BIBL MASƖ SƖNƐ SƖ-TƆBƲƲ LƐ SUWE?
Yereemii 33:3—«Ya-m nɛ mankaɣ-ŋ cosuu»
«Ya-m nɛ mankaɣ-ŋ cosuu nɛ mɛnkɛdɩ-ŋ faaa tɔm sɔsɔtʋ nɛ tɔm ndʋ paapɩzɩɣ nɛ panɩɩ tɩ-tɔbʋʋ yɔ, ndʋ ŋtɩsɩm-tʋ yɔ.»—Yereemii 33:3, Ɛjaɖɛ kɩfaɖɛ tɔm ɖɛzʋʋ.
«Ma kubuka nɛ mɔn-cɔlɔ kiŋ, manɩɣnɩ-ŋ nɛ mankaɣ-ŋ heyuu tɔm sɔsɔtʋ nɛ ndʋ tɩ-yɔɔ huuzaa yɔ, ndʋ ŋŋsɩŋ yɔ.»—Yereemii 33:3, TAKAYAƔ KIÐEÐEA, Verbum Bible, 1997.
Yereemii 33:3 tɔbʋʋ nɩʋ
Ɛsɔ caɣ se ɛtɩŋnɩ tɔm ndʋ tɩ-yɔɔ nɛ eheyi ɛyaa se patɩmɩɣnɩ-ɩ. Nɛ ɛyaa mba pɔɖɔŋ tɔm ndʋ tɩ-yɔɔ nɛ patɩmɩɣnɩ Ɛsɔ yɔ, ɛwɩlɩɣ-wɛ mbʋ pɩkaɣ labʋ cee wayɩ yɔ.
«Ya-m nɛ mankaɣ-ŋ cosuu.» Tɔm loyaɣ «ya-m» ɛɛwɩlɩɣ se ɖɩyaa Ɛsɔ hɩɖɛ yaa ɖikoo ɛ-hɩɖɛ yem. Ɛlɛ ye pɔtɔm se ɖɩyaa Ɛsɔ yɔ, pɩwɩlɩɣ se ɖɩpɔzɩ-ɩ adɩma taa se ɛsɩnɩ-ɖʋ nɛ ɛwɩlɩ-ɖʋ nʋmɔʋ.—Keɣa 4:1; Yereemii 29:12.
Pɩwɛ ɛzɩ caanaʋ taa Izrayɛɛlɩ samaɣ Ɛsɔ kaaheyi tɔm ndʋ yɔ. Izrayɛɛlɩ mba kaaha Ɛsɔ siɣye, nɛ Babilɔɔnɩ sɔɔjanaa kaakɔma se poyooni-wɛ. (Yereemii 32:1, 2) Pʋyɔɔ Yehowa a heyi-wɛ se papɩsɩnɩ ɛnʋ yɔɔ nɛ patɩmnɩ-ɩ.
«Nɛ mɛnkɛdɩ-ŋ . . . tɔm sɔsɔtʋ nɛ tɔm ndʋ paapɩzɩɣ nɛ panɩɩ tɩ-tɔbʋʋ yɔ, ndʋ ŋtɩsɩm-tʋ yɔ.» Tɔm ndʋ Ɛsɔ labɩ tamaɣ se ɛkɛdɩɣ yɔ, tɩkɛ «tɔm ndʋ paapɩzɩɣ nɛ panɩɩ tɩ-tɔbʋʋ yɔ.» Pʋ-tɔbʋʋ se ɛyʋ ɛɛpɩzɩɣ nɛ ɛnɩɩ tɩ-tɔbʋʋ ɛ-maɣmaɣ ɛ-tɩ yɔɔ kpa. Tɔm ndʋ pɛɖɛzaa se «tɔm ndʋ paapɩzɩɣ nɛ panɩɩ tɩ-tɔbʋʋ yɔ» papɩzɩɣ nɛ pɛɖɛzɩ-tʋ ɖɔɖɔ se «mɛsaɣ tɛɛ tɔm.»
