Samɩyɛɛlɩ takayaɣ kajalaɣ ñɩŋga 2:1-36
2 Nɛ Hana tɩmɩ nɛ ɛyɔɔdɩ se:
«Ma-laŋɩyɛ mɛyɩɣ amɛya Yehowa yɔɔ;+Yehowa kpazɩ ma-hɩlʋʋ.*
Monkuli mɔ-nɔɔ wamm mon-koyindinaa yɔɔ,Mbʋ pʋyɔɔ yɔ man-taa lakɩ leleŋ nɛ ña-ñʋʋ yabʋ tʋma.
2 Nɔɔyʋ fɛyɩ nɛ ɛkɛ kiɖeɖeu ɛzɩ Yehowa yɔ,Nɔɔyʋ fɛyɩ nɛ pɩtasɩnɩ-ŋ,+Nɛ kaaʋ nakʋyʋ fɛyɩ ɛzɩ ɖɛ-Ɛsɔ yɔ.+
3 Ɩtaawɛɛ nɛ ɩyɔɔdʋʋnɩ tɩ kpazʋʋ;Itaayele nɛ cajayɛ tɔm natʋyʋ lɩɩnɩ mɩ-nɔɔ taa,Mbʋ pʋyɔɔ yɔ Yehowa kɛ sɩmtʋ tɛ Ɛsɔ,+Nɛ ɛnʋ teɣdiɣni ɛyaa lakasɩ camɩyɛ.
4 Ɛyaa ɖoŋ tɩnaa tɔŋ pɛlaa,Ɛlɛ mba pɛkɛ ajamaa yɔ* pehikiɣ ɖoŋ.+
5 Mba pɔtɔkaɣ camɩyɛ yɔ, pɩwɛɛ se pala lalaa tʋmɩyɛ pʋcɔ nɛ pehiɣ tɔɔnaɣ,*Ɛlɛ mba ñɔɔsɩ wɩɣaɣ-wɛ yɔ, ñɔɔsɩ ɛɛtasɩɣ-wɛ wɩʋ.+
Kaalʋlaɣ lʋlɩ pɩyalaa 7,+Ɛlɛ halʋ weyi ɛɛwɛnɩ pɩyalaa sakɩyɛ yɔ, pɩkazɩ e-ɖeke.*
6 Yehowa kʋʋ, nɛ ɛkandɩyɩɣ wezuu yɔɔ;*Etisiɣ Pɩlaʋ* taa, nɛ ɛkpazɩɣ.+
7 Yehowa pɩsɩɣ ɛyʋ kʋñɔndʋ, nɛ ɛpɩsɩɣ ɛyʋ ñɩm tʋ;+Etisiɣ ɛyʋ, nɛ ɛkpazɩɣ ɛyʋ.+
8 Ɛkʋsʋʋ ɛjam nɛ mʋzʋʋ taa;Ɛkʋsʋʋ kʋñɔndɩnaa nɛ tɔlɩma huuye taa,*+Se eyele nɛ pa nɛ awumbiya pacaɣ,Nɛ ɛhaɣ-wɛ ñamtʋ lone.
Yehowa tɩnɩ tɛtʋ tigila,+Nɛ ɛcaɣzɩɣ tɛtʋ* a-yɔɔ.
9 Ɛkandɩyɩɣ ɛyaa siɣsiɣ tɩnaa nɩŋgbanzɩ yɔɔ,+Ɛlɛ pakaɣ kʋʋ kañatʋ tɩnaa* cɩkpɛndʋʋ taa,+Mbʋ pʋyɔɔ yɔ, pɩtɩkɛ ɖoŋ yɔɔ pɩtɩŋɩɣna nɛ ɛyʋ wa.+
10 Yehowa kaɣ tɔyɩtʋʋ mba poyouni-i yɔ;*+Ɛkaɣ nazʋʋ ɛzɩ tɛʋ yɔ pɔ-yɔɔ nɛ ɛsɔdaa kiŋ.+
Yehowa kaɣ tɔm hʋʋ nɛ pɩtalɩ tɛtʋ kamasɩ yɔɔ,+Ɛkaɣ e-wiyaʋ haʋ ɖoŋ+Nɛ ɛkpazɩ ɛ-tɛ patam num hɩlʋʋ.»*+
