Awiya takayaɣ kajalaɣ ñɩŋga 12:1-33
12 Nɛ Robowam wolo Sekɛɛm, mbʋ pʋyɔɔ yɔ Izrayɛɛlɩ kpeekpe kaawobi Sekɛɛm+ se pasɩɩ-ɩ wiyaʋ.+
2 Nɛ Nebatɩ pɩyalʋ Yerobowam nɩɩ-tʋ (ɛɛwɛ Ejipiti mbʋ, mbʋ pʋyɔɔ yɔ Wiyaʋ Salomɔɔ yɔɔ lɛ, eesewa nɛ ewolo ɛcaɣ Ejipiti).+
3 Peeɖe petiyi ɛyaa nɛ powolo payaa-ɩ. Pʋwayɩ lɛ, Yerobowam nɛ Izrayɛɛlɩ samaɣ kpeekpe powolo Robowam cɔlɔ nɛ peheyi-i se:
4 «Ña-caa yeba nɛ ɖa-sʋʋtʋ ɖaʋ nɩɩ-ɖʋ pɩdɩɩfɛyɩ.+ Ɛlɛ ye ŋyeba nɛ tʋmɩyɛ kaɖɛ ñɩnɖɛ nɖɩ ña-caa kaaɖʋ-ɖʋ yɔ ɖɩpasɩ nɛ ŋla nɛ sʋʋtʋ ɖaʋ yuŋ ñɩŋgʋ* ŋgʋ ɛsʋʋ-ɖʋ yɔ kɩwɛɛ hʋnjaŋ yɔ, ɖɩkaɣ-ŋ ɖʋʋ lɩm.»
5 Peeɖe eheyi-wɛ se: «Iwolo nɛ kɩyakɩŋ 3 wayɩ lɛ, ɩpɩsɩ nɛ ɩkɔɔ mɔn-cɔlɔ.» Nɛ samaɣ ɖɛɛ.+
6 Nɛ Wiyaʋ Robowam pɔzɩ lɔŋ tasʋʋ ɛyaa mba pasʋtʋyaa* nɛ pa nɛ ɛ-caa Salomɔɔ paalabɩ tʋmɩyɛ alɩwaatʋ ndʋ ɛlɛ kaawɛnɩ ɛ-ɛsa yɔ se: «Lɔŋ weyi ɩtasɩɣ-m pɩlɩɩnɩ ɛzɩma pɩwɛɛ se moncosi samaɣ kanɛ yɔ pɩ-yɔɔ?»
7 Pocosi-i se: «Ye sɔnɔ ŋpɩsɩ samaɣ kanɛ ka-lɩmɖʋyʋ nɛ ŋla mbʋ kɔpɔzʋʋ yɔ nɛ ŋcosi-kɛ camɩyɛ yɔ, kakaɣ-ŋ lɩm ɖʋʋ tam.»
8 Ɛlɛ ekizi nɛ ɛtɩɖɔ lɔŋ weyi ɛyaa mba pasʋtʋyaa yɔ* patasɩ-ɩ yɔ ɩ-yɔɔ, nɛ ɛpɔzɩ lɔŋ tasʋʋ evebiya mba pɛkɛ ɛ-ɖaɣʋnaa* nɛ pɛkɛ lɛɛlɛɛyɔ ɛ-lɩmɖʋyaa yɔ.+
9 Ɛpɔzɩ-wɛ se: «Lɔŋ weyi ɩtasɩɣ-m pɩlɩɩnɩ ɛzɩma pɩwɛɛ se ɖicosi samaɣ kanɛ yɔ pɩ-yɔɔ? Keheyi-m se: “Yele nɛ sʋʋtʋ ɖaʋ ŋgʋ ña-caa sʋʋ-ɖʋ yɔ ki-yuŋ pasɩ.”»
10 Evebiya mba pɛkɛ ɛ-ɖaɣʋnaa yɔ,* pocosi-i se: «Tɔm tʋnɛ pɩwɛɛ se ŋcosi samaɣ kanɛ, ŋga keheyi-ŋ se: “Ña-caa yeba nɛ ɖa-sʋʋtʋ ɖaʋ wɛɛ yuŋ, ɛlɛ pɩwɛɛ se ŋyele nɛ ki-yuŋ pasɩ” yɔ; tɔm tʋnɛ pɩwɛɛ se ŋcosi-wɛ: “Me-niye cikpeɖe kaɣ kpeetuu nɛ pɩkpaɖɩ man-caa tɩnaɣ taa.
11 Man-caa kaatɩnɩ mɩ-yɔɔ sʋʋtʋ ɖaʋ yuŋ ñɩŋgʋ, ɛlɛ ma lɛ mankaɣ ki-yuŋ yɔɔ suyuu. Man-caa kaahɔm mɩ-nɩŋgbaaŋ nɛ agbazɛɛ yem, ɛlɛ ma lɛ mankaɣ mɩ-nɩŋgbaaŋ hɔm nɛ agbazɛɛ wena a-yɔɔ nɛ ñɩma yɔ.”»