«Mɛsaɣ tɛɛ tɔm» ndʋ yɔɔ Ɛsɔ kaɣaɣ kuluu? Mbʋ pɩkaɣaɣ labʋ nɛ ɛsɩndaa yɔ pɩ-yɔɔ ɛkaɣaɣ kuluu, pʋ-tɔbʋʋ se pakaɣ ɖɩzʋʋ Yeruzalɛm tɛtʋ nɛ pɔyɔkɩ-tʋ caɣ caɣ nɛ pʋwayɩ lɛ, paɖaɣnɩ-tʋ maʋ. (Yereemii 30:1-3; 33:4, 7, 8) Ɛlɛ Ɛsɔ yɔɔdaa ɖɔɖɔ se paakaɣ ɖɩzʋʋ ɛ-samaɣ caɣ caɣ.—Yereemii 32:36-38.
Tɔm ndʋ tɩcɔ Yereemii 33:3 nɛ tɩta yɔ
Yehowa heyi nayʋ Yereemii tɔm ndʋ Wiyaʋ Zedekiya kewiyitu tɔɔʋ pɩnaɣ 10 ñɩŋga taa, pʋ-tɔbʋʋ se pɩnaɣ 608 taa P.P.Y. Yereemii kaayɔɔdaa se pakaɣ yɔkʋʋ Yeruzalɛm nɛ powoni Zedekiya yomiye taa. Tɔm ndʋ tɩtaakɛdɩnɩ wiyaʋ, pʋyɔɔ eyeba nɛ paɖʋ Yereemii salaka.—Yereemii 32:1-5; 33:1; 37:21.
Wɛtʋ ndʋ tɩ-taa Ɛsɔ kaayɔɔdɩ Yereemii 33:3 taa tɔm. Pɩlabɩ pʋtɔdɩyɛ se Wiyaʋ Zedekiya nɛ samaɣ taa ɛyaa sakɩyɛ powobi pɩ-yɔɔ nɛ pala kaañamtʋ lakasɩ. (Yereemii 7:26; 25:4) Patɩtɩmnɩ Ɛsɔ se ɛwɩlɩ-wɛ nʋmɔʋ. Pɩnaɣ kʋɖʋmaɣ wayɩ lɛ, Wiyaʋ Zedekiya lesi e-kewiyitu, paɖɩzɩ Yeruzalɛm nɛ powoni Izrayɛɛlɩ mba sakɩyɛ yomiye taa Babilɔɔnɩ.—Yereemii 39:1-7.
Tɔm ndʋ tɩwɛ Yereemii 33:3 taa yɔ, tɩtɔzʋʋ mba pakalɩɣ-tʋ sɔnɔ yɔ se Ɛsɔ pɩzɩɣ nɛ ɛsɩnɩ mba patɩmɩɣnɩ-ɩ nɛ pakalɩɣ ɛ-Tɔm Bibl yɔ nɛ patɩlɩ «[ɛ-sɔɔlɩm] tɛ toovenim sɩmtʋ,» nɛ ɛpɩzɩɣ ɖɔɖɔ nɛ ɛwɩlɩ-wɛ «wondu ndʋ tɩwɛ cukaŋ yɔ.» (Koloosi mba 1:9; 1 Kɔrɛntɩ mba 2:10) Wondu cukaŋ ñɩndʋ ndʋ tɩ-taa natʋyʋ lɛ mbʋ Ɛsɔ labɩ tamaɣ se piileɖiɣ lɛ ɛkaɣ labʋ yɔ.—Natʋ 21:3, 4.
Cɔnɩ video cikpeluu kʋnɛ nɛ ŋtɩlɩ Yereemii takayaɣ taa lɩmaɣza sɔsɔna.
a Ɛsɔ hɩɖɛ maɣmaɣ lɛ Yehowa. (Keɣa 83:18) Kalɩ tɔm ñʋʋ «Qui est Jéhovah?»