11 Nɛ Ɛlɩkaana pɩsɩ ɛ-ɖɩɣa taa Ramaa, ɛlɛ abalɩbɩɣa ñapɩsɩ Yehowa lɩmɖʋyʋ*+ cɔjɔ Elii ɛsɩndaa.
12 Elii pɩyalaa kaakɛ ɛyaa kɩdɛkɛdaa;+ pataawɛɛnɩ ñamtʋ natʋyʋ Yehowa yɔɔ.
13 Ɛzʋnɔ palakaɣ kɩlaŋ hɔɔlɩŋ weyi pasɩɣaɣ kɩjaʋ se pɩkɛ cɔjɔnaa ñɩŋ yɔ, ɩ-hɔɔlʋʋ taa:+ Alɩwaatʋ ndʋ nɔɔyʋ wɛɣ nɛ ɛlaɣ kɩlaʋ yɔ, cɔjɔ lɩmɖʋyʋ nɔɔyʋ kɔŋaɣ alɩwaatʋ ndʋ nandʋ ɖiɣni wasʋʋ yɔ, ɛɖɔkaɣ kela 3 lɔɔyaɣ e-nesi taa,
14 nɛ ɛlɛkaɣ-kɛ ñanaɣ sɔsɔɔ taa, ɖeɣa ŋga kɛwɛnɩ kanɖɛɛ 2 yɔ ka-taa, ɖeebiye taa, yaa ɖeɣa ŋga kɛwɛnɩ kanɖɩyɛ kʋɖʋmɖɩyɛ yɔ ka-taa. Nɛ paa ɛbɛ kela lɔɔyaɣ ŋga kalɩzaa yɔ, cɔjɔ kpakaɣ-pʋ nɛ pɩpɩsɩɣ ɛ-pʋyʋ. Mbʋ palakaɣ Izrayɛɛlɩ ñɩma mba payɩ pɔkɔŋaɣ Siiloo peeɖe yɔ.
15 Pɩtasɩ lɛ, halɩ pʋcɔ nɛ ɛyʋ weyi eɖiɣni laʋ kɩlaʋ yɔ ɛkpaɣ num nɛ ɛñaɣzɩ miŋ lɛ,+ cɔjɔ lɩmɖʋyʋ nɔɔyʋ kɔŋaɣ nɛ eheyiɣ-i se: «Cɛlɩ nandʋ nɛ pawɩsɩ-tʋ cɔjɔ. Ɛɛkaɣ mʋʋ nandʋ ndʋ patɩzaa yɔ ñɔ-cɔlɔ, ɛlɛ lɛŋ ñɩndʋ ɖeke.»
16 Alɩwaatʋ ndʋ ɛyʋ ɛnʋ eheyaɣ-i se: «Yele nɛ pañaɣzɩ num miŋ nɛ pʋcɔ,+ pʋwayɩ lɛ ŋŋkpaɣ mbʋ ñe-liu wɛɛ* yɔ» lɛ, ekitaɣni-i se: «Aayɩ, cɛlɩ-m tʋ lɛɛlɛɛyɔ; pɩtɩkɛ mbʋ yɔ mamʋʋ-tʋ nɛ ɖoŋ!»
17 Piyeba nɛ lɩmɖʋyaa kɩwɛɛkɩm paɣlɩ siŋŋ Yehowa ɛsɩndaa,+ mbʋ pʋyɔɔ yɔ abalaa mba pataawɛɛnɩ ñamtʋ Yehowa kɩlaʋ yɔɔ.
18 Nɛ Samɩyɛɛlɩ lakaɣ lɩm ɖʋʋ tʋmɩyɛ+ Yehowa ɛsɩndaa, esuwaɣ* efoodɩ ŋgʋ palʋnɩ pɩsatʋ fɛlɛ fɛlɛ ñɩndʋ yɔ,+ paa ɛɛkɛ abalɩbɩɣa yem yɔ.
