Ɛsɩdrasɩ 4:1-24
4 Yuuda nɛ Bɛnjamɛɛ po-koyindinaa+ nɩwa se mba palɩnɩ yomiye taa nɛ pɔkɔɔ yɔ,+ paawɛɛ nɛ pamaɣ templo Izrayɛɛlɩ tɛ Ɛsɔ Yehowa lɛ,
2 pɔñɔtɩnɩ Zorobabɛɛlɩ nɛ hɔŋ ñʋndɩnaa kpaagbaa nɛ peheyi-wɛ se: «Iyele nɛ ɖa nɛ mɩ ɖɩkpɛndɩ nɛ ɖɩma; mbʋ pʋyɔɔ yɔ ɛzɩ mɩ yɔ, ɖa ɖɔɖɔ ɖɩsɛɣ* mɩ-Ɛsɔ,+ nɛ ɖɩpaɣzɩ-ɩ kɩlaŋ laʋ kpaɣnɩ ɖooo Asiirii wiyaʋ Esarɩ-Hadɔɔnɩ,+ weyi ɛkɔnɩ-ɖʋ cɩnɛ yɔ+ ɛ-alɩwaatʋ taa.»
3 Ɛlɛ Zorobabɛɛlɩ nɛ Yesuwa nɛ Izrayɛɛlɩ hɔŋ ñʋndɩnaa mba pɩkazaa yɔ pocosi-wɛ se: «Ða nɛ mɩ ɖɩɩkaɣ kpɛndʋʋ kpa nɛ ɖɩma ɖɛ-Ɛsɔ ɖɩɣa,+ ɖe-ɖeke ɖɩkaɣnɩ-kɛ maʋ Izrayɛɛlɩ tɛ Ɛsɔ Yehowa, ɛzɩ Pɛrɩsɩ wiyaʋ, Wiyaʋ Siiruusi ɖʋʋ-ɖʋ paɣtʋ yɔ.»+
4 Ðɩnɛ ɛlɛ ɛjaɖɛ taa ɛyaa wɛɛ nɛ petisiɣ Yuuda mba toma taa* tam nɛ paɖʋʋ-wɛ sɔɔndʋ se pataama Ɛsɔ ɖɩɣa.+
5 Pɛhɛyɩ lɔŋ tasɩyaa se paba ɩwɛɛkɩ Yuuda mba ɖʋtʋ+ kpaɣnɩ Pɛrɩsɩ wiyaʋ Siiruusi kewiyitu tɔɔʋ alɩwaatʋ kpeekpe taa nɛ pɩkɔɔ pɩtalɩ Pɛrɩsɩ wiyaʋ Dariyusi+ kewiyitu tɔɔʋ alɩwaatʋ taa.
