BIBL MASƖ SƖNƐ SƖ-TƆBƲƲ LƐ SUWE?
Roma mba 10:13—«Mba pakaɣ yaʋ Kɩbaɣlʋ hɩɖɛ yɔ»
«Weyi ɛyaɣ Yehowa hɩɖɛ yɔ, pakaɣ ɛ-ñʋʋ yabʋ.»—Roma mba 10:13, Ɛjaɖɛ kɩfaɖɛ tɔm ɖɛzʋʋ.
«Mba pakaɣ yaʋ Kɩbaɣlʋ hɩɖɛ yɔ, pe-kpeekpe pakaɣ pa-ñʋʋ yabʋ.»—Roma mba 10:13, TAKAYAƔ KIÐEÐEA, Verbum Bible, 1997.
Roma mba 10:13 tɔbʋʋ nɩʋ
Ɛsɔ ɛɛtʋkʋʋ ɛyaa taa; ɛhaɣ ɛyaa tɩŋa waɖɛ se pehiɣ ñʋʋ yabʋ nɛ pacaɣ wezuu tam tam paa ɛjaɖɛ nɖɩ ɖɩ-taa palɩnaa yɔ, paa tomnaɣ tɔlɩm mbʋ pɛwɛna yɔ yaa paa wɛtʋ ndʋ tɩ-taa pɛwɛɛ yɔ. Ɛlɛ pʋcɔ nɛ ɖihiɣ wazasɩ nzɩ lɛ, pɩwɛɛ se ɖɩyaa Ɛsɔ Ðoŋ Tɩŋa Tʋ hɩɖɛ Yehowa. a—Keɣa 83:18.
Bibl taa lɛ, tɔm loyaɣ «weyi ɛyaɣ Yehowa hɩɖɛ yɔ» wɩlɩɣ se pɩwɛɛ se ɛyʋ ɛtɩlɩ Ɛsɔ hɩɖɛ nɛ ɛlabɩnɩ-ɖɩ tʋmɩyɛ Ɛsɔ sɛtʋ taa; ɛlɛ pɩtɩsɩɩnɩ pi-ɖeke. (Keɣa 116:12-14) Kawɩlɩɣ ɖɔɖɔ se pɩwɛɛ se ɛyʋ ɛtaa Ɛsɔ liu nɛ ɛpɔzɩ-ɩ se ɛsɩnɩ-ɩ.—Keɣa 20:7; 99:6.
Ɛsɔ hɩɖɛ tɔm kaacɛyɩ Yesu Krɩstʋ ɛsɩndaa. Tɔm pee kajalaɣ ñɩna wena ɛlabɩnɩ tʋmɩyɛ kɩɖaʋ adɩma taa yɔ ana yɔ: «Ða-Caa ña weyi ŋwɛ ɛsɔdaa yɔ, ña-hɩɖɛ yɔɔ ɛñalɩ,» yaa papɩsɩ-ɖɩ kiɖeɖeye. (Maatiyee 6:9) Yesu wɩlaa ɖɔɖɔ se ye ɖɩsɔɔlaa se ɖihiɣ wezuu maatɛŋ yɔ, pɩwɛɛ se ɖɩkpɛlɩkɩ nɛ ɖɩtɩlɩ Yehowa, ɖɩñamɩ-ɩ nɛ ɖɩsɔɔlɩ-ɩ.—Yohanɛɛsɩ 17:3, 6, 26.
