«Kɩwɛɛkɩm kɩhɛyʋʋ lɛ sɩm, ɛlɛ kʋjɔʋ ŋgʋ Ɛsɔ tɩŋɩɣnɩ ɖa-Kɩbaɣlʋ Krɩstʋ Yesu yɔɔ nɛ ɛhaɣ yɔ, ŋgʋ lɛ wezuu maatɛŋ.»—Roma mba 6:23, Ɛjaɖɛ kɩfaɖɛ tɔm ɖɛzʋʋ.

 «Kɩwɛɛkɩm kɩhɛyʋʋ kɛlɛ sɩm; piyele nɛ Ɛsɔ kʋjɔʋ kɛzɛɣa lɛ tamtam wezuu, ɖa-Kɩbaɣlʋ Yesu Krɩstʋ taa.»—Roma mba 6:23, TAKAYAƔ KIÐEÐEA, Verbum Bible, 1997.

 Apostoloo Pɔɔlɩ tɩŋnɩ mayaɣ kanɛ ka-taa tɔm yɔɔ nɛ ɛlɩzɩ pɩ-taa se ɛyaa sɩkɩ mbʋ pʋyɔɔ yɔ pɛkɛ kɩwɛɛkɩm laɖaa. Paa mbʋ yɔ, Ɛsɔ ha ɛ-sɛyaa siɣsiɣ ñɩma lidaʋ kɩbaŋʋ nakʋyʋ, ŋgʋ lɛ wezuu maatɛŋ kʋjɔʋ.

 «Kɩwɛɛkɩm kɩhɛyʋʋ lɛ sɩm.» Palʋlɩ ɛyaa tɩŋa mantɩtalɩ pilim wɛtʋ taa, pʋyɔɔ pituyuu-wɛ nɛ palakɩ kɩwɛɛkɩm. a (Keɣa 51:5; Eklezɩyasɩtɩ 7:20) Ɛzɩma palʋlɩ ɛyaa kɩwɛɛkɩm taa yɔ pʋyɔɔ pakpadɩyɩɣ nɛ pasɩkɩ.—Roma mba 5:12.

 Pɔɔlɩ kpaɣ kɩɖaʋ nakʋyʋ se ɛlɩzɩnɩ tɔm ndʋ tɩ-taa. Ɛkpaɣ kɩwɛɛkɩm nɛ ɛmaɣzɩnɩ tʋmɩyɛ ñʋʋdʋ weyi ɛhɛyɩɣ tʋmlaɖʋ e-liidiye yɔ. Ɛzɩma tʋmlaɖʋ nɔɔyʋ nawa se pakaɣ-ɩ hɛyʋʋ tʋmɩyɛ nɖɩ ɛlaba yɔ ɖi-liidiye yɔ, mbʋ ɖɔɖɔ ɛzɩma ɛyaa tɩtalɩ pilim yɔ panawa se pakaɣ sɩbʋ.

 Paa mbʋ yɔ, Pɔɔlɩ tasɩ lɩzʋʋ pɩ-taa se «ɛyʋ weyi ɛsɩba yɔ, ɛlɩ ɛ-kɩwɛɛkɩm taa.» (Roma mba 6:7) Alɩwaatʋ ndʋ ɛyʋ nɔɔyʋ sɩkɩ yɔ, ɛlɩ kɩwɛɛkɩm mbʋ payɩ ɛɛlaba yɔ pɩ-taa. Pʋyɔɔ pɩtɩmʋna se ɖɩmaɣzɩ se sɩɖaa ɖiɣni labʋ kʋñɔŋ ɖoli kɩwɛɛkɩm mbʋ paalaba yɔ pʋyɔɔ. Toovenim taa lɛ, Bibl yɔɔdɩ kpayɩ kpayɩ se sɩɖaa ɩɩpɩzɩɣ nɛ pamaɣzɩ yaa pala nabʋyʋ.—Eklezɩyasɩtɩ 9:5.

