Awiya takayaɣ kajalaɣ ñɩŋga 6:1-38
6 Izrayɛɛlɩ mba* lɩ Ejipiti ɛjaɖɛ taa+ nɛ pɩtalɩ pɩnaɣ 480 ñɩŋga taa lɛ Salomɔɔ paɣzɩ Yehowa* ɖɩɣa maʋ. Ɛpɩsɩ wiyaʋ Izrayɛɛlɩ taa nɛ pɩtalɩ pɩnaɣ 4 ñɩŋga taa lɛ ɛpaɣzɩ-kɛ maʋ, Ziiv* fenaɣ taa+ (pʋ-tɔbʋʋ se fenaɣ 2 ñɩŋga taa).+
2 Ðɩɣa ŋga Wiyaʋ Salomɔɔ ma Yehowa yɔ, ka-ɖaɣlɩkɩŋ kaakɛ nuŋgolonzi* 60, ka-walanzɩ nuŋgolonzi 20, nɛ ka-kʋkʋyɩŋ nuŋgolonzi 30.+
3 Templo* ɛsɩndaa kʋjɔŋ+ ɖaɣlɩkɩŋ* kaakɛ nuŋgolonzi 20, ɛzɩ ɖɩɣa walanzɩ yɔ.* Ki-limaŋ kaakɛ nuŋgolonzi 10, kpaɣnɩ ɖɩɣa ɛsɩndaa.
4 Ɛlabɩ mondoɖebɔŋ weyi ɩkpɩyɩsɩɣ yɔ+ ɖɩɣa yɔɔ.
5 Pɩtasɩ lɛ, ɛma hʋyʋʋ yɔɔ kuduyuu nakʋyʋ nɛ kɩmalɩnɩ ɖɩɣa koloŋa; kɩcɔ ɖɩɣa kolonzi nɛ kɩta, templo* nɛ ɖooo pɩ-taa kuduyuu+ kolonzi, nɛ ɛla hʋyɩŋ yɔɔ ɖamɩŋ nɛ pɩcɔɔ pɩta.+
6 Pɩ-tɛɛ ɖamɩŋ walanzɩ kɛ nuŋgolonzi 5, hɛkʋ taa ñɩŋ walanzɩ kɛ nuŋgolonzi 6, nɛ tozo ñɩŋ walanzɩ ñɛkɛ nuŋgolonzi 7, mbʋ pʋyɔɔ yɔ ɛlabɩ tendemee nɛ pɩcɔɔ ɖɩɣa ŋga nɛ pɩta, nɛ pʋyɔɔ lɛ, patɩsʋzɩ ɖasɩ ɖɩɣa kolonzi taa.+
7 Pama ɖɩɣa ŋga nɛ pɛɛ wena pohuyi-yɛ nɛ pɛtɛm-yɛ ñɔɔzʋʋ nɛ pasɩɩ yɔ,+ nɛ pʋyɔɔ lɛ, pamaɣaɣ-kɛ lɛ, patɩnɩɩ hamanaa yaa laɖa yaa ñɩɣtʋ wondu natʋyʋ taŋ.
8 Hʋyʋʋ yɔɔ kuduyuu tɛ pɩ-tɛɛ ɖamɩŋ nɔnɔɔ kaawɛnɩ ɖɩɣa hɔɔlʋʋ hadɛ* ñɩŋgʋ yɔɔ,+ nɛ pama tendemee wena patɩŋɩɣnɩ a-yɔɔ nɛ pakpaɣ hɛkʋ taa ɖamɩŋ taa yɔ, nɛ wena patɩŋɩɣnɩ a-yɔɔ kpaɣnɩ peeɖe nɛ pakpaɣ tozo ñɩŋ taa yɔ.
9 Ewobi ɖɩɣa ŋga ka-maʋ yɔɔ nɛ ɛkɔɔ ɛtɛm-kɛ,+ nɛ ɛlɔ ɖɩɣa ŋga nɛ sɛɛdrɩ ɖasɩ nɛ sɛɛdrɩ kpoŋgbolonaa canzɩ.+
10 Ɛma hʋyɩŋ yɔɔ ɖamɩŋ nɛ pɩcɔɔ ɖɩɣa nɛ pɩta,+ paa ŋgʋ lɛ kɩ-kʋkʋyɩŋ kɛ nuŋgolonzi 5, nɛ pakpaɣ sɛɛdrɩ kpoŋgbolonaa nɛ patamnɩ-ɩ nɛ ɖɩɣa.
