Ɛsɩdrasɩ 3:1-13
3 Fenaɣ 7 ñɩŋga taa,+ Izrayɛɛlɩ mba* tɛm wɛʋ pɛ-tɛtʋ taa lɛ, pekpeɣli nɔɔ kʋɖʋmaɣ taa Yeruzalɛm.
2 Yehozadaakɩ pɩyalʋ Yesuwa+ nɛ cɔjɔnaa mba ɛ nɛ wɛ palakaɣ tʋmɩyɛ yɔ, nɛ Seyalɩtɩyɛɛlɩ+ pɩyalʋ Zorobabɛɛlɩ+ nɛ e-koobiya pakʋyɩ nɛ pama Izrayɛɛlɩ tɛ Ɛsɔ tɛ altaaru, se pɩsa nɛ palaa kɩlaŋ kɩñaɣzɩŋ kɩ-yɔɔ, ɛzɩ pamaʋ Moyizi weyi ɛɛkɛ Ɛsɔ toovenim tʋ ɛyʋ yɔ, ɛ-Paɣtʋ taa yɔ.+
3 Paa sɔɔndʋ ɛkpaɣaɣ-wɛ nɛ pɩ-cɔlɔ ajɛɛ taa mba yɔ,+ pesiɣ altaaru ki-lone kɩbɩnɖɛ taa nɛ papaɣzɩ laʋ kɩ-yɔɔ kɩlaŋ kɩñaɣzɩŋ Yehowa, tanaŋ tɛɛ nɛ ɖanaɣ kɩlaŋ kɩñaɣzɩŋ.+
4 Ðɩnɛ ɛlɛ pɔtɔɔ Coka* Kazandʋ ɛzɩ pamaʋ paɣtʋ taa yɔ,+ nɛ kɩlaŋ kɩñaɣzɩŋ ɛzɩma pɩɩpɔzɩ paa evemiye nɖɩ yɔ, palaɣaɣ-ɩ paa ɖooye.+
5 Pʋwayɩ lɛ, pɩtasɩnɩ kɩlaʋ kɩñaɣzʋʋ ŋgʋ palaɣaɣ paa evemiye nɖɩ yɔ lɛ,+ pala ɖɔɖɔ fenasɩ kɩfasɩ+ kɩlaŋ nɛ kɩlaŋ weyi pɩpɔzʋʋ se palaa Yehowa kazandʋ kiɖeɖetu tɩŋa alɩwaatʋ taa+ yɔ, pɩkpɛndɩnɩ mba payɩ paasɔɔlaa se paha Yehowa sɔɔlɩm haɖɛ+ yɔ pa-kɩlaŋ.
6 Kpaɣnɩ fenaɣ 7 ñɩŋga tɛ kajalaɣ evemiye wiye+ paapaɣzɩ laʋ kɩlaŋ kɩñaɣzɩŋ Yehowa, paa pataatɩɩsɩtɩ Yehowa templo tigiɖe yɔ.
7 Pɛcɛlɩ liidiye pɛɛ saɣyaa+ nɛ nesi tɛɛ tʋmlaɖaa,+ nɛ pɛcɛlɩ Siidɔɔ mba nɛ Tiirɩ mba tɔɔnaɣ nɛ kʋñɔñɔm nɛ num, se pɩsa nɛ paba kpaɣ sɛɛdrɩ tɩŋ kpoŋgbolonaa Libaŋ nɛ pɛtɛzɩnɩ teŋgu nɛ powoni-wɛ Yopee+ ɛzɩ Pɛrɩsɩ wiyaʋ Siiruusi+ haʋ-wɛ nʋmɔʋ yɔ.
