2 Kɔrɛntɩ mba 7:1-16
7 Ye mbʋ, ɛzɩma ɖɩwɛnɩ lidaʋ tɔm tʋnɛ yɔ pʋyɔɔ lɛ, koobiya kʋsɔɔlaa, ɖɩñalɩ ɖo-tomnaɣ yɔɔ nɛ ɖa-maɣzɩm* taa azuluma tɩŋa, nɛ ɖɛ-wɛtʋ kiɖeɖetu wɛɛ pilim Ɛsɔ sɔɔndʋ seu taa.
2 Ɩha-ɖʋ ɖɩjaɣyɛ mɩ-laŋa taa. Ðɩtɩla nɔɔyʋ kɩdɛkɛdɩm nabʋyʋ, ɖɩtɩɖʋzɩ nɔɔyʋ, ɖitimuli nɔɔyʋ se ɖihiɣ kɛzɛɣa.
3 Maayɔɔdʋʋ mbʋ se mankʋ mɩ-tɔm. Mbʋ pʋyɔɔ yɔ maatɛm yɔɔdʋʋ se ɩwɛ ɖa-laŋa taa se ɖa nɛ mɩ ɖɩsɩ nɛ ɖa nɛ mɩ ɖɩwɛɛ wezuu.
4 Mɔyɔɔdʋʋnɩ-mɩ kaalɛyɩtʋ siŋŋ.* Mankʋndʋʋ mɩ-yɔɔ siŋŋ. Laŋɩyɛ hɛzʋʋ su man-taa ɖo; man-taa lakɩ leleŋ nɛ pɩɖɛlɛsɩɣ ɖa-kʋñɔmɩŋ tɩŋa taa.
5 Toovenim taa lɛ, alɩwaatʋ ndʋ ɖɩtalɩ Masedonii yɔ, ɖo-tomnasɩ tɩhɛzɩ, ɛlɛ ɖɩwɛ kʋñɔŋ tɔɔʋ yɔɔ hɔɔlɩŋ tɩŋa taa—yoŋ kaawɛ awayɩ, nɛ sɔɔndʋ ñɛwɛɛ pɩ-taa.
6 Ɛlɛ Ɛsɔ weyi ɛhɛzɩɣ mba pitibi-wɛ yɔɔɔ yɔ pa-laŋa yɔ, ɛtɩŋnɩ ɛzɩma Tiiti kaawɛ ɖɔ-cɔlɔ yɔ pɩ-yɔɔ nɛ ɛhɛzɩ ɖa-laŋa;
7 nɛ pɩtɩsɩɩnɩ ɛzɩma ɛɛwɛ ɖɔ-cɔlɔ yɔ pi-ɖeke, ɛlɛ pɩtɩŋnɩ ɖɔɖɔ laŋɩyɛ hɛzʋʋ mbʋ iyeba nɛ ehiɣ yɔ pɩ-yɔɔ, mbʋ pʋyɔɔ yɔ, ɛkɛdɩ-ɖʋ ɛzɩma mi-liu kaawɛɛ kpem se ɩna-m yɔ, ɛzɩma ɩcaɣ kʋñɔwiye yɔ, nɛ ɛzɩma ɩmaɣzɩɣ* mɔ-yɔɔ siŋŋ yɔ; pʋyɔɔ lɛ, man-taa labɩ leleŋ kpem nɛ pɩkɩlɩ.
8 Mbʋ pʋyɔɔ yɔ, paa man-takayaɣ ɛkɔnɩ-mɩ laŋwɛɛkɩyɛ yɔ, maakpiɖiɣ pɩ-yɔɔ. Paa maakpiɖi pɩ-yɔɔ kajalaɣ taa kɔyɔ (manawa se takayaɣ ŋga kɔkɔnɩ-mɩ laŋwɛɛkɩyɛ, ɛlɛ alɩwaatʋ pazɩ yem na),
9 lɛɛlɛɛyɔ lɛ man-taa lakɩ leleŋ, pɩtɩkɛ ɛzɩma pɩkɔnɩ-mɩ laŋwɛɛkɩyɛ yɔ pʋyɔɔ yem, ɛlɛ ɛzɩma pɩkɔnɩ-mɩ laŋwɛɛkɩyɛ nɛ ikpiɖi mɩ-kɩwɛɛkɩm yɔɔ yɔ pʋyɔɔ. Mbʋ pʋyɔɔ yɔ pɩkɔnɩ-mɩ laŋwɛɛkɩyɛ nɖɩ ɖɩlabɩ nɔɔ kʋɖʋmaɣ nɛ Ɛsɔ sɔɔlɩm yɔ, se pɩtaala nɛ ɖɔ-yɔɔ yɔɔ lɛ, pɩkɔnɩ-mɩ kaɖɛ.