11 Alɩwaatʋ ndʋ lɛ, Yehowa tɔm talɩ Salomɔɔ se:
12 «Ðɩɣa ŋga ŋɖiɣni maʋ yɔ kɔ-tɔm taa lɛ, ye ŋɖɔŋ man-kpalɩtʋ yɔɔ nɛ ŋlakɩ ɛzɩ mɔn-tɔm hʋʋ pɔzʋʋ yɔ nɛ ŋñaŋ man-paɣtʋ kpeekpe yɔ,+ pʋbʋ lɛ mankaɣ yebu ɖɔɖɔ nɛ lidaʋ tɔm ndʋ maaheyi ña-caa Daviid yɔ tɩla ñɔ-yɔɔ,+
13 nɛ mankaɣ wɛʋ Izrayɛɛlɩ mba hɛkʋ taa,+ nɛ maakaɣ man-samaɣ Izrayɛɛlɩ lɔʋ.»+
14 Salomɔɔ wolo pɩ-yɔɔ nɛ ɛma ɖɩɣa ŋga nɛ ɛtɛm-kɛ.
15 Ɛkpaɣ sɛɛdrɩ kpoŋgbolonaa nɛ ɛɖʋ* ɖɩɣa tɛ pɩ-taa kolonzi yɔɔ. Ɛkpaɣ kpoŋgbolonaa nɛ ɛpɔ pɩ-taa kolonzi nzɩ sɩ-yɔɔ, kpaɣnɩ tataa nɛ pɩkpa plafɔŋ ɖasɩ, nɛ ɛkpaɣ jenevriyee tɩʋ kpoŋgbolonaa nɛ ɛpɔ tataa ɖɩɣa ŋga ka-taa.+
16 Nɛ ɛkpaɣ sɛɛdrɩ kpoŋgbolonaa nɛ ɛtayɩnɩ ɖɩɣa ŋga ka-taa nɛ wayɩ kiŋ, nuŋgolonzi 20, kpaɣnɩ tataa nɛ piwolo pɩtalɩ lɔbʋtʋ ɖasɩ, nɛ ɛma ka-taa* ɖooo pɩ-taa kuduyuu,+ Lone Kiɖeɖeye nɖɩ ɖɩkpaɖaa yɔ.+
17 Nɛ templo,*+ pʋ-tɔbʋʋ se hɔɔlʋʋ ŋgʋ kɩwɛ ɖɩɣa ɛsɩndaa yɔ, kɩɩkɛ nuŋgolonzi 40.
18 Sɛɛdrɩ kpoŋgbolonaa mba pɔpɔ ɖɩɣa nɛ pɩ-taa kiŋ yɔ, pasaɣ pɔ-yɔɔ kɩlɛmɩŋ weyi ɩwɛ ɛzɩ kamɩyɛ yɔ+ nɛ hɛtʋ ndʋ tɩyawa yɔ.+ Sɛɛdrɩ kpoŋgbolonaa paalabɩnɩ ka-tɩŋa; pɩtaanaɣ pɩyɛ naɖɩyɛ.
19 Nɛ ɛñɔɔzɩ ɖooo pɩ-taa kuduyuu+ ŋgʋ kɩwɛ ɖɩɣa taa yɔ se pasɩɩ Yehowa ɛgbɛyɛ ɖʋʋ aɖakaɣ+ peeɖe.
20 Ðooo pɩ-taa kuduyuu ŋgʋ, kɩ-ɖaɣlɩkɩŋ kaakɛ nuŋgolonzi 20, kɩ-walanzɩ nuŋgolonzi 20, nɛ kɩ-kʋkʋyɩŋ nuŋgolonzi 20;+ nɛ ɛpɔ kɩ-yɔɔ sika kele kele ñɩŋga; ɛkpaɣ sɛɛdrɩ kpoŋgbolonaa nɛ ɛpɔ altaaru+ yɔɔ.
21 Salomɔɔ kpaɣ sika kele kele ñɩŋga nɛ ɛpɔ ɖɩɣa nɛ pɩ-taa kiŋ,+ nɛ eposi sika kpasɩ ɖooo pɩ-taa kuduyuu+ ɛsɩndaa, ŋgʋ ɛɛpɔ sika kɩ-yɔɔ yɔ.
