Maatiyee 26:1-75
-
Cɔjɔnaa labɩ nɔɔ se pakʋ Yesu (1-5)
-
Papɩyɩ sɔzɩŋ num Yesu yɔɔ (6-13)
-
Kɛdɛzaɣ Paska nɛ Yesu wayɩ lɩʋ (14-25)
-
Kɩbaɣlʋ Ðanaɣ Tɔɔnaɣ sɔnzɩ ɖʋʋ (26-30)
-
Yesu yɔɔdaa se Pɩyɛɛrɩ kaɣ-ɩ kizuu (31-35)
-
Yesu tɩmɩ Jɛtɩsemaanee (36-46)
-
Pakpa Yesu (47-56)
-
Pahʋnɩ Yesu tɔm Sahedrɛɛ ɛsɩndaa (57-68)
-
Pɩyɛɛrɩ kizi Yesu (69-75)
26 Nɛ Yesu tɛm tɔm ndʋ tɩ-tɩŋa payɩ yɔɔdʋʋ lɛ, eheyi ɛ-tɔmkpɛlɩkɩyaa se:
2 “Ɩnawa se pɩkazɩ kɩyakɩŋ naalɛ se pɔtɔɔ Paska, nɛ pakaɣ ɛyʋ Pɩyalʋ kpaʋ nɛ pɛcɛlɩ nɛ pakamɩ-ɩ sizika yɔɔ.”
3 Ðɩnɛ ɛlɛ cɔjɔnaa ñʋndɩnaa nɛ samaɣ taa ɛzʋtʋyaa pekpeɣli cɔjɔ sɔsɔ weyi payaɣ se Kayifu yɔ ɛ-kadaɣ taa,
4 nɛ pala nɔɔ se patɩŋnɩ ajitu nʋmɔʋ nakʋyʋ yɔɔ nɛ pakpa Yesu nɛ pakʋ-ɩ.
5 Ɛlɛ, paawɛɛ nɛ pɔtɔŋ se: “Pɩtaakɛ kazandʋ wiye, se pɩtaala nɛ pɩkɔnɩ ñam ñam lakasɩ ɛyaa samaɣ taa.”
6 Yesu kaawɛ Betaanii, canaɣ Siimɔɔ ɖɩɣa taa lɛ,
7 halʋ nɔɔyʋ ñɔtɩnɩ-ɩ, ɛɖɔkɩ alɩbaatɩrɩ fiɣa nakɛyɛ nɛ ka-taa nɛ sɔzɩŋ num mbʋ pɩwɛ liidiye siŋŋ yɔ, nɛ ɛpaɣzɩ-pʋ pɩyʋʋ Yesu ñʋʋ taa alɩwaatʋ ndʋ ɛlɛ kaawɛɛ nɛ ɛtɔkɩ tɔɔnaɣ* yɔ.
8 Tɔmkpɛlɩkɩyaa na mbʋ lɛ, pɩwɩzɩ-wɛ nɛ pɔtɔ se: “Ɛbɛ yɔɔ ɛwɛɛkɩɣ num mbʋ?
9 Mbʋ pʋyɔɔ yɔ papɩzaɣ se pɛpɛdɩ-pʋ liidiye sɔsɔɖɛ nɛ paha-ɖɩ kʋñɔndɩnaa.”
10 Yesu na mbʋ lɛ, eheyi-wɛ se: “Pɩlabɩ ɛzɩma nɛ ɩcaɣ halʋ ɛnʋ tɔm? Ɛlabɩ-m lakasɩ kɩbanzɩ.
11 Mbʋ pʋyɔɔ yɔ kʋñɔndɩnaa lɛ, pɛwɛ mɩ-cɔlɔ paa ɛzɩmtaa, ɛlɛ ma lɛ maakaɣ wɛʋ mɩ-cɔlɔ paa ɛzɩmtaa.
12 Alɩwaatʋ ndʋ halʋ ɛnʋ ɛpɩyɩ sɔzɩŋ num mbʋ mon-tomnaɣ yɔɔ yɔ, ɛlabɩ mbʋ se ɛñɔɔzɩ men-pimtu.
13 Toovenim taa lɛ, meheyiɣ-mɩ se paa le posusuu tɔm kɩbandʋ tʋnɛ ɛjaɖɛ kpeekpe yɔɔ yɔ, mbʋ halʋ ɛnɛ ɛlaba yɔ, pakaɣ pɩ-tɔm yɔɔdʋʋ ɖɔɖɔ se pɔtɔzɩnɩ ɛ-yɔɔ.”
