Awiya takayaɣ kajalaɣ ñɩŋga 16:1-34
16 Nɛ Baasa nɩŋgbaŋʋʋ hɔm tɔm ndʋ Yehowa yɔɔdaa yɔ, tɩtalɩ Ananii+ pɩyalʋ Yehu+ se:
2 «Mankʋsɩ-ŋ nɛ mʋzʋʋ taa nɛ manpɩsɩ-ŋ man-samaɣ Izrayɛɛlɩ ɖiyiyu,+ ɛlɛ ŋwolo pɩ-yɔɔ nɛ ŋɖɔŋ Yerobowam nʋmɔʋ taa nɛ ŋyele nɛ man-samaɣ Izrayɛɛlɩ la kɩwɛɛkɩm nɛ kaɖʋ-m ɖɩwɩzɩyɛ nɛ ka-kɩwɛɛkɩm.+
3 Pʋyɔɔ lɛ, mankaɣ hazʋʋ Baasa nɛ ɛ-ɖɩɣa kpɩlɩŋgbɩlɩ, nɛ mankaɣ yebu nɛ ɛ-ɖɩɣa wɛɛ ɛzɩ Nebatɩ pɩyalʋ Yerobowam ɖɩɣa yɔ.+
4 Weyi ɛkɛ Baasa tɛ ɛyʋ yɔ, ye ɛsɩbɩ tɛtʋ taa yɔ, hasɩ kaɣ-ɩ tɔɔʋ; nɛ weyi ɛkɛ ɛ-tɛ ɛyʋ yɔ, ye ɛsɩbɩ ñɩtʋ taa yɔ, ɛsɔdaa sumasɩ kaɣ-ɩ tɔɔʋ.»
5 Piyele nɛ Baasa yɔɔ tɔm ndʋ pɩkazaa yɔ, mbʋ ɛlaba yɔ nɛ e-ɖoŋ, patɩma pɩ-tɔm mbʋ pɩlakaɣ Izrayɛɛlɩ awiya alɩwaatʋ taa yɔ pɩ-takayaɣ taa yaa we?
6 Pʋwayɩ lɛ, Baasa sɩ,* nɛ pepimi-i Tiriza;+ nɛ ɛ-pɩyalʋ Elaa pɩsɩ wiyaʋ e-lone taa.
7 Pɩtasɩ lɛ, Yehowa nɩŋgbaŋʋʋ hɔm tɔm tɩŋnɩ Ananii pɩyalʋ, nayʋ Yehu yɔɔ nɛ tɩtalɩ Baasa nɛ ɛ-ɖɩɣa. Tɩtalɩ-ɩ lakasɩ kɩdɛkɛdɩsɩ nzɩ payɩ ɛlabɩ Yehowa ɛsɩndaa yɔ sɩ-yɔɔ: Ɛɖʋ-ɩ ɖɩwɩzɩyɛ nɛ e-nesi tɛɛ tʋma nɛ ɛpɩsɩ ɛzɩ Yerobowam ɖɩɣa yɔ. Tɩtalɩ-ɩ ɖɔɖɔ mbʋ pʋyɔɔ yɔ ɛɛkʋ Yerobowam pɩyalʋ Nadaabɩ.+
8 Yuuda wiyaʋ Aazaa pɩnaɣ 26 ñɩŋga taa, Baasa pɩyalʋ Elaa pɩsɩ wiyaʋ Izrayɛɛlɩ yɔɔ Tiriza tɛtʋ taa, nɛ ɛtɔɔ kewiyitu pɩnzɩ naalɛ.
9 Ɛ-lɩmɖʋyʋ Zimirii, ɛ-sɔɔjanaa mba pacakɩ you kɛɛkɛɛnaa yɔɔ yɔ pɔ-hɔɔlʋʋ kʋɖʋmʋʋ ñʋʋdʋ, lɩɩ Elaa wayɩ alɩwaatʋ ndʋ ɛlɛ kaawɛ Tiriza nɛ ɛñɔʋ sʋlʋm nɛ pɩkʋʋ-ɩ Arɩza ɖɩɣa taa yɔ; Arɩza kaakɛ wiyaʋ ɖɩɣa yɔɔ cɔnɩyʋ Tiriza taa.