6 Pɩtalɩ Asiyeruusi kewiyitu ɖɩbazɩyɛ lɛ, pama takayaɣ nakɛyɛ nɛ pakʋyɩnɩ Yuuda mba nɛ Yeruzalɛm mba yɔɔ.
7 Nɛ Pɛrɩsɩ wiyaʋ Artaazɛɛrɩzɛɛsɩ alɩwaatʋ taa lɛ, Bisilaamɩ, Mitredaatɩ, Tabeyɛɛlɩ nɛ ɛ-taabalaa lalaa pama takayaɣ Wiyaʋ Artaazɛɛrɩzɛɛsɩ; pɛɖɛzɩ takayaɣ ŋga ka-taa tɔm Arameya kʋnʋŋ taa,+ pama-kɛ nɛ Arameya kʋnʋŋ masɩ.*
8 * Komina kaɖɩsɩ taa sɔsɔ Rehum nɛ takayɩsɩ mayʋ Simisaayɩ paama takayaɣ Wiyaʋ Artaazɛɛrɩzɛɛsɩ nɛ pakʋyɩnɩ Yeruzalɛm yɔɔ, ka-taa tɔm tɔŋaɣ se:
9 (Takayaɣ ŋga, mba pɔ-cɔlɔ kaalɩnaa yɔ mba yɔ: Komina kaɖɩsɩ taa sɔsɔ Rehum nɛ takayɩsɩ mayʋ Simisaayɩ nɛ pa-taabalaa lalaa, tɔm hʋyaa nɛ ñʋndɩnaa cikpema, takayɩsɩ taa mayaa, Erɛɛk+ samaɣ, Babilɔɔnɩ mba, mba pɛwɛ Suzaa+ yɔ, pʋ-tɔbʋʋ se Elam mba,+
10 nɛ ajɛɛ wena Asɩnaaparɩ sɔsɔ weyi ɛmʋnɩ ñamtʋ yɔ ɛkɛzɩ tɛtʋ nɛ ɛsɩɩ-yɛ Samaarii tɛtʋ ndɩ ndɩ taa+ yɔ a-taa wena pɩkazaa yɔ, nɛ mba pɩkazɩ egeetiye nɖɩ ɖɩwɛnɩ Pɔɔ nɛ Wayɩ* yɔ ɖɩ-taa yɔ. Nɛ lɛɛlɛɛyɔ lɛ,
11 takayaɣ ŋga petiyini-i yɔ, ka-taa tɔm yɔ.)
«Wiyaʋ Artaazɛɛrɩzɛɛsɩ, ña-lɩmɖʋyaa, abalaa mba pɛwɛnɩ Pɔɔ nɛ Wayɩ yɔ, mba tiyiɣnini-ŋ tɔm tʋnɛ: Lɛɛlɛɛyɔ
12 wiyaʋ ɛtɩlɩ se Yuuda ñɩma mba pakʋyɩnɩ ñɔ-cɔlɔ nɛ pakpa ɖɔ-cɔlɔ cɩnɛ yɔ, patalɩ Yeruzalɛm. Peɖiɣni ɖaɣnʋʋ maʋ ñʋʋ taa ɖoŋ nɛ kañatʋ tɛtʋ, peɖiɣni tɛzʋʋ kolonzi+ nɛ pɔñɔɔzʋʋ tigila.
13 Nɛ lɛɛlɛɛyɔ lɛ, pɩwɛɛ se wiyaʋ ɛtɩlɩ se ye paɖaɣnɩ tɛtʋ ndʋ maʋ nɛ pɛtɛzɩ ti-kolonzi yɔ, paakaɣ hɛyʋʋ lambuu, paakaɣ hɛyʋʋ tikee+ nɛ paakaɣ hɛyʋʋ ɖɔɖɔ habɩyɛ yɔɔ ɖɔm liidiye, nɛ pɩkaɣ ɖʋzʋʋ awiya koozasɩ.
14 Wiyaʋ ɖɩɣa taa ɖɔm ɖɩtɔkɩ* nɛ ɖɛ-ɛsɩndaa lɛ, pɩtɩmʋna se nɔɔyʋ ɛla nɛ pɩɖʋzɩ wiyaʋ, pʋyɔɔ ɖitiyiɣni takayaɣ se ɖiyele nɛ wiyaʋ tɩlɩ tɔm tʋnɛ,
15 nɛ pɩsa nɛ pañɩnɩ ñɔ-cɔzɔnaa takayɩsɩ taa.+ Takayɩsɩ nzɩ sɩ-taa, ŋkaɣ naʋ nɛ ŋɖiɣzina se tɛtʋ ndʋ, tɩkɛ ñʋʋ taa ɖoŋ tɛtʋ, tɩkɔŋnɩ kaɖɛ awiya nɛ ageeta, nɛ mba peseɣtaɣ ñam ñam lakasɩ yɔ, paawɛ tɩ-taa ɖooo caanaʋ taa. Pʋyɔɔ paaɖɩzɩ tɛtʋ ndʋ.+
16 Ðɩñɩnɩɣ se wiyaʋ ɛtɩlɩ se ye paɖaɣnɩ maʋ tɛtʋ ndʋ nɛ pɛtɛzɩ ti-kolonzi yɔ, ŋŋkaɣ pɩzʋʋ nɛ ŋtasɩ ɖiyuu* egeetiye nɖɩ ɖɩwɛ Pɔɔ nɛ Wayɩ yɔ.»+
17 Nɛ wiyaʋ tiyini tɔm komina kaɖɩsɩ taa sɔsɔ Rehum nɛ takayɩsɩ mayʋ Simisaayɩ nɛ pa-taabalaa lalaa mba paawɛ Samaarii nɛ mba pɩkazɩ Pɔɔ nɛ Wayɩ egeetiye taa yɔ se:
«Ɩmʋ mɛn-sɛtʋ! Lɛɛlɛɛyɔ lɛ
18 takayaɣ ŋga itiyini-ɖʋ yɔ, pakalɩ-kɛ kpayɩ kpayɩ* mɛ-ɛsɩndaa.