14 Ðɩnɛ ɛlɛ Hiu nɛ Naalɛ taa kʋɖʋm, weyi payaɣ se Yudaasɩ Isɩkarɩyɔɔtɩ yɔ, ewolo cɔjɔnaa ñʋndɩnaa cɔlɔ
15 nɛ ɛpɔzɩ-wɛ se: “Ɛbɛ ɩkaɣ-m cɛlʋʋ nɛ manɖʋzɩ-ɩ mi-nesi tɛɛ?” Peheyi-i se pahaɣ-ɩ liidiye pɔɔyɩsɩ 30.
16 Nɛ kpaɣnɩ mbʋ lɛ, ɛwɛɛ nɛ ɛñɩnɩɣ nʋmɔʋ kɩbaŋʋ nakʋyʋ se ɛɖʋzɩ-ɩ pe-nesi tɛɛ.
17 Kpɔnʋ ŋgʋ kɩ-taa patɩɖʋ lɔlɔm yɔ, kɩ-kazandʋ kajalaɣ kɩyakʋ ñɩŋgʋ wiye lɛ, tɔmkpɛlɩkɩyaa kɔɔ Yesu cɔlɔ nɛ pɔpɔzɩ-ɩ se: “Le ŋñɩnɩɣ se ɖɩñɔɔzɩ-ŋ nɛ ŋtɔɔ Paska?”
18 Ɛtɔ se: “Iwolo tɛtʋ taa Akele cɔlɔ nɛ iheyi-i se: ‘Wɩlɩyʋ tɔŋ se: “Ma-alɩwaatʋ* ñɔtaa; ma nɛ mɔn-tɔmkpɛlɩkɩyaa ɖɩkaɣ tɔɔʋ Paska ña-ɖɩɣa taa.”’”
19 Peeɖe tɔmkpɛlɩkɩyaa laba ɛzɩ Yesu heyuu-wɛ yɔ nɛ pɔñɔɔzɩ Paska.
20 Ðanaɣ ɖanaa lɛ, ɛcaɣ taabɩlɩ yɔɔ, ɛ nɛ ɛ-tɔmkpɛlɩkɩyaa 12.
21 Pɛwɛɛ nɛ pɔtɔkɩ lɛ, ɛtɔ se: “Toovenim taa lɛ, meheyiɣ-mɩ se mɩ-taa kʋɖʋm kaɣ ma-wayɩ lɩʋ.”
22 Pa-laŋɩyɛ wɛɛkɩ siŋŋ nɛ pa-taa paa weyi lɛ, ɛpaɣzɩ-ɩ heyuu se: “Kɩbaɣlʋ, pɩtɩkɛ ma, yaa we?”
23 Ekitini-wɛ se: “Weyi ma nɛ ɩ ɖitisiɣ nesi ñanaɣ taa yɔ, ɛnʋ kɛnɩ weyi ɛkaɣ ma-wayɩ lɩʋ yɔ.
24 Toovenim lɛ, ɛyʋ Pɩyalʋ ɖɛɣ ɛzɩ pamaʋ ɛ-tɔm yɔ, ɛlɛ pɩtɔɔ ɛyʋ weyi pɩtɩŋɩɣnɩ ɛ-yɔɔ nɛ pakpa ɛyʋ Pɩyalʋ yɔ! Ye pataalʋlɩ ɛyʋ ɛnʋ yɔ, pɩɩkɩlɩ-ɩ ɖeu.”
25 Yudaasɩ weyi ɛkaɣ ɛ-wayɩ lɩʋ yɔ, eheyi-i se: “Raabi, pɩtɩkɛ ma, yaa we?” Yesu cosi-i se: “Ña-maɣmaɣ ñɔyɔɔdɩna.”
26 Pɛwɛɛ nɛ pɔtɔkɩ lɛ, Yesu kpaɣ kpɔnʋ, nɛ ɛwazɩ kɩ-yɔɔ nɛ ɛtɛ lɛ, ɛpɛlɩ-kʋ nɛ ɛcɛlɩ tɔmkpɛlɩkɩyaa nɛ ɛtɔ se: “Ɩmʋ nɛ ɩtɔɔ. Pʋnɛ pɩsɩŋnɩ mon-tomnaɣ.”