12 Yerobowam nɛ samaɣ kpeekpe powolo Robowam cɔlɔ kɩyakʋ tozo ñɩŋgʋ wiye, ɛzɩ wiyaʋ kaaheyuu-wɛ se: «Ɩpɩsɩ nɛ ɩkɔɔ mɔn-cɔlɔ kɩyakʋ tozo ñɩŋgʋ wiye» yɔ.+
13 Ɛlɛ wiyaʋ cosi samaɣ nɛ kañatʋ tɔm, nɛ ekizi nɛ ɛtɩɖɔ lɔŋ weyi ɛyaa mba pasʋtʋyaa yɔ* paatasɩ-ɩ yɔ ɩ-yɔɔ.
14 Ecosi-wɛ ɛzɩ evebiya kaatasʋʋ-ɩ lɔŋ yɔ nɛ ɛyɔɔdɩ se: «Man-caa kaayeba nɛ mɩ-sʋʋtʋ ɖaʋ wɛɛ yuŋ, ɛlɛ ma lɛ mankaɣ ki-yuŋ yɔɔ suyuu. Man-caa kaahɔm mɩ-nɩŋgbaaŋ nɛ agbazɛɛ yem, ɛlɛ ma lɛ mankaɣ mɩ-nɩŋgbaaŋ hɔm nɛ agbazɛɛ wena a-yɔɔ nɛ ñɩma yɔ.»
15 Nɛ wiyaʋ tiwelisini samaɣ, mbʋ pʋyɔɔ yɔ Yehowa kaayebina se pɩla mbʋ,+ se pɩsa nɛ tɔm ndʋ Yehowa kaatɩŋnɩ Siiloo tʋ Ahiya+ yɔɔ nɛ eheyi Nebatɩ pɩyalʋ Yerobowam yɔ tɩla.
16 Izrayɛɛlɩ kpeekpe nawa se wiyaʋ kizaa se eewelisiɣni-wɛ lɛ, samaɣ cosi wiyaʋ se: «Ða nɛ Daviid ɖɩka we? Ðɩfɛyɩnɩ ñɩm nabʋyʋ Yesee pɩyalʋ cɔlɔ. Pɩsɩ ñɛ-ɛsɔnaa cɔlɔ, Oo Izrayɛɛlɩ. Lɛɛlɛɛyɔ, cɔnɩ ña-maɣmaɣ ña-ɖɩɣa yɔɔ, Oo Daviid!» Peeɖe Izrayɛɛlɩ mba pɩsɩ pa-ɖɩsɩ taa.*+
17 Ɛlɛ Robowam wolo pɩ-yɔɔ nɛ ɛtɔkɩ kewiyitu Izrayɛɛlɩ ñɩma mba pɛwɛ Yuuda tɛtʋ ndɩ ndɩ taa yɔ pɔ-yɔɔ.+
18 Pʋwayɩ lɛ, Wiyaʋ Robowam tiyi Adoram+ weyi ɛcɔŋnaɣ mba paɖʋ-wɛ kɩjɛyʋʋ tʋma yɔ pɔ-yɔɔ yɔ Izrayɛɛlɩ mba kpeekpe cɔlɔ, ɛlɛ payaɣ-ɩ pɛɛ nɛ ɛsɩ. Wiyaʋ Robowam ñaɣ pana nɛ ɛkpa ɛ-kɛɛkɛɛ taa nɛ ese nɛ ɛɖɛɛ Yeruzalɛm.+
19 Nɛ Izrayɛɛlɩ mba wɛɛ nɛ pakaɖɩɣnɩ+ Daviid ɖɩɣa halɩ nɛ sɔnɔ.
20 Izrayɛɛlɩ kpeekpe tɩɩnɩwa se Yerobowam pɩsaa lɛ, payaa-ɩ nɛ ɛkɔɔ kigbeɣluu taa nɛ papɩsɩ-ɩ wiyaʋ Izrayɛɛlɩ kpeekpe yɔɔ.+ Nɔɔyʋ tɩtɩŋ Daviid ɖɩɣa wayɩ nɛ pɩtasɩnɩ Yuuda cejewiye+ taa ñɩma.
21 Robowam talɩ Yeruzalɛm lɛ, ɛcaŋ ekpeɣli Yuuda ɖɩɣa kpeekpe nɛ Bɛnjamɛɛ cejewiye, pɛkpɛndɩ sɔɔjanaa 180 000 mba pafalɩsɩ-wɛ yɔ,* se poyooni Izrayɛɛlɩ ɖɩɣa nɛ papɩsɩnɩ kewiyitu nɛ pɛcɛlɩ Salomɔɔ pɩyalʋ Robowam.+
22 Peeɖe lɛ, Ɛsɔ toovenim tʋ tɔm talɩ ɛ-nayʋ* Semayaa+ se:
23 «Heyi Salomɔɔ pɩyalʋ Yuuda wiyaʋ Robowam nɛ Yuuda ɖɩɣa kpeekpe nɛ Bɛnjamɛɛ nɛ samaɣ taa ñɩma mba pɩkazaa yɔ se:
24 “Tɔm tʋnɛ Yehowa yɔɔdʋʋ: ‘Pɩtɩpɔzɩ se ɩkpa nɛ iyooni mi-koobiya Izrayɛɛlɩ mba. Pɩwɛɛ se mɩ-taa paa weyi lɛ, ɛpɩsɩ ɛ-ɖɩɣa taa, mbʋ pʋyɔɔ yɔ meyebina se pɩla mbʋ.’”»+ Nɛ paña Yehowa nɔɔ taa tɔm nɛ papɩsɩ pa-ɖɩsɩ, ɛzɩ Yehowa kaaheyuu-wɛ yɔ.