8 Pɔkɔm Ɛsɔ toovenim tʋ ɖɩɣa taa Yeruzalɛm pɩnaɣ 2 ñɩŋga taa, fenaɣ 2 ñɩŋga taa lɛ, Seyalɩtɩyɛɛlɩ pɩyalʋ Zorobabɛɛlɩ, Yehozadaakɩ pɩyalʋ Yesuwa nɛ po-koobiya mba pakazaa yɔ, cɔjɔnaa nɛ Leevi mba, nɛ mba payɩ paalɩnɩ yomiye taa nɛ pɔkɔɔ Yeruzalɛm yɔ,+ papaɣzɩ tʋmɩyɛ labʋ. Paalɩzɩ Leevi ñɩma mba pɛwɛnɩ kpaɣnɩ pɩnzɩ 20 nɛ pɩɖɛɛ yɔ, se pɔcɔnɩ tʋmɩyɛ nɖɩ palakɩ Yehowa ɖɩɣa taa yɔ ɖɩ-yɔɔ.
9 Nɛ Yesuwa, ɛ-pɩyalaa nɛ e-koobiya, nɛ Kadɩmɩyɛɛlɩ nɛ ɛ-pɩyalaa, Yuuda pɩyalaa pɛkpɛndɩ se peɖiyi mba palakɩ tʋmɩyɛ Ɛsɔ toovenim tʋ ɖɩɣa taa yɔ, pa nɛ Henadaadɩ+ pɩyalaa, pa-pɩyalaa nɛ po-koobiya, paba ɖɔɖɔ paakɛ Leevi mba.
10 Kuduyuu mayaa sɩ Yehowa templo tigiɖe lɛ,+ cɔjɔnaa mba posu cɔjɔtʋ tokonaa nɛ pɔɖɔkɩ aganda yɔ,+ nɛ Leevi mba, Azaafʋ pɩyalaa, mba paba ñɔɖɔkɩ ŋgbamɛɛ yɔ pakʋyɩ pasɩŋ nɛ pasa Yehowa ɛzɩ Izrayɛɛlɩ wiyaʋ Daviid kaayɔɔdʋʋ se pala yɔ.+
11 Nɛ papaɣzɩ teu hendu nɛ pasaŋ Yehowa nɛ pɛsɛɣ-ɩ nɛ petisiɣ+ se: «Mbʋ pʋyɔɔ yɔ ɛwɛ ɖeu; sɔɔlɩm siɣsiɣ ñɩmbʋ mbʋ ɛwɩlɩ Izrayɛɛlɩ yɔ, pɩwɛ tam.»+ Ðɩnɛ ɛlɛ ɛyaa kpeekpe paɣzɩ kubusi sɔsɔsɩ mabʋ nɛ pasaŋ Yehowa, mbʋ pʋyɔɔ yɔ pasɩ Yehowa ɖɩɣa tigiɖe.
12 Cɔjɔnaa sakɩyɛ, Leevi mba sakɩyɛ nɛ hɔŋ ñʋndɩnaa sakɩyɛ mba pakpadɩyaa nɛ paana ɖɩɣa kajalaɣ ñɩŋga yɔ,+ pewiɣaɣ ɖoŋ alɩwaatʋ ndʋ panaɣaɣ se pɛwɛɛ nɛ paɖaɣnɩɣ sɩʋ ɖɩɣa ŋga ke-tigiɖe yɔ, nɛ ɛyaa lalaa sakɩyɛ ñɛwɛɛ nɛ pamakɩ taa leleŋ kubusi nɛ po-ɖoŋ kpeekpe.+
13 Piyeba nɛ ɛyaa taapɩzɩɣ se paɖʋ tʋkaɣ taa leleŋ kubusi nɛ wiluu pɛ-hɛkʋ taa, mbʋ pʋyɔɔ yɔ ɛyaa makaɣ kubusi ɖoŋ siŋŋ nɛ halɩ panɩɩ pa-taŋ ɖooo poliŋ taa.
Pɩ-tɛɛ tɔm
^ Piye piye, «Izrayɛɛlɩ pɩyalaa.»
^ Yaa «Ðɩjɔzɩyɛ lona wena pesiki nɛ pʋwayɩ lɛ pɛkpɛzɩ-yɛ yɔ.»