27 Nɛ ɛkpaɣ kɔpʋ nɛ ɛsɛɛ Ɛsɔ nɛ ɛcɛlɩ-wɛ, nɛ ɛtɔ se: “Mɩ-tɩŋa payɩ ɩñɔɔ,
28 mbʋ pʋyɔɔ yɔ pʋnɛ pɩsɩŋnɩ man-calɩm mbʋ pɩkɛ ‘ɛgbɛyɛ calɩm,’ mbʋ pakaɣ kpɛdʋʋ ɛyaa sakɩyɛ yɔɔ se pekpeɣ-wɛ pa-kɩwɛɛkɩm yɔ.
29 Ɛlɛ meheyiɣ-mɩ se: Maakaɣ tasʋʋ ñɔʋ vɛɛ kʋnɛ pɩkɔɔ pɩtalɩ kɩyakʋ ŋgʋ ma nɛ mɩ ɖɩkaɣ ñɔʋ vɛɛ kɩfalʋʋ man-Caa Kewiyaɣ taa yɔ.”
30 Nɛ pɛtɛm samtʋ hendu* teu lɛ, palɩɩ nɛ powolo Oliivi Pʋʋ yɔɔ.
31 Nɛ Yesu heyi-wɛ se: “Mɩ-tɩŋa payɩ pɩkaɣ-mɩ tuuluu mɔ-yɔɔ ɖoo anɛ, mbʋ pʋyɔɔ yɔ pamawa se: ‘Mankaɣ mabʋ ninɖiɣyu, nɛ heŋ ewiɖe kaɣ mɩzʋʋ.’
32 Ɛlɛ men-femtu wayɩ lɛ, mankaɣ-mɩ ɖɛʋ nɔɔ Galilee.”
33 Ɛlɛ Pɩyɛɛrɩ cosi-i nɛ ɛtɔ se: “Paa pituuluu lalaa ñɔ-yɔɔ yɔ, ma lɛ pɩɩkaɣ-m tuuluu kpa!”
34 Yesu heyi-i se: “Toovenim taa lɛ, meheyiɣ-ŋ se ɖoo anɛ a-taa, pʋcɔ nɛ kalɩmaʋ koo lɛ, ŋkaɣ-m kizuu tam nabudozo.”
35 Pɩyɛɛrɩ heyi-i se: “Halɩ paa pɩwɛɛ se ma nɛ ŋ ɖɩsɩ yɔ, maakaɣ-ŋ kizuu kpa.” Tɔmkpɛlɩkɩyaa lalaa tɩŋa ɖɔɖɔ heyi-i tɔm kʋɖʋmtʋ ndʋ.
36 Pʋwayɩ lɛ, Yesu nɛ ɛ-tɔmkpɛlɩkɩyaa powolo lone nɖɩ payaɣ se Jɛtɩsemaanee yɔ ɖɩ-taa, nɛ eheyi-wɛ se: “Ɩcaɣ cɩnɛ nɛ mowolo ɛsɩndaa peeɖe yɔ nɛ mantɩmɩ.”
37 Nɛ ɛkpɛndɩnɩ Pɩyɛɛrɩ nɛ Zebedee pɩyalaa naalɛ, nɛ ɛpaɣzɩ nɩʋ siziŋ nɛ ɛnɩɣzɩɣ siŋŋ.
38 Nɛ eheyi-wɛ se: “Mɛwɛɛ* nɛ manɩɣ siziŋ siŋŋ nɛ halɩ pɩtalɩ sɩm taa. Ɩcaɣ cɩnɛ nɛ ɩsɩnɩ-m feŋuu.”
39 Nɛ etuzi ɛ-tɩ nɛ ɛsɩndaa pazɩ lɛ, ɛtɔlɩ nɛ ɛpa ɛ-ɛsa nɛ tɛtʋ nɛ ɛtɩmɩ nɛ ɛtɔ se: “Man-Caa, ye pɩsaŋ yɔ, yele nɛ kɔpʋ kʋnɛ kɩɖɛɛ mɔ-yɔɔ. Ɛlɛ pɩtaakɛ ɛzɩ mɔnsɔɔlʋʋ yɔ, ɛlɛ ɛzɩ ŋsɔɔlʋʋ yɔ.”
