Awiya takayaɣ kajalaɣ ñɩŋga 10:1-29
10 Nɛ Seeba abiɖe nɩɩ Salomɔɔ yɔɔ tɔm nɛ nɔɔ kʋɖʋmaɣ ŋga kaawɛ ɛ nɛ Yehowa hɩɖɛ pɛ-hɛkʋ taa yɔ kɔ-tɔm,+ nɛ ɛkɔɔ se ɛpɔzɩ-ɩ tɔm kaɖɛ ñɩndʋ* nɛ ɛtakɩ-ɩ.+
2 Ɛtalɩ Yeruzalɛm, ɛ nɛ ɛ-lɩmɖʋyaa* sakɩyɛ,+ pɛkpɛndɩnɩ aɖaaɖaanaa mba pasɩɣlɩ balɩsam num+ nɛ sika nɛ ñɩɣlɩm pɛɛ sakɩyɛ yɔ. Ɛsʋʋ Salomɔɔ cɔlɔ nɛ ɛyɔɔdɩ ɛlɛ cɔlɔ tɔm ndʋ payɩ tɩɩwɛ ɛ-laŋɩyɛ taa yɔ.
3 Nɛ Salomɔɔ cosi tɔm ndʋ payɩ ɛpɔzɩ-ɩ yɔ tɩ-yɔɔ. Pɩtɩkazɩ natʋyʋ se tɩkɩlɩ wiyaʋ kaɖɛ* nɛ ɛtɩpɩzɩ nɛ ɛlɩzɩ-ɩ tɩ-taa.
4 Seeba abiɖe na Salomɔɔ lɔŋsɩnɖɛ kpeekpe,+ ɖɩɣa ŋga ɛmawa yɔ,+
5 tɔɔnaɣ ŋga kɛwɛ ɛ-taabɩlɩ yɔɔ yɔ,+ ɛ-lɩmɖʋyaa cakɩ caɣʋ mbʋ yɔ, mba pasɩɣ-ɩ tɔɔnaɣ taabɩlɩ yɔɔ yɔ nɛ po-wondu suu, ɛ-sʋlʋm cɛɖaa, nɛ ɛ-kɩlaŋ kɩñaɣzɩŋ weyi ɛlaɣ Yehowa ɖɩɣa taa ɖoŋ ɖoŋ yɔ lɛ, ɛ-yɔɔ sɩ kpɩndɩlɩm.*
6 Peeɖe eheyi wiyaʋ se: «Tɔm ndʋ manɩ ma-maɣmaɣ mɛ-ɛjaɖɛ taa pɩlɩɩnɩ ña-tʋma* nɛ ñɔ-lɔŋsɩnɖɛ yɔɔ yɔ tɩkɛ toovenim.
7 Ɛlɛ mantitisi tɔm ndʋ tɩ-yɔɔ pɩkɔɔ nɛ pɩsɩɩnɩ alɩwaatʋ ndʋ mɔnkɔm nɛ mananɩ ma-maɣmaɣ mɛ-ɛsa yɔ. Toovenim taa lɛ, tɔm ndʋ paaheyi-m yɔ tɩtɩtalɩ mbʋ manawa yɔ pɩ-hɔɔlʋʋ. Ñɔ-lɔŋsɩnɖɛ nɛ ña-ñɩm mbʋ manawa yɔ, pɩcɛzɩ mbʋ pɩ-tɔm maanɩwa yɔ pɩdɩɩfɛyɩ.
8 Ñɛ-ɛyaa nɛ ña-lɩmɖʋyaa mba pasɩŋɩɣ ñɛ-ɛsɩndaa tam nɛ pewelisiɣ ñɔ-lɔŋsɩnɖɛ tɔm yɔ, pɛkɛ koboyaɣ tɩnaa!+
9 Pasa ñɛ-Ɛsɔ Yehowa,+ weyi ñɔ-tɔm kɛdɩnɩ-ɩ nɛ ɛsɩ-ŋ Izrayɛɛlɩ kewiyaɣ kpelaɣ yɔɔ yɔ. Tamtam sɔɔlɩm mbʋ Yehowa sɔɔlɩnɩ Izrayɛɛlɩ yɔ pʋyɔɔ lɛ, ɛlɩzɩ-ŋ se ŋkɛ wiyaʋ nɛ ŋhʋʋ tɔm siɣsiɣ nɛ ŋyele nɛ paña paa weyi lɛ ɛ-waɖɛ.»