22 Ɛpɔ sika ɖɩɣa tɩŋa yɔɔ; ɛpɔ ɖɔɖɔ altaaru tɩŋa yɔɔ sika,+ ɖooo pɩ-taa kuduyuu cɔlɔ.
23 Ɛkpaɣ num tɩʋ* ɖasɩ nɛ ɛlɩzɩnɩ kerebimwaa+ 2 ɖooo pɩ-taa kuduyuu taa; pa-taa paa weyi lɛ, ɛ-kʋkʋyɩŋ kaakɛ nuŋgolonzi 10.+
24 Kerebim keluu kʋɖʋmʋʋ kaakɛ nuŋgolonzi 5, nɛ keluu lɛɛkʋ nuŋgolonzi 5. Kpaɣnɩ keluu kʋɖʋmʋʋ nɔɔ nɛ piwolo lɛɛkʋ nɔɔ lɛ, pɩɩkɛ nuŋgolonzi 10.
25 Kerebim 2 ñɩnʋ ɖɔɖɔ kaakɛ nuŋgolonzi 10. Kerebimwaa mba pa-naalɛ pa-paɣlɩka nɛ pɛ-wɛtʋ kaawɛ kɩmaŋ.
26 Kerebim kʋɖʋm kʋkʋyɩŋ kaakɛ nuŋgolonzi 10, nɛ kerebim lɛlʋ ɖɔɖɔ mbʋ.
27 Nɛ ɛkpaɣ kerebimwaa+ mba nɛ ɛsɩɩ pɩ-taa ɖɩɣa taa.* Kerebimwaa mba, poposi pe-keŋ nɛ piyele nɛ kerebim kʋɖʋm keluu talɩ koloŋa kʋɖʋmaɣ cɔlɔ nɛ kerebim lɛlʋ keluu talɩ koloŋa lɛɛka cɔlɔ, nɛ pe-keŋ weyi iposini ɖɩɣa hɛkʋ taa kiŋ yɔ, ɩ-nɔsɩ tukuni ɖama.
28 Nɛ ɛkpaɣ sika nɛ ɛpɔ kerebimwaa mba pɔ-yɔɔ.
29 Nɛ ɛlɩzɩ kerebimwaa kɩlɛmɩŋ,+ paŋ kɩlɛmɩŋ,+ nɛ hɛtʋ ndʋ tɩyawa yɔ+ tɩ-kɩlɛmɩŋ ɖɩɣa kolonzi tɩŋa yɔɔ, Lone Kiɖeɖeye nɖɩ ɖɩkpaɖaa yɔ nɛ Lone Kiɖeɖeye kuduyuŋ* yɔɔ nɛ pɩcɔɔ nɛ pɩta.
30 Ɛkpaɣ sika nɛ ɛpɔ Lone Kiɖeɖeye nɖɩ ɖɩkpaɖaa yɔ nɛ Lone Kiɖeɖeye kuduyuŋ tɛɛ tataa.
31 Nɛ ɛkpaɣ num tɩʋ* ɖasɩ nɛ ɛlabɩnɩ ɖooo pɩ-taa kuduyuu nɔnɔɔ pɔɔyɩŋ, hɔɔlɩŋ yɔɔ tilima, nɔnɔɔ tilima, pɩkɛ hɔɔlʋʋ 5 ñɩŋgʋ.*
32 Ɛkpaɣ num tɩʋ* ɖasɩ nɛ ɛlabɩnɩ pɔɔyɩŋ ɛnɩ ɩ-naalɛ, nɛ ɛsaɣ ɩ-yɔɔ kerebimwaa, paŋ, hɛtʋ ndʋ tɩyawa yɔ, nɛ ɛpɔ ɩ-yɔɔ sika; nɛ ɛkpaɣ hama nɛ ɛma sika nɛ kataaɖɩnɩ kerebimwaa nɛ paŋ.