40 Ɛpɩsɩ nɛ ɛkɔɔ tɔmkpɛlɩkɩyaa cɔlɔ nɛ ɛmaɣnɩ-wɛ peɖiɣni ɖou, nɛ ɛpɔzɩ Pɩyɛɛrɩ se: “Ɩtɩpɩzɩ nɛ ɩsɩnɩ-m feŋuu ñɩɣyʋʋ kʋɖʋmʋʋ na?
41 Ɩwɛɛ feŋuu yɔɔ nɛ ɩwɛɛ adɩma yɔɔ, se pɩsa nɛ ɩtaatɔlɩ takɩm taa. Toovenim taa lɛ, fezuu wɛ ɖoŋ* ɛlɛ tomnaɣ wɛnɩ ɛjandʋ.”
42 Ɛtasɩ wobu nabʋlɛ ɖeɖe nɛ ɛtɩmɩ se: “Man-Caa, ye pɩɩsaŋ se kɔpʋ kʋnɛ kɩɖɛɛ mɔ-yɔɔ nɛ mantɩñɔɔ-kʋ yɔ, yele nɛ ñɔ-sɔɔlɩm la.”
43 Nɛ ɛɖaɣnɩ pɩsʋʋ ɛkɔɔ nɛ ɛmaɣnɩ-wɛ peɖiɣni ɖou, mbʋ pʋyɔɔ yɔ ɖom kaahɔkɩ pɛ-ɛsa.
44 Peeɖe eyebi-wɛ, nɛ ɛɖaɣnɩ wobu nɛ ɛtɩmɩ tozo ɖeɖe, nɛ ɛtasɩ yɔɔdʋʋ tɔm kʋɖʋmtʋ ndʋ.
45 Pʋwayɩ lɛ, ɛpɩsɩ ɛkɔɔ tɔmkpɛlɩkɩyaa cɔlɔ nɛ eheyi-wɛ se: “Alɩwaatʋ tʋnɛ tɩ-yɔɔ iɖiɣni ɖou nɛ ɩhɛzɩɣ! Ɩna! Ñɩɣyʋʋ ñɔtaa se pakpa ɛyʋ Pɩyalʋ nɛ paɖʋzɩ-ɩ kɩwɛɛkɩm laɖaa nesi tɛɛ.
46 Ɩkʋyɩ nɛ ɖɩɖɛɛ. Ɩna! Weyi ɛlɩɣ ma-wayɩ yɔ, ɛñɔtaa.”
47 Eɖiɣni yɔɔdʋʋ lɛ, na, Yudaasɩ, Hiu nɛ Naalɛ taa kʋɖʋm kɔɔ, ɛ nɛ ɛyaa samaɣ sɔsɔɔ nakɛyɛ, kɔɖɔkɩ laɣɖa* nɛ ɖaŋ; cɔjɔnaa ñʋndɩnaa nɛ samaɣ taa ɛzʋtʋyaa kaatiyini-kɛ.
48 Nɛ weyi ɛlɩɣaɣ ɛ-wayɩ yɔ, ɛɛha-wɛ yʋsaɣ nakɛyɛ nɛ ɛtɔ se: “Weyi mamʋzʋʋ ɛ-lɩkpaɣzaɣ yɔɔ yɔ, ɛnʋ lɛ; ɩkpa-ɩ.”
49 Nɛ ɛɖɔ nɛ ewolo Yesu yɔɔ kpaagbaa nɛ ɛtɔ se: “Mɛnsɛ-ŋ, Raabi!” nɛ ɛmʋzɩ ɛ-lɩkpaɣzaɣ yɔɔ.
50 Ɛlɛ Yesu pɔzɩ-ɩ se: “Taabalʋ, ɛbɛ yɔɔ ŋkɔm cɩnɛ?” Ðɩnɛ ɛlɛ pɔɖɔ nɛ powolo Yesu yɔɔ nɛ pesezi nesi nɛ pakpa-ɩ.
51 Ɛlɛ na, mba pa nɛ Yesu paawɛɛ yɔ, pa-taa kʋɖʋm sezi e-nesi nɛ ɛkpɛɛ ɛ-laɣɖɛ* nɛ elo cɔjɔ sɔsɔ yom nɛ ɛsɛtɩ ɛ-nɩŋgbaŋʋʋ.
52 Nɛ Yesu heyi-i se: “Pɩsɩnɩ ña-laɣɖɛ* ɖi-lone taa, mbʋ pʋyɔɔ yɔ mba pa-tɩŋa payɩ pakpakɩɣ laɣɖɛ lalaa yɔɔ yɔ, pakaɣ sɩbɩnʋʋ laɣɖɛ.
