29 août 2023 wiye, helim sɔsɔm mbʋ payaɣ se Idalia yɔ pɩɩmabɩ Kubaa wɩsɩ ɖɩɖʋyɛ taa egeetiye nɖɩ payaɣ se Pinar del Río yɔ ɖɩ-taa nɛ tɛʋ nɩɩ ɖɔɖɔ siŋŋ. Helim mbʋ pɩɩwɛɛ nɛ pɩkpaɣ ɖoŋ kpaʋ yɔ nɛ pi-seya kɔɔ nɛ acɛzɩ kilomɛtanaa 200 ñɩɣyʋʋ kʋɖʋmʋʋ yɔɔ. 30 août 2023 wiye lɛ, helim mbʋ pɩtalɩ Floriidi tɛtʋ ndʋ tɩwɛ kidiiliŋ yɔɔ nɛ payaɣ-tʋ se Keaton Beach yɔ tɩ-taa, (Etaazuunii ɛjaɖɛ taa.) Pʋwayɩ lɛ, helim mbʋ pi-ɖoŋ pasɩ nɛ piseɣ ɛzɩ kpaɣnɩ kilomɛtanaa 63 nɛ ŋwolo kilomɛtanaa 118 ñɩɣyʋʋ kʋɖʋmʋʋ yɔɔ mbʋ yɔ. Paa mbʋ yɔ pɩɩwɛ ɖoŋ siŋŋ, tɛʋ sɔsɔʋ nɩɣaɣ, lɩm wadɩɣ nɛ laatriki miŋ cɛ hɔɔlɩŋ sakɩyɛ taa Floriidi tɛtʋ taa, Jeyɔɔrjii tɛtʋ taa nɛ Karoolini tɛtʋ hayo kiŋ nɛ hadɛ kiŋ.

Kubaa

• Ðo-koobu nɔɔyʋ tɩsɩ.

• Paakɛzɩ tɔm susuyu kʋɖʋm lone.

• Pɩɩpʋʋtɩ ɖɩɣa kʋɖʋmaɣ.

• Pɩɩwɛɛkɩ ɖɩsɩ 12 hɔɔlɩŋ nɩɩyɩ pazɩ.

Etaazuunii

• Ðo-koobu nɔɔyʋ tɩsɩ.

• Tɔm susuyu kʋɖʋm kaamʋ heŋ pazɩ.

• Paakɛzɩ tɔm susuyaa 1297 lona.

• Pɩɩpʋʋtɩ ɖɩsɩ 4.

• Pɩɩwɛɛkɩ ɖɩsɩ 12 hɔɔlɩŋ nɩɩyɩ siŋŋ.

• Pɩɩwɛɛkɩ ɖɩsɩ 61 hɔɔlɩŋ nɩɩyɩ pazɩ.

• Pɩɩwɛɛkɩ Kewiyaɣ kpaaŋ kʋɖʋmʋʋ hɔɔlɩŋ nɩɩyɩ siŋŋ.

• Pɩɩwɛɛkɩ Kewiyaɣ kpaamɩŋ 3 hɔɔlɩŋ nɩɩyɩ pazɩ.

• Kubaa nɛ Etaazuunii lona wena a-taa helim wɛɛkɩ wondu yɔ, peeɖe ɛzʋtʋyaa nɛ egeetiye yɔɔ cɔnɩyaa pɛwɛɛ nɛ patɩŋɩɣnɩ Bibl yɔɔ nɛ pakpazɩɣ koobiya ɖoŋ nɛ pasɩɣnɩ-wɛ.

Ða-taa tɛma se Yehowa kaɣ wobu pɩ-yɔɔ nɛ ɛsɩɣnɩ mba payɩ helim mbʋ payaɣ se Idalia yɔ pɩwɛɛkɩ po-wondu yɔ.—Izaayii 63:9.