Ɛbɛ yɔɔ ɖɩpɩzɩɣ nɛ ɖɩyɔɔdɩ se Yehowa paya Roma mba 10:13 taa se «Kɩbaɣlʋ» TAKAYAƔ KIÐEÐEA, Verbum Bible taa? Mbʋ pʋyɔɔ yɔ Yowɛɛlɩ 2:32 taa tɔm mayaɣ ŋga kɔyɔɔdaa, nɛ kiɖe tɛɛ Ebree kʋnʋŋ taa lɛ, Ɛsɔ hɩɖɛ maɣmaɣ paya peeɖe, pɩtɩkɛ ɛ-hɩɖɛ kɩsɛsɛyɛ «Kɩbaɣlʋ.» b
Tɔm ndʋ tɩcɔ Roma mba 10:13 nɛ tɩta yɔ
Roma mba ñʋʋ 10 taa, Bibl wɩlɩɣ se pʋcɔ nɛ ɛyʋ tɔm kɛdɩnɩ Ɛsɔ lɛ, pɩwɛɛ se ɛwɛɛnɩ tisuu Yesu Krɩstʋ yɔɔ. (Roma mba 10:9) Masɩ nzɩ sɩwɛ Nɔɔ Haʋ Kɩbɩm taa yɔ, sɩ-taa sakɩyɛ wɩlɩɣ se tɔm ndʋ tɩkɛ toovenim. Ɛyʋ wɩlɩɣ se ɛwɛnɩ tisuu alɩwaatʋ ndʋ ‘ɛyɔɔdʋʋ ɛyaa ɛsɩndaa’ yɔ, nɛ tɔm ndʋ ɛyɔɔdʋʋ yɔ, tɩ-taa natʋyʋ lɛ se esusi ɛyaa mba pɛfɛyɩnɩ tisuu yɔ tɔm kɩbandʋ ndʋ tɩkɔŋnɩ ñʋʋ yabʋ yɔ. Piyeki nɛ paba wɛɛnɩ tisuu nɛ pɩsɩnɩ-wɛ nɛ pehiɣ wezuu maatɛŋ.—Roma mba 10:10, 14, 15, 17.
Kalɩ Roma mba 10:10, 14, 15, 17 pɩkpɛndɩnɩ pɩ-tɛɛ tɔm ndʋ tɩ-taa palɩzɩ tɔm taa yɔ nɛ masɩ lɛɛsɩ nzɩ sɩwɛ pɩ-taa nɛ sɩsɩɣnɩ-ŋ se ŋnɩɩ masɩ taa camɩyɛ yɔ.
a Ɛsɔ hɩɖɛ wɛ ɛzɩ tam 7 000 mbʋ yɔ Bibl takayɩsɩ kɩbɩnzɩ taa. Ebree taa lɛ, abalɩmasɩ 4 pamanɩ Ɛsɔ hɩɖɛ. Kabɩyɛ taa lɛ, payaɣ hɩɖɛ nɖɩ ɖoŋ ɖoŋ se «Yehowa.» Ɛlɛ Bibl taa tazɩyaa nabɛyɛ ñayaɣ-ɖɩ se «Yahve» yaa «Yahweh.»
b Pɩtʋʋ fɛyɩ se Bibl mayaa mba paakɛ Krɩstʋ mba yɔ, palabɩnɩ tʋmɩyɛ Ɛsɔ hɩɖɛ alɩwaatʋ ndʋ payaɣaɣ «Nɔɔ Haʋ Kɩbɩm» masɩ nzɩ sɩ-taa hɩɖɛ nɖɩ ɖɩɩwɛɛ yɔ. Bibl tɔm kpou nakʋyʋ yɔɔdaa se: «Nabʋyʋ wɛɛ nɛ pɩwɩlɩɣ se alɩwaatʋ ndʋ pacalɩ maʋ Nɔɔ Haʋ Kɩfam yɔ, Ebree abalɩmasɩ 4 nzɩ pamanɩ Ɛsɔ hɩɖɛ Yahweh yɔ, sɩɩwɛ Nɔɔ Haʋ Kɩbɩm masɩ nzɩ paya Nɔɔ Haʋ Kɩfam masɩ taa yɔ, sɩ-taa nasɩyɩ taa yaa sɩ-tɩŋa sɩ-taa.» (The Anchor Bible Dictionary, volume 6, hɔɔlʋʋ 392) Ye ŋsɔɔlaa se ŋtɩlɩ nɛ pɩkpaɖɩ yɔ, kalɩ tɔm ñʋʋ «Ɛsɔ hɩɖɛ Krɩstʋ Mba Grɛɛkɩ Masɩ taa.» Kɩwɛ Bibl—Ɛjaɖɛ kɩfaɖɛ tɔm ɖɛzʋʋ tɛ Tɔm kɩsɔzɩtʋ A5 taa. Fransɩɩ tɛ Traduction du monde nouveau Bibl taa lɛ, Tɔm kɩsɔzɩtʋ C2 taa, pama Biblwaa mba pa-taa palabɩnɩ Ɛsɔ hɩɖɛ tʋmɩyɛ Roma mba 10:13 taa yɔ pa-hɩla.
Kalɩ ɖɔɖɔ....
POCOSI BIBL TAA TƆM YƆƆ
Ɛsɔ wɛnɩ hɩɖɛ na?
Pama Ɛsɔ hɩɖɛ maɣmaɣ Biblwaa sakɩyɛ taa Ŋkaɣ-ɖɩ labɩnʋʋ tʋmɩyɛ na?
