Awiya takayaɣ kajalaɣ ñɩŋga 5:1-18
5 Tiirɩ+ wiyaʋ Hiram nɩwa se pata Salomɔɔ num nɛ ɛpɩsɩ wiyaʋ ɛ-caa lone taa lɛ, etiyi ɛ-lɩmɖʋyaa Salomɔɔ cɔlɔ, mbʋ pʋyɔɔ yɔ Hiram kaakɛ Daviid taabalʋ paa ɛzɩmtaa.*+
2 Ðɩnɛ ɛlɛ Salomɔɔ ɖɔɖɔ tiyi se peheyi Hiram se:+
3 «Ŋsɩm camɩyɛ se man-caa Daviid taapɩzɩɣ se ɛma ɖɩɣa ŋga keyeki nɛ ɛ-Ɛsɔ Yehowa hɩɖɛ sɛɛ yɔ,* mbʋ pʋyɔɔ yɔ paayoni-i hɔɔlɩŋ tɩŋa taa pɩkɔɔ pɩtalɩ alɩwaatʋ ndʋ Yehowa sɩ e-koyindinaa ɛ-nɩŋgbanzɩ tɛɛ yɔ.+
4 Ɛlɛ lɛɛlɛɛyɔ lɛ, mɛ-Ɛsɔ Yehowa ha-m hɛzʋʋ hɔɔlɩŋ tɩŋa taa.+ Nɔɔyʋ fɛyɩ nɛ ɛkaɖɩɣnɩ-m nɛ kɩdɛkɛdɩm nabʋyʋ ɛɛlakɩ.+
5 Pʋyɔɔ manɖʋ man-taa se mamaɣ ɖɩɣa ŋga keyeki nɛ mɛ-Ɛsɔ Yehowa hɩɖɛ sɛɛ yɔ,* ɛzɩ Yehowa kaaheyuu man-caa Daviid yɔ. Eeheyi-i se: “Ña-pɩyalʋ weyi mankaɣ sɩʋ ñe-kewiyaɣ kpelaɣ yɔɔ ño-lone taa yɔ, ɛnʋ kaɣnɩ maʋ ɖɩɣa ŋga keyeki nɛ ma-hɩɖɛ sɛɛ yɔ.”*+
6 Lɛɛlɛɛyɔ lɛ, ɖʋ ñɛ-ɛyaa paɣtʋ se pɛsɛtɩ-m Libaŋ sɛɛdrɩ tɩŋ.+ Ma-lɩmɖʋyaa nɛ ña-lɩmɖʋyaa pakaɣnɩ labʋ tʋmɩyɛ, nɛ mankaɣ hɛyʋʋ ña-lɩmɖʋyaa mbʋ ŋpɛlɩɣ se mɛhɛyɩ yɔ, mbʋ pʋyɔɔ yɔ ŋsɩm mbʋ se ɖa-taa nɔɔyʋ ɛɛsɩŋ tɩŋ sɛtʋʋ ɛzɩ Siidɔɔ mba yɔ.»+
7 Hiram nɩ Salomɔɔ tɔm ndʋ lɛ, ɛ-taa la leleŋ siŋŋ nɛ ɛyɔɔdɩ se: «Pasa Yehowa sɔnɔ, mbʋ pʋyɔɔ yɔ ɛha pɩyalʋ lɔŋsɩnɖʋ nɔɔyʋ Daviid se eɖiyi samaɣ sɔsɔɔ* kanɛ!»+
8 Nɛ Hiram tiyi se peheyi Salomɔɔ se: «Manɩ tɔm ndʋ ŋtiyaa se peheyi-m yɔ. Mankaɣ yebu nɛ petiyini-ŋ sɛɛdrɩ nɛ jenevriyee ɖasɩ ɛzɩ ŋsɔɔlʋʋ yɔ.+
9 Ma-lɩmɖʋyaa kaɣ-sɩ kpaɣʋ nɛ Libaŋ nɛ petini-sɩ teŋgu nɔɔ, nɛ mankaɣ-sɩ hɔkʋʋ hɔɔ hɔɔ nɛ meyele nɛ patɩŋnɩ teŋgu yɔɔ nɛ petiyini-sɩ nɛ pɩtalɩ lone nɖɩ ɖɩ-taa ŋwɩlɩɣ-m yɔ. Mankaɣ yebu nɛ pɛhɛɖɩ-sɩ peeɖe, nɛ ŋpɩzɩɣ nɛ ŋkpaɣ-sɩ nɛ ŋɖɛna. Pi-lone taa lɛ, ŋkaɣ haʋ man-ɖɩɣa taa mba tɔɔnaɣ ŋga mɔnpɔzʋʋ-ŋ yɔ.»+