19 Maha nɔɔ nɛ patazɩ tɔm taa, nɛ pana se kpaɣnɩ ɖooo caanaʋ taa, tɛtʋ ndʋ tɩkaɖaɣnɩ awiya, nɛ palakaɣ ñʋʋ taa ɖoŋ nɛ puuyaɣ lakasɩ tɩ-taa.+
20 Awiya ɖoŋ ñɩna kaatɔɔ kewiyitu Yeruzalɛm, aɖiyaɣ Pɔɔ nɛ Wayɩ egeetiye tɩŋa, nɛ pɛhɛyaɣ-yɛ lambuu, tikee nɛ habɩyɛ yɔɔ ɖɔm liidiye.
21 Pʋyɔɔ lɛ, ɩɖʋ paɣtʋ abalaa mba se peyele tʋmɩyɛ, nɛ pataatasɩ tɛtʋ ndʋ maʋ pɩkɔɔ pɩsɩɩnɩ alɩwaatʋ ndʋ mahaɣ nɔɔ yɔ.
22 Ɩkpa mɩ-tɩ nɛ ɩtaala kaakendu tɔm ndʋ tɩ-yɔɔ, ɖɩnɛ ɛlɛ pɩɩkaɣ tasʋʋ wiyaʋ ɖʋzʋʋ.»+
23 Pakalɩ Wiyaʋ Artaazɛɛrɩzɛɛsɩ takayaɣ Rehum nɛ takayɩsɩ mayʋ Simisaayɩ nɛ pa-taabalaa pɛ-ɛsɩndaa lɛ, pakʋyɩ kpaka nɛ powolo Yuuda mba cɔlɔ Yeruzalɛm nɛ pasɩnzɩ Yuuda mba tʋmɩyɛ nɛ ɖoŋ.
24 Alɩwaatʋ ndʋ Ɛsɔ ɖɩɣa ŋga kaawɛ Yeruzalɛm yɔ ka-tʋmɩyɛ kaasɩŋaa; nɛ ɖɩsɩŋ mbʋ nɛ pɩkɔɔ pɩtalɩ Pɛrɩsɩ wiyaʋ Dariyusi+ kewiyitu tɔɔʋ pɩnaɣ 2 ñɩŋga.
Pɩ-tɛɛ tɔm
^ Piye piye, «ɖɩñɩnɩɣ.»
^ Piye piye, «nɛ pacamɩɣ Yuuda mba nesi.»
^ Pɩpɩzɩɣ pɩkɛ, «paama-kɛ Arameya kʋnʋŋ taa nɛ pʋwayɩ lɛ, pɛɖɛzɩ-kɛ.»
^ Kiɖe tɛɛ lɛ, paama Ɛsd 4:8 nɛ piwolo 6:18 Arameya kʋnʋŋ taa.
^ Yaa «ɖɩwɛnɩ Efraatɩ Wayɩ.»
^ Yaa «Wiyaʋ ɖɩɣa taa ɖɩmʋʋ ɖa-kɩhɛyʋʋ.»
^ Piye piye, «ŋŋkaɣ tasʋʋ nabʋyʋ wɛnʋʋ.»
^ Pɩpɩzɩɣ pɩkɛ, «pɛɖɛzɩ-kɛ nɛ pakalɩ-kɛ.»
