Awiya takayaɣ kajalaɣ ñɩŋga 4:1-34
4 Wiyaʋ Salomɔɔ tɔɔ kewiyitu Izrayɛɛlɩ kpeekpe yɔɔ.+
2 Ɛ-kaɖɩsɩ sɔsɔsɩ* yɔ: Sadɔɔkɩ+ pɩyalʋ Azariya kaakɛ cɔjɔ;
3 Sisa pɩyalaa Eliyorɛɛfʋ nɛ Ahiya paakɛ takayɩsɩ taa mayaa;+ Ahiluudɩ pɩyalʋ Yozafaatɩ+ kaakɛ tɔm ndʋ tɩlakɩ yɔ tɩ-mayʋ;
4 Yehoyiyada pɩyalʋ Benayaa+ kaakɛ sɔɔjanaa ñʋʋdʋ; Sadɔɔkɩ nɛ Abiyaataarɩ+ paakɛ cɔjɔnaa;
5 Naataanɩ+ pɩyalʋ Azariya kaakɛ tʋma yɔɔ cɔnɩyaa ñʋʋdʋ; Naataanɩ pɩyalʋ Zabudi kaakɛ cɔjɔ nɛ ɛtɛ ɛkɛ wiyaʋ taabalʋ;+
6 Ahisarɩ kaakɛ weyi ɛcɔŋnɩ ɖɩɣa taa mba yɔɔ yɔ; nɛ Abɩda pɩyalʋ Adoniram+ kaakɛ mba paɖʋwaɣ-wɛ kɩjɛyʋʋ tʋma yɔ, pɔ-yɔɔ cɔnɩyʋ.+
7 Salomɔɔ kaawɛnɩ tʋma yɔɔ cɔnɩyaa 12 Izrayɛɛlɩ kpeekpe taa nɛ pɔkɔŋnɩ wiyaʋ nɛ ɛ-ɖɩɣa taa mba tɔɔnaɣ. Pa-taa paa weyi kɔŋnaɣ tɔɔnaɣ fenaɣ kʋɖʋmaɣ pɩnaɣ taa.+
8 Pa-hɩla yɔ: Huuri pɩyalʋ, ɛcɔŋnaɣ Efrayim pʋŋ egeetiye yɔɔ;
9 Deekɛɛrɩ pɩyalʋ, ɛcɔŋnaɣ Makazɩ, Saalibim,+ Bɛtɩ-Semɛɛsɩ nɛ Elɔɔnɩ-Bɛtɩ-Hanaanɩ yɔɔ;
10 Hesɛɛdɩ pɩyalʋ, ɛcɔŋnaɣ Arubɔtɩ yɔɔ (ɛcɔŋnaɣ Soko nɛ Hefɛɛrɩ egeetiye tɩŋa yɔɔ);
11 Abinadaabɩ pɩyalʋ, ɛcɔŋnaɣ Dɔɔr piyisi egeetiye yɔɔ (ɛɛkpaɣ Salomɔɔ pɛlɛ Tafatɩ nɛ ɛkɛ ɛ-halʋ);
12 Ahiluudɩ pɩyalʋ Baana, ɛcɔŋnaɣ Taanakɩ, Megido,+ nɛ Bɛtɩ-Seyanɩ+ kpeekpe yɔɔ, ŋgʋ kɩwɛ Zarɩtaanɩ cɔlɔ Yizreyɛɛlɩ tɛɛ yɔ, kpaɣnɩ Bɛtɩ-Seyanɩ nɛ piwolo Abɛl-Mehola nɛ pɩɖɛɛ piwolo Yokmeyam+ egeetiye taa;
13 Gebɛɛrɩ pɩyalʋ, ɛcɔŋnaɣ Ramɔɔtɩ-Galaadɩ+ yɔɔ (ɛcɔŋnaɣ Manaasee pɩyalʋ Yayiirɩ+ kizinzikiŋ tɛtʋ ndʋ tɩwɛ Galaadɩ+ yɔ tɩ-yɔɔ; ɛcɔŋnaɣ ɖɔɖɔ Arɩgob egeetiye+ nɖɩ ɖɩwɛ Basaanɩ+ yɔ ɖɩ-yɔɔ: Tɛtʋ sɔsɔtʋ 60 ndʋ tɩwɛnɩ kolonzi nɛ ñɩɣyʋʋ kɩsɛɛmʋʋ ñɩɣtʋ nɔnɔsɩ yɔ);
14 Ido pɩyalʋ Ahinadaabɩ, ɛcɔŋnaɣ Mahanayim+ yɔɔ;
15 Ahimaazɩ, ɛcɔŋnaɣ Naftalii yɔɔ (ɛɛkpaɣ Basɩmaatɩ, Salomɔɔ pɛlɛ lɛlʋ nɛ ɛpɩsɩ-ɩ ɛ-halʋ);
16 Usaayii pɩyalʋ Baana, ɛcɔŋnaɣ Asɛɛrɩ nɛ Beyalɔɔtɩ pɔ-yɔɔ;
17 Paruwa pɩyalʋ Yozafaatɩ, ɛcɔŋnaɣ Isakaarɩ yɔɔ;
18 Ela pɩyalʋ Simeyii,+ ɛcɔŋnaɣ Bɛnjamɛɛ+ yɔɔ;
19 Uri pɩyalʋ Gebɛɛrɩ, ɛcɔŋnaɣ Galaadɩ+ egeetiye yɔɔ, Amoori mba wiyaʋ Sihɔɔnɩ+ egeetiye nɛ Basaanɩ wiyaʋ Oogi+ egeetiye yɔɔ. Tʋmɩyɛ yɔɔ cɔnɩyʋ nɔɔyʋ kaawɛɛ ɖɔɖɔ nɛ ɛcɔŋnɩ tʋma yɔɔ cɔnɩyaa panɛ pa-tɩŋa pɔ-yɔɔ ɛjaɖɛ taa.