19 Pɩtasɩ lɛ, e-ɖoo lʋwaɣ-ɩ toko kɩtɩnʋʋ cikpeluu ŋgʋ kɩfɛyɩnɩ nɩŋgbɛɛnzɩ yɔ, nɛ ɛkɔŋnaɣ-ɩ kʋ paa pɩnaɣ ŋga alɩwaatʋ ndʋ ɛ nɛ ɛ-walʋ pakpaɣ se palaa pɩnaɣ taa kɩlaʋ yɔ.+
20 Nɛ Elii wazɩ Ɛlɩkaana nɛ ɛ-halʋ pɔ-yɔɔ nɛ ɛtɔ se: «Tɛtɛ nɛ Yehowa tɩŋnɩ halʋ ɛnɛ ɛ-yɔɔ nɛ ɛha-ŋ pɩɣa nɛ pɩlɛɣzɩ ŋga pakɩndɩ Yehowa yɔ ko-lone taa.»+ Nɛ papɩsɩ nɛ pekpe pɛ-tɛ.
21 Yehowa kɛzɩ ɛ-lɩmaɣza nɛ Hana yɔɔ, se pɩsa nɛ ɛhaɣ hoɣa;+ nɛ ɛtasɩ lʋlʋʋ abalɩbiya 3 nɛ halɩbiya 2. Nɛ abalɩbɩɣa Samɩyɛɛlɩ wɛɛ nɛ kapaɣlɩɣ Yehowa ɛsɩndaa.+
22 Elii kaakpadɩyɩ siŋŋ, ɛlɛ ɛɛnɩ mbʋ payɩ ɛ-pɩyalaa lakaɣ+ Izrayɛɛlɩ tɩŋa yɔ nɛ ɛzɩma pasʋwaɣnɩ halaa mba palakaɣ tʋmɩyɛ kediɣzaɣ kizinziku nɔnɔɔ taa yɔ pɩ-tɔm.+
23 Eheyaɣ-wɛ se: «Ɛbɛ yɔɔ ɩwɛɛ nɛ ɩlakɩ lakasɩ nzɩ mbʋ? Mbʋ pʋyɔɔ yɔ tɔm ndʋ mɛwɛɛ nɛ manɩɣ mɩ-yɔɔ samaɣ kpeekpe cɔlɔ yɔ, tɩfɛyɩ ɖeu.