10 Nɛ ɛha wiyaʋ sika talaŋwaa* 120 nɛ balɩsam num+ sakɩyɛ nɛ ñɩɣlɩm pɛɛ.+ Patɩtasɩ wonuu balɩsam num sakɩyɛ nɛ pɩtalɩ mbʋ Seeba abiɖe ha Wiyaʋ Salomɔɔ yɔ wiɖiyi kpa.
11 Hiram mɛlɛnaa mba powokaɣ Ofiiri+ nɛ pɔkɔŋnɩ sika yɔ, pɔkɔŋnaɣ ɖɔɖɔ algumim kpoŋgbolonaa+ sakɩyɛ nɛ ñɩɣlɩm pɛɛ.+
12 Wiyaʋ kpaɣ algumim kpoŋgbolonaa nɛ ɛlabɩnɩ mbʋ pɩɖɔkʋʋ Yehowa ɖɩɣa nɛ wiyaʋ ɖɩɣa yɔ, nɛ ɛlabɩnɩ ɖɔɖɔ hendu teyaa cɩmɩŋ nɛ cɩmʋʋ wondu ndʋ tɩ-yɔɔ wɛ nimasɩ yɔ.+ Patɩtasɩ wonuu algumim kpoŋgbolonaa sakɩyɛ mbʋ nɛ patɩtasɩ-wɛ naʋ sakɩyɛ mbʋ wiɖiyi kpa halɩ nɛ sɔnɔ.
13 Wiyaʋ Salomɔɔ ha ɖɔɖɔ Seeba abiɖe mbʋ payɩ ɛlɛ kaasɔɔlaa nɛ mbʋ payɩ ɛlɛ kaapɔzaa yɔ, pɩtasɩnɩ mbʋ ɛ-maɣmaɣ ɛɛha-ɩ se pɩkɛnɩ kʋjɔʋ ŋgʋ ɛlabɩ-ɩ yɔ.* Pʋwayɩ lɛ, Seeba abiɖe ɖɛɛ nɛ ɛpɩsɩ ɛ-tɛtʋ taa, ɛ nɛ ɛ-lɩmɖʋyaa.+
14 Nɛ sika ŋga pɔkɔŋnaɣ Salomɔɔ pɩnaɣ kʋɖʋmaɣ taa yɔ, ko-yuŋ kaakpɛndɩ sika talaŋwaa 666,+
15 pɩtasɩnɩ sika ŋga kalɩnɩ tadɩyɛ laɖaa cɔlɔ nɛ kɛzɛɣa ŋga pɛdɩyaa hikiɣ nɛ pɔkɔŋnɩ-ɩ yɔ nɛ ŋga ehikiɣ Arabii awiya tɩŋa nɛ ɛjaɖɛ taa komina ñʋndɩnaa nesi tɛɛ yɔ.
16 Wiyaʋ Salomɔɔ kpaɣ sika ŋga ka-taa pesidi ñɩɣtʋ lɛɛtʋ yɔ nɛ ɛlabɩnɩ kpayɩŋ sɔsɔŋ 200+ (paa kpayʋʋ ŋgʋ lɛ, pakpaɣ sika siklinaa* 600 nɛ palabɩnɩ-kʋ)+
17 nɛ ɛkpaɣ sika ŋga ka-taa pesidi ñɩɣtʋ lɛɛtʋ yɔ nɛ ɛlabɩnɩ kpayɩŋ cikpeŋ* 300 (paa kpayʋʋ cikpeluu ŋgʋ lɛ, pakpaɣ sika miinɩwaa* 3 nɛ palabɩnɩ-kʋ). Nɛ wiyaʋ kpaɣ kpayɩŋ ɛnɩ nɛ ɛsɩɩ Libaŋ Laʋ Ðɩɣa+ taa.
