŋa se pɩtɩcɛyɩ se pakɩlɩ nɩɣzʋʋ tɩlasɩ nzɩ papɩzaɣ se pakatɩnɩ ɛsɩndaa yɔ sɩ-yɔɔ. Pɩtasɩ lɛ ye pa-lɩmaɣza ɩwɛ paa evemiye nɖɩ lɛ ɖɩ-kʋñɔmɩŋ ɖeke yɔɔ, nɛ paanɩɣzɩɣ kadadayaɣ nɛ pɩkpɛndɩnɩ avema wena awɛnɩ ɛsɩndaa yɔ a-kʋñɔmɩŋ yɔɔ yɔ pɩwazɩɣ-wɛ nɛ pɩkɩlɩ.

 Yesu taacaɣ yɔɔdʋʋ se ɖɩtaamaɣzɩ cee yɔɔ yaa ɖɩtaala ɖʋtʋ natʋyʋ cee yɔɔ. (Aduwa 21:5) Ɛlɛ ɛsɩŋnaɣ-ɖʋ se ɖɩtaanɩɣzɩ kadadayaɣ mbʋ pɩpɩzɩɣ nɛ pɩla cee yɔ pɩ-yɔɔ. Nɩɣzɛ ana apɩzɩɣ ayele nɛ ɖilesi ɖa-taa leleŋ, nɛ pɩlabɩ-ɖʋ kaɖɛ se ɖɩka ñʋʋ nɛ tʋma wena pɩpɔzʋʋ se ɖɩla yɔ. Tɩlasɩ nzɩ sɩwɛnɩ ɛsɩndaa nɛ sɩtɩkɔmta yɔ, ɖa-nɩɣzɛ ɩɩpɩzɩɣ acɔnɩ si-ɖeɖe sɔnɔ. Pɩtasɩ lɛ, ɖoŋ ɖoŋ lɛ mbʋ pɩ-yɔɔ ɖɩnɩɣzɩɣ yɔ pɩɩkɔŋ, yaa paa pɩkɔma yɔ pɩɩwɛɣ kaɖɛ ɛzɩ ɖɩɩmaɣzʋʋ yɔ.

 Yesu yɔɔdɩ mayaɣ kanɛ ka-taa tɔm alɩwaatʋ ndʋ ɛyɔɔdaɣ ɛ-tɔm ndʋ payaɣ se Pʋʋ yɔɔ tɔm yɔɔdʋʋ yɔ. Pama ɛ-tɔm ndʋ Maatiyee ñʋŋ 5-7 taa. Yesu tɔm ndʋ tɩ-taa, ɛlɩzɩ pɩ-taa se nɩɣzɛ kɛɖɛlɛsaɣ ɛɛpɩzɩɣ nɛ pɩñɔɔzɩ ɛyʋ wezuu caɣʋ yaa pɩsɔzɩ ɛyʋ wezuu ɖaɣlɩkɩŋ. (Maatiyee 6:27) Ɛyɔɔdaa ɖɔɖɔ se ye ɖɩsɩ Ɛsɔ kajalaɣ ɖeɖe ɖe-wezuu caɣʋ taa yɔ, pɩfɛyɩ se ɖɩkɩlɩ nɩɣzʋʋ cee yɔɔ. Ɛsɔ cɔŋnɩ hayɩm taa ñɩtʋ nɛ kpɩna yɔɔ, nɛ ɛkaɣ cɔnʋʋ mba pɛsɛɣ-ɩ yɔ pɔ-yɔɔ ɖɔɖɔ.—Maatiyee 6:25, 26, 28-33.