Pitileɖi yɔ helim sɔsɔm mbʋ payaɣ se Freddy yɔ pɩmabɩ Afrika wɩsɩ ɖɩlɩyɛ taa kiŋ, pɩmaba kɩyakɩŋ sakɩyɛ, nɛ wiɖiyi nabʋyʋ tɩmabɩtɩ mbʋ. Helim mbʋ pɩkʋyɩnɩ teŋgu yɔɔ février 2023 ɖɩbazɩyɛ, nɛ pɩma nɛ pɩtalɩ tɛtʋ hɔɔlɩŋ sakɩyɛ taa. 21 février 2023 wiye, pɩmabɩ Madaagasɩkaarɩ ɛjaɖɛ taa nɛ kɩyakɩŋ sakɩyɛ wayɩ lɛ, pɩɖɛɛ nɛ pɩtalɩ Moozambiiki ɛjaɖɛ nɛ Malaawii ɛjaɖɛ taa. Helim mbʋ, pɩwɛɛ nɛ pɩkpaɣ ɖoŋ kpaʋ yɔɔ nɛ 11 mars 2023 wiye lɛ pɩɖaɣnɩ mabʋ Moozambiiki ɛjaɖɛ taa. Pɩɩwɛɛkɩ wondu ageeta sakɩyɛ taa Madaagasɩkaarɩ, Malaawii nɛ Moozambiiki ajɛɛ taa. Helim sɔsɔm maba nɛ tɛʋ sɔsɔʋ nɩɩ nɛ lɩm wadɩ ageeta ana a-taa nɛ pɩwɛɛkɩ ɖɩsɩ, nɛ pɩkʋ ɛyaa mba yɔ pɛcɛzɩ 500 nɛ ɖo-koobiya sakɩyɛ wɛ pa-taa. Ɛyaa kudokiŋ sakɩyɛ ɖɔɖɔ lɩ pa-ɖɩsɩ taa nɛ pɛkɛɛ lona.

Akɔnta ŋgʋ kɩ-tɔm ɖɩcaɣ yɔɔdʋʋ yɔ, 27 mars 2023 wiye palabɩ-kʋ. Koobiya mba pɛwɛ lona ana a-taa yɔ patazɩ akɔntanaa mba pa-taa nɛ pañɩɣ niye se pɩkɛ toovenim. Ɛlɛ akɔnta kʋnɛ kɩpɩzɩɣ kɩcɛzɩ mbʋ pʋwayɩ, mbʋ pʋyɔɔ yɔ lona lɛɛna taa wobu wɛ kaɖɛ nɛ koobiya tɩnatɩ ɛzɩma wondu wɛɛkɩ peeɖe yɔ.

Madaagasɩkaarɩ

• Pɛkɛzɩ tɔm susuyaa 256 nɛ pɔ-hɔŋ taa mba lalaa lona.

• Pɩɩpʋʋtɩ ɖɩsɩ 8.

• Pɩɩwɛɛkɩ ɖɩsɩ 29.

• Pɩɩwɛɛkɩ Kewiyaɣ kpaamɩŋ 3.

Malaawii

• Pɩlabɩ pʋtɔdɩyɛ se tɔm susuyaa 8 sɩba nɛ halɩ nɛ sɔnɔ paanaɣ tɔm susuyaa 6.

• Tɔm susuyaa 3 mʋ heŋ.

• Tɔm susuyaa mba pɛkɛzɩ pa nɛ pɔ-hɔŋ taa mba lalaa lona yɔ pɛcɛzɩ 4300.

• Pɩɩpʋʋtɩ ɖɩsɩ 821.

• Pɩɩwɛɛkɩ ɖɩsɩ 174.

• Pɩɩwɛɛkɩ Kewiyaɣ kpaamɩŋ 20.

Moozambiiki

• Pɩlabɩ pʋtɔdɩyɛ se tɔm susuyu 1 sɩba nɛ halɩ nɛ sɔnɔ paanaɣ 1.

• Pɛkɛzɩ tɔm susuyaa 880 nɛ pɔ-hɔŋ taa mba lalaa lona.

• Pɩɩpʋʋtɩ ɖɩsɩ 248.

• Pɩɩwɛɛkɩ ɖɩsɩ 185.

• Pɩɩwɛɛkɩ Kewiyaɣ kpaamɩŋ 7.

• Halɩ nɛ sɔnɔ, pɩwɛ kaɖɛ se ɛyʋ ewolo lona wena a-taa pɩwɛɛkɩ wondu yɔ a-taa sakɩyɛ taa.

• Sɩnʋʋ kɔɔmiteewaa wɛɛ nɛ pahaɣ mba asɛyʋʋ ŋgʋ kitukunaa yɔ ɖɩzʋyɛ, tɔɔnaɣ, lɩm nɛ wondu lɛɛtʋ.

• Moozambiiki ɛjaɖɛ taa, pesiɣ kizinziku nakʋyʋ Gaazaa egeetiye taa se pɩsa nɛ tɔm susuyaa 167 nɛ pɔ-hɔŋ taa ñɩma mba paawoba nɛ pɔcɔzɩ Kigbeɣluu kpaaŋ nakʋyʋ taa yɔ powolo nɛ pacaɣ kɩ-tɛɛ alɩwaatʋ natʋyʋ. Ɛyaa mɩnɩŋ sakɩyɛ wɛ Kewiyaɣ kpaamɩŋ taa, nɛ lalaa ɖɔɖɔ ñɛwɛɛ ɛyaa lalaa ɖɩsɩ taa egeetiye hɔɔlɩŋ lɛɛŋ taa.

• Pɛtɛm ñɔɔzʋʋ ɖɩsɩ nzɩ yɔ sɩcɛzɩ 16.

• Ɛgbɛyɛ piliŋa kɔɔmitee taa mba, egeetiye yɔɔ cɔnɩyaa nɛ peeɖe ɛgbɛyɛ taa ɛzʋtʋyaa wɛɛ nɛ pekilimiɣ hɔŋ yɔɔ se patɩlɩ ɩ-kɩcɛyɩm nɛ pasɩnɩ-ɩ.

Paa ɖo-koobiya mba pɛwɛ tɩlasɩ ndɩ ndɩ nzɩ sɩ-taa mbʋ yɔ pɛwɛɛ nɛ powoki pɩ-yɔɔ nɛ palakɩ kediɣzisi lona wena a-taa papɩzɩɣ yɔ nɛ pakpazɩɣ ɖama ɖoŋ. Ða-taa tɛma se Yehowa kaɣ-wɛ haʋ «ɖoŋ weyi ɩcɛzɩ ɛyʋ ɖoŋ yɔ» nɛ pɩsɩnɩ-wɛ nɛ pɔɖɔkɩ pa-laŋa.—2 Kɔrɛntɩ mba 4:7.