20 Yuuda nɛ Izrayɛɛlɩ taa ɛyaa kaaɖɔ siŋŋ ɛzɩ teŋgu nɔɔ kañɩŋa pee yɔ;+ pɔtɔkaɣ nɛ pɔñɔʋ nɛ pɛmɛyɩɣ amɛya.+
21 Salomɔɔ tɔɔ kewiyitu kewiyisi kpeekpe yɔɔ, kpaɣnɩ Pɔɔ*+ nɛ piwolo Filistii mba ɛjaɖɛ nɛ pɩɖɛɛ piwolo Ejipiti kamaɣ yɔɔ. Powokaɣni Salomɔɔ lambuu nɛ paɖʋʋ-ɩ lɩm e-wezuu kɩyakɩŋ kpeekpe.+
22 Paa kɩyakʋ ŋgʋ lɛ, Salomɔɔ tɔɔnaɣ kaakɛ mʋlʋm mbʋ pɩkpɩzɩ camɩyɛ yɔ kɔɔrwaa* 30 nɛ mʋlʋm yem kɔɔrwaa 60,
23 naŋ 10 weyi ɩɖʋ num yɔ, ñɩtʋ ɖɩdɔɔyɛ taa naŋ 20, nɛ heŋ 100, pɩtasɩnɩ cɩyɩŋ* nɩɩyɩ, nɛnzɛŋ, lakʋ taa pʋŋ, nɛ sumasɩ num ñɩnzɩ nzɩ payaɣ se kuukunaa yɔ.
24 Mbʋ pʋyɔɔ yɔ ɛɛwɛnɩ ɖoŋ pɩtɩŋa pɩ-yɔɔ Pɔɔ hɔɔlʋʋ kʋnɛ kɩ-yɔɔ,*+ kpaɣnɩ Tifɩsa nɛ piwolo Gaazaa,+ pɩkpɛndɩnɩ awiya wena payɩ awɛ Pɔɔ hɔɔlʋʋ kʋnɛ kɩ-yɔɔ yɔ; nɛ laŋhɛzɩyɛ kaawɛ paa egeetiye nɖɩ lɛ ɖɩ-taa nɛ pɩcɔɔ-ɩ nɛ pɩta.+
25 Yuuda nɛ Izrayɛɛlɩ paawɛ pɛɛyɛ taa, paa weyi ɛɛwɛ ɛ-maɣmaɣ e-viiñi tɛɛ nɛ ɛ-maɣmaɣ e-fiigi tɩʋ tɛɛ, kpaɣnɩ Daanɩ nɛ piwolo Beyɛɛrɩ-Seeba, Salomɔɔ alɩwaatʋ kpeekpe taa.
26 Nɛ Salomɔɔ kaawɛnɩ kpaŋnaŋ kalakɩŋ 4 000* nɛ pasɩɣ ɩ-taa ɛ-kɛɛkɛɛnaa nɛ kpaŋnaŋ* 12 000.+
27 Tʋma yɔɔ cɔnɩyaa mba, pɔkɔŋnaɣ tɔɔnaɣ Wiyaʋ Salomɔɔ nɛ mba payɩ pɔtɔkaɣ tɔɔnaɣ Wiyaʋ Salomɔɔ taabɩlɩ yɔɔ yɔ. Paa weyi lɛ, ɛlakaɣ tʋmɩyɛ e-fenaɣ taa nɛ ɛñakaɣ pana se nabʋyʋ ɛtaatɛɖɩ.+
28 Powokaɣni ɖɔɖɔ orjɩ* nɛ ñɩtʋ ɖenɖe payɩ pɩpɔzaɣ se powoni-tʋ kpaŋnaŋ nɛ kpaŋnaŋ tindima yɔ; paa weyi lɛ, paapɛlɩ-ɩ orjɩ nɛ ñɩtʋ ɖɔʋ mbʋ pɩwɛɛ se ewona yɔ.