18 Wiyaʋ kpaɣ tukela nɛ ɛla ɖɔɖɔ kewiyaɣ kpelaɣ+ sɔsɔɔ nɛ ɛtaa kɔ-yɔɔ sika kele kele ñɩŋga.*+
19 Tendemee 6 kaawɛɛ, nɛ ɛyʋ kpaɣ-yɛ nɛ pʋcɔ ɛtalɩ kewiyaɣ kpelaɣ, nɛ kewiyaɣ kpelaɣ ŋga kaawɛnɩ sakaɣ ŋga kɛwɛ kulukulu yɔ ka-wayɩ, nɛ kaawɛnɩ ɖɔɖɔ nuŋgolonzi ɖɩdɩnɩyɛ hɔɔlɩŋ ɛnɩ ɩ-naalɛ ɩ-yɔɔ, nɛ mʋʋzɩŋ+ 2 kaasɩŋ nuŋgolonzi ɖɩdɩnɩyɛ cɔlɔ.
20 Nɛ mʋʋzɩŋ 12 kaasɩŋ tendemee 6 ana a-yɔɔ, kʋɖʋmʋʋ sɩŋ paa nɖɩ lɛ ɖɩ-nɔɔ taa. Kewiyaɣ nakɛyɛ taala kewiyaɣ kpelaɣ nakɛyɛ nɛ kɛwɛɛ ɛzɩ ŋga yɔ.
21 Sika palabɩnɩ Wiyaʋ Salomɔɔ kɔpʋnaa tɩŋa, nɛ sika kele kele ñɩŋga palabɩnɩ ñanzɩ nzɩ sɩwɛ Libaŋ Laʋ Ðɩɣa+ taa yɔ sɩ-tɩŋa. Patɩlabɩnɩ nabʋyʋ nɛ liidiye ñɩɣtʋ, mbʋ pʋyɔɔ yɔ Salomɔɔ alɩwaatʋ taa lɛ, pataakpaɣ liidiye ñɩɣtʋ se pɩkɛ pʋyʋ.+
22 Mbʋ pʋyɔɔ yɔ wiyaʋ kaawɛnɩ Tarɩsiisi+ mɛlɛnaa teŋgu yɔɔ nɛ pɩkpɛndɩnɩ Hiram mɛlɛnaa. Tam kʋɖʋm pɩnzɩ 3 taa lɛ, Tarɩsiisi mɛlɛnaa kpakɩɣ sika nɛ liidiye ñɩɣtʋ, tukela,+ tɩgbayɩŋ, nɛ sumasɩ nzɩ payaɣ se pawɔŋnaa yɔ nɛ pɔkɔŋna.
23 Mbʋ Wiyaʋ Salomɔɔ ñɩm+ nɛ ɛ-lɔŋsɩnɖɛ+ kaakpaɖɩ tɛtʋ yɔɔ awiya lɛɛna kpeekpe.
24 Nɛ tɛtʋ yɔɔ ɛyaa kpeekpe ñɩnaɣ se pana Salomɔɔ* nɛ pewelisi ɛ-lɔŋsɩnɖɛ nɖɩ Ɛsɔ kaaɖʋ ɛ-laŋɩyɛ taa yɔ.+
25 Paa weyi ɛkɔŋnaɣ kʋjɔʋ nakʋyʋ—liidiye wondu, sika wondu, wondu kususutu, you wondu, balɩsam num, kpaŋnaŋ nɛ kpaŋasɩ—nɛ palakaɣ mbʋ paa pɩnaɣ ŋga.