24 Aayɩ, man-pɩyalaa, tɔm ndʋ manɩɣ tɩwɛɛ nɛ tɩyɛlɩɣ Yehowa samaɣ taa yɔ, tɩfɛyɩ ɖeu.
25 Ye ɛyʋ ɛyʋsɩnɩ ɛyʋ lɛlʋ yɔ, nɔɔyʋ pɩzɩɣ nɛ etendi Yehowa ɛ-yɔɔ;* ɛlɛ ye ɛyʋ ɛyʋsɩnɩ Yehowa yɔ,+ apɩzɩɣ nɛ ɛtɩmɩ ɛ-yɔɔ?» Ɛlɛ pekizi se paawelisiɣni pa-caa, mbʋ pʋyɔɔ yɔ Yehowa kaaɖʋwa se ɛkʋʋ-wɛ.+
26 Alɩwaatʋ ndʋ tɩ-taa lɛ, abalɩbɩɣa Samɩyɛɛlɩ kaawɛɛ nɛ kapaɣlɩɣ nɛ kɔ-tɔm kɛdɩɣnɩ Yehowa nɛ ɛyaa.+
27 Ɛsɔ tɛ ɛyʋ nɔɔyʋ kɔɔ Elii cɔlɔ nɛ eheyi-i se: «Tɔm tʋnɛ Yehowa yɔɔdʋʋ: “Ɛzɩ mantɩlɩzɩ man-tɩ kaɣlaa nɛ mawɩlɩ ña-caa ɖɩɣa alɩwaatʋ ndʋ paawɛ Ejipiti nɛ pɛkɛ Farawɔɔ ɖɩɣa yomaa yɔ?+
28 Nɛ paalɩzɩ ñɔ-cɔzɔ Izrayɛɛlɩ cejewe kpeekpe taa+ se ɛlabɩ-m cɔjɔtʋ tʋmɩyɛ nɛ ɛkpa ma-altaaru yɔɔ+ nɛ ɛlaa kɩlaŋ, nɛ ɛsɔ ŋgee tɩlaaɖɩ miŋ,* nɛ esuu efoodɩ mɛ-ɛsɩndaa; nɛ Izrayɛɛlɩ ñɩma* kɩlaŋ weyi pañaɣzɩɣ-ɩ miŋ yɔ, mɛncɛlɩ ɩ-tɩŋa ñɔ-cɔzɔ ɖɩɣa.+
29 Abalaa mɩ, ɛbɛ yɔɔ iniŋ* man-kɩlaʋ nɛ haɖɛ nɖɩ mɔnpɔzaa se ɩlabɩ-m lone nɖɩ ɖɩ-taa mɛwɛɛ yɔ?+ Ɛbɛ yɔɔ ŋwɛɛ nɛ ŋɖʋʋ ña-pɩyalaa hɩɖɛ nɛ pɩkɩlɩɣ-m, nɛ ɩkpakɩɣ man-samaɣ Izrayɛɛlɩ kɩlaŋ hɔɔlɩŋ weyi ɩkpaɖɩ ɖeu yɔ nɛ ɩtɔkɩ nɛ ɩɖʋʋ num?+
30 «“Pʋyɔɔ lɛ, Izrayɛɛlɩ tɛ Ɛsɔ Yehowa tɔm kɔyɔ: ‘Toovenim taa lɛ, maayɔɔdaa se ña-ɖɩɣa nɛ ñɔ-cɔzɔ ɖɩɣa pakaɣ ɖɔm mɛ-ɛsɩndaa tam.’+ Ɛlɛ lɛɛlɛɛyɔ lɛ, Yehowa yɔɔdʋʋ se: ‘Mɔ-hɔɔlʋʋ taa lɛ, pɩɩpɩzɩɣ nɛ pɩla mbʋ, mbʋ pʋyɔɔ yɔ mba paɖʋʋ-m hɩɖɛ yɔ, mankaɣ-wɛ ɖʋʋ hɩɖɛ;+ ɛlɛ mba peniŋi-m yɔ, mankaɣ-wɛ ɖʋʋ fɛyɛ.’
31 Na! Kɩyakɩŋ ɖiɣni kɔm nɛ alɩwaatʋ ndʋ lɛ, mankaɣ ɖɩzʋʋ ño-ɖoŋ* nɛ ña-caa ɖɩɣa ñɩŋ ɖɔɖɔ, nɛ piyele nɛ ɛyʋ nɔɔyʋ ɛɛkaɣ caɣʋ wezuu ña-ɖɩɣa taa nɛ ɛkɔɔ ɛkpadɩyɩ.+
32 Nɛ alɩwaatʋ ndʋ mankaɣ labʋ Izrayɛɛlɩ kɩbandʋ yɔ, ŋkaɣ naʋ koyindu man-ɖɩjaɣyɛ taa,+ nɛ akpadɩyʋ nɔɔyʋ ɛɛkaɣ tasʋʋ wɛʋ ña-ɖɩɣa taa wiɖiyi.