 «Ɛlɛ kʋjɔʋ ŋgʋ Ɛsɔ tɩŋɩɣnɩ ɖa-Kɩbaɣlʋ Krɩstʋ Yesu yɔɔ nɛ ɛhaɣ yɔ, ŋgʋ lɛ wezuu maatɛŋ.» Kɩwɛɛkɩm «kɩhɛyʋʋ» wɛ ndɩ kpem nɛ kʋjɔʋ ŋgʋ Ɛsɔ lakɩ yɔ; kʋjɔʋ ŋgʋ Ɛsɔ lakɩ yɔ ŋgʋ lɛ wezuu maatɛŋ. Tɔm piye nɖɩ palabɩnɩ tʋmɩyɛ kiɖe tɛɛ se «kʋjɔʋ» yɔ papɩzɩɣ nɛ pɛɖɛzɩ-ɖɩ ɖɔɖɔ se «pʋtɔdɩyɛ naʋ kʋjɔʋ.» Pɩwɩlɩɣ kʋjɔʋ ŋgʋ palakɩ nɔɔyʋ ɛlɛ ɛtɩmʋna se palabɩ-ɩ kʋ yɔ. Ɛyaa kɛ kɩwɛɛkɩm laɖaa nɛ pa-taa nɔɔyʋ ɛɛpɩzɩɣ nɛ ɛtaa liu se ehikiɣ ñʋʋ yabʋ nɛ wezuu maatɛŋ. (Keɣa 49:7, 8) Paa mbʋ yɔ, ɛyaa mba pɛwɛnɩ tisuu Yesu yɔɔ yɔ, Ɛsɔ ha-wɛ kʋjɔʋ ŋgʋ kɩ-wayɩ fɛyɩ yɔ falaa; kʋjɔʋ ŋgʋ lɛ wezuu maatɛŋ.—Yohanɛɛsɩ 3:16; Roma mba 5:15, 18.

 Krɩstʋ ñɩma mba paawɛ Roma yɔ Pɔɔlɩ ma takayaɣ kanɛ pɩnaɣ 56 taa mbʋ yɔ. Pɩwɛ ɛzɩ alɩwaatʋ ndʋ tɩ-taa, Krɩstʋ ñɩma mba pa-taa nabɛyɛ taawɛɛnɩ lɩmaɣza wena amʋnaa yɔ Ɛsɔ pʋtɔdɩyɛ naʋ yɔɔ yɔ. Grɛɛkɩ lɔŋsɩnɖaa lɩmaɣza kaawɛnɩ ɖoŋ pɔ-yɔɔ, nɛ pʋyɔɔ lɛ pɩtɩla pamaɣzaɣ se ye ɛyʋ ɛlabɩ kɩwɛɛkɩm sakɩyɛ yɔ ehikiɣ Ɛsɔ kpaɣʋ nɛ kpeɣu sakɩyɛ ɖɔɖɔ. (Roma mba 6:1) Lalaa ñɔyɔɔdaɣ se paapɩzɩɣ nɛ pɔhɔ pa-nɩŋgbaaŋ pa-kɩwɛɛkɩm yɔɔ, mbʋ pʋyɔɔ yɔ patɩtasɩ wɛʋ Moyizi Paɣtʋ tɛɛ. (Roma mba 6:15) Takayaɣ ŋga ka-taa, Pɔɔlɩ ñɩɣ niye se ye Krɩstʋ mba iyeba nɛ kɩwɛɛkɩm labʋ wɛɛnɩ ɖoŋ pɔ-yɔɔ yɔ Ɛsɔ ɛɛkaɣ naʋ pa-pʋtɔdɩyɛ.—Roma mba 6:12-14, 16.

 Tɔm ndʋ Pɔɔlɩ yɔɔdɩ takayaɣ ŋga ka-taa yɔ tɩhɛzɩɣ Ɛsɔ sɛyaa laŋa sɔnɔ, mbʋ pʋyɔɔ yɔ panawa se paa palʋlɩ-wɛ kɩwɛɛkɩm taa yɔ pɛwɛnɩ lidaʋ. Ɛsɔ labɩ tamaɣ se ye pañaŋ paɣtʋ ndʋ ɛɖʋ wezuu kɩbaŋʋ caɣʋ nʋmɔʋ taa, nɛ paayeki se pɔ-kɔɖɛyɩ kɩdɛkɛdʋʋ eseɣti-wɛ nɛ pala mbʋ pɩfɛyɩ ɖeu yɔ, ɛhaɣ-wɛ wezuu maatɛŋ.—Roma mba 6:22.

 Cɔnɩ video cikpeluu kʋnɛ nɛ ŋtɩlɩ Roma mba takayaɣ taa lɩmaɣza sɔsɔna