26 Nɛ Salomɔɔ wɛɛ nɛ ekpeɣliɣ kɛɛkɛɛnaa nɛ kpaŋnaŋ* nɛ ɛkpazɩɣ huwa; ɛɛwɛnɩ kɛɛkɛɛnaa 1 400 nɛ kpaŋnaŋ* 12 000,+ nɛ ɛsɩɩ-wɛ kɛɛkɛɛnaa tɛtʋ ndɩ ndɩ taa nɛ lona wena añɔtɩnɩ wiyaʋ yɔ a-taa Yeruzalɛm taa.+
27 Wiyaʋ yeba nɛ liidiye ñɩɣtʋ tɔyɩ Yeruzalɛm taa siŋŋ ɛzɩ pɛɛ yɔ, nɛ sɛɛdrɩ ɖasɩ tɔyɩ siŋŋ ɛzɩ sikomɔɔrɩ tɩŋ Seefela taa+ yɔ.
28 Ejipiti payakaɣ Salomɔɔ kpaŋnaŋ nɛ pɔkɔŋna, nɛ liidiye kʋɖʋmɖɩyɛ wiyaʋ tadɩyɛ laɖaa yakaɣnɩ kpaŋnaŋ tindimiye kʋɖʋmɖɩyɛ.*+
29 Paa kɛɛkɛɛ ŋgʋ lɛ, payakaɣ-kʋ Ejipiti nɛ liidiye pɔɔyɩsɩ 600, nɛ payakaɣ kpaŋnʋ nɛ liidiye pɔɔyɩsɩ 150; pʋwayɩ lɛ paɖaɣnɩɣ-wɛ pɛdɩnʋʋ Hɛɛtɩ mba+ awiya tɩŋa nɛ Siirii awiya.
Pɩ-tɛɛ tɔm
^ Yaa «se ɛlabɩ-ɩ ɖimɖimɖanaa.»
^ Yaa «mba pasɩ-ɩ yɔ.»
^ Piye piye, «se tɩmɛlɩ wiyaʋ.»
^ Piye piye, «fezuu tɩtasɩ ɛ-taa wɛʋ.»
^ Yaa «ñɔ-tɔm.»
^ Talaŋ kʋɖʋmʋʋ maɣnɩ ɛzɩ kilonaa 34 mbʋ yɔ (kilonaa 34,2). Cɔnɩ Tɔm kɩsɔzɩtʋ B14.
^ Piye piye, «ɛɛha-ɩ ɛzɩ Wiyaʋ Salomɔɔ nesi pɔzʋʋ yɔ.»
^ Sikli kʋɖʋmʋʋ maɣnɩ ɛzɩ kɩɖamnaa 11 nɛ hɔɔlʋʋ mbʋ yɔ (kɩɖamnaa 11,4). Cɔnɩ Tɔm kɩsɔzɩtʋ B14.
^ Ðoŋ ɖoŋ lɛ, tɔŋ tɔyaa ɖɔkaɣnɩ kpayɩŋ cikpeŋ.
^ Ebree Masɩ taa lɛ, miinɩ kʋɖʋmʋʋ maɣnɩ kɩɖamnaa 570. Cɔnɩ Tɔm kɩsɔzɩtʋ B14.
^ Ebree tɔm piye nɖɩ palabɩnɩ tʋmɩyɛ yɔ, ye pɛɖɛzɩ-ɖɩ piye piye yɔ, ɖɩwɩlɩɣ ɛzɩma paɖʋʋ ñɩɣyʋʋ miŋ taa se kiyoli nɛ palɩzɩ kɩ-azuluma nɛ kɩwɛɛ cɩɖɩ cɩɖɩ yɔ.
^ Piye piye, «ɛyaa kpeekpe ñɩnaɣ Salomɔɔ ɛsɩndaa.»
^ Yaa «kpaŋnaŋ yɔɔ caɣyaa.»
^ Yaa «kpaŋnaŋ yɔɔ caɣyaa.»
^ Pɩpɩzɩɣ pɩkɛ, «Payakaɣ Salomɔɔ kpaŋnaŋ nɛ Ejipiti nɛ Kuwee; wiyaʋ tadɩyɛ laɖaa yakaɣ-ɩ Kuwee;» pɩtɩla Siliisii payaɣ se Kuwee.