29 Nɛ Ɛsɔ ha Salomɔɔ lɔŋsɩnɖɛ nɛ tɔm taa nɩʋ lɛɣtʋ nɛ pɩɖɔɔ siŋŋ, nɛ ɛha-ɩ ɖɔɖɔ laŋɩyɛ nɖɩ ɖɩwɛnɩ lɛɣtʋ* sakɩyɛ ɛzɩ teŋgu nɔɔ kañɩŋa yɔ.+
30 Salomɔɔ lɔŋsɩnɖɛ kaacɛzɩ Wɩsɩ Ðɩlɩyɛ taa mba kpeekpe lɔŋsɩnɖɛ nɛ Ejipiti lɔŋsɩnɖɛ kpeekpe.+
31 Ɛɛwɛnɩ lɔŋsɩnɖɛ nɛ pɩkpaɖɩ paa ɛyʋ weyi, ɛɛwɛnɩ lɔŋsɩnɖɛ nɛ pɩkpaɖɩ Ezra tʋ Etaanɩ+ nɛ Hemaanɩ,+ nɛ Mahɔɔlɩ pɩyalaa Kalɩkɔɔlɩ+ nɛ Dara; ɛ-hɩɖɛ kaasɛwa nɛ pɩyɛlɩ nɛ pɩtalɩ ajɛɛ wena payɩ aacɔ peeɖe nɛ ata yɔ a-taa.+
32 Etuu* aduwa 3 000+ nɛ e-hendu+ kpɛndɩ 1 005.
33 Ɛyɔɔdaɣ tɩŋ tɔm, kpaɣnɩ sɛɛdrɩ ŋgʋ kɩwɛ Libaŋ yɔ nɛ piwolo izɔɔpʋ+ ŋgʋ kɩñɔʋ koloŋa yɔɔ yɔ. Ɛyɔɔdaɣ kpɩna tɔm,+ sumasɩ* tɔm,+ kpɩna wena atuu tataa yɔ* a-tɔm,+ nɛ kpakpasɩ tɔm.
34 Ɛyaa lɩɣaɣnɩ ajɛɛ kpeekpe taa nɛ pɔkɔŋ se panɩɩ Salomɔɔ lɔŋsɩnɖɛ, pɩkpɛndɩnɩ tɛtʋ kpeekpe yɔɔ awiya wena anɩ ɛ-lɔŋsɩnɖɛ tɔm yɔ.+
Pɩ-tɛɛ tɔm
^ Yaa «Ɛ-awumbiya.»
^ Pʋ-tɔbʋʋ se Efraatɩ.
^ Kɔɔr kʋɖʋmʋʋ tɔkaɣ litrinaa 220. Cɔnɩ Tɔm kɩsɔzɩtʋ B14.
^ Cɩyɩŋ kɛ namɩŋ weyi ɩwɛnɩ hɩŋ ñɔɔɔ yɔ.
^ Pʋ-tɔbʋʋ se Efraatɩ wɩsɩ ɖɩɖʋyɛ hɔɔlʋʋ yɔɔ.
^ Caanaʋ taa takayɩsɩ nasɩyɩ taa nɛ 2 Kroniiki 9:25 taa lɛ, pɔyɔɔdaa se 4 000. Caanaʋ taa takayɩsɩ lɛɛsɩ ñɔyɔɔdʋʋ se 40 000.
^ Yaa «kpaŋnaŋ yɔɔ caɣyaa.»
^ Orjɩ kɛ tɔɔnaɣ pee naayɛ.
^ Yaa «laŋɩyɛ nɖɩ ɖɩwɛnɩ tɔm taa nɩʋ lɛɣtʋ.»
^ Yaa «Ɛma.»
^ Yaa «kpɩna wena akʋyʋʋ ɛsɔdaa yɔ.»
^ Pɩpɩzɩɣ pɩkɛ ɖɔɖɔ tɛtɛ ñɩtʋ nɛ nakaŋ nɛ kpɩna wena anɩɣzɩnɩ mbʋ yɔ.