25 Nɛ Yerobowam ma* Sekɛɛm+ tɛtʋ, Efrayim pʋŋ egeetiye taa nɛ ɛwɛɛ peeɖe. Ɛlɩɩnɩ peeɖe nɛ ewolo ɛma* Penuwɛɛlɩ+ tɛtʋ.
26 Yerobowam yɔɔdaɣ ɛ-laŋɩyɛ taa se: «Lɛɛlɛɛyɔ kewiyaɣ kaɣ pɩsʋʋ Daviid ɖɩɣa taa.+
27 Ye samaɣ kanɛ kowobi pɩ-yɔɔ nɛ kakpaɣ nɛ kalaɣ kɩlaŋ Yehowa ɖɩɣa taa Yeruzalɛm yɔ,+ samaɣ kanɛ ka-laŋɩyɛ ɖɔɖɔ kaɣ pɩsɩnʋʋ ka-kɩbaɣlʋ Yuuda wiyaʋ Robowam yɔɔ. Ɛɛɛ, pakaɣ-m kʋʋ nɛ papɩsɩnɩ Yuuda wiyaʋ Robowam yɔɔ.»
28 Wiyaʋ pɔzɩ lɔŋ tasʋʋ nɛ pɩtɛ lɛ, ɛla sika newee+ 2 nɛ eheyi samaɣ se: «Yeruzalɛm kpaʋ kɩlɩ-mɩ kaɖɛ. Oo Izrayɛɛlɩ, ñɛ-Ɛsɔ weyi ɛlɩzɩ-ŋ Ejipiti ɛjaɖɛ taa yɔ ɛnʋ yɔ.»+
29 Nɛ ɛsɩɩ kʋɖʋmɖɩyɛ Betɛɛlɩ,+ nɛ ɛsɩɩ lɛɛɖɛ Daanɩ.+
30 Nɛ pʋnɛ piyeba nɛ pala kɩwɛɛkɩm,+ nɛ samaɣ wokaɣ ɖooo Daanɩ se kɛsɛɛ neɣye nɖɩ ɖɩwɛ peeɖe yɔ.
31 Nɛ ɛma ɛsɔ sɛtʋ ɖɩsɩ lona kʋkʋya taa nɛ ɛlɩzɩ samaɣ taa ɛyaa se pɛkɛ cɔjɔnaa, paa pataakɛ Leevi ñɩma yɔ.+
32 Yerobowam ɖʋ ɖɔɖɔ kazandʋ fenaɣ 8 ñɩŋga taa, fenaɣ ŋga kɛ-tɛ kɩyakʋ 15 ñɩŋgʋ wiye, nɛ tɩwɛɛ ɛzɩ kazandʋ ndʋ palakɩ Yuuda yɔ.+ Ɛla kɩlaŋ newee wena eluba yɔ altaaru ŋgʋ ɛma Betɛɛlɩ+ yɔ kɩ-yɔɔ, nɛ ɛsɩɩ cɔjɔnaa lona kʋkʋya wena ɛlabɩ Betɛɛlɩ yɔ a-taa.
33 Nɛ ɛpaɣzɩ kɩlaŋ laʋ altaaru ŋgʋ ɛma Betɛɛlɩ yɔ kɩ-yɔɔ fenaɣ 8 ñɩŋga tɛ kɩyakʋ 15 ñɩŋgʋ wiye, fenaɣ ŋga ɛ-maɣmaɣ ɛlɩzaa yɔ ka-taa; ɛɖʋ kazandʋ Izrayɛɛlɩ samaɣ, nɛ ɛkpa altaaru yɔɔ se ɛlaa kɩlaŋ nɛ eyele nɛ kɩlaŋ ñɔsɩ kpa.
Pɩ-tɛɛ tɔm
^ Yaa «sʋʋtʋ ɖaʋ ŋgʋ kɩwɩlɩɣ ñaŋ yɔ.»
^ Yaa «ɛzʋtʋyaa.»
^ Yaa «ɛzʋtʋyaa.»
^ Yaa «evebiya mba ɛ nɛ wɛ papaɣlaa yɔ.»
^ Yaa «Evebiya mba ɛ nɛ wɛ papaɣlaa yɔ.»
^ Yaa «ɛzʋtʋyaa.»
^ Piye piye, «pe-kizinzikiŋ tɛɛ.»
^ Piye piye, «mba pɔtɔzɩ-wɛ yɔ.»
^ Piye piye, «talɩ Ɛsɔ toovenim tʋ tɛ ɛyʋ.»
^ Yaa «ɛcɛyɩsɩ.»
^ Yaa «cɛyɩsɩ.»