53 Yaa ŋmaɣzɩɣ se maapɩzɩɣ nɛ mɔnpɔzɩ man-Caa se ɛha-m alɩwaatʋ tʋnɛ tɩ-yɔɔ Ɛsɔ tiyiyaa nɛ pɩcɛzɩ tikasɩ 12 yaa we?
54 Ye malabɩ mbʋ, Masɩ nzɩ sɩyɔɔdʋʋ se pɩwɛɛ se pɩla mbʋ yɔ, ɛzɩma sɩ-taa tɔm kaɣ labʋ?”
55 Ñɩɣyʋʋ ŋgʋ kɩ-yɔɔ lɛ, Yesu heyi ɛyaa samaɣ se: “Ɛzɩ mɩlʋ sɔsɔ nɔɔyʋ mɛnkɛnaa nɛ ɩkɔŋ ma-wayɩ se ɩkpa-m nɛ laɣɖa* nɛ ɖaŋ na? Paa kɩyakʋ ŋgʋ lɛ, mancakaɣ templo taa nɛ mawɩlɩɣ tɔm, ɛlɛ ɩtɩkpa-m.
56 Ɛlɛ pɩtɩŋa payɩ mbʋ yɔ, pɩlaba se pɩsa nɛ tɔm ndʋ nayaa kaamawa* yɔ, tɩla.” Ðɩnɛ ɛlɛ tɔmkpɛlɩkɩyaa tɩŋa se nɛ peyebi-i.
57 Mba pakpa Yesu yɔ powoni-i cɔjɔ sɔsɔ Kayifu tɛ, ɖenɖe paɣtʋ wɩlɩyaa nɛ ɛzʋtʋyaa paakpeɣlaa yɔ.
58 Ɛlɛ Pɩyɛɛrɩ wɛɛ nɛ ɛtɩŋɩɣ ɛ-wayɩ ɖooo poliŋ taa, nɛ ɛtalɩ cɔjɔ sɔsɔ ɖɩɣa kadaɣ taa, nɛ ɛsʋ pɩ-taa lɛ, ɛcaɣ ɖɩɣa taa tʋmlaɖaa cɔlɔ se ɛna mbʋ pɩtɛŋna yɔ.
59 Alɩwaatʋ ndʋ tɩ-taa lɛ, cɔjɔnaa ñʋndɩnaa nɛ Sahedrɛɛ* taa mba tɩŋa wɛɛ nɛ pañɩnɩɣ cɛtɩm aseɣɖe tɔm Yesu yɔɔ se pɩsa nɛ pakʋ-ɩ.
60 Ɛlɛ petihiɣ natʋyʋ, ŋgʋ cɛtɩm aseɣɖe tɩnaa sakɩyɛ kaakɔma. Pʋwayɩ lɛ, naalɛ kɔɔ
61 nɛ pɔtɔ se: “Abalʋ ɛnɛ ɛɛtɔm se: ‘Manpɩzɩɣ nɛ mɔyɔkɩ templo nɛ manɖaɣnɩ-kʋ maʋ kɩyakɩŋ naadozo taa.’”
62 Peeɖe cɔjɔ sɔsɔ kʋyaa nɛ ɛpɔzɩ-ɩ se: “Ŋŋcosuu natʋyʋ yaa we? Ŋŋnɩɣ aseɣɖe tɔm ndʋ abalaa panɛ pɛwɛɛ nɛ pɔyɔɔdʋʋ ñɔ-yɔɔ yɔ?”
63 Ɛlɛ Yesu su ɖiɣ ɖiɣ. Nɛ cɔjɔ sɔsɔ heyi-i se: “Mɔnpɔzʋʋ-ŋ se ŋɖuuni Ɛsɔ ɛsadʋ nɛ ŋheyi-ɖʋ ye ñɛkɛnɩ Krɩstʋ, Ɛsɔ Pɩyalʋ yɔ!”
64 Yesu cosi-i se: “Ña-maɣmaɣ ñɔyɔɔdɩnɩ-tʋ. Ɛlɛ meheyiɣ-mɩ se kpaɣnɩ lɛɛlɛɛyɔ lɛ, ɩkaɣ naʋ ɛyʋ Pɩyalʋ, ɛcaɣ Ɛsɔ Ðoŋ tʋ nesi kɩbanzɩ yɔɔ, nɛ ɛkɔŋ ɛsɔdaa mɩndʋ yɔɔ.”