10 Zimirii sʋʋ nɛ ɛkʋ-ɩ+ Yuuda wiyaʋ Aazaa pɩnaɣ 27 ñɩŋga taa, nɛ ɛpɩsɩ wiyaʋ e-lone taa.
11 Alɩwaatʋ ndʋ ɛpɩsɩ wiyaʋ yɔ, ɛtɩɩcaɣ e-kewiyaɣ kpelaɣ yɔɔ lɛ, ɛkʋ Baasa ɖɩɣa taa mba tɩŋa. Ɛtɩkazɩ paa abalʋ* kʋɖʋm, paa pɩtɩɩkɛ ɛ-hɔʋ taa ñɩma* yaa ɛ-taabalaa yɔ.
12 Mbʋ Zimirii ɖɩzɩ Baasa ɖɩɣa tɩŋa, ɛzɩ Yehowa kaatɩŋnʋʋ nayʋ Yehu yɔɔ nɛ ɛyɔɔdɩ nɩŋgbaŋʋʋ hɔm tɔm Baasa yɔɔ yɔ.+
13 Kɩwɛɛkɩm mbʋ payɩ Baasa nɛ ɛ-pɩyalʋ Elaa paalaba yɔ, nɛ kɩwɛɛkɩm mbʋ peyeba nɛ Izrayɛɛlɩ la, alɩwaatʋ ndʋ patɩŋnɩ pa-sɩʋ kpelisi nzɩ sɩfɛyɩnɩ wazaɣ yɔ+ sɩ-yɔɔ nɛ paɖʋnɩ ɖɩwɩzɩyɛ Izrayɛɛlɩ tɛ Ɛsɔ Yehowa yɔ, pʋyɔɔ pɩlabɩ mbʋ.
14 Piyele nɛ Elaa yɔɔ tɔm ndʋ pɩkazaa yɔ, mbʋ payɩ ɛlaba yɔ, patɩma pɩ-tɔm mbʋ pɩlakaɣ Izrayɛɛlɩ awiya alɩwaatʋ taa yɔ pɩ-takayaɣ taa yaa we?
15 Yuuda wiyaʋ Aazaa pɩnaɣ 27 ñɩŋga taa, Zimirii pɩsɩ wiyaʋ Tiriza tɛtʋ taa kɩyakɩŋ 7, alɩwaatʋ ndʋ sɔɔjanaa kaakpeɣlaa se poyooni Filistii mba tɛtʋ Gibetɔɔnɩ+ yɔ.
16 Alɩwaatʋ natʋyʋ wayɩ lɛ, sɔɔjanaa mba paakpeɣlaa yɔ panɩɩ pɔyɔɔdʋʋ se: «Zimirii lɩ wiyaʋ wayɩ nɛ halɩ ɛkʋ-ɩ.» Peeɖe Izrayɛɛlɩ kpeekpe kpa sɔɔjanaa ñʋʋdʋ Omirii+ nɛ pasɩɩ-ɩ Izrayɛɛlɩ wiyaʋ kɩyakʋ ŋgʋ ki-wiye sɔɔjanaa ɖigbeɣliye* taa.
17 Omirii nɛ Izrayɛɛlɩ kpeekpe pakʋyɩ Gibetɔɔnɩ nɛ pakpa nɛ pɛñɛyɩ Tiriza.
18 Zimirii nawa se pamʋ tɛtʋ ndʋ lɛ, ɛɖɛɛ nɛ ɛsʋʋ wiyaʋ ɖɩɣa ɖoŋ tilimiye* taa nɛ ɛsɔ ɖɩɣa ŋga miŋ, nɛ ɛsɩ miŋ ɛnɩ ɩ-taa.+
19 Pɩlabɩ mbʋ, mbʋ pʋyɔɔ yɔ ɛ-maɣmaɣ ɛɛlabɩ kɩwɛɛkɩm, mbʋ pʋyɔɔ yɔ ɛɛlabɩ mbʋ pɩfɛyɩ ɖeu Yehowa ɛsɩndaa yɔ nɛ ɛɖɔŋ Yerobowam nʋmɔʋ taa, nɛ eeyeba ɖɔɖɔ nɛ Izrayɛɛlɩ la kɩwɛɛkɩm.+
20 Piyele nɛ Zimirii yɔɔ tɔm ndʋ pɩkazaa yɔ, nɛ tɔm ndʋ ɛkpɛyaa yɔ, patɩma pɩ-tɔm mbʋ pɩlakaɣ Izrayɛɛlɩ awiya alɩwaatʋ taa yɔ pɩ-takayaɣ taa yaa we?