33 Piyele nɛ templo* nɔnɔɔ lɛ, mbʋ ɖɔɖɔ ɛkpaɣ num tɩʋ* ɖasɩ nɛ ɛlabɩnɩ nɔnɔɔ ŋga ke-tilima, nɛ pɩkɛ hɔɔlʋʋ 4 ñɩŋgʋ.*
34 Nɛ ɛkpaɣ jenevriyee ɖasɩ nɛ ɛlabɩnɩ pɔɔyɩŋ 2. Pɔɔyʋʋ kʋɖʋmʋʋ tayɩ nabʋlɛ taa nɛ hɔɔlɩŋ ɛnɩ ɩ-naalɛ ɩcɔʋ nɔnɔɔ ɖasɩ taa, nɛ pɔɔyʋʋ lɛɛkʋ tayɩ nabʋlɛ taa nɛ hɔɔlɩŋ ɛnɩ ɩ-naalɛ ɩcɔʋ nɔnɔɔ ɖasɩ taa.+
35 Ɛsaɣ kerebimwaa, paŋ, nɛ hɛtʋ ndʋ tɩyawa yɔ, nɛ ɛkpaɣ sika ɖɔfɩɩ ñɩŋga nɛ ɛpɔ kɩlɛmɩŋ ɛnɩ ɩ-yɔɔ.
36 Ɛlabɩ pɩ-taa kadaɣ+ nɛ pɛɛ wena pasaɣaa yɔ canzɩ 3 nɛ sɛɛdrɩ kpoŋgbolonaa caŋa kʋɖʋmaɣ.+
37 Pɩnaɣ 4 ñɩŋga taa, Ziiv* fenaɣ taa, pasɩ Yehowa ɖɩɣa tigiɖe;+
38 nɛ pɩnaɣ 11 ñɩŋga taa, Bul* fenaɣ taa (pʋ-tɔbʋʋ se fenaɣ 8 ñɩŋga), pɛtɛm ɖɩɣa ŋga maʋ nɛ pala kɔ-hɔɔlɩŋ tɩŋa tete ɛzɩ pɩpɔzʋʋ yɔ nɛ pɩla nɔɔ kʋɖʋmaɣ nɛ ɛzɩma pɩɩwɛɛ se pama-kɛ yɔ.+ Ɛkpaɣ pɩnzɩ 7 nɛ ɛmanɩ-kɛ.
Pɩ-tɛɛ tɔm
^ Cɔnɩ Tɔm kɩsɔzɩtʋ B15.
^ Cɔnɩ Tɔm kɩsɔzɩtʋ B8.
^ Piye piye, «Izrayɛɛlɩ pɩyalaa.»
^ Nuŋgoloŋa kʋɖʋmaɣ kɛ santimɛtawaa 44 nɛ hɔɔlʋʋ (santimɛtawaa 44,5). Cɔnɩ Tɔm kɩsɔzɩtʋ B14.
^ Piye piye, «Ðɩɣa tɛ templo.»
^ Yaa «walanzɩ.»
^ Yaa «nuŋgolonzi 20 ɖɩɣa walanzɩ tɩŋa yɔɔ.»
^ Cɩnɛ lɛ Lone Kiɖeɖeye tɔm pɔyɔɔdʋʋ.
^ Piye piye, «nɩwaŋ.»
^ Piye piye, «ɛma.»
^ Pʋ-tɔbʋʋ se ɖɩɣa taa.
^ Pʋ-tɔbʋʋ se Lone Kiɖeɖeye, nɖɩ ɖɩɩwɛ Lone Kiɖeɖeye nɖɩ ɖɩkpaɖaa yɔ ɖɩ-ɛsɩndaa yɔ.
^ Yaa «pɛɛnɩ tɩʋ.»
^ Pʋ-tɔbʋʋ se Lone Kiɖeɖeye nɖɩ ɖɩkpaɖaa yɔ.
^ Piye piye, «pɩ-taa nɛ pɩ-wayɩ kuduyuŋ.»
^ Yaa «pɛɛnɩ tɩʋ.»
^ Pʋtɔma yɔ, pɩwɩlɩɣ ɛzɩma palabɩ pɔɔyɩŋ hʋyɩŋ yɔɔ kpoŋgbolonaa yɔ, yaa pɔɔyɩŋ paɣlɩka tɔm pɔyɔɔdʋʋ.
^ Yaa «pɛɛnɩ tɩʋ.»
^ Cɩnɛ lɛ Lone Kiɖeɖeye tɔm pɔyɔɔdʋʋ.
^ Yaa «pɛɛnɩ tɩʋ.»
^ Pʋtɔma yɔ, pɩwɩlɩɣ ɛzɩma palabɩ pɔɔyɩŋ hʋyɩŋ yɔɔ kpoŋgbolonaa yɔ, yaa pɔɔyɩŋ paɣlɩka tɔm pɔyɔɔdʋʋ.
^ Cɔnɩ Tɔm kɩsɔzɩtʋ B15.
^ Cɔnɩ Tɔm kɩsɔzɩtʋ B15.