10 Peeɖe Hiram ñɩnɩ sɛɛdrɩ nɛ jenevriyee ɖasɩ nzɩ payɩ Salomɔɔ liu kaawɛɛ yɔ nɛ etiyini-i.
11 Nɛ Salomɔɔ ha Hiram blee kɔɔrwaa* 20 000 nɛ pɩkɛ ɛ-ɖɩɣa taa mba tɔɔnaɣ, nɛ Oliivi num kɩbam* kɔɔrwaa 20. Mbʋ Salomɔɔ haɣaɣ Hiram paa pɩnaɣ ŋga.+
12 Nɛ Yehowa ha Salomɔɔ lɔŋsɩnɖɛ ɛzɩ eeheyuu-i yɔ.+ Nɛ laŋhɛzɩyɛ kaawɛ Hiram nɛ Salomɔɔ pɛ-hɛkʋ taa, nɛ pa-naalɛ paɖʋ ɛgbɛyɛ.
13 Wiyaʋ Salomɔɔ ɖʋ ɛyaa kɩjɛyʋʋ tʋma Izrayɛɛlɩ kpeekpe taa; ɛyaa 30 000 paaɖʋ kɩjɛyʋʋ tʋma.+
14 Etiyaɣ pa-taa ɛyaa 10 000 paa fenaɣ ŋga Libaŋ. Pacakaɣ Libaŋ fenaɣ kʋɖʋmaɣ nɛ pacakɩ pa-ɖɩsɩ taa fenasɩ 2. Nɛ Adoniram+ cɔŋnaɣnɩ mba paɖʋwaɣ-wɛ kɩjɛyʋʋ tʋma yɔ pɔ-yɔɔ.
15 Salomɔɔ kaawɛnɩ wondu sɩɣlɩyaa* 70 000 nɛ pɛɛ saɣyaa+ 80 000 pʋŋ taa,+
16 pɩtasɩnɩ Salomɔɔ tʋma yɔɔ cɔnɩyaa tɛɛ mba+ 3 300 mba paalɩzaa se pɔcɔnɩ tʋmlaɖaa yɔɔ yɔ.
17 Wiyaʋ ha nɔɔ lɛ, pohuyi pɛɛ sɔsɔna, pɛɛ wena awɛ liidiye yɔ,+ nɛ pasaɣ-yɛ+ se pasɩɩnɩ ɖɩɣa tigiɖe.+
18 Nɛ Salomɔɔ ɛyaa nɛ Hiram ɛyaa nɛ Gebal mba+ pasaɣ pɛɛ, nɛ pɔñɔɔzɩ ɖasɩ nɛ pɛɛ se pamanɩ ɖɩɣa.
Pɩ-tɛɛ tɔm
^ Yaa «kaasɔɔlɩ Daviid paa ɛzɩmtaa.»
^ Piye piye, «se ɛma ɛ-Ɛsɔ Yehowa hɩɖɛ ɖɩɣa.»
^ Piye piye, «mamaɣ mɛ-Ɛsɔ Yehowa hɩɖɛ ɖɩɣa.»
^ Piye piye, «kaɣnɩ maʋ ma-hɩɖɛ ɖɩɣa.»
^ Yaa «samaɣ sakɩyɛ.»
^ Kɔɔr kʋɖʋmʋʋ tɔkaɣ litrinaa 220. Cɔnɩ Tɔm kɩsɔzɩtʋ B14.
^ Piye piye, «mbʋ pɔsɔbɩ oliivi kɩsɔbʋ nɛ palɩzɩ-pʋ yɔ.»
^ Yaa «kaawɛnɩ tʋmlaɖaa mba patɩfalɩsɩ-wɛ hɔɔlʋʋ nakʋyʋ taa yɔ.»