21 Alɩwaatʋ ndʋ lɛ, Izrayɛɛlɩ samaɣ kaatayɩ tindima 2 nɛ akaɖɩɣnɩ ɖama. Tindimiye kʋɖʋmɖɩyɛ tɩŋaɣ Ginaatɩ pɩyalʋ Tibinii wayɩ, nɛ ɖɩɩsɔɔlaa se ɖɩsɩɩ-ɩ wiyaʋ, nɛ tindimiye lɛɛɖɛ ñatɩŋaɣ Omirii wayɩ.
22 Ɛlɛ ɛyaa mba patɩŋaɣ Omirii wayɩ yɔ pawa mba patɩŋaɣ Ginaatɩ pɩyalʋ Tibinii wayɩ yɔ. Nɛ Tibinii sɩ, nɛ Omirii pɩsɩ wiyaʋ.
23 Yuuda wiyaʋ Aazaa pɩnaɣ 31 ñɩŋga taa lɛ, Omirii pɩsɩ wiyaʋ Izrayɛɛlɩ yɔɔ, nɛ ɛtɔɔ kewiyitu pɩnzɩ 12. Ɛtɔɔ kewiyitu Tiriza pɩnzɩ loɖo.
24 Ɛkpaɣ liidiye ñɩɣyʋʋ pɔɔyɩsɩ talaŋwaa* 2 nɛ ɛyabɩnɩ Samaarii pʋʋ, Semɛɛrɩ cɔlɔ, nɛ ɛma tɛtʋ natʋyʋ pʋʋ ŋgʋ kɩ-yɔɔ. Ɛyaa tɛtʋ ndʋ ɛmawa yɔ se Samaarii;*+ Semɛɛrɩ weyi ɛkɛ pʋʋ ŋgʋ kɩ-tʋ* yɔ ɛ-hɩɖɛ yɔɔ ɛtɩŋnaa nɛ ɛyaa-tʋ mbʋ.
25 Omirii wolo pɩ-yɔɔ nɛ ɛlakɩ mbʋ pɩkɛ kɩdɛkɛdɩm Yehowa ɛsɩndaa yɔ, nɛ ɛlabɩ kɩdɛkɛdɩm nɛ pɩkpaɖɩ mba paawɛɛ pʋcɔ nɛ pɩtalɩɣnɩ-ɩ yɔ.+
26 Ɛɖɔm Nebatɩ pɩyalʋ Yerobowam nʋmɔŋ kpeekpe taa, nɛ ɛɖɔm ɖɔɖɔ kɩwɛɛkɩm mbʋ Yerobowam kaayeba nɛ Izrayɛɛlɩ la yɔ pɩ-taa: Pakpaɣ pa-sɩʋ kpelisi nzɩ sɩfɛyɩnɩ wazaɣ yɔ nɛ paɖʋnɩ ɖɩwɩzɩyɛ Izrayɛɛlɩ tɛ Ɛsɔ Yehowa.+
27 Piyele nɛ Omirii yɔɔ tɔm ndʋ pɩkazaa yɔ, mbʋ ɛlaba yɔ, nɛ ɛ-abalɩtʋ tʋma sɔsɔna, patɩma pɩ-tɔm mbʋ pɩlakaɣ Izrayɛɛlɩ awiya alɩwaatʋ taa yɔ pɩ-takayaɣ taa yaa we?