65 Nɛ cɔjɔ sɔsɔ cɩyɩ e-tokonaa kɩtɩnaa nɛ ɛtɔ se: “Ɛyɔɔdɩ tɔm kɩdɛkɛdɩtʋ Ɛsɔ yɔɔ! Ɛbɛ yɔɔ ɖɩtasɩɣ ñɩnʋʋ aseɣɖe tɩnaa yɔ? Ɩna! Lɛɛlɛɛyɔ ɩnɩ ɛzɩma ɛyɔɔdɩ tɔm kɩdɛkɛdɩtʋ Ɛsɔ yɔɔ yɔ.
66 Suwe ɩmaɣzɩɣ?” Pocosi se: “Ɛmʋnɩ sɩm.”
67 Nɛ pɔtɔ ndaatʋ ɛ-ɛsɩndaa nɛ pamabɩ-ɩ ŋgulumee. Lalaa cɛbɩ-ɩ kadanzɩ,
68 nɛ pɔtɔŋ se: “Krɩstʋ, ye ŋkɛ nayʋ yɔ, heyi-ɖʋ nɛ ɖɩna, amabɩ-ŋ?”
69 Alɩwaatʋ ndʋ lɛ, Pɩyɛɛrɩ kaacaɣ awayɩ, kadaɣ taa, nɛ pɛlɛ lɩmɖʋyʋ nɔɔyʋ kɔɔ ɛ-cɔlɔ nɛ eheyi-i se: “Ña ɖɔɖɔ ŋŋwɛ Yesu Galilee tʋ cɔlɔ!”
70 Ɛlɛ ɛkpɛzɩ pa-tɩŋa pɛ-ɛsɩndaa nɛ ɛtɔ se: “Maasɩŋ mbʋ pɩ-tɔm ŋɖiɣni yɔɔdʋʋ yɔ.”
71 Ɛlɩ nɔnɔɔ taa lɛ, pɛlɛ nɔɔyʋ tasɩ-ɩ naʋ nɛ eheyi mba pɛwɛ peeɖe yɔ se: “Abalʋ ɛnɛ ɛɛwɛ Yesu Nazarɛɛtɩ tʋ cɔlɔ.”
72 Ɛtasɩ kpɛzʋʋ nɛ eɖuu se: “Maasɩŋ abalʋ ɛnʋ!”
73 Pɩlabɩ pazɩ lɛ, mba paasɩŋ peeɖe yɔ pɔñɔtɩnɩ Pɩyɛɛrɩ nɛ peheyi-i se: “Pɩtʋʋ fɛyɩ se ŋkɛ pa-taa nɔɔyʋ ɖɔɖɔ, mbʋ pʋyɔɔ yɔ toovenim taa lɛ, ñɔ-yɔɔdaɣ wɩlɩɣnɩ mbʋ.”
74 Nɛ ɛpaɣzɩ nɔɔ kɩdɛkɛdaɣ lɔʋ nɛ eɖuki nɛ ɛtɔŋ se: “Maasɩŋ abalʋ ɛnʋ!” Nɛ kpaagbaa mbʋ lɛ, kalɩmaʋ koo.
75 Nɛ Pɩyɛɛrɩ tɔzɩ tɔm ndʋ Yesu kaaheyi-i yɔ tɩ-yɔɔ, ndʋ yɔ: “Pʋcɔ nɛ kalɩmaʋ koo lɛ, ŋkaɣ-m kizuu tam nabudozo.” Nɛ ɛlɩɩ awayɩ nɛ ewii siŋŋ.
Pɩ-tɛɛ tɔm
^ Yaa “ɛlɛ kaacaɣ taabɩlɩ yɔɔ.”
^ Yaa “Alɩwaatʋ ndʋ paɖʋ-m yɔ.”
^ Yaa “keɣsi.”
^ Yaa “Man-kalɩzaɣ wɛɛ.”
^ Yaa “fezuu sɔɔlaa.”
^ Yaa “abalɩsɩsɩ.”
^ Yaa “ɛ-abalɩsɩɣa.”
^ Yaa “ña-abalɩsɩɣa.”
^ Yaa “abalɩsɩsɩ.”
^ Yaa “tɔm ndʋ masɩ kaayɔɔdaa.”
^ Cɔnɩ Tɔm pee sɔsɔna tɔbʋʋ lɩzʋʋ.
