4 avril 2023 wiye, Yehowa Aseɣɖe Tɩnaa miiliyɔɔwaa sakɩyɛ nɛ ɛyaa lalaa palabɩ Kɩbaɣlʋ Ðanaɣ Tɔɔnaɣ sɔnzɩ. Paa ɛyaa sakɩyɛ kaakatɩ tɩlasɩ sɔsɔsɩ ndɩ ndɩ yɔ, papɩzaa nɛ powolo ŋgee sɔnzɩ nzɩ sɩ-taa.

Kɩɖaʋ nakʋyʋ yɔ. Ukrɛɛnɩ ɛjaɖɛ taa, ɛyaa kudokiŋ sakɩyɛ pɩzaa nɛ powolo sɔnzɩ nzɩ sɩ-taa paa ɛsɔdaa wɛtʋ ɛtaawɛɛ camɩyɛ nɛ you kaawɛ ɛjaɖɛ hɔɔlɩŋ nɩɩyɩ taa yɔ. Ukrɛɛnɩ wɩsɩ ɖɩlɩyɛ hɔɔlʋʋ taa, you yɔɔ lɛ, ɛgbɛyɛ taa ɛzʋtʋyaa cɛlɩ koobiya Krɩstʋ sɩm yɔɔ tɔzʋʋ sɔnzɩ tɔm yɔɔdʋʋ mbʋ pakpaɣ tataɣ yɔɔ yɔ kpɩtaʋ kʋɖʋmʋʋ pʋcɔ nɛ sɔnzɩ alɩwaatʋ talɩɣ. Kɩyakɩŋ pazɩ wayɩ lɛ, helim sɔsɔm nabʋyʋ ma hɔɔlʋʋ ŋgʋ kɩ-taa nɛ pɩcɛ intɛrnɛɛtɩ nɛ laatriki miŋ. Ɛlɛ, ɛgbɛyɛ taa koobiya tɩŋa pɩzaa nɛ pɔcɔnɩ Krɩstʋ sɩm yɔɔ tɔzʋʋ sɔnzɩ tɔm yɔɔdʋʋ mbʋ pakpaɣ tataɣ yɔɔ yɔ paa laatriki miŋ ɛtaawɛɛ nɛ you ɛtaasɩŋ yɔ.

Kazakhstan ɛjaɖɛ taa lɛ, Violetta weyi ɛwɛnɩ pɩnzɩ 15 yɔ, pakaɖɩnɩ-ɩ ɛ-hɔʋ taa. Ɛ nɛ ɛ-cɔzɔ pɛwɛnɩ ɖɩɣa, nɛ ɛlɛ paɣzɩɣ kaɖɩnʋʋ Bibl taa toovenim tɔm yɔ pɩlakɩ ɛzɩ pɩnzɩ 20 mbʋ yɔ. Ɛñakaɣ pana se ɛɖaŋ ɛ-hɔʋ taa mba nɛ pataawolo kediɣzisi nɛ halɩ ɛcɩyaɣ pa-takayɩsɩ. Ɛlɛ sɔɔlɩm mbʋ ɛɛwɛnɩ ɛ-sayɩ yɔɔ yɔ, piseɣti-i nɛ pazɩ pazɩ lɛ ɛ nɛ ɩ papaɣzɩ labʋ kɛdaɣ Bibl yɔɔ. Nɛ pɩɖɩɣzɩ Violetta siŋŋ mbʋ pʋyɔɔ yɔ pɩnaɣ kanɛ, ɛ-cɔzɔ tisaa nɛ ɛpaɣzɩ kpɛlɩkʋʋ Bibl nɛ halɩ ɛkɔɔ Krɩstʋ sɩm yɔɔ tɔzʋʋ sɔnzɩ taa.

Lalaa lɛ, pɛwɛ lona wena awɛ poliŋ yɔ a-taa nɛ mbʋ yebina nɛ Krɩstʋ sɩm yɔɔ tɔzʋʋ sɔnzɩ taa wobu labɩ-wɛ kaɖɛ. Timor oriental taa lɛ, ɖo-koobiya tɩŋɩɣnɩ kaŋgalaafu yɔɔ nɛ pɛkpɛlɩkɩɣnɩ ɛyaa 55 Bibl Same nɛ Suai tɛtʋ taa. Lona ana a-naalɛ aposi siŋŋ, nɛ ye ɛyʋ ɛkʋyɩ a-taa naɖɩyɛ taa se ewoki ɛgbɛyɛ nɖɩ ɖɩkɩlɩ ñɔtɩnʋʋ yɔ ɖɩ-taa yɔ, ye kpokpo ɛcaɣaɣ yɔ pɩkpakɩɣ-ɩ ñɩɣtʋ sakɩyɛ. Ɛlɛ koobiya labɩ ɖʋtʋ se pɩsa nɛ tɛtʋ ndʋ tɩ-naalɛ tɩ-taa papɩzɩ nɛ pala Krɩstʋ sɩm yɔɔ tɔzʋʋ sɔnzɩ ɖɩsɩ nasɩyɩ taa. Ɛzʋtʋyʋ nɔɔyʋ ɖɔm nʋmɔʋ ñɩɣtʋ 4 nɛ ewolo Same se ɛyɔɔdɩ Krɩstʋ sɩm yɔɔ tɔzʋʋ sɔnzɩ tɔm yɔɔdʋʋ, nɛ ɛyaa 56 kaakɔm sɔnzɩ nzɩ sɩ-taa. Ɛzʋtʋyʋ lɛlʋ ñɔɖɔm nʋmɔʋ ñɩɣtʋ 7 nɛ ewolo Suai, ɖɩnɛ ɛlɛ ɛyaa 50 kaakɔmna.