28 Pʋwayɩ lɛ, Omirii sɩ,* nɛ pepimi-i Samaarii; nɛ ɛ-pɩyalʋ Ahaabɩ+ pɩsɩ wiyaʋ e-lone taa.
29 Omirii pɩyalʋ Ahaabɩ pɩsɩ Izrayɛɛlɩ wiyaʋ Yuuda wiyaʋ Aazaa pɩnaɣ 38 ñɩŋga taa. Omirii pɩyalʋ Ahaabɩ tɔɔ kewiyitu Izrayɛɛlɩ pɩnzɩ 22 Samaarii+ taa.
30 Omirii pɩyalʋ Ahaabɩ labɩ kɩdɛkɛdɩm Yehowa ɛsɩndaa nɛ pɩkpaɖɩ mba payɩ paawɛɛ pʋcɔ nɛ pɩtalɩɣnɩ-ɩ yɔ.+
31 Ɛɖɔm Nebatɩ pɩyalʋ Yerobowam kɩwɛɛkɩm taa;+ pɩtɩmaɣ-ɩ lɛ, ɛkpaɣ ɖɔɖɔ Siidɔɔ mba+ wiyaʋ Etɩbaalɩ pɛlɛ Yezaabɛɛlɩ,+ nɛ ɛpaɣzɩ sɛʋ Baalɩ+ nɛ eluŋuu ɛ-tɛɛ.
32 Pɩtasɩ lɛ, ɛma Baalɩ altaaru nakʋyʋ Baalɩ ɖɩɣa*+ ŋga ɛɛma Samaarii yɔ ka-taa.
33 Ahaabɩ la ɖɔɖɔ sizika kiɖeɖeɣa.*+ Ɛlabɩ lakasɩ kɩdɛkɛdɩsɩ sakɩyɛ se ɛɖʋnɩ ɖɩwɩzɩyɛ Izrayɛɛlɩ tɛ Ɛsɔ Yehowa nɛ pɩkpaɖɩ Izrayɛɛlɩ awiya wena payɩ aatɔɔ kewiyitu pʋcɔ nɛ pɩtalɩɣnɩ-ɩ yɔ.
34 Ahaabɩ kewiyitu tɔɔʋ alɩwaatʋ taa, Betɛɛlɩ tʋ Hiyɛɛlɩ ɖaɣnɩ maʋ Yeriikoo. Ɛ-kajalaɣ pɩɣa Abiram sɩba, alɩwaatʋ ndʋ ɛsɩɣaɣ ki-tigiɖe yɔ, nɛ ɛ-tɩnʋʋ Seguubu sɩ alɩwaatʋ ndʋ ɛɖʋwaɣ kɩ-pɔɔyɩŋ yɔ, ɛzɩ Yehowa kaatɩŋnʋʋ Nuuni pɩyalʋ Yozuwee yɔɔ nɛ ɛyɔɔdɩ yɔ.+
Pɩ-tɛɛ tɔm
^ Piye piye, «pahɩzɩ Baasa ɛ-cɔzɔnaa cɔlɔ.»
^ Yaa «ɛ-calɩm kɩmɩyɛ kpayaa.»
^ Piye piye, «weyi ɛhɩɣ hɩm koloŋa yɔɔ yɔ.» Pɩkɛ Ebree tɔm ndʋ pɔyɔɔdʋʋ se peni abalaa yɔ.
^ Yaa «maalika.»
^ Cɔnɩ Tɔm pee sɔsɔna tɔbʋʋ lɩzʋʋ (Tilimiye).
^ Talaŋ kʋɖʋmʋʋ maɣnɩ ɛzɩ kilonaa 34 mbʋ yɔ (kilonaa 34,2). Cɔnɩ Tɔm kɩsɔzɩtʋ B14.
^ Pʋ-tɔbʋʋ se «Semɛɛrɩ cejewiye pʋyʋ.»
^ Piye piye, «kɩ-kɩbaɣlʋ.»
^ Piye piye, «pahɩzɩ Omirii ɛ-cɔzɔnaa cɔlɔ.»
^ Yaa «templo.»
^ Cɔnɩ Tɔm pee sɔsɔna tɔbʋʋ lɩzʋʋ.