10 Mbʋ pʋyɔɔ yɔ laŋwɛɛkɩyɛ nɖɩ ɖɩlabɩ nɔɔ kʋɖʋmaɣ nɛ Ɛsɔ sɔɔlɩm yɔ, ɖɩkɔŋnɩ kɩwɛɛkɩm yɔɔ kpiɖuu mbʋ piwokini ñʋʋ yabɩtʋ taa yɔ, nɛ pɩɩkɔŋnɩ agbiɖa; ɛlɛ ɛjaɖɛ yɔɔ laŋwɛɛkɩyɛ kɔŋnɩ sɩm.
11 Mbʋ pʋyɔɔ yɔ ɩna pee kɩbana wena mɩ-pana ñaɣʋ lʋlɩ mɩ-taa alɩwaatʋ ndʋ ɩwɛ laŋwɛɛkɩyɛ nɖɩ ɖɩlabɩ nɔɔ kʋɖʋmaɣ nɛ Ɛsɔ sɔɔlɩm yɔ ɖɩ-taa yɔ, ɛɛɛ, piyeba nɛ ɩñalɩ mɩ-tɩ; ɛɛɛ, piyeba nɛ ɩpaɖɩ mbʋ pɩfɛyɩ ɖeu yɔ; ɛɛɛ, piyeba nɛ sɔɔndʋ kpa-mɩ; ɛɛɛ, piyeba nɛ mi-liu wɛɛ siŋŋ se ikpiɖi mɩ-kɩwɛɛkɩm yɔɔ; ɛɛɛ, piyeba nɛ ɩwɛɛ kpekpeka; ɛɛɛ, piyeba nɛ ɩñɔɔzɩ mbʋ pɩwɛɛkaa yɔ! Paa hɔɔlʋʋ ŋgʋ kɩ-taa lɛ, ɩwɩlaa se ɩwɛ kele kele* tɔm tʋnɛ tɩ-taa.
12 Paa mama-mɩ takayaɣ yɔ, pɩtɩkɛ weyi ɛlabɩ kɩdɛkɛdɩm, yaa weyi palabɩ-ɩ kɩdɛkɛdɩm yɔ mama-kɛ, ɛlɛ mama-kɛ se pɩsa nɛ pana wena ɩñakɩ ɖɔ-yɔɔ yɔ, pana-yɛ kaɣlaa mɩ-hɛkʋ taa, Ɛsɔ ɛsɩndaa.
13 Pʋyɔɔ pɛhɛzɩ ɖa-laŋɩyɛ.
Ɛlɛ pɩtasɩnɩ ɖa-laŋɩyɛ hɛzʋʋ lɛ, ɖa-taa labɩ leleŋ nɛ Tiiti laŋhʋlʋmɩyɛ nɛ pɩkɩlɩ, mbʋ pʋyɔɔ yɔ mɩ-tɩŋa payɩ ɩhɛzɩ e-fezuu.
14 Mbʋ pʋyɔɔ yɔ ye mankʋndɩ mɩ-yɔɔ ɛ-cɔlɔ yɔ, fɛyɛ tɩkpa-m; ɛlɛ ɛzɩ tɔm ndʋ payɩ ɖiheyi-mɩ yɔ tɩkɛʋ toovenim yɔ, mbʋ ɖɔɖɔ mbʋ pɩ-yɔɔ ɖɩkʋndɩ Tiiti cɔlɔ yɔ pɩkɛ toovenim.
15 Pɩtasɩ lɛ, sɔɔlɩm mbʋ ɛwɛnɩ mɩ-yɔɔ yɔ pɩpaɣlɩɣ siŋŋ, alɩwaatʋ ndʋ ɛtɔzʋʋ mɩ-tɩŋa mɩ-ñamtʋ yɔɔ yɔ, ɛzɩma ɩmʋ-ɩ nɛ sɔɔndʋ nɛ seluu yɔ.
16 Man-taa lakɩ leleŋ se paa hɔɔlʋʋ ŋgʋ kɩ-taa lɛ, manpɩzɩɣ nɛ mantaa-mɩ liu.*
Pɩ-tɛɛ tɔm
^ Piye piye, “ɖe-fezuu.”
^ Yaa “Mɔyɔɔdʋʋnɩ-mɩ kpayɩ.”
^ Piye piye, “ɛzɩma ɩwɛ kpekpeka.”
^ Yaa “se ɩfɛyɩnɩ kɩwɛɛkɩtʋ natʋyʋ.”
^ Pɩpɩzɩɣ pɩkɛ, “manpɩzɩɣ nɛ mɛwɛɛ abalɩtʋ siŋŋ mɩ-yɔɔ.”