33 Ñɛ-ɛyʋ weyi maakaɣ-ɩ ɖɩzʋʋ nɛ ɛwɛɛ nɛ ɛlakɩ tʋmɩyɛ ma-altaaru yɔɔ yɔ, ɛkaɣ yebu nɛ ñɛ-ɛsa camɩ nɛ ɛkaɣ-ŋ kɔnʋʋ laŋwɛɛkɩyɛ,* ɛlɛ pakaɣ kʋʋ ña-ɖɩɣa taa ɛyaa hɔɔlʋʋ sɔsɔʋ nɛ laɣɖɛ.+
34 Nɛ mbʋ pɩtalɩɣ ña-pɩyalaa 2, Hɔfɩnii nɛ Fineyaasɩ yɔ, pɩkaɣ-ŋ kɛʋ yʋsaɣ: Pa-naalɛ pakaɣ sɩbʋ kɩyakʋ kʋɖʋmʋʋ.+
35 Nɛ mankaɣ man-tɩ lɩzʋʋ cɔjɔ siɣsiɣ tʋ nɔɔyʋ.+ Ɛkaɣ labʋ mbʋ ma-laŋɩyɛ sɔɔlaa yɔ;* nɛ mankaɣ-ɩ maʋ tamtam ɖɩɣa, nɛ ɛkaɣ ɖɔm mɛn-tɛ patam num ɛsɩndaa tam.
36 Weyi pɩkazɩɣ ña-ɖɩɣa taa yɔ, ɛkaɣ kɔm nɛ eluŋ ɛ-tɛɛ se ehiɣ tʋmɩyɛ nɛ ɛla nɛ ehiɣ liidiye nɛ kpɔnɔ, nɛ ɛkaɣ yɔɔdʋʋ se: ‘Mentendi-ŋ, ɖʋ-m cɔjɔtʋ tʋmɩyɛ naɖɩyɛ, se pɩsa nɛ mehiɣ kpɔnɔ hɔɔlaɣ nɛ mɔntɔɔ.’”»+
Pɩ-tɛɛ tɔm
^ Yaa «mon-ɖoŋ.» Cɔnɩ Tɔm pee sɔsɔna tɔbʋʋ lɩzʋʋ.
^ Yaa «mba pituuluu-wɛ yɔ.»
^ Piye piye, «kpɔnɔ.»
^ Piye piye, «elowa.»
^ Yaa «nɛ ɛhaɣ wezuu.»
^ Yaa «Sewɔɔlɩ,» pʋ-tɔbʋʋ se ɛyaa tɩŋa pɩlaʋ. Cɔnɩ Tɔm pee sɔsɔna tɔbʋʋ lɩzʋʋ.
^ Yaa «tɛtʋ ndʋ tɩlʋlʋʋ yɔ.»
^ Pɩpɩzɩɣ pɩkɛ, «nɛ huɖe yɔɔ.»
^ Yaa «pakaɣ yebu nɛ kañatʋ tɩnaa su ɖiɣ ɖiɣ.»
^ Yaa «ɖoŋ.» Cɔnɩ Tɔm pee sɔsɔna tɔbʋʋ lɩzʋʋ.
^ Pɩpɩzɩɣ pɩkɛ, «Mba palʋkɩnɩ Yehowa yɔ, sɔɔndʋ kaɣ-wɛ kpaʋ siŋŋ.»
^ Yaa «tʋmlaɖʋ.»
^ Yaa «mbʋ ña-kalɩzaɣ sɔɔlɩ siŋŋ.»
^ Piye piye, «ɛtaŋaɣ.»
^ Pɩpɩzɩɣ pɩkɛ, «Ɛsɔ kaɣ cɔnʋʋ ɛ-tɔm ndʋ ti-ɖeɖe.»
^ Piye piye, «Izrayɛɛlɩ pɩyalaa.»
^ Pɩpɩzɩɣ pɩkɛ, «nɛ ɛla nɛ kɩlaŋ ñɔsɩ kpa.»
^ Piye piye, «ɩyakɩ nɩŋgbanzɩ.»
^ Piye piye, «ña-nɩŋgbɛɛŋa.»
^ Yaa «ɛkaɣ yebu nɛ ña-kalɩzaɣ hoo.»
^ Yaa «mbʋ pɩwɛ ma-laŋɩyɛ taa nɛ man-kalɩzaɣ taa yɔ.»