Ðo-koobiya mba pɛwɛ Siilii tɛtʋ ndʋ payaɣ se Hualpén yɔ tɩ-taa yɔ, ɛzɩma pehiɣ lone nɖɩ ɖɩ-taa pala Krɩstʋ sɩm yɔɔ tɔzʋʋ sɔnzɩ yɔ mbʋ kaalabɩnɩ-wɛ kaɖɛ. Pɔpɔzɩ tɛtʋ taa ñʋʋdʋ weyi ɛcɔŋnɩ Ɛsɔ sɛtʋ tʋma yɔɔ yɔ se ɛsɩnɩ-wɛ nɛ pehiɣ lone kɩbanɖɛ naɖɩyɛ nɛ pala sɔnzɩ nzɩ. Ñɩɣtʋ pazɩ nɛ pʋcɔ sɔnzɩ nzɩ sɩ-alɩwaatʋ talɩɣ lɛ, pɩɩlabɩ ɛzʋtʋyaa leleŋ se ñʋʋdʋ ɛnʋ ɛya-wɛ nɛ eheyi-wɛ se powolo sukuli nakʋyʋ taa nɛ pala sɔnzɩ nzɩ tɔɔnaɣ ɖɩdɔɔyɛ kuduyuu nakʋyʋ tɛɛ. Kpaagbaa mbʋ lɛ, ɖo-koobiya ñaɣ pana nɛ pɔñɔɔzɩ kuduyuu ŋgʋ kɩ-tɛɛ nɛ kɩpɩsɩ kediɣzaɣ lone kɩbanɖɛ. Tɛtʋ taa ñʋʋdʋ weyi ɛcɔŋnɩ Ɛsɔ sɛtʋ tʋma yɔɔ yɔ nɛ tɛtʋ ñʋʋdʋ, petisaa nɛ pɔkɔɔ Krɩstʋ sɩm yɔɔ tɔzʋʋ sɔnzɩ nzɩ sɩ-taa. Tɛtʋ ñʋʋdʋ yɔɔdaa se: «Mansaŋ mba pɔkɔm kediɣzaɣ kanɛ ka-taa yɔ ñamtʋ ndʋ pɛwɛna yɔ tɩ-yɔɔ nɛ ɛzɩma peyeba nɛ pɩtɩŋa pɩɖɔ camɩyɛ cɔlɩɩɩ yɔ pʋyɔɔ, halɩ piya ɖɔɖɔ kaawɛnɩ wɛtʋ kɩbandʋ. Mɩ-taa pɩzɩɣ nɛ pɩtɛ se ɖɩkaɣ-mɩ sɩnʋʋ ye pɩpɔzʋʋ yɔ.»

Ðɩnɩwa se novembre 2022, Monaco ɛjaɖɛ tisaa se Yehowa Aseɣɖe Tɩnaa kɛ Ɛsɔ sɛtʋ ɛgbɛyɛ lɛ, pɩɩlabɩ-ɖʋ leleŋ ɖɔɖɔ siŋŋ. Ðɩɩlabɩ haya kuduyuu kɩbaŋʋ nakʋyʋ nɛ ɖɩla Krɩstʋ sɩm yɔɔ tɔzʋʋ sɔnzɩ kɩ-taa, sɔnzɩ nzɩ sɩtɛma lɛ mba paya-wɛ nɛ pɔkɔɔ yɔ pa-taa nɔɔyʋ yɔɔdɩ se: «Pɩkɛ toovenim se kuduyuu kʋnɛ kɩwɛ ɖeu kpem, ɛlɛ ɛyaa mba pɛwɛ cɩnɛ yɔ mba yebina nɛ kɩwɛɛ ɖeu nɛ pɩkɩlɩ.»

Pɩkpazɩɣ-ɖʋ ɖoŋ siŋŋ se ɖo-koobiya pɩzaa nɛ pawa tɩlasɩ sɩnɛ nɛ tɩlasɩ lɛɛsɩ se pɩsa nɛ paña paɣtʋ ndʋ Krɩstʋ ɖʋwa se ɖikpeɣliɣ nɛ ‘ɖɩtɔzʋʋ’ ɛ-sɩm yɔɔ yɔ.—Luka 22:19.