Ɛsɩdrasɩ 9:1-15
9 Ðɩtɩɩtɛm pɩtɩŋa mbʋ yɔ lɛ, awumbiya ñɔtɩnɩ-m nɛ peheyi-m se: «Izrayɛɛlɩ samaɣ, cɔjɔnaa nɛ Leevi mba patiposi pa-tɩ nɛ ajɛɛ taa mba nɛ pa-kʋzɔɔtʋ lakasɩ,+ nzɩ Kanaŋ mba, Hɛɛtɩ mba, Perizi mba, Yebuusi mba, Amooni mba, Mowaabʋ mba, Ejipiti mba+ nɛ Amoori mba+ palakɩ yɔ.
2 Pakpaɣ a-taa pɛlaa nabɛyɛ nɛ papɩsɩ-wɛ pa-halaa nɛ pa-pɩyalaa halaa.+ Ɛyaa mba, mba pɛkɛ samaɣ* kiɖeɖeɣa yɔ,+ pesidi pa-tɩ nɛ ajɛɛ taa mba.+ Awumbiya nɛ kaɖɩsɩ calɩnɩ lakasɩ nzɩ sɩfɛyɩ siɣsiɣ mbʋ yɔ yɔ sɩ-labʋ.»
3 Mantɩɩnɩ-tʋ lɛ, mancɩyɩ mon-toko nɛ mon-toko kɩtɩnʋʋ nɛ mɛnkpɛzɩ ma-ñʋʋ taa ñɔsɩ nɛ man-tandaʋ, nɛ pitibi-m yɔɔɔ nɛ mentii mancaɣ.
4 Pʋwayɩ lɛ, mba palɩnɩ yomiye taa nɛ pɔkɔɔ yɔ, pa-lakasɩ nzɩ sɩfɛyɩ siɣsiɣ yɔ sɩ-yɔɔ lɛ, mba payɩ pañaŋaɣ Izrayɛɛlɩ tɛ Ɛsɔ tɔm yɔ,* pekpeɣli mɔn-cɔlɔ, nɛ ma lɛ, maacaɣ mbʋ laŋwɛɛkɩyɛ taa nɛ pɩkɔɔ pɩtalɩ ɖanaɣ yɔɔ tɔɔnaɣ pee kɩlaʋ alɩwaatʋ taa.+
5 Ðanaɣ yɔɔ tɔɔnaɣ pee kɩlaʋ alɩwaatʋ talaa lɛ,+ mankʋyɩ ma-laŋwɛɛkɩyɛ taa, mon-toko nɛ mon-toko kɩtɩnʋʋ paacɩyaa, nɛ moluŋ ma-nʋmbɔla yɔɔ nɛ mankpazɩ me-nesi nɛ mɛ-Ɛsɔ Yehowa cɔlɔ kiŋ.
6 Nɛ mɔyɔɔdɩ se: «Hayɩ mɛ-Ɛsɔ, fɛyɛ kpaɣ-m nɛ pɩcɛyɩɣ-m se mankpazɩ mɛ-ɛsa nɛ ñɔ-cɔlɔ kiŋ, hayɩ mɛ-Ɛsɔ, mbʋ pʋyɔɔ yɔ ɖa-kɩwɛɛkɩm ɖɔ sakɩyɛ nɛ pihuuzi ɖa-ñʋŋ yɔɔ, nɛ ɖa-kɩdɛkɛdɩm kpa huuye nɛ pɩtalɩ ɖooo ɛsɔdaa.+
7 Kpaɣnɩ ɖɔ-cɔzɔnaa alɩwaatʋ nɛ pɩtalɩ sɔnɔ, ɖa-kɩdɛkɛdɩm paɣlaa;+ nɛ ɖa-kɩwɛɛkɩm yɔɔ lɛ, ŋɖʋzɩ ɖa nɛ ɖa-awiya nɛ ɖɔ-cɔjɔnaa ajɛɛ awiya nesi taa, ŋyeba nɛ pakʋ-ɖʋ nɛ laɣɖɛ,+ powoni-ɖʋ yomiye taa,+ palazɩ-ɖʋ+ nɛ paɖʋ-ɖʋ fɛyɛ, ɛzɩ mbʋ pɩ-taa ɖɩwɛ sɔnɔ yɔ.+
8 Ɛlɛ lɛɛlɛɛyɔ ɖɛ-Ɛsɔ Yehowa, ŋna ɖa-pʋtɔdɩyɛ alɩwaatʋ pazɩ nɛ ŋyele nɛ ɛyaa nabɛyɛ hiɣ ñʋʋ yabʋ nɛ ŋha-ɖʋ ɖɩjɔzɩyɛ naɖɩyɛ ño-lone kiɖeɖeye taa+ se ŋyele nɛ ɖɛ-ɛsa ñɩlɩsɩ, hayɩ ɖɛ-Ɛsɔ; nɛ ŋtasɩ-ɖʋ wezuu haʋ pazɩ ɖo-yomiye taa.
9 Mbʋ pʋyɔɔ yɔ paa ɖɩkɛ yomaa yɔ,+ ɖɛ-Ɛsɔ, ŋtiyebi-ɖʋ ɖo-yomiye taa; ɛlɛ ŋwɩlɩ-ɖʋ ñɔ-sɔɔlɩm siɣsiɣ ñɩmbʋ nɛ ŋyele nɛ ɖɔ-tɔm kɛdɩnɩ Pɛrɩsɩ awiya,+ ŋtasɩ-ɖʋ wezuu haʋ se pɩsa nɛ ɖɩkʋsɩ ɖɛ-Ɛsɔ ɖɩɣa+ nɛ ɖɩñɔɔzɩ ka-njaa nɛ ŋha-ɖʋ pɛɛ koloŋa* Yuuda nɛ Yeruzalɛm taa.
10 «Ɛlɛ lɛɛlɛɛyɔ, hayɩ ɖɛ-Ɛsɔ, suwe ɖɩpɩzɩɣ nɛ ɖɩtasɩ yɔɔdʋʋ pʋnɛ pɩ-wayɩ? Mbʋ pʋyɔɔ yɔ ɖiyebi ña-paɣtʋ,
11 ndʋ ŋtɩŋnɩ ña-lɩmɖʋyaa, nayaa yɔɔ nɛ ŋɖʋ-ɖʋ yɔ se: “Ɛjaɖɛ nɖɩ ɩsʋʋ ɖɩ-taa se ɩmʋ-ɖɩ yɔ, ɖɩkɛ kʋzɔɔtʋ ɛjaɖɛ; mbʋ pʋyɔɔ yɔ ɖɩ-taa mba lakɩ mbʋ pɩfɛyɩ kele kele yɔ, mbʋ pʋyɔɔ yɔ patɩŋnɩ pa-azuluma yɔɔ nɛ peyele nɛ pa-kʋzɔɔtʋ lakasɩ su ɖɩ-taa, kpaɣnɩ ɖɩ-kamaɣ lɛɛka nɛ piwolo kamaɣ lɛɛka yɔɔ.+
12 Pʋyɔɔ lɛ, ɩtaakpaɣ mɩ-pɛlaa nɛ ɩcɛlɩ pa-pɩyalaa nɛ ɩtaamʋ ɖɔɖɔ pɛ-pɛlaa nɛ ɩcɛlɩ mɩ-pɩyalaa;+ nɛ pɩtɩmʋna se ɩñɩnɩ pa-laŋhɛzɩyɛ nɛ mbʋ piɖeɣni-wɛ yɔ kpa,+ se pɩsa nɛ ɩwɛɛ ɖoŋ nɛ ɩtɔɔ ɛjaɖɛ taa mbʋ pɩwɛ ɖeu yɔ nɛ ɩmʋ-ɖɩ nɛ ɩcɛlɩ mɩ-pɩyalaa tam.”
13 Mbʋ payɩ pɩtalɩ-ɖʋ ɖa-lakasɩ kɩdɛkɛdɩsɩ nɛ ɖa-kɩwɛɛkɩm sɔsɔm yɔɔ yɔ pɩ-wayɩ lɛ (mbʋ pʋyɔɔ yɔ ña lɛ, hayɩ ɖɛ-Ɛsɔ, ŋtɩcɔnɩ ɖa-kɩdɛkɛdɩm nɛ ŋlabɩnɩ-ɖʋ;+ nɛ ŋyeba nɛ ɖa mba ɖɩwɛ cɩnɛ yɔ ɖihiɣ ñʋʋ yabʋ)+
14 ɛzɩ ɖɩɖaɣnɩɣ ña-paɣtʋ yɔɔ maʋ nɛ ɖa nɛ ajɛɛ wena alakɩ lakasɩ kɩdɛkɛdɩsɩ nzɩ yɔ ɖɩɖʋ nesi ɖɔkʋʋ agbaa* na?+ Pɩɩkɛdɩɣ nɛ ña-taa wɩɩnɩ-ɖʋ nɛ ŋɖɩzɩ-ɖʋ caɣ caɣ nɛ pɩɩkazɩɣ nɔɔyʋ yaa nɔɔyʋ eehikiɣ ñʋʋ yabʋ na?
15 Hayɩ Izrayɛɛlɩ tɛ Ɛsɔ Yehowa, ŋwɛ siɣsiɣ,+ mbʋ pʋyɔɔ yɔ ɖɩkɛ mba pakazaa nɛ pehiɣ ñʋʋ yabʋ nɛ pɩkɔɔ pɩtalɩ sɔnɔ yɔ. Ðɩwɛ ñɛ-ɛsɩndaa ɖa-kɩwɛɛkɩm taa, mbʋ pʋyɔɔ yɔ lakasɩ sɩnɛ sɩ-yɔɔ lɛ ɖɩtɩmʋna se ɖɩsɩŋ ñɛ-ɛsɩndaa.»+
Pɩ-tɛɛ tɔm
^ Yaa «lʋlʋʋ taa mba.» Piye piye, «ɖomaɣ.»
^ Piye piye, «mba payɩ peselaɣ Izrayɛɛlɩ tɛ Ɛsɔ tɔm yɔɔ yɔ.»
^ Yaa «ŋha-ɖʋ yɔɔ huuzuu koloŋa.»
^ Yaa «nzɩ yɔ ɖɩkpaɣ ɖama pɛlaa